Prepara Lider Jerasaun Foun; “Xanana Doku Boina Mean FALINTIL Ba La Sama”

Xanana - Lasama

Serimonia desmobilizasaun FALINTIL remata, Eis Komandante Em-Xefi FALINTIL aktual Primeiru Ministru Kay Rala Xanana Gusmão marka istoria ida iha Palacio do Governu, hodi doku boina mean FALINTIL ba Presidenti Parlamentu Nasional Fernando ‘La Sama’ de Araujo.

“Ne’e ba jerasaun foun, nudar istoria,” koalia lider istoriku Timor Leste Kay Rala Xanana Gusmão bainhira doku ninia boina mean FALINTIL ba La Sama hanesan jerasaun foun iha Palacio do Governu, Sabadu (20/8).

Iha jerasaun foun barak ke’e hakbesik ba Xanana Gusmão ne’ebe hatais hela farda FALINTIL hodi hasai foto hamutuk, Xanana Gusmão nunka doku ninia boina mena ba sira nia ulun.

Maibe kuandu, nia (Xanana) alin La Sama mosu iha nia sorin, nia foti kedas boina mean hodi doku ba La Sama nia ulun, hodi hasai foto hamutuk ho nia (Xanana) ne’ebe hatais hela farda FALINTIL.

“Ne’e farda FALINTIL nian, hau hatais dala ikus ona iha hau nia moris maka ida ne’e, ”dehan Xanana Gusmão bainhira doku boina mean FALINTIL ba La Sama.

Xanana Gusmão doku boina mean FALINTIL ba La Sama, nia (Xanana) mos hatudu jempol ba La Sama bainhira tau boina mean FALINTIL ne’e.

“Obrigado maun boot i parabens ba maun boot, ”koalia La Sama ho kontenti bainhira Xanana Gusmão doku boina mean FALINTIL ba nia (La Sama).

Ema hotu ne’ebe hadulas Xanana ho La Sama, sira hotu hakilar ho kontenti katak, La Sama merese duni atu Xanana konsidera hanesan lider Timor Leste nian ba oin.

Hare ba pasadu, Xanana ho La Sama mos iha nia istoria ida ke’e hanesan atu konta ba jerasaun sira tuir mai, tanba bainhira Xanana hetan kaptura husi Tentara Indonesia, lori ba kumarka Cipinan Indonesia, iha ne’eba mos La Sama ema hatama hotu iha kumarka, tanba halo demostrasaun iha Indonesia hodi defende ukun rasik an (das).

Fonte: Jornal Nacional Diario (JND), edisaun segunda-feira (22/08/2011) paj. 11!
Autor: Joao da Silva, Journalista!