VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20110818

“Estado Fragil” no “Fratura Sociologica”: Teoria ka Ideologia?

Hanoin Ruma Husi FORUM MAUBISSE – parte II

“Estado Frágil” no “Fratura Sociológica”: Teoria ka Ideologia?

Martinho G. da Silva Gusmão

Ita rona bebeik liafuan “estado frágil”, “state-building”, “peacebuilding” nst. Tópico ida ne’e mos mosu iha FM-1 no FM-2, maski la hetan debate maka’as. Maibe, too ohin loron la iha justificação husi aspecto epistemologia no teoria social ka teoria política. Hodi dehan ho liafuan seluk, conceito “estado frágil” sai liu hanesan insinuação política no la’os teoria política. Nudar insinuação política, conceito ida ne’e mosu deit iha “relatório” (ONU, Banco Mundial, ka ONG internacional) no pesquisa regional hodi obriga aan atu halo conclusão universal. Tan sa? Ohin loron, mundo internacional hasoru problema boot wainhira Portugal no Grécia husu “bail-out” tan la agoenta ho situação financial no economia. Espanha no Itália tama iha “alarm” emergência. Seidauk hotu, Europa hahu tama oituan iha violência rasial (Inglaterra, Fransa, Áustria, nst). Agora, EUA fuan fekit maka’as atu oinsa mak resolve sira nia tusan be butuk rai loos no husu atu halo retificação atu resolve lalais. Pergunta simples deit: tan sa UE–EUA la tama iha “estado failhado” no “frágil” nia laran, maski iha risku laran?

Atu ita hatene, iha epistemologia (filosofia do conhecimento) dala ruma mosu “fallibilism theory” (Karl R. Popper, Thomas S. Kung, Imre Lakatos, Paul K. Feyerabend), katak, teoria ida bele monu wainhira ita hatudu deit sikun ida ne’ebe falha. Nune’e conceito kona ba “estado failhado” (frágil) ne’e failha rasik tan teoria falibilismo: nia la bele explica no aplica ba Europa no EUA. “Estado failhado” (estado frágil) ne’e bele deit aplika ba situação particular ida, no la iha justificação universal. Tan ne’e hau hanoin, conceito “estado frágil” (ka estado failhado) ne’e la’os teoria maibe pensamento ideológico ka ideologia rasik.

“Estado Failhado”: Internal Colonization of Lifeworld

Husi 1991 (wainhira moro Berlin monu), bele dehan, discurso kona ba ideologia mate ona (“the death of ideology”), tan marxista–komunista naksobu. Maibe, ida ne’e la significa katak “pensamento ideológico” mos mate tuir hotu. Bai-bain, ideologia (tuir Karl Marx) hanesan “crenças falsas” (fiar la loos kona ba buat ida). Iha escola Marxista, ema hanoin katak ideologia nudar “... instrumento de controlo e estava inteiramente condicionada pela estratégia imediata da classe a que servia de suporte. ... uma falsa consciência ou um processo mental ofuscado no qual os homens não compreendem as forças que realmente guiam o seu pensamento, imaginando que está totalmente governado por influências lógicas e intelectuais”. Tan ne’e, ideologia hakarak ka lakohi implica mos Ideologiekritik. Katak, ita la bele fiar nara-naran deit maibe hasoru ho kritik liu husi realidade.

Hau hanoin, conceito “estado frágil” hanesan “pensamento ideológico” ida. Katak, “crenças falsas” ka “falsa consciência” (fiar ba buat ne’ebe la loos no la mos), tan forsa política ‘nasional’ no pensador sira husi (organização) ‘internasional’ hatama idéia ida ne’e hodi sai fali hanesan mata-dalan ba ita tomak nia hanoin. Wainhira matenek sira halo explicação ita hare ba iha duni ninia lógica. Maibe, lógica ne’e “formal” deit. La’os real.

Maibe, ita husu uluk lai, “se mak Estado”? Ita nia Lei-Inang hakerek momos, “Plenamente conscientes da necessidade de se erigir uma cultura democrática e institucional própria de um Estado de Direito onde o respeito pela Constituição, pelas leis e pelas instituições democraticamente eleitas sejam a sua base inquestionável; ...” (Preâmbulo). Atu dehan: Estado harii liu husi eleição. Órgão eleito mak Presidente da Republica no Deputado sira iha Parlamento Nacional. Husi ne’e mak sira harii Governo no Tribunais. Ne’e duni, ita nia Uma Boot Timor Leste iha ai-rin 4: Presidência da Republica, Parlamento Nacional (inclui, oposição), Governo no Tribunais. Liu husi eleição, povo tomak hili sira hodi harii Estado (state-building).

Maibe, wainhira ita husu “tan sa mak estado frágil?” Agora, ita hakfodak ka lae se iha tinan 12 nia laran ho investimento boot husi ONU hamutuk ho doadores internacionais hodi hatama 8 bilhões de dollar americanos, peritos (expert) oi-oin, hamutuk ho assessores internacionais hodi lori ita too deit iha conclusão desesperada ida: Estado Frágil. Ita nia ran la halai tiha kedas wainhira ita hatene katak, expert sira ne’e rasik mak troka malu atu ajuda (wainhira kontratu hotu), ida foun mai halo fali pesquisa foun ninia resultado hanesan deit: estado frágil.

Ita hetan relatório barak husi UNDP, Banco Mundial, UNMIT no agencia internacional seluk tan, maibe hateten bebek “negativo” ka “seidauk bele”. Situação ida ne’e lori ita tama ba “internal colonization of lifeworld” (Konseptu ida ne’e mai husi Max Weber no Jürgen Habermas). Tuir sira nia hare, ita nia mundo da vida nakonu ho “burocratização” ne’ebe halakon tiha ita nia liberdade rasik no la iha sistema ida atu halo mediação. Ninia rasultado, ita tama iha colonização foun nia laran. Katak, “to formally organized domains of action”, hodi hakruk ho laran todan ba prosesu “the monoterization and bureaucratization of labor power and government performance”, (J. Habermas, The Theory of Communicatie Action II: 318–321). Ita hare liafuan rua – “monoterization” no “bureaucratization”: oinsa mak buat hotu-hotu sukat ho osan, maibe liu husi birokrasia ne’ebe naruk. Ida ne’e hamosu “custo” ne’ebe halo osan barak lakon tuir dalan. Maibe, furak ba governo ninia lalaok tan ho ida ne’e sira

Atu hafurak tiha liafuan “internal colonization”, ita rona fali ona frase foun “monitoring the principles for good international engagment in fragile states”. Iha principio lubuk ida (too 10) kona ba oinsa mak ajudo no suporta international ba estado frágil sira. Maibe, ita bele habadak ukun fuan 10 ne’e ba 2 deit – ida uluk kona ba “monoterization and bureuacratization”; no ida seluk kona ba oinsa mak halo ema fiar nafatin kona ba estado frágil atu nune’e bele iha nafatin “international engagement”.

“Fratura Sociológica”: Nation–Building

Maibe, wainhira dehan “estado frágil” nia mos hanesan ho “nação frágil” ka lae? Ita fo exemplo kona ba “ahi mate permanente”. Wainhira iha Díli, ema barak haksesuk malu tan electricidade ne’ebe mate lakan hela deit sei la fo impacto nudar “problema nação” nian. Tan sa? Tan electricidade ne’e problema Díli nian. La’os Baucau. Iha Baucau “ahi moris permanente”. La’os problema “sub-distrito” no “suku” barak – tan, ahi la iha duni. Ita la haksesuk malu kona ba buat ne’ebe la iha! Nune’e, problema mos la iha. Maibe, wainhira política nain sira foti ‘ahi mate permanente’ nudar problema kona ba incapacidade governo AMP, nia sai deit “consumo político” (oposição no media) maibe la’os interesse nacional. Ne’e duni, wainhira ita nia “estado frágil” tan seidauk iha capacidade atu halo lakan ahi ba ema hotu, ita nia sociedade halao moris hanesan baibain. Iha “fratura” entre Estado no Nação.

Problema boot liu mak corrupção ne’ebe hatudu duni “estado frágil”, maibe la halo nação tomak monu. Tan sa? Tan corrupção ne’e mosu iha órgão no instituições estado nian, hamutuk ho grupo emprezarial sira. Impossível atu corrupção mosu iha nível “suku” no “aldeia”, nível “distrito” no “sub-distrito” tan iha ne’e ita hasoru “ausência do estado”. Estado iha deit Díli. Sai husi Díli, Estado la iha ninia representante. Atu halo buat ki’ik ka boot (hanesan pakote referendum, pakote desenvolvimento decentralizado), hein deit atu ministro sira no direitor sira mai husi Díli. Iha neba mak sira prepara plano estratégico no plano ação, forma companhia no grupo emprezarial, maibe tama tiha ona “rede” ho Ministerial hodi nune’e bele fasilita processo “tender”. Buat hirak ne’e hotu atu hatan ba “the monoterization and bureaucratization of labor power and government performance”. Maibe, maski Ministério halo “monitoring of fragile state” – sira rasik la monta “representante” ho autoridade no poder local kona ba execução. Administrador distrito no sub-distrito, chefe de suco no ninia conselho la iha autoridade no poder controladora no fiscalizadora ba projecto. Tan ne’e, sira mos la iha “interesse nacional” atu bele hola responabilidade moral ba processo desenvolvimento. Ne’e duni, sasan tomak lori husi Díli too distrito, suku no aldeia atu ema horon liu deit “dollar” nia iis hodi lori fila ba Díli. Dala ruma político nain sira fo justificação ne’ebe halo moe deit “ami distrital” – katak, descentralização seidauk bele halao tan ita seidauk iha recurso humano iha distrito. Por amor de Deus, dala ruma Ministro no Direitores ka Deputado sira mos ita bele sukat sira nia capacidade: la iha diferencia radikal hanesan lalehan ho rai, ka loron ho kalan. Iha Timor Leste, ema barak iha capacidade hanesan. Diferencia, balun eleito nudar representante nação no povo ho tur iha governo.

Ne’e duni, buat ida ita ko’alia kona ba “estado frágil”, buat seluk ita ko’alia kona ba “fratura sociológica”. Katak, hare husi sociologia (desenvolvimento) nian, Timor Leste nakles hela. Estado frágil ne’e problema estado nian. Maibe, fratura sociológica ne’e problema nação tomak nian. Ministério Finanças halo analiza kona ba “Kronolojia Eventu Bot sira desde Referendu 1999” – husi Konflitu 1999 ba Pos-Konflitu too iha Dezenvolvimentu. Wainhira hau rona explicação husi MF, hau husu bebeik iha laran, “se mak hola responsabilidade ba konflitu hirak ne’e?” Estado ka Nação? Ninia resposta: Estado mak hola responsabilidade, tan sira iha poder (forsa política no economia) no autoridade (tan eleito). Maibe, infelizmente, ita nia estado fiar fali katak “frágil”. Maski, hare husi “monoterization” ita nia condição diak liu Portugal no Grécia, no la iha tusan hanesan EUA ka “negara bangkrut” (estado failhado) hanesan Indonésia ka nação seluk iha África.

Ne’e duni ita iha fratura sociológica iha nível Estado katak, relação ne’ebe nakles hela entre PR, PN (AMP no OMP) no Governo ho Tribunais karik; relação ne’ebe nakles entre Estado no sociedade Timor Leste; no ikus liu, relação ne’ebe seidauk metin iha nível comunitária. Ho fratura ida ne’e, tuir lolos ita labele deit ona ko’alia kona ba “state building”, maibe “nation building” ne’ebe involve componente tomak husi nação nian – povo tomak.

Revitalização Energia: “Right or wrong is my country”

Primeiro Ministro Inglaterra nian, Sir W. Churchill halo apelo radio ba Estado no Nação tomak, katak hasoru invasão Hitler nian hotu-hotu hamrik no fo aan tomak atu defende sira nia rai doben no sira nia destino. Ninia liafuan ne’ebe mosu bebeik mak “right or wrong is my country”. Ida ne’e sai tiha ona hanesan energi espiritual hodi fo forsa boot ba luta armada no luta política interna. PM Chruchill iha ai-tahan ida: fuma la para no hemu tua barak molok ba reunião atu foti decisão, maibe ninia liafuan ne’e sai ona hanesan mantra no lulik, hanesan ‘sunu’ ema nia fuan no aten atu luta maka’as hodi defende Inglaterra husi invasão.

Tebes, Churchill nia liafuan vale ba ita nia luta iha tempo ida – 1975 too 1999 karik. Maibe, liu tiha ida ne’e ita hasoru tragédia humanidade ida katak, sira ne’ebe uluk “right” agora bele “wrong” – hanesan vitima (família vitima) sira, veterano no eis-combatente hamutuk ho Igreja Católica. Katak, ema sira ne’ebe tuba rai metin atu fo liman no fo laran ba malu iha luta nia laran, ohin loron hela iha periferia política. Husi parte seluk, ema ne’ebe uluk “wrong” agora bele “right” fali. Hanesan Deputado David Dias Ximenes husi OMP nia liafuan “sira bele uluk aprende husi Bapa sira no militar indonésio mos ohin loron tama política diak hela deit”. A lias, sira mos sai asuwain combatente hotu. Criticas no debates kona ba “right or wrong” sai tópico ne’ebe sensitivo duni. Buat diak ida, katak, iha FM-1 no FM-2 nia laran, tópico ida ne’e tama ona iha nível “political discourse” no “political opinion”.

Tan ne’e, hanesan Prof. Aurélio Guterres (reitor UNTL) dehan katak, FORUM MAUBISSE hanesan passo ida tan atu halo revitalização da energia: sunu fali ita nia fuan no aten hodi luta atu halo estado no nação metin fali. Husi ne’e mak ita hakat “consolidação” nacional. Tópico ne’ebe sai hanesan acordo mak:


  1. Eleição 2012 tenki absolutamente pacifica;
  2. Processo Eleição ne’ebe “livre e justo” (free and fair) no hatene simu ninia prosesu no nia resultado! Ida ne’e depende ba “vontade popular”, katak, wainhira povu hakarak nia hili, wainhira lakohi nia la hili. Tan ne’e, vontade popular sai hanesan sasukat no kriteria hodi simu resultado eleição.
  3. Husi CNE no STAE hatoo katak nudar órgão eleitoral, instituição 2 ne’e halo ona programa, plano no processo ba eleição nian; husu colaboração husi partido político sira. Basa, wainhira la iha colaboração ne’e sei bele hamosu confusão, conflito no desconfiança, liu-liu halo atakes ba CNE/ STAE tan ignorância. Ikus mai, CNE/STAE mak sai fali bode expiatório (kambing hitam), maski partido rasik mak la iha capabilidade atu manan.
  4. Transformação ba lideransa liu husi preparação ne’ebe diak – sira ne’ebe ‘fuk mutin ona’ hahu acompanha foinsae sira atu hahu estafet liderança foun. Tan ne’e, la’os deit ko’alia maibe prepara instituição hodi halo preparação nian!
  5. Geração emergente husu atu katuas sira hola responsabilidade hodi partilha nafatin sira nia hanoin, matenek, experiência no mehi kona ba oinsa mak uluk sira hahu luta too ohin loron, no fo energia kona ba oinsa mak lori nação ne’e ba oin. Tan ne’e, geração foun husu atu geração kaer processo transição nia talin metin nafatin.
  6. Consenso nacional – “áreas estruturantes da nação”: interesse nacional no riku-soy naturais (mina no gás).
  7. Governo no governacao. Governo katak órgão ida ne’ebe kaer ukun executivo nian. Governacao katak processo halao ukun ne’e rasik. Nune’e, Estado la’o nafatin ba oin wainhira governo bele troka iha tempo ida no tempo seluk.
  8. Asegura ita nia liderança sira. Ita nia “assets” ba liderança oituan deit. Tan ne’e lalika ameasa malu no hatun malu. Ida ne’ebe iha ona, ita usa didiak atu ba diak nação nian.
  9. Hotu-hotu hanoin kona ba unidade nacional, desenvolvimento no estabilidade.

*) Hakerek nain, Direitor CJP Diocese Baucau, Secretario Executivo/ Porta Voz FM

Sem comentários:

Enviar um comentário

Nota: só um membro deste blogue pode publicar um comentário.