VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20110502

La Sama Matan Ben Turu Iha Vaticano

"Timor Leste sempre iha Vaticano nia fuan"

“Joao Paulo Segundu agora beato ona,” deklara Amu Papa Bento XVI ba ema tokon ba tokon nebe nakonu iha Basilica Sao Pedro, Vaticano, Roma, no mos ba mundu tomak nebe akompanha liu hosi televizaun no radio. Ema hotu basa liman naruk hodi haksolok no barak matan ben turu tamba laran dodok. Presidente Parlamento Nacional, Fernando La Sama de Araujo nebe tur besik iha altar (metro ruanulu hosi altar nebe amu papa tur ba) mos basa liman naruk no matan ben turu. Ema hotu haksolok, ema hotu laran dodok. “Hau reza ba beato Joao Paulo II para tulun ita nafatin hanesan uluk, Nia halo ona. Agora hau reza ba beato Joao Paulo II, para domin buras liu tan iha ita nia rain. Ita nia rain, sei han malu, tamba buat domin nee sei kuran,” hatete La Sama ba komunidade madre, padre no Timor oan sira seluk nebe partisipa mos iha serimonia boot no fenomenal tebes nee.

Presidente La Sama nebe hetan fiar estado, Amu bispo sira no sarani Timor Leste hodi partisipa iha serimonia beatifikasaun Amu papa Joao Paulo II nee, hetan konsiderasaun boot hosi Vaticano hodi tur iha oin besik altar ba misa beatifikasaun ida nee. Bainhira too iha fatin serimonia, protokolo Vaticano nian simu hodi dehan: “Agradese ba Presidente La sama ho nia delegasaun Timor Leste nebe fo importansia boot tebes ba serimonia ida nee. Timor Leste sempre iha Vaticano nia fuan.”

Durante serimonia nebe hetan kobertura media hosi mundu tomak, Bazilica Sao Pedro, sai duni hanesan sasin ba domin nebe La Sama mehi hela. Ema hotu¬ hatudu nia domin ba Joao Paulo Segundu. Ho laran haksolok tebes no sentimentu ida klean, Presidente La sama hatete: “Ida nee grasa ida ba hau, ba komitiva Timor Leste no ba ita Timor Leste tomak hodi bele tur iha fatin santo ida nee no asiste direitamente prosesu beatifikasaun ba amu Papa Joao paulo II nebe santo tebes. Mundu tomak, liu-liu ita Timor Leste deve Amu Papa Joao Paulo II, Vaticano no Igreja nia favor iha prosesu ukun rasik an no iha prosesu ba dezenvolvimentu Timor Leste ikus mai,” haktuir presidente La sama ho laran dodok tebes.

Amu papa Joao Paulo II nebe nia naran morin iha mundu tomak, hetan atensaun makas hosi sarani mundu tomak. Tamba nee, Roma, nakonu ho ema nebe mai partisipa iha serimonia beatifikasaun nee. Hotel sira iha Roma laran nakonu hotu. Ema barak, inklui padre ho madre sira mak la hetan fatin no toba iha tenda laran. Governu nasaun sira seluk hanesan Polandia, fasilita nia sarani ema rihun atus rua resin para mai asiste prosesu santo ida nee.

Amu Papa Joao Paulo II durante nee, ema konsidera hanesan santo tiha ona tamba milagre barak mak nia halo ona hanesan ho grasa Maromak nebe nia iha, bele akontese milagre, hodi kura moras parkinson madre Franca ida nian nebe tuir mediku modernu nian, labele kura.

Presidente La Sama nia prezensa iha Vaticano akompanha hosi komitiva Timor Leste, Vice Ministro Negocio Estrangeiro TL, Alberto Xavier Pereira Carlos, chefe gabinete Presidente Parlamento, Marcelino Ximenes Magno, Anastasia Pires (MNEC), Paulino Kintas (Jornalista TVTL) no Enkaregador Negosiu Interino Embaisada Timor Leste iha Vaticano, Armindo Simoens nebe esforsu an makas tebes para Timor Leste tenki marka nia prezensa iha serimonia espesial ida nee.

Timor Leste nia prezensa iha Vaticano hetan atensaun espesial hosi Vaticano. Iha website Vaticano nian hakerek, Timor Leste, uniku nasaun iha Asia nebe haruka nia dignitariu nain rua, Presidente Parlamento Nacional, Fernando La Sama de Araujo no Vice Ministro NEC, Alberto Xavier Pereira Carlos hodi mai partisipa iha serimonia beatifikasaun Amu Papa Joao Paulo II nee. Komunidade Timorense iha Italia nebe mai partisipa serimonia nee mos hatete, prezensa Timor Leste iha serimonia nee hatudu duni ita nia domin ba Amu papa Joao Paulo Segundu no mos tau duni Timor Leste iha mapa mundu nian liu hosi nia prezensa iha Vaticano. Iha loron 2 fulan Maio nee, La Sama ho nia komitiva mos sei partisipa iha misa agradesimentu ba Beato foun Joao Paulo II iha Basilika Sao Pedro, Vaticano.***

Sem comentários:

Enviar um comentário

Nota: só um membro deste blogue pode publicar um comentário.