Populasaun NTT rona liu RTL do ke RRI

Dili. Fraksi Partai Demokrasi Indonesia Perjuangan (PDIP) foin dadaun halao vizita ba provinsi NTT no parte fronteiras ho RDTL. Tuir observsaun Fraksi PDIP katak, ”populasaun iha zonas hanesan Atambua, Kefa Manunu, Kupang, rona liu fali Radio Timor-Leste (RTL) do ke Radio Repúblik Indonesia (RRI)”.

Tuir Ezki Sulyanto, husi KPI (Komisi Penyiaran Indonesia) katak, ”sira simu kesar husi Fraksi PDIP iha Parlamentu Nasional (PN) konaba populasaun iha NTT no liliu iha fronteira rona liu fali RTL do ke RRI”. Ezki nudar membru KPI kasu lia hirak ne´e iha terça-feira ( 22/02/2011), iha Hotel Akmani, Jl. KH. Wahid Hasyim Nº.91, Jakarta, Indonesia, wainhira halao surumutuk entre AJI (Aliança Jornalis Independent) ho Delegasaun husi Timor-Leste ne´ebe lidera husi Vitor Maia, Diretor Jeral Sekretariu Estadu ba Konseilu Ministru (SEKM) no delegasaun ne´ebe kompostu organizasaun Journalista sira nian, hanesan Rosario Martins, AJTL (Associação Jornalista de Timor-Leste), Otelo Ote, husi Sindikatus, Mauzinho Lopes, husi TLPRC (Timor-Leste Press Club), SEKM no Gabinete PM nian.

Hatan ba preokupasaun husi Fraksi PDIP ne´ebe ható ba KPI, direktur RTL, Rosario Martins ne´ebe representa AJTL iha surumutuk ne´e katak, ”RTL aposta iha programas sira ne´ebe maka kativa ba rona nain sira, hanesan noticias nasionais no internasionais dala tolu (3) loron ida(1)”. Tenik tan Rosario Martins, ”RTL mos fornece programas ba rona nain sira hanesan muzika nebe koresponde ba rona nain sira ninia gostu”.

Konaba preokupasaun husi Fraksi PDIP nian konaba populasaun fronteiras RDTL-RI rona liu RTL, direktur RTL, Rosario Martins haktuir katak, ”ne´e normal ba rona nain radios iha fronteiras RDTL-RI, tamba rona nain sira iha liberdade ba hili radio ne´ebe maka sira hakarak rona, radios ne´ebe maka fornece programas diak liu tuir sira nia gostu”.

Konaba kesar husi Fraksi PDIP ba KPI, António Ramos da Silva, Assessor Komunikasaun ba PM nian kestiona mos katak, ”iha Timor-Leste siaran Tvs husi Indonesia hanesan: Metro Tv, Tvone, RCTI, SCTV, Indosiar, Antv, TransTV, Trans7, MNCTv, sel-seluk tan, quase populasaun tomak hetan acesu. Se kompara ho RTL ne´ebe sai hanesan preferencia ba rona nain sira iha fronteira RDTL-RI ninia influencia kiik”. Kestiona tan António Ramos da Silva, “tamba saida fraksi PDIP tenki tauk konaba RTL sai hanesan radio ne´ebe sai hanesan preferencia ba populasaun iha fronteiras?”.

RTL iha ninia planu asaun hahu monta ninia antena iha Timor-Leste laran tomak, foin dadaun ne'e monta tan iha foho Taroman ne´ebe kobre ba Distritu Kova Lima, sub-distritus hanesan Fatumean, Fatululik, Fohoren no distritus Bobonaro sorin balun!

Fonte: Jornal Nacional Diario (JND) edisaun Quinta-Feira (3/3,paj.5)!