JND: Mundu INTERNASIONAL Aprecia Governasaun PM Xanana

Komunidade Internasional fó rekonyecimentu ba Governasaun AMP ne’ebe lidera husi PM Kay Rala Xanana Gusmao. Sinais ba konfiansa ne’e bele hare husi Komunidade internasionais liliu rai bo-bot sira hanesan Estadus Unidus Amerika, Englatera no sel-seluk tan, ninia aprecisaun ne’ebe bot no áas ba PM Kay Rala Xanana Gusmao ninia lideransa ne’ebe lidera procesu konstrusaun estado husi post-konflitus.

Hatur Nasaun Timor-Leste ninia nivel hanesan mos rai sira be sai husi post-konflitus, ne’ebe Timor-Leste hahu lidera g7+ ne’ebe dait to’o g15. Foin dadaun ne’e, iha loron 7 fulan Marsu, PM ba ható ninia palestra iha Desenvolvimentu Internasional London, konvite husi Governu Ingles. Fatin ne’e, embot mundu nian sira maka ba ható ona diskursu no hanoin, hanesan Ex-Prezidente Amerika Bill Clinton, ex-Sekretariu Jeral ONU, lider resistensia kontra Apartheid Nelson Mandela. Xanana mos hatur an hanesan ho lideres sira iha mundu ne’ebe maka ba ható ona palestra iha fatin ne’ebe refere.

Tuir komisaun organizadora katak konvida PM Kay Rala Xanana Gusmao tamba reformas no medidas sira ne’ebe maka Governu PM Kay Rala Xanana Gusmao nian, maka sai hanesan referencia ba rai sira ne’ebe foin sai husi post-konflitus.

Reformas sira ne’ebe maka Governu Xanana adopta, ninia impaktu ba estabilidade politika no seguransa, krecimentu ekonomika ne’ebe maka konsidere áas iha mundu, ne’ebe desde reformas implementa husi Governu Xanana ninian (2008), krescimentu por volta 9-12 %.

Aprecisaun Komunidade Internasional ba Governasaun Xanana, fó hanesan votus konfiansa ba Povo Timor-Leste atu fó nafatin fiar ba Governantes ka ukun Nain ne’ebe maka bele garante ba estabilidade no lori procesu desenvolvimentu ba oin. Ho Xanana maka sei lori Planu Estratejika ba Desenvolvimentu Nasional (PEDN) hahu tinan 2011-2030.

Iha palestra ne’ebe maka PM Kay Rala Xanana Gusmao ható iha Forum Desenvolvimentu Internasional London, ”ami nia sucesu ne’ebe maka alkansa tamba reformas no mudansa politika ne’ebe maka brani foti hodi lao ba oin”. Hatutan PM, ”maske sucesu sira ne’ebe maka alkansa seidauk bele perfeitu maibe kompara ho rai seluk, ami bele dehan katak Timor-Leste mos bele”. Iha period ne’e, ”Estado no komponente hotu-hotu buka rekopera konfiansa husi povu ba instituisaun estado no estado halao ninia knar no dever hodi hatan ba necessidade povo nian”.

Fonte: Jornal Nacional Diario (JND), edisaun Sexta-Feira (11/03/2011, paj. 1 i 15)!