Debate OJE2011 hatudu maturidade iha demokrasia Timor-Leste nian

Dili.Forum Haksesuk (FH). Debate OJE2011 tama ona iha loron nem (6), loron tolu (3) ba especialidade, tuir Lei ne’ebe maka vigora konaba debate OJE halao loron 13. Iha debates OJE2011 ba dala tolu (3) especialidade, hatudu katak iha progresso bot procesu debates.

Iha debate iha especialidade ba loron tolu (3), hahu ho debate OJE Primeiru-Ministru no Presidencia Konseilu Ministru, iha propostas hamutuk 6, no. 18 konaba aloka osan ba servisus profisionais no proposta no. 22 konaba viajem ba rai liur iha Gabinete Priemeiru-Ministru. Husi preponente sira ninia justifikasaun ba proposta no. 18, hodi haktuir katak, ”koloka osan ba servisu profisionais, kontrata ema nain hira, ninia exekusaun osan hira no produs rezultado hira”, defende Deputado Antonino Bianco, Partidu FRETILIN.

Konaba proposta no. 22, konaba “viagem ba rai liur”, justifika husi preponente ”reduz osan hodi viagem ba rai liur tamba gasta osan deit”, dehan Antonino Bianco, Partidu FRETILIN.

Depois hetan explikasaun husi PM Kay Rala Xanana Gusmao ba propostas rua (18 no 22), ”konaba servisu profisionais ne’ebe maka afekta ba Assessorias sira, PM rekonece katak ne’e problema rekursus humanus ne’ebe laos problema iha kurtu no médio prazus maibe problemas longo prazu”.

Konaba proposta ba viagem estranjeirus, ”iha kompromisu estadu halao viagem ba New York tamba iha fulan Fevereiro iha reuniaun Konseilu Seguransa Onu konaba mandatu UNMIT/UNPOL, viajen ba nudar visita oficial Brazil no Cuba, viajem servisu ba China no viagen nudar Ministru Defesa/Seguranca ba Indonesia”.

Depois hetan explikasaun husi PM, husi parte preponente husi partidu FRETILIN retira sira nia proposta no. 22, hare ba explikasaun konaba visia oficial PM nian importante duni ba rubrika ida ne’e. Husi preponente sira retira sira nia proposta o.22.

Iha preponentes nos. 14,15,16 no 17, preponente ható ninia proposta no explikasaun husi PM. Parte Governu liu husi PM Kay Rala Xanana Gusmao, ”aceita proposta no. 17 ne’ebe koalia konaba reduz osan ba sosa jeradoures iha GPM nian”. Proposta no. 17 ne’e hetan aprovasaun ho votus Favor 32, Kontra17 no Abstensaun 8.

Iha mos proposta konaba Gabinete Vice Primeiru-Ministru nian iha rubirka Bens-Servisus (BS), ba proposta no. 20 konaba aumenta osan iha gabinete VPM no proposta no. 21 konaba viajens ba liur, ne’ebe buka halo alterasaun.

Hatan ba propostas rua ne’e (20+21), PM hatan katak, ”proposta no. 20... aumento tamba, nota karik mudansa husi ASC husi GPM ba VPM nian.... resultadu husi muda ba muda ne’e maka mudansas sira. ASC laos funcionarios, mandatu hotu, sira mos ba ona! Proposta No. 21, VPM viajens VPM nian, representa PM (delega ba nia), Presidente g+, oinsa maka hadia kapacidade institucional (convite) husi Pres. Konseilu Seguransa ONU nian”.

Depois hetan explikasaun husi PM Kay Rala Xanana Gusmao, deputadus preponentes, husi deputadu Antonino Bianco, retira sira nia propostas no. 20 no 21.

Ida ne’e maka dinamika iha debates OJE2011, mos reflekte duni procesu demokratizasaun no konsolidasaun estadu Timor-Leste nian, maske foin tinan 10 deit, maibe hatudu katak iha duni maturidade politika ne’ebe hatudu liu husi debates ne’ebe konstrutivus!