VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20101114

Resposta ba Senhor Reis konaba artigu “Alarico Fernandes Vizita: Se Utuliza Se?”

Ba’a Senhor Reis,

Com tudo respeito,

Dahuluk, hau pessoal hakarak hato’o diskulpa tamba tarde responde ita bo’ot ninia input ba’a hau nia artigu fulan kotuk ho titulu “Alarico Fernandes Vizita: Se Utuliza Se?” Hau semana tolu-resin iha tiha foho.

Daruak, nudar pessoal hau mos hakarak hato’o obrigado no agradecimento ba senhor Reis ninia tanggapan no koriji ba hau nia artigu fulan kotuk ho titulu “Alarico Fernandes Vizita: Se Utuliza Se?” li-liu sobre k’nar nebe’e mak uluk Senhor Alarico Fernandes ka’er iha estrutura “governu proklamasaun” nebe’e Frente Revolusionaria de Timor-Leste Independente (Fretilin) proklama. Hau konsidera kuriji no tanggapan nudar antitesa hodi rezulta sintesa nebe’e diak ba istoria iha pasadu no vida politika TL nian iha tempu oin mai.

Datoluk, ho lam-lamas hau mos hakarak dehan katak ho tanggapan husi senhor Reis hatudu ba publiku katak senhor Reis pessoal ida husi jerasaun/‘angkatan’ 1975 nebe’e uluk besik ba estrutura antigus lideransas nian. Senhor Reis bele mos mai husi Maun ka Alin husi saudozu Sahe ou bele mos husi individu nebe mak lakohi fo’o sai identidade lolos.

Daha’at, sobre matebian Alexandre Lemos no Rui Vaz nebe’e tuir informasaun senhor Alarico Fernandes haruka oho ho razoins hanesan senhor Reis hato’o liu husi ita bo’ot nia tanggapan, hatudu liu tan ba publiku sobre vitima politika husi funu revolusaun Timor-Leste nian nebe’e hahu husi 1975. Ita tomak ninia memoria sidauk haluha termus nebe’e mosu iha Ailaran hanesan, reaksinariu no traidor tamba halo traisaun. Id-idak ho ninia style oi-oin hodi likida maluk nebe’e mak estrutura politika tempu neba’a du’un hodi dehan katak sira ser reaksionariu no traidor ba politika revolusaun nian. Reaksionariu ka traidor balun hetan dadur hodi sulan iha raikoak, hetan mate, halai mai rende ba inimigu no sel-seluk tan. Iha kazu hirak hanesan ne'e dalaruma bele mosu mos senhores sira seluk hodi hato’o informasaun validu ruma atu nune'e bele so’e netik istoria politika revolusaun nian mai ita tomak. Tamba ema hanesan senhor Reis, jerasaun 1975 la’barak ona, sa’a tan ema nebe’e mak hakarak so’e netik lia los ruma ba istoria politika revolusaun Timor-Leste nian. Jerasaun husi ami sei barak, maibe tempu iha Ailaran la’besik ba estrutura rezistensia nian tamba tempu neba’a ami barak mak sei ki’ik.

Dalima, ho lam-lamas hau mos hakarak hamosu hipoteza katak, Saudozu Nicolau Lubato ninia mate iha 1978 bele la’ses husi kontribuisaun senhor Alarico Fernandes nian, tamba depois de Senhor Alarico Fernandes entrega a’an ba inimigu mak saudozu Nicolau Lubato hetan oho husi militar Indonesia.

Dane’en, hau hein katak senhor Reis bele ajuda mos hodi buka informasaun atu nune’e hamosu diskusaun nebe’e mais profunda sobre ba kazu senhor Alarico nian no kazu sel-seluk tan. Sobre buat nebe’e mak mosu iha pasadu hau hanoin ita so bele hato’o deit informasaun liu husi sasin, tamba susar atu hetan evidensias sobre aktuasaun nebe’e mosu iha funu rezistrensia nian.

Mak ne’e deit, fortes abracos ba senhor Reis.

Obrigado.

Filipe Rodrigues Pereira

Sem comentários:

Enviar um comentário

Nota: só um membro deste blogue pode publicar um comentário.