“Povu Hotu Tenki Defende Soberania...”: Timor-Leste Persiza Utiliza Frase Nee ho Diak

Husi: Cesar Dias Quintas (Lere-Malae)

Master of Arts in Southeast Asian Studies Minor in Political Science

Wainhira ita hare husi perpektiva akademia ninia, lia fuan henesan “Defende Soberania” ladun utiliza ona iha seklu 21 tamba mudanza iklima politika, ekonomia, teknolozia, kultura no buat seluk-seluk tan. Frase ida nee mos persiza hare no utiliza didiak tamba bele halai ba buat seluk hanesan konflitu ho rai liur no violensia iha rai laran. Frase nee mos bele halo ita nia vizinho Indonesia bele interperta iha kontekstu ida oin seluk. Ita, Timor-oan mak sala kuandu ita la iha matenek no kapasidade atu defende ita nia soberania liu husi negosiasaun ho nasaun visinho sira. Nusa mak wainhira Nasaun Unidas (ONU) liu husi UNTAET, ita la izizi kedas ba sira dehan, ami sidauk bele simu tranferensia puder (Ita nia Soberania nasional) husi imi tamba ami nia fronteira nasaun nia sidauk kompletu i ami lakohi halo konfrontasaun ho nasaun visinho sira tamba deit linha fronteiras. Nee siknifika katak Timor-Leste nato’on simu tranferensia poder husi ONU, legalmente sidauk iha soberania lolos.

Ita, Timor-oan sira gosta kahur assuntu politika ho lei. Ita labele hare soberania husi konteksu politik deit maibe ita mos persiza istuda klean liu konaba sistema legais tuir negosiasaun standar internasional. See linha fronteira maritime (Maritime Boundary) ita la konsege resolve ona ho Australia, iha hipotesa ida bele mosu husi Indonesia katak fronteira ho Australia mos Timor-Leste la resolve ona, sa’a tan ho ita. Nee duni atu resolve problema soberania Timor-Leste persiza hare husi perpektiva tolu (3), politik, ekonomia no lei internasional, ho lia fuan simples ida katak ita, Timor-an mak tenki matenek istuda no halo negosiasaun didiak tuir ita nia konhesementu no profesionalismu. Husi aspeitu politika no ekonomia ita bele hare husi negosisaun ba kortu prazu (short term) ho mediu prazu (Medium term) ba ita nia interese nasional, hanesan kortu prazu “Timor Gap” ita persiza halo redimentu (revenue) atu responde lalais assuntu dezenvolvimentu iha rai laran tamba independensia tenki iha uluk prosesu dezenvolvimentu husi aspeitu hotu.

Lakohi no hakarak ita tenki iha orsamnetu par hahu Timor-Leste nia devezenvolvimentu, liu-liu atu responde nesidade nebe urgente hanesan edukasaun, saude, infrastutura, nesesidade no ahi han lor-loron no buat seluk tan nebe sai basiku ba roda ekonomia bele lao. Ekonomia ho politik labele lao ketak-ketak tamba ita tenki uza ita nia matenek politika (political Skills) par bele fo vantazen no benefisiu ba interese nasional nebe halai liu ba interese ekonomia. Wainhira ita kolia aspeitu rua nee, nasaun barak sakrifisiu sira nia prinsipiu tamba sira iha situsaun nesesidade urgente basiku no labele kontra rai nebe iha ekonomia no politika makas. Posisaun nee mak agora Timor-Leste adopta hasoru Australia no Indonesia. Lolos sei iha mos dalan seluk atu bele utiliza par bele no foti atu dezenvolve Timor-Leste, la persiza halo sakrifisiu ba Timor-Leste dia direitu soberania.

Husi aspeitu legal/lei internasional (Prinsipiu soberania), ema barak bele hateten katak Timor-Leste sidauk iha ekonomia no politika diak atu hasoru Australia kona ba linha fronteira maritima ninia. Prosesu nee Timor-Leste uluk liu tia ona to’o konsege atu tau Australia liu husi prosesu tribunal internasional maibe tansa kazu nee sai malirin tia deit. Husi perspektiva Autor, tamba kazu nee leader Timor-Leste sira hare’e liu ba konteksu prakmatismu do que prinsipiu. Kazu fronteira maritime laos fasil atu halo negosiasaun ho Australia tamba tenki hare’e mos dadus husi tempu Portuguese to’o Indonesia nia. Puratantu kazu Timor Gap laos negosiasaun ida nebe atu hare husi soberania deit maibe involve barak liu mak kotiudu politik no ekonomia. Governu Timor-Leste hatene hela mais ita sidauk iha kapasidade atu hasoru rai bot ida hanesan Australia nebe iha politika no ekonimia makas iha mundo atu kolia seriu liu kona ba assuntu legais konaba linha fronteira maritima. Nee duni Timor-Leste mak hakarak duni halo sakrifisiu ba nia linha fronteira (sobernia) atu aksplora Mina no Gas iha area Timor Gap ninia. Governu Timor-Leste hatene hela katak prosesu nee la justu (fair game) iha negosiasaun maibe Timor-Leste mak hakarak duni prosesu nee lao hanesane tamba atu foti laternative seluk, ita nia governu sidauk bele. Husi faktor sira nee mak halo ita nia governu kadabes to’o iha faze ida defisil tebes i bolu povu hamotuk atu azizi kontra Australia kona ba ita nia soberania. Maibe tuir lolos frase “Mai ita defende ita nia soberania” lalika utiliza demais tamba ema matenek sira bele sadik fali ita ho li fuan nee. Hanesan Autor temi iha leten katak frase nee kuaze ema la utiliza ona iha rai laran no forum internasional.

Iha Segundo Gera Mundial (War World Two) no Gera Friu (Cold War) kuaze rai barak utiliza lian fuan nee atu hametin unidade kontra kolonialismu no okupasaun husi rai liur. Maibe agora kuaze rai nebe adopta sisteme demokrasia iha mundu nee, la utiliza ona frase nee tamba rai barak mak utiliza sira nia matanek atu interperta frase nee ba iha kontekstu internasional hanesan lei internasional (International laws) no akodu internasional (International agreements and treaties) liu husi kanal bilaterais no multi-laterais. Purtantu ema ladun persiza ona atu halo agitasaun no bomilizasaun atu kontra rai seluk ho lia fuan “Mai ita defende ita nia soberania”. Simplemente, movimentu hirak nee atu habeik ita nia povo la tuir dalan ida nebe edukativu. Iha parte seluk, ema balun utiliza lia fuan nee ho intensaun diak maibe sira sidauk hare’e no istuda konteksu lia fuan nee ho profundu. Situsaun agora kompletamente oin seluk wainhira povo hasoru kolonialismo no okupasaun husi rai liur, sira komesa hatene soberania lolos mak saida.

Tuis lolos sira nebe toma konta ba assuntu guvernasaun (negosiasaun), lalika utiliza no halo kampanya kona ba defende soberania tamba povo halo sakrifisiu demais ona atu defende sira nia soberania. Tempu too ona governu nebe sira hili husi elisaun tau matenek sira par bele halo negosiasaun ho rai nebe deit konaba assustu politika no ekonmia. Iha konteksu simples ida, dehan soberania signifika katak povo bele hetan liberdade, hetan a’hi han, edukasaun, saude, direitu ekonomia no politika. Agora iha pontu seluk, governu halo kampanya hasoru Australia kona ba Timor-Leste nia soberania maibe iha fatin seluk, governu hatama hela Xina (Chinese mainland ho eistrageiros: Indonesia, Singapore no seluk-seluk tan) barak fa’an sasan sira iha rai laran, liu-liu vendadores xineza sira (Chinese vendors). Lolos politika ida nee mak hadau Timor-oan sira nia soberania tamba atu fa’an deit sasan iha loza mos ema tenki mai husi liur (estrangiros), nebe Timor-oan mos bele halo. Hahalok nee mak hadau povu nia direitu (Soberania) i hahalok nee mos bele hamate direitu ekonomia povo Timor-oan ninia.

Wainhira hau hare kuadru (papan) bot no spanduk sira husi depertamentu guvernu ida dehan “Povo Hotu Tenki Defende Soberania...”, hau ladun kompriende frase nee ho hau nia intelektual ida nebe limitadu tebes. See la sala kuadru no spanduk sira nee husi guverno atu halo kampanya hasoru governu Federala Australia kona ba mina ho gas iha tasi klaran (Timor Gap). Iha konteksu internasional, ida nee laos atu hadau Timor-Leste nia soberania maibe kazu nee depende ba rai rua atu halo negosiasaun tuir matenek diplomasia tuir strandar internasional. Timor-Leste labele politiza sasan nebe lolos laos tama no kahor assuntu politika iha rai laran. Povo hatene katak Mina no Gas iha Tasi Timor (Timor Gap) ho Fronteira Maritimu (Maritime Boundary) nee assuntu externu no kompetensia masimu ba governu atu atiliza sira nia matek atu halo negosiasaun ho rai nebe refere. Povu laos deit atu kontra ema nebe deit atu hadau sira soberania maibe sira mos bele kontra sira nia governu wainhira lider governu sira la iha kapasidade atu halo negosiasaun nebe ikus mai Timor-Leste lakon iha prosesu negosisaun, nebe ikus mai governu Timor-Leste fo sala mak governu Federal Australia.

Timor-oan hotu-hotu foin mak apriende sasan hotu-hotu iha era independensia maibe ita labele apreinde bebeik nebe sei sai hanesan kustume (kultura) ida. Kultura nee sei la lori Timor-oan sira ba oin tamba ema hotu-hotu bele hakiak mentalidade ida, dehan foin mak ukun a’an. Tempu too ona ba Timor-oan hotu atu tau preoridade interese nasional ba oin ho prinsipiu ida katak Timor-ona labele hare husi partidu, etniku, veteranismu, reliziaun ho buat seluk-seluk tan. Wainhira ita kolia kona ba assuntu “Soberania” so ema matenek sira mak bele interperta liu husi kontekstu lei nasional no internasional. Povu ki’ik sira iha aldeia no suku sira hanesan iha Timor-Leste realmente ladun iha kunhesementu ba soberania Timor-Leste ninia. Husi parte ida, ita bele dehan katak organ estadu no governu sira mak iha liu kompentensia atu hasoru malu ema no rai liur sira atu halo negisiasaun.

Autor rasik apoiu politika governu AMP atu resolve ita nia problema, liu-liu negosiasaun kona ba kazu “Timor Gap.” Maibe Timor-Leste persiza iha kapasidade atu bele hare’e no analiza didiak par Timor-oan sira bele hetan resultadu sastifas ba parte rua. Jogu politika ida sempre parte ida la sastifas iha parte final maibe tenki (fair game) husi parte rua par bele iha fiar no reseiu iha nivel profesionalismu tuir standar internasional. Autor la hare katak Australia atu hadau ita nia soberania tamba husi dalan extreme Timor-Leste bele lori Australia ba tribunal internasional atu julga kazu nee. Timor-oan hotu hatene katak uluk Australia ho Indonesia ilegalmente explora ona ita nia riku suin iha Tasi Timor, hanaran Timor Gap Treaty (Akordu Timor Gap). See wainhira governu Timor-Leste hakarak tuir nafatin politika antigu husi rai rua nee, fronteira maritime ninia (maritime boundary) par explora Mina no Gas entau ita lalika dehan Australia nauk ita nia riku soin tamba Timor-Leste mak hakarak. Tuir lolos kazu nee lori ba Nasaun Unidas (ONU) par bele resolve kazu nee kompletamente idepois hafoin halo negosiasaun foun ho rai (pais) foun Republika Demokratika Timor-Leste. Tamba kazu nee la resolve hotu kedas husi prosesu legal mak loron ikus ita sei politiza nafatin assuntu nee. Kazu Timor Gap laos fasil atu resolve tamba uluk Portuguese nia tempu mos kazu nee la resolve enter Australia tama to’o okupasaun Indonesia. Ikus mai tamba Australia apoiu makas invazaun Indonesia entau Australia hetan liu vantazen no benefiu husi Timor Gap Treaty nee. Purtantu Timor-Leste persiza hare’e didiak istoria antes halo negosiasaun par ita iha bazeia argumentu forti liu i wainhira Timor-oan iha vontade ho matenek negosiasaun (Negotiation Skills), kazu nee bele defende Timor-Leste nia interese no soberania ho dalan ida justu.

Timor-oan sira persiza komesa hanoin atu halo politika ho profesional iha rai laran (nasional) no rai liur (internasional). Timor-oan persiza hare’e katak negosiasaun hotu-hotu laos atu hetan resultadu positivu. Iha prinsipiu Timor-oan hakas a’an par bele hetan resultadu ida nebe sastivas no foti dalan nebe nia risku (kosekuensia) ki’ik liu. Nee duni ita lalika mehi demais atu halo kampanya no politiza assuntu nebe lolos bele resolve ho ita nia matenek. Timor-oan hotu-hotu sei fo apoiu masimu ba sira nia governu wainhira prinsipalmente sira fiar nesesariu duni atu halo. See lae povu hanoin governu halimar deit ho sira tamba povu rasik la kompriende kontekstu soberania nebe governu izizi atu fo apoiu. Governu persiza halo pazu ida konkretu katak negosiasaun lori duni resultadu positivu ba povu nia moris. Hanesan osan husi Mina no Gas tasi timor gasta to’o henebe ona i nia resultadu ho impaktu positivu mak saida. See lae povu atu apoiu politika governu nia mos senti soe tempu deit tamba governu promesa mak barak liu, sai fali hanesan halibur politika ba povu sira (Political entertainer).

Artikel nee laos atu halo kritika ba governu AMP nia politika kona ba Mina ho Gas iha tasi Timor (Timor Gap) maibe lia fuan hirak nee atu for hanoin kona ba lifuan ruma nebe lolos laos tempu atu utiliza (nia timing nee la favorese atu uza frase nee) tamba lifuan nee bele halo ema duvidas ba governu nia kompetensia atu halo negosiasaun ho rau visinhu sira hanesan Australia no Indonesia. Timor-oan hotu-hotu tempu to’o ona atu utiliza sira nia matenek atu fo apoiu ba governu par determina lalais ita nia negosiasaun fornteira ho Australia no Indonesia. Tamba negosiasaun hirak nee laos deit involve assuntu legais atu determina (legal determination) maibe aspeitu nee mos persiza hare no balansu ekonomia ho politika diplomasia (diplomatic approach) tuir ita nia kapasidade negosiasaun bazeia ba ita nia interese nasional. Soberania kuandu bele eziste wainhira iha konhesenmentu husi aspeitu legal rai laran no rai liur. Nee siknifika katak povu hatene sira nia direitu ho dever atu moris iha rai ida soberania. Iha parte seluk rai liur (Nasaun seluk), liu-liu rai (pais) visinhu sira persiza hatene ita nia fronteira legalmente. Nee parte servisu bot ba governu Timor-Leste atu halo sosializasaun komprehensivu inklui povu tomak iha responsibilidade atu apoiu ba governu atu resolze kazu sira nee ho dalan ida transparante. Luta Kontinua!