PILARES 7 SUPORTA XANANA*

SYNOPSIS

Diseminasaun Plano Desenvolvimento Estragico Nacional (PDEN) remata ona nebe lori tempo fulan lima nia laran. Xanana halo esforsos maximo no lori horas barak atu explika em detalhes nia plano ba populasaun sira, ho mos ho paciencia bot rona preokupasaun husi povo nian liu husi: sugestoens, kriticas, keixas no komentarios, ba implementasaun programas governo nian, ho mos keixas ka protestos sobre atuasaun CPD- RDTL nian iha fatin barak nebe lideres komunitarios sira sente la kontente.

Sintese mehi Xanana nian, Governo nebe nia lidera, kria kondisoens favoraveis atu povo moris diak, iha paz, trankuilidade no hetan prosperiedade, ekonomica, social no politica husi policy: edukasaun, saude, infraestrutura, meio-ambiente, agricultura, protesaun social, sector privado no informal.

Plano no ambisaun Xanana nian hodi kria alicerces democraticos nebe komponentes hotu-hotu partisipa ba desenvolvimento nacional, instituisaun Estado nia ho kapasidade atu atende servisus publicos no povo sente katak ukun nain sira iha duni preokupasaun bot hodi buka dalan atu povo moris diak

Husi encontro directo, ho populasaun sira, Xanana iha oportunidade atu hare, estradas nebe maka presisa hadia lalais, dificuldade povo nian nebe maka atende iha tempo badak.

Husi encontro sira iha Distritos no sub-Distritos komponentes nebe hetan oportunidade atu koalia maka: Chefes Sukos, juventude, Igreja Catolika, veteranos, emprezarios, rede feto, sociedade civil (NGO lokais) no Administradores sub-Distritos.

Husi populasaun sira nebe mai rona sosializasaun, sira iha duni preokupasaun no vontade atu mai rona saída maka materia no substancia palestra Primeiro Ministro nian. Tamba ne, maka populasaun sira iha paciencia durante horas sanulo (10) nia laran, tur ho konsentrasaun maxima hodi rona Primeiro Ministru iha duni vontade no komitemento atu hadia povo nia moris ka lae.

Tuir hakerek nain nia observasaun no interpretasaun povo sira iha foho sente kontente ho PDEN tanba koalia fundamentalmente ba povo nia moris diak. Povo sira sente duni resultado balu durante Xanana nia governasaun tinan 3 nia laran.

Ho diseminasaun konteudo PDEN nebe Xanana hatoo iha sub-Distritos 65 confiansa povo nian ba Xanana nia governasaun aumenta no sai solido bot liu tan.

PILARES 7 XANANA KONKISTA

1. Terceira idade

Resipientes 3a idade iha territorio tomak hamutuk 89 000. Segmento ida ne la kalkula sira nian konfiansa bot deposita ba Xanana. Tanba durante governasaun Xanana maka komtempla sira nia sobrevivensia hodi aloka orsamento estado nian.

Husi lideres FRETILIN halo propaganda ba povo iha fatin barak dehan katak, programa ida ne mai husi FRETILIN. Mai be faktus maka koalia diak liu.

Tansa durante tinan 5 ukun, Dr.Mari Alkatiri nem seker hanoin programa ida ne hodi implementa? Povo hatene ona ukun nain nebe gosta bosok povo, no ida nebe hadomi povo hodi halo buat ruma ba sira nia moris.

Benifiarios husi veteranos da Resistencia hamutuk 12 000 no feto faluk sira husi martires da paz nia familias hamutuk 11 000 nebe hetan assistensia. Subsidio nebe sira hetan atu hatutan sira nia moris no fasilita oan kiak sira nia eskola.

Valorizasaun ba veteranos Klandestina no feto faluk sira, hatudo katak Xanana kumpre duni Artigo 11 husi Constituisaun RDTL iha no. (1, 3, 4). Total benefiasiarios hamutuk 23 000 nebe estado assegura protesaun especial.

2. Igreja Katolika

Iha Constituisaun Artigo 11 (No 3) halo referensia ba Igreja nia partisipasaun ba libertasaun nasional. Ne duni governo Xanana aloka orsamento total 12 milõens ba Diocese Baukau no Dili. Diocese Maliana foin hari iha tinan klaran ne duni tinan oin maka tama ba orsamento estado.

3. FRETILIN Mudansa (F-M)

F-M hanesan aliado estratetigo Xanana nian nebe hahu iha 2007 kontinua fo apoio ba Xanana liu husi CNRT. Apoio inkondisional husi F-M, tanba ho Xanana, maka konsegue restaura seguransa no estabilidade husi crise 2006, no liu husi Xanana maka bele hari alicerces demokratikas no kria kondisoens basikas ba krescimento economico ba ohin no aban bai rua.

F-M la nota iha Xanana carateristicas de: arrogancia politica, autoritarismo, no miss using power ba nia interesse individual. Xanana nia vida tomak sakrifica nia aan povo Timor Leste hetan libertasaun no kontinua esforsos makas atu povo ne liberta husi kiak no mukit. Ho faktus sira ne maka F-Mudansa nafatin iha Xanana nia sorin, iha tempo diak ka at, atu liberta povo husi miseria.

4. Plano Desenvolvimento Estrategico Nasioal (PDEN)

PDEN nebe Xanana hato ba povo iha nia soromuto iha 65 sub-distritos hatudo ba Povo Xanana nia hanoin (pensamento) no assaun atu resolve povo nia necessidades balu iha tempo badak hanesan: eletrisidade, estradas, eskolas, klinicas, be mos etc.. no artikulasaun multi-dimensional husi politica governo nian hodi kria konsisoens basikas ba povo nia moris diak ba presente no futuru.

Preokupasaun nebe lideres komunitarios sira hato iha soromuto ho chefe do governo, Primeiro Ministro toma konsiderasaun seria ba assuntos hotu-hotu, balu karater emergencia hetan kedas resposta imediata. Ho interasaun dinamika populasaun ho chefe do governo, partisipantes sira nebe mai rona sente haksolok tanba sira hatoo sira nia susar ba chefe do governo atu resolve.

5. Camara do Comercio no Industria (CCI)

Husi klasse tesido empresarial iha governasaun Xanana nian hetan oportunidade hetan projectos liu husi Pakote Referendu iha 2009 no Programa Desenvolvimento Desentralizado, (PDD) nebe kontratores sira husi Distritos ida-idak maka iha direito atu hetan liu husi prosesu tender. Gestores ba projectos PDD maka Admnistradores Distritos no sub-Distritos.

Iha mos Programa Desenvolvimento Lokal (PDL) nebe ho objective atu kapasita liders sira husi Distritos no sub-Distritos kona ba gestaun projectos iha sira nia dominio.

Obviamente empresarios sira ho oportunidade ida ne, la duvida sira nian esperansa no espetativa bot ba Xanana nia preokupasaun ba sector privado atu implementa programas governo nian ba desenvolvimento nasional husi aspetu ekonomico.

Encontro iha Balibar 29 Setembro CCI ho Primeiro Ministro iha Balibar nebe aborda assunto projecto estradas ba 2011, buka estrageias oin sa emprezarios sira labele “hadau malu” ba projectos, em vez de buka formas de partisipasaun no koperasaun entre emprezarios sira. Iha aspetu ida ne, kredit poin bot ba Xanana nia politica hodi hetan apoio husi Emprezarios ho nia mão de obra tomak nebe bele konta ho milhares de votos.

6. Lideransa Komunitaria

Husi PDEN Xanana iha oportunidade koalia diretamente ho 13 Administradores Distritos ho nia ekipa Distrital, 65 Administradores sub-Distritais, 442 sukos, no 2225 chefes aldeias (Estatal 2010). Partikularmente ba lideres komunitarias, Xanana buka atu liberta sira, husi sira nia funsaun nebe ho rotula (3b) to ohin loron: bola, boneka no bombeiros.

Atu kombate funsoens chefes sukos ho 3b Xanana fo kompetensia ba lideres komunitarias sira atu halo gestaun no supervisaun ba projectos hahu ho montante $10,000 to $50 000 aban bai rua. Fo oportunidade no delegasaun de poderes ba lideres komunitarios, la iha razaun, lideres komunitarios ho nia komitiva no populasaun sira ses dok husi Xanana iha altura eleisaun geral 2012.

Ho laran no fiar metin katak Xanana nia programa monu duni ba povo nia hakarak no necessidade, no povo tomak sente ona iha sira nia moris katak Xanana halo duni ona buat ruma ba sira nia moris durante governasaun tinan 3, obviamente kualker lidere politico husi partido nebe deit atu “hasai“ konfiansa bot ida entre povo ho Xanana difisil tebe-tebes tanba abut metin klean ona.

Ho konfiansa mutual ida ne, maka Xanana sem hesitasaun deklara ba publiko “alto e bom som” katak CNRT hakarak ukun mesak ba 2012. Se sorte at hetan deit 32 kadeiras, Xanana prefere hela iha oposisaun.

KONKLUSAUN

 Plano Estrategico Desenvolvimento Nasional, akumula intereses no preokupasaun komponentes sociedade Timor tomak hodi buka estrategias de solusaun ba kurto no longo prazu;

 Atu implementa plano ida ne, prezisa duni envolvimento sector hotu-hotu nian. Ne duni konteudo plano ne konvida partisipasaun ativa komponentes hotu-hotu atu fo andamento ba oin, hodi hetan resultados esperado;

 Partisipasaun activa no dinamika komponetes hotu iha desenvolvimento nasional fo prosperiedade ba Timor oan hotu tuir duni Xanana nia ambisaun no mehi ba povo iha nasaun doben ida ne.

)* Vicente Maubocy (Observador politico)