Alarico Fernandes Nia Visita: Se Utiliza Se?

Alarico Fernandes Nia Visita: Se Utiliza Se?

Interessante tebes sani artigo Filipe Rodrigues nian, maibe hau duvida ba observador ne'e nia dados nebe lori publico ba hanoin ida la los.

Dados nebe la los maka dehan Alarico Fernandes uluk hanesan ministro Defesa. Ne'e la loos tanba ministro defeza maka Rogerio Tiago Lobato.

Conceito "desaparecido" mos usa la los, tanba desaparecido signifika lakon no ema la hatene ninia paradeiro. Enquanto Alarico Fernandes moris hela iha NTB ka Sumbawa nebe ba mai Sumbawa-Denpasar. Ninia oan sira mos eskola iha neba. Timor oan sira hatene hela Alarico iha neba no balu hetan malu ho nia, neduni dehan "desaparecido", la los, karik dehan lakon hosi orbita politika sei tama ulun.

Alarico iha tempo neba sai hanesan ema bilang tiha, la hatene se nia halo finji nune'e hodi Indonesia labele oho nian ka nia bilang duni tanba presaun nia maka hatene.

Kona-ba halo traisaun, ne bazeia ba livro ida nebe Comite Central Fretilin nian hasai. La hatene se akuzasaun sira ne objetiva ou lae, maibe buat nebe importante maka Comite Central mos uluk halo akuzasaun falsu barak, inklui hasoru Francisco Xavier rasik nebe sira dehan traidor. Akuzasaun sira ne ho objetivu ida deit, halo perseguisaun no elimina hotu ema sira nebe kontra membru Komite Sentral sira radikal. Neduni akuzasaun sira ne presiza investiga hikas no investiga to'o nia abut hodi haree ema sira ne uluk halo traisaun duni ka lae. Membru Komite Sentral Fretilin sira aktual mos balu duvida ba akuzasaun sira ne, tanba ne agora mosu pro ho kontra entre sira kona-ba Xavier do Amaral ho Alarico Fernandes ne.

Mau-Riki