KOMBATE LIXU, BELUN HO MEIU AMBIENTE, HADOMI VIDA

Hosi )* Victor Tavares

Besik ona halo tinan rua (2) mak Prezidente Repúblika ho Primeiru-Ministru hola inisiativa hodi fo ezemplu no tau iha pratika, hamoos sidade Díli laran. No mos hanaran ka adjectivo oin-oin ba sidade Díli, liu hosi aktividades desportivas oin-oin. Nu’une’e mos foin lalais, Prezidente Repúblika José Ramos-Horta kontinua insiste, dala ida tan, iha loron 10 fulan Julhu 2010 liu ba, atu sidade Díli sai iha realidade tuir Prezidente Republika nian dezeju : Díli tenke sai sidade ne’ebe moos, sidade ne’ebe paz, sidade ne’ebe furak no sidade ne’ebe saudável.

Iha pratika, hamoos Díli laran semana ida dala ida, limpeza jeral, ne’ebe halo iha loron Sesta, hosi Ministeriu ka Instituisoins publikas hotu partisipa. Ne’e hatudu katak ulun boot sira preokupadu ho kondisoins ijienes iha kapital Timor-Leste nian.

Prezidente Republika, Primeiru-Ministro ho orgauns soberno hirak seluk preokupadu tebes ho meius ambientais no preokupadus mos ho atitudes sidadauns sira iha Díli laran, ho razaun katak ita seidauk iha sensibilidade (sadar) kona ba impaktu ne’ebe mai husi ita nian hahalok maibe fo konsekuensia ne’ebe todan ba ita nian an rasik, agora no ba meius ambientais iha futuru.

Ulun boot sira iha razaun atu preokupadu tanba motivus lima (5) :

Ida, motivu saúde publika – sidade saudável mak nian ema mos saudável hodi bele hala’o servisu ba dezenvolvimentu nasional ho diak.

Daruak, motivu dignidade sidade – Díli sidade kapital RDTL, ne’ebe kalan-loron diplomatas no mos ema hosi rai selu-seluk tama-sai. Sidade Díli foer ka moos determina ema estranjeirus sira nian notas (penilaian) ne’ebe fo ho proporsionais tuir realidade oin sa. Se sidade Díli moos mak determina hetan “nota di’ak”, maib’e se sidade Díli mak fo’er mak automatika hetan “nota aat” no ema seluk nian impresaun, katak ema Timor laiha auto-estima, ka governantes sira investe deit iha sira nian hatais di’ak maibe ignora aspektu fundamental ba nian moris rasik.

Datoluk, motivu sosio-kultural – katak Timor-Leste ho nian ema mos moris iha sivilizasaun no modernidade, ne’ebe hatene moris haketak an hosi lixu ka fo’er. Tanba ita la moris iha sosiedade antiga ka moris iha pré-istorika ne’ebe sei moris tuir sistema nomoda, moris dependente ba meius naturais ka meius ne’ebe natureza fo, la bele moris ketak hosi ai-laran, du’ut laran ka fo’er laran.

Dahat, motivu sosio-ekonomiku – Timor-Leste hakarak sai destinu turismu iha tinan 2020 ba oin, ne’eduni ho ambiente ne’ebe saudável, sidade ne’ebe moos, no mos ninian ema ne’ebe sivilizadu mak bele atrai ema rai seluk mai Timor-Leste, ne’ebe mos fo nian efeitu ba ekonomia nasional liu hosi reseitas não-petroliferas iha sektor turismu, alein ida ne’e, ambiente ne’ebe di’ak sai faktor konvidativo atu halo investimentu hosi kapitais estranjeirus iha Timor-Leste.

Dalimak, dever atu kumpri kompromisu konvensaun internasional kona ba protesaun meiu ambiente.

Ha’u apresia tebe-tebes na’i Prezidente Republika ho na’i Primeiru-Ministru nian esforsu boot ne’ebe dala barak ona sira hatudu, to’o sira rasik tun ba dalan, kanu ninin, mota ninian ka tasi ibun hodi hamoos fo’er no fo motivasaun ba sidadauns sira iha Díli laran atu bele halo tuir ka sensibilizadu ho ezemplus di’ak hirak ne’e. Maibe iha realidade estratejia ida ne’ebe ulun boot na’in rua ne’e hatudu seidauk fo nian efeitu ba ema sira iha uma kain hotu-hotu iha Díli laran.

Karik ha’u hakerek kona ba kestaun ida ne’e ba daruak ona. Ha’u mos sempre akompanha no observa (okular) kona ba limpeza jeral ne’ebe halo iha loron sexta kada semana, katak kada ministeriu ka repartisoins hala’o iha ida-idak nian zona iha perimetru ne’ebe determinadu hosi governo. Ne’e di’ak ona, maibe tanba semana ida dala ida deit mak ida ne’e mos la fo impaktu ne’ebe boot atu kombate lixu ho efikaz no efektivu. Tanba, funsionarius sira halo limpeza iha sexta, alein de la kobre zona hotu iha Díli laran tomak, la partisipativu hosi populsaun no liu tiha loron ida, sabadu lixu nakonu fali ona iha dalan hirak iha Díli laran nian ninin-ninin.

Ne’e foin iha dalan boot hirak ka estrada hirak iha Díli laran nian ninin, ita tama uitoan tan ba laran mak ita hasoru populasoins sira trata lixu ho atitude pior liu tan. Sunu lixu indiskriminadamente, ai-tahan, masa ho sakus plastikus, boraxa roda kareta nian ho latas, iha uma leet hirak ne’e, hodi nu’une’e ita nota momos katak populasaun sei falta de informasaun no ignorante tebes kona ba implikasaun ka impaktu negativu ba nian saúde rasik, ba meiu ambiente no mos ba vida selu-seluk iha zona ne’e rasik, zonas vizinhas no mos sidade Díli iha jeral.

Kona ba atitudes sidadauns sira nian relasiona ho lixu mos nota momos katak sei falta informasaun no mos sosializasaun kona ba kampanha atu Díli sai furak no saudável seidauk sufisiente. Basa, hanesan ohin temi iha leten, iha estradas prinsipais hirak ne’e deit ita hetan ema soe masa plastiku bee fatin, ki’ik to’o boot, lata ki’ik to’o boot, sakus plastiku ki’ik to’o boot, botir ki’ik to’o boot namkari lemo-lemo iha fatin-fatin.

Alein de estradas hirak iha Díli laran nian ninin, mota, kanu no tasi ibun sai destinu migrasaun lixu nian. Ita hakat uitoan sai hosi Díli, ba deit Kristo Rei nian resintu ka zonas Tasi Tolu nian, iha ne’eba mos ita hasoru lixu hirak ne’ebe ha’u temi iha leten. Ita ba iha praias hirak ne’ebe bai-bain turista sira ba haris, hanesan iha Hera no Behau, hosi dok ita nian matan haree masa bee fatin hanesan kampu de konsentrasaun boot “populasaun lixu” iha ne’eba. Ita haluha tiha katak matéria plastiku ne’e matéria ida ne’ebe atu lakon ka transforma ba rai presiza tinan rihun resin.

Oin sa Timor-Leste nian kompromisu kona ba konvensaun internasional ba protesaun meiu ambiente se la iha politika ida ne’ebe adekuadu atu prevene no kombate lixu no protesaun meiu ambiente ne’ebe adekuadu ?

Tuir ha’u nian hanoin, atu prevene no kombate lixu, hadia kualidade moris hodi luta ba ita ema nian moris ne’ebe naruk no mos promosaun meiu ambiente presiza fo atensaun seriu ba problema ida ne’e.

Ha’u sujere atu iha intervensaun hosi Ministeriu Saúde nian, Ministeriu Komersiu Industria e Turismu, Sekretariu de Estadu Meiu Ambiente ho Fundasaun Haburas hodi atua hamutuk.

Promove sosializasaun no informasaun kona ba prevensaun no kombate lixu no proteksaun meiu ambiente liu hosi:

• Dauluk, produsaun no divulgasaun material informativu liu hosi meius oin-oin kona ba oin sa prevene no kombate lixu no mos kuidadu meiu ambiente.

• Daruak, edukasaun sivika, sensibilizasaun no konsiensializasaun kona ba saúde puplika no faktores ne’ebe implika ba ita ema nian moris.

• Datoluk, sensibiliza no divulga oin sa kombate lixu, liu hosi separasaun lixu tuir ninian tipu no koloka lixu iha fatin ne’ebe apropriadu.

• Dahat, bandu atu komunidade iha Díli laran la bele sunu lixu, hodi tulun sidade ne’e hetan anin ne’ebe moos atu nian ema la hetan moras ne’ebe impaktu hosi ahi su’ar ne’ebe kahur lixu oin-oin.

• Dalimak, estadu investe iha produsaun meius resipientes lixus, hanesan kontentores boot, media no ki’ik hodi koloka iha fatin hotu-hotu tuir espasu nian nesesidades.

Ou estadu halo investimentu hodi kria empreza estatal ba limpeza no protesaun meiu ambiente, hodi nu’une’e bele kombate lixu ho efektivu.

Ministériu Saúde la’os pronto deit atu kura ema kabun moras, moras TBC, moras sistema respiratória ho moras selu-seluk ne’ebe ema hetan tanba efeitu poluisaun, hanesan Sir Lawrence hateten, prevention is better than cure.

Ministeriu Komersiu Industria no Turismu la bele dada ema mai Timor atu investe iha area turismu nian se tasi ibun la iha kondisoins atu ema haris. Nune’e mos MCTI bele buka solusaun atu oin sa prosesa matérias hanesan masa plastikus ka sakus plastikus, latas, botir ka besi restus hirak ne’e sai fali sasan ba utilidades selu-seluk (halo resikajen ka daur ulang) hodi kria empregu ba Timor oan sira hodi loke no investe iha industria resiklajem hodi buka merkadu ba esportasaun ka konsumu internu nian.

Sekretariu Estadu Ambiente mos la’os deit promove ka fo atensaun deit ba kuidadus florestais no protesaun ekolojika maibe presiza fo atensaun ba poluisaun bee iha fontes ka bee matan, bee iha mota, bee iha lagoa ka bee iha tasi. Atensaun no kontrola poluisaun anin liu-liu iha sidades, kontrola poluisaun ba rai hosi matérias organikas, kontrola poluisaun ruídos ba trankuilidade.

Estadu RDTL tenke reforsa ho meius no rekursus finanseirus hodi promove kompromisu kona ba konvensaun meiu ambiente no protesaun natureza.

Basa, atu bele nasaun RDTL sai forte, atu dezenvolvimentu ba oin, atu nian ekonomia aumenta, mak nian ema tenke moris saudável fizika no mental.

)* Editor FH