Ema Moris Laiha Liña Fronteira

Nasaun Maka Iha Liña Fronteira

Husi )* Raimundo Oqui

KOALIA kona ba linha fronteira tuir tradisaun Jedua sira Nian katak ema hotu iha mundu laiha fronteira, maibe nasaun maka iha fronteira. Iha ema lobun bo’ot prefere temi lia fuan tikus ba ema sira ne’ebe tama ba nasaun seluk sein dokumentus legal hanesan passaporte ka boarding pass. Entaun sira tama ba nasaun seluk liu husi dalan laho nian alias Jalan Tikus. Nune’e kuandu to’o dalan klaran maka hetan kapturasaun tantu husi parte seguransa hanesan PNTL Unidade Polisia Fronteira (UPF) ka Border Patrol Unit (BPU) no militar Indonesia (TNI), dignidade husi ema hirak ne’e hanesan animal ne’ebe nunka hatene horon buat diak (morin) no a’at (i’is/ dois). No finalmente bele hetan kastigu, multa halo deportasaun no seluk tan ho rajaun halo violasaun hasoru lei fronteira nasaun ida-ida nian. Nudar nasaun foun iha mundu klaru katak sidadaun husi nasaun foun ne’e wainhira ate semo ba nasaun seluk tenke iha duni dokumentus legal ka normalmente ema bolu dehan passaporte. Kuandu laiha passaporte ita sei lahetan admisaun husi PNTL Unidade Imigrasaun no UPF. Nune’e mos vijinho sira husi Holandes mos sei lahetan admisaun husi sira nia Imigrasaun no TNI. Ho ida ne’e ital abele vijita ba malu.

Hare fali lia fuan ida katak ita ema moris laiha linha fronteira. Ita ema laos laho, tanba ita maka sai nudar nain ba rai ka nudar liu rai ba rai. Nasaun maka iha linha fronteira. (Manusia tidak memiliki batas tanah. Manusia bukan tikus, sebab manusia adalah tuan atas tanah. Manusia adalah raja atas tanah. Negara lah yang memiliki batas tanah atau wilayah) Maibe, tanba saida maka sei akontese disputa rai? Tanba saida maka sei oho malu tan deit hadau malu rai pedasuk oan ida!! Sei ita kompriende katak ita ema moris laiha linha fronteira, entaun problema hotu ne’ebe iha ligasaun ho assuntu rai, la ejisti ona iha ita le’et. Maibe hare ba realidade hatudu katak problema disputa rai kontinua akontese iha ita nia moris loron-loron. Hanesan akontese iha fatin barak liliu kapital Dili nomos distrito sira ne’ebe besik ho nasaun vijiñu Indonesia. Disputa rai ne’ebe agora dadauk akontese iha ita le’et maka Distrito Enclave Oe-cusse, Ambeno. Problema ne’e akontese iha Sub-distrito Nitibe, Suku Beneufe Citrana, area Naktuka.

Disputa rai iha area Naktuka desde primeiru, Segundo, terseiru no ikus liu maka kuartu governu konstitusional ne’ebe lidera husi Primeiru Ministru Kay Rala Xanana Gusmão mos to’o oras ne’e seidauk bele resolve. Lahatene tanba saida?! Atan hau rasik mos lahatene ida tanba saida maka problema disputa rai kotinua akontese iha area Naktuka. Ita makas tebes iha parte troka governu iha kada semana, maibe fraku tebes oinsa atu resolve problema disputa rai entre nasaun rua, Timor-Leste no Indonesia. Ema barak hateten katak area Naktuka nudar area disputa entre Timor-Leste ho Indonesia. Liafuan disputa ne’e laos hasai ka deklara deit husi parte balun, maibe inklui mos Oe-cusse oan Jorge da Conceição Teme nudar Sekretario Estado Rejiaun Autonomia Oe-cusse. Nia rasik deklara ba publiku atraves meius komunikasaun sosial tantu jornal, TV no radio ne’ebe ejisti iha nasaun Timor-Leste alias nasaun LAFAEK katak area Naktuka nudar area disputa. Ne’eduni defisil tebes atu resolve. Ho deklarasaun hirak ne’e hatudu mai ita katak lahatene bainhira los maka bele resolve.

Bazeia ba historia no administrasaun kolonializmu Portugal hatudu katak liña fronteira Oe-cusse parte norte iha Noemuti, Miomafo, maibe depois tama ba fase invasaun militar Indonesia ba Timor-Leste iha 7 Desembru 1975, Indonesia komesa dada ka muda tan liña fronteira husi Noemuti mai fali iha Oelfaub, Nusa Tenggara Timur (NTT). Aliende ne’e Indonesia mos muda tan liña fronteira Oe-cusse parte sul husi Timaub, Kupang mai fali iha Oe-poli ne’ebe besik malu ho area Naktuka, Citrana. Tuir fali mai Indonesia hadau tan Fatuk Sinai ne’ebe partense ba Timor-Leste ho rajaun kuandu to’o tempu udan povo sira iha Oe-cusse liliu Suku Beneufe, Citrana sempre hala’o serimonia ritual hodi husu udan be’en. Area sira ne’ebe mensionadu iha leten agora nudar propriedade Indonesia nian. Problema foun fali maka agora sira (Indonesia) komesa buka maneira oi-oin atu oinsa bele hadau tan area Naktuka ne’ebe sai nudar propriedade Timor-Leste nian. Maibe, Jorge da Conceição Teme kontinua konsidera Naktuka nudar area disputa. Ne’eduni it abele hatete katak area Naktuka bele tama fali ba Indonesia hanesan area sira seluk iha leten. Kestaun ne’e bele sai realidade wainhira lideransa estadu ka governu Timor-Leste la defende.

Foin lalais akontese tan insidente ida iha Naktuka. Iha insidente ne’e militar Indonesia (TNI) hamutuk 28 tama ba area ne’e no konsege destrui uma sosia rua ne’ebe oferese husi Ministerio Solidariedade liu husi Sekretariu Estadu Dezastre Naturais. Problema akontese ho rajaun area Naktuka partense ba Indonesia nune’e Timor-Leste laiha direitu atu halo konstrusaun uma iha fatin ne’eba. (Timor Post Edisaun). Normalmente kada xefi estadu iha nasaun ida sempre defende nia rai pedasuk sira ne’ebe haketak husi tasi. Maibe, iha Timor-Leste agora halo ita konfujaun itoan. Sei laos defende ba liña fronteira, saida los maka xefi estado ne’e atu defende?! Ida ne’ebe maka xefi estado ida tenke defende?!

Ho problema disputa rai entre Timor-Leste ho Indonesia kontinua akontese fo hanoin mai ita katak funsionamento husi Ministerio dos Negosius Estranjeirus laiha ona. Tanba desde ukun a’an Ministerio ne’e hahu ona aktividade ida ho naran negosiasau liña fronteira entre rai rua. Laos negosiasaun liña fronteira deit inklui mos surat ida naran boarding pass. Boarding pass katak kuandu sidadaun Timor-Leste hakarak hala’o vijita ida ba familia ruma iha Indonesia la persija uja passaporte, maibe bele uja deit boarding pass. Maibe, buat hirak ne’e hotu laiha serteja. Buat hirak ne’e ho finalidade jero porsentu. Entaun durante ne’e hala’o viajen ba Indonesia hodi halo negosiasaun kona ba assuntu hirak ne’e gasta deit orsamentu ne’ebe aprova husi Parlamentu Nasional. Kriteria ida atu hetan independensia total ka atu sai nudar nasaun soberanu ida maka linha fornteira tantu iha rai maran no tasi tenke klaru. Kriteria ne’e vigor ba nasaun hotu iha mundu. Antes ita hetan independensia iha loron 20 Maio 2002, Timor-Leste hakilar no haklalak ba mundu tomak katak ami pronto ona atu sai nudar nasaun foun ida iha mundu ho rajaun fronteira hotu-hotu define klaru tiha ona. Nomos oferese sakrifisiu barak ona liu husi fakar iha fatin barak durante okupasaun Indonesia. Ho ida ne’e Timor-Leste hetan apointes barak husi nasaun lobuk ida mundu atu realiza mehi povo ida ne’e nian katak, tenke indepensia duni.

Nasaun sira ne’ebe sai nudar apointes ba Timor-Leste hodi hetan independensia monu ba laso Timor-Leste nian, tanba falta kriteria ida maka seidauk priense. Kriteria ne’e maka linha fronteira tantu fronteira terrestres no fronteira mar seidauk klaru. Bazeia ba deklarasaun porta voz departamento estranjeiru Indonesia, Yuri Oktavian Thamrin katak 4% area fronteira Indonesia-Timor-Leste ne’ebe maka seidauk hotu sei halo sterilijasaun (disterilkan). “ Akordo ne’e nudar resultadu husi sorumutu entre Indonesia-Timor-Leste iha 11 Outubru 2005” katak Yuri.

Area fronteira ne’ebe maka seidauk hetan solusan metodolojia maka MANUSASI ho naruk 3 kilometrus no parte Noe Bessi mais ou menus 4 kilometrus. Nune’e mos sei iha area ne’ebe maka seidauk identifika ka survey maka area SUBINA ho 20 kilometrus. Iha tempu hirak liu ba akontese insidente iha area ne’ebe maka seidauk resolvidu. Insiden ne’ebe akontese tuir Yuri, katak insidente ne’e nudar mal persepsaun husi sidadaun ne’ebe maka sente konfujaun kona ba liña fronteira terretres entre Timor-Leste ho Indonesia. Depois sorumutu 11 Outubru, parte rua hasoru malu fali iha 2 Novembru 2005 nafatin deskuti kona ba problema liña fronteira, insidente ne’ebe mosu nomos koalia kona ba area sira ne’ebe seidauk hetan survey. Sorumutu hala’o ho objetivu Sub Committee on Border de Marcation and Regulation ne’ebe maka hamahon a’an iha komite fronteira nia okos alias Joint Border Committee (JBC). Sorumutu hirak ne’e to’o oras ne’e seidauk iha rejultadu ne’ebe halo ita satisfas.

Kuarta, 30 April 2008 Ministru Interior Indonesia Mardiyanto hateten katak liña fronteira Timor-Leste-Indonesia sei iha etapa negosiasaun. “Iha parte balun maka seidauk hetan pontu konkordansia” katak Mardiyanto hafoin simu vijitasaun Ministru Administrasaun Estatal Ordeanamentu Teritoriu, Arcangelo L.G Leite iha edifisiu departementu Interior, Jakarta (30/4/2008). Eis governador Jawa Tengah ne’e rekoñese failansu balun relasiona ho area markasaun liña fronteira. Fronteira ne’ebe maka seidauk iha parte mota no area sira seluk seidauk klaru. “ To’o oras ne’e seidauk hetan pontu konkordansia” katak nia.

Iha sorumutu entre Ministru Estatal Arcangelo Leite ho Ministru Interior Indonesia Mardiyanto nafatin seidauk hetan pontu definitivu kona ba markasaun liña fronteira Timor-Leste-Indonesia. Ho ida ne’e iha Kinta 01 Maio 2008 Primeiru Ministru Kay Rala Xanana Gusmão rekonhese seguransa iha fronteira terrestres Timor-Leste-Indonesia sei fraku tebes. PNTL, tuir, Xanana katak seidauk hala’o serbisu optimu atu kontrola sidadaun sira ne’ebe maka viola fronteira nasaun rua. “Iha ‘jalan tikus’ barak iha fronteira sira aproveita hatama (Menyelundup) nesesidades bajiku” Xanana Gusmão hateten lia hirak ne’e wainhira vijita edifisiu Muhammadiyah Malang, Indonesia.

Tersa, 09 Maret 2010, komisaun I Dewan Perwakilan Rakayat Republik Indonesia (DPR RI) haleu ka vijita lokalijasaun fronteira entre Timor-Leste ho Indonesia ne’ebe maka sei disputa hela entre nasaun rua. “Ita sei hare direitamente area fronteira ne’ebe maka sei disputa hela entre nasaun rua,” katak vise presidente Komisiaun I DPR RI, Tubagus Hasanudin, iha Kupang.

Iha area fronteira ha’at maka sei sai nudar disputa entre Timor-Leste ho Indonesia. Hanesan Suku Noelbesi iha Kabupaten Kupang, Bijaela Sunan ho Oben iha Kabupaten Timor Tengah Utara (TTU) inklui Malibaka iha Kabupaten Belu. Tuir Tubagus, problema fronteira nasaun rua nudar isu internasional ne’ebe maka persija atensaun spesial hodi resolve. Neduni, komisaun I sei hadia data husi governu local ho kondisaun iha baze. “Data primeiru husi governu local ne’ebe iha ami sei hadia bazeia ba kondisaun iha baze” hateten Tubagus.

Tubagus subliña, nia rasik sei foka liu ba prosesu resolve fronteira rai maran entre nasaun rua. Ida ne’e importante tebes tanba fronteira marina sei difisil liu tan atu resolve wainhira fronteira rai maran seidauk klaru. Aliende problema fronteira, subliña deputadu bankada PDI Perjuangan ne’e katak, nia rasik mos sei tun direitamente hodi hare besik liu tan kondisaun moris povo iha area fronteira entre nasaun rua. (http//pt. www.tempointeraktif.com)

Falta tinan rua Timor-Leste sei hala’o tan eleisaun jeral hodi forma governu foun. Atan hau nudar Oe-cusse oan fiar no espera katak governasaun ne’ebe lidera husi Primeiru Ministru Kay Rala Xanana Gusmão ho nia Ministru Negocios dos Estrangeiros faila total hodi resolve disputa rai iha area Naktuka, Distritu Oe-cusse, Sub-distrito Nitibe, Suku Beneufe. Laos iha area Naktuka deit, maibe inklui fatin sira seluk ne’ebe to’o oras ne’e sei nudar area disputa. Ho kestaun hirak ne’e hamosu Question Mark (?) ba knar no funsionamentu xefi negosiasaun fronteira ne’ebe hamahon a’an iha Ministeriu Negosius Estranjeirus nia okos. Tanba governu ida ne’e faila ona espera katak kintu governu konstitusional bele forma planu ida ne’ebe definite atu oinsa bele resolve problema disputa rai iha Timor-Leste, laos Naktuka deit.

)* Hakerek nain eis Jornalista STL
oki98@ymail.com & roqui@lusa.pt