VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Bloku Unidade Popular Associação Popular Monarquia Timorense Kmanek Haburas Unidade Nasional Timor Oan Partido Esperança da Pátria Partido Socialista de Timor Partido Desenvolvimento Popular Congresso Nacional para a Reconstrução de Timor-Leste Partido Republicano União Democrática Timorense Partido Democrata Cristão Partidu Movimento Libertasaun Povu Maubere Partidu Libertasaun Popular Partido Democratico União Nacional Democrática de Resistência Timorense Partido Unidade Desenvolvimento Democrático Partido Timorense Democratico Frenti-Mudança Partido Social Democrata Centro Ação Social Democrata Timorense Partido do Desenvolvimento Nacional Frente Revolucionaria de Timor-Leste Independente
NICOLAU LOBATO
“O povo de Timor-Leste está reconstruindo com o seu próprio suor, com o seu próprio sangue uma pátria revolucionaria democrática, uma terra livre para gente livre”.

Espelho da Realidade
A Esperança Nunca Morre
TIMOR-LESTE



Interview with Fernando Lasama de Araujo: On the road to democracy, where the streets have no name
UKUN HAMUTUK?
Sorumutu "Meja Bo'ot" nakonu ho "bua-malus". Sei lo'ok ba malu hela hodi mama hamutuk.
Fretilin
Fretilin - CNRT
Fretilin - PLP
Fretilin - PD
Fretilin - KHUNTO

 
 
   

terça-feira, 4 de maio de 2010

Opinaun - Dia 3 de Maiu: “Liberdade ba Imprensa no Direitu atu Hatene“

Husi: Hugo Fernandes

Iha dia 3 de Maiu tinan-tinan, komunidade jornalista, instituisaun jornalismu, no mos intidade barak iha mundu mak selebra Loron Mundial Ba Liberdade da Imprensa (LMLI) ka World Press Freedom Day (WPFD). Tinan ne’e LMLI, sei halao iha Brisbane, Australia.

Universidade Queensland, sai nudar uma nain ba Konferensia Annual ne’ebe UNESCO mak fo tulun ne’e, iha loron 2 to 3 de Maiu de 2010. Tema ka topiku ba tinan ida ne’e kona-ba: “Liberdade ba Informasaun: Direitu atu Hatene.“ Iha konferensia loron rua ne’e sei koalia kona-ba dezafiu ba media foun sira, ameasa sira ba liberdade iha Pasifiku du Sul no mos kona-ba Akontabilidade. Eventu ne’e sei taka ho adopta Deklasaun Brisbane kona-ba Liberdade da Imprensa.

Topiku tinan ida ne’e relasiona direitamente ho baze legal-konstitusional ba ema ida-idak iha Timor-Leste no mos ba kna’ar media massa nian iha Timor-Leste, nudar Konstituisaun RDTL Artigu 41 kona-ba Liberdade Imprensa no Komunikasaun Sosial Nian no Artigu 40 kona-ba Direitu Sidadaun ba Informasaun. Semana kotuk, Timor Post, publika tiha ona hau nia opiniaun ida kona-ba Liberdade ba Imprensa no mos Direitu ba Informasaun.

Atu hahu opiniaun ne’e, hau lembra iha tinan 2003, bainhira reprezenta Timor-Leste - nudar Chefe Editor ba „matebian” Talitakum - iha Konferensia no Selebrasaun LMLI iha Manila, Filipina. Nudar panelista designadu iha konferensia ne’e, hau koalia kona-ba oinsa mak jornalista, media massa, sosiedade sivil, sidadaun ida-idak no estadu bele garante Libardade ba Imprensa iha Timor-Leste. Tuir hau nia observasaun, se mak tenki garante liberadade ba imprensa, tenki hahu uluk husi jornalista no media massa sira, liu husi kompriende didiak Kode Etiku Jornalismu. Kode Etiku ne’e mak sei hodi jornalista no media massa sira hases a’an husi akuzasaun no kestaun ne’ebe ema barak hato’o kona-ba kredibiliade no profesionalismu jornalista no media massa. Realidade hatudu katak iha Timor-Leste ema ka entidade balun konsidera katak jornalista sira la profesional. Tan ne’e mak hau fiar katak, ho jornalista ne’ebe professional no media massa ne’ebe independente, bele garante kredibilidade no mos bele garante liberadade ba imprensa.

Maibe nudar jornalista no ema media massa, hau mos rezeita idea ida atu kriminaliza jornalista ruma tamba media massa nia publikasaun. Hau mos hato’o katak, atu resolve disputa ruma ne’ebe mosu entre jornalista – media massa ho ema ka intidade ne’ebe mak sente hetan disvantazen husi publikasaun ruma, persiza hari’i Press Council ka Konselu ba Imprensa ida ne’ebe independente. Konselu ba Imprensa ne’e mak sei sai nudar mediador ida hodi resolve disputa ka keisa ne’ebe ema ruma ka instituisaun ruma hato’o. Hau mos hato’o katak Konselu ba Imprensa ne’e mos tenki sai nudar Ombudsman ida hodi sai nudar instituisaun self-censorship ba media sira. Konselu ba Imprensa ne’e tenki iha puder legal ida hodi bolu jornalista no media massa sira hodi hato’o observasaun ruma ba publikasaun ka programa ruma husi televizaun ka radio mak kontraria ho kode etiku jornalismu ka viola direitu konstitusional ema ka instituisaun ruma.

Infelismente, to’o ohin loron Timor-Leste seidauk hanoin atu hahu harii Konselu ba Imprensa maibe aprova tiha ona Lei Politika Komunikasaun Sosial ne’ebe iha parte balun husi Politika ne’e sei hetan kritika husi komunidade jornalista no media iha Timor-Leste.

Iha Timor-Leste, hahu kedas iha 2002 to agora, iha tendensia katak, Liberdade da Imprensa ne’e preokupasaun jornalista, media no sociedade civil sira deit no la’os preukupasaun governu/estadu no governante sira. Ne’e bele hare husi saida mak dala barak keisa husi jornalista sira katak susar tebes atu asesu ba informasaun kredibel husi governante sira.

Iha parte seluk, iha mos tendensia husi governante no membru orgaun soberania no mos sidadaun balun mak keisa katak, jornalista sira sempre hakerek la tuir informasaun ne’ebe lolos no husi fonte ne’ebe la kredibel. Ho rasaun hirak ne’e, iha entidade balun mak hili atu la koalia ba jornalista sira tamba sira iha apriori ida katak, jornalista iha Timor-Leste ladun iha kapasidade ne’ebe diak. Debate ba tendensia no akuzasaun ne’ebe mosu, bele sei la hetan soulusaun ne’ebe hotu-hotu bele simu.

Iha parte seluk, maske sensura la’os problema bo’ot ba jornalista sira, realidade hatudu katak governu koko atu kontrola media sira liu husi la fo asesu ba governu nia informasaun no limite officiais estadu sira atu sai nudar fonte ba informasaun ba jornalista. Resultadu husi hahalok ne’e ita bele hare katak, nutisia ne’ebe mak media massa sira publika, mosu husi angle ida deit ou hanesan deit. Ne’e tamba jornalista sira iha deit opurtunidade atu hetan informasaun liu husi konferensia da imprensa ka eventu ofisial ruma ne’ebe mak organizadu. Tamba ne’e mak hau mos haree katak, persiza duni aleinde harii Konselu ba Imprensa, iha Timor-Leste, presiza mos hahu debate kona-ba Lei hodi Asesu ba Informasuan ka Access to Information Law, ne’ebe sai nudar etapa ka pasu kritiku hodi hadia liberdade da imprensa iha Timor-Leste.

Ita mos tenke rekunese katak, media massa imprimi (printing) iha Timor-Leste dalabarak mak uza sensasionalismu iha nutisia nia titulu (headlines) atu garante katak leitor sira influensidu, no husi aspeitu bisnis nian sira sei bele imprimi nutisia iha loron aban. Sensasionalismu bele deit sai nudar strategia ba media sira atu kompete malu, maibe dalabarak mak sensasionalismu media massa nian ne’e la korela ho substansia nutisia ne’ebe sira publika. Ne’e iha parte ida, bele loke opurtunidade ba ema atu la fiar tan media no konsidera katak media uza nia liberdade atu bosok.

Iha Loron Mundial ba Liberdade ba Imprensa ba tinan ne’e, haree ba nia tema prinsipal iha leten, refleta duni katak, Liberdade ba Imprensa no Direitu Atu Hatene ne’e importante duni. Tamba ne’e hau fiar katak, bainhira iha Timor-Leste iha ona mudansa ba hanoin ida katak se mak bele garante liberdade ba imprensa ne’e hahu kedas husi jornalista, media massa, sosiedade civil, sidadaun ida-idak no governante sira, ita tama ona ba implementasaun Artigu 19 Deklarasaun Universal Direitus Humanu ne’ebe haraik ba direitu ba ema ida-idak nian hatoo nia opiniaun, buka, simu no hatoo informasaun liu husi meius sa deit sein iha limitasaun, sei bele mos realize iha Timor-Leste ho slogan ida: Press Freedom is Your Freedom ka Liberdade ba Imprensa mak Ita Nia Liberdade.

Hugo Fernandes
Observador Media Massa
nahabere@yahoo.com

Sem comentários:

Enviar um comentário

Nota: só um membro deste blogue pode publicar um comentário.