Dala Ida Tan Fenomenolgia “Kitsch”: Anotasaun ba Pe. Martinho Gusmão nia Hanoin Sala

)* Martinho Sacadura

Depois de halo analise ba Pe. Martinho Gusmão nia artigo publica iha Timor Post (11, Maio. 2010) ho título “Dala Ida Tan Fenomenologia “Kitsch”: Anotasaun ba Sr. Martinho Sacadura nia Hanoin”, terpaksa hau tenki gaba duni Padre Martinho ninia beikten. Porque?

Primeiro nia la buka rebate hau nia hanoin, subar hotu parte sira be hau rebate nia hanoin sira sem fundamento e rediculo liu tan dehan hau beikten tanba incomoda tebes ninia matenek. Hau sente orgulho tanba Pe. Martinho dehan iha Timor hau mesak mak beikten, ida ne hanesan orgulho ida pois bele marca diferença ida. Infelizmente, hau triste, tanba Pe. Martinho mos afinal beik hanesan hotu hau, iha nebe halo diferença ne mos lakon tanba ninia hakerek baseia barak iha imaginação hodi desacredita media em geral.

Segundo buka “tebak” tun tebak sa’en, maibe “tebak” sala tan to’o “tembak” rasik nia ain-klor hodi dehan hau nia naran Martinho Sacadura la’os naran original, mas naran clandestina nian. Falta de precisão, pois tiru la acerta alvo.

Terceiro, so ema nebe Pe. Martinho conhece deit mak bele intelectual ho observador, ida nebe nia la conhece la’os intelectual ho observador, pois nia defende ninia tese nune: “iha intelectual ho observador Timor oan nia let, naran ida ne’e [Martinho Sacadura] desconhecido”. Tanba desconhecido la’os intelectual nem observador. To’o agora hau la proclama an nudar intelectual e labele duni tanba hau la’os ema intelectual mas sai observador de’it hanesan qualquer ema ida, hau acha bele, porque ita moris ho realidade social nebe iha, ita bele observa acontecimentos nebe passa lorloron. Observação los ou sala ne problema seluk, pois nem ema hotu nia observação ba acontecimento ida hanesan.

Quarto, Pe. Martinho dehan “husi artigo ida ne’e hatudu katak Sacadura ne’e escritor di’ak ida, ka toman ona hakerek iha jornal. Maibe primeira vez mak nia mosu iha jornal. Entaun, senhor ne’e bele fohin mak mai husi rai liur eh jornalista ida nebe toman ona hakerek maibe uza identidade falsu atu ita labele hatene (ka, tauk hasoru debate aberta)”. Hau hakfodak tebes oinsa ema ida dehan matenek ne bele monu iha conclusão simplista ida. Oinsa mak nia hatene hau escritor diak ho jornalista? Keta nia hanoin so ema jornalista deit hakerek diak no ema la jornalista hakerek la diak? Ne conclusão beik nian. Iha mos contradição boot iha nia hakerek, dehan hau “toman ona hakerek iha jornal, depois iha parte seluk dehan [foin] primeira vez hau mosu ou hakerek iha jornal”. Hatudu tan nia beik dala ida, pois oinsa ema ida foin primeira vez hakerek iha jornal e nia toman tiha ona hakerek iha jornal? Claro que hau nunca hakerek iha jornal duni. Conclusão sira ne hotu hatudu de’it buat ida, tuir ami mambae nia lian dehan “thun le pa siuk naeri” (ignorância atrevido=sok pintar) ou “par sut gar de sek maudi” (sente an matenek no considera ema seluk beik=merasa diri pintar dan menggagap orang lain bodoh). Perigoso tebes quando ema sente an de’it matenek mas na realidade la matenek ida. Hau hatene Pe. Martinho nudar bibi atan, maibe buat nebe hau la hatene maka ida ne: Padre Martinho mak hein bibi ou bibi mak hein Padre Martinho, porque susar atu distingui hosi nia maneira hakerek nebe nakonun ho “tebak-menebak” sira ne.

Quinto nia obriga ema para hatene nia hanoin, maibe nia haluha katak ema buka hatene mak buat nebe hakerek sai, la’os buka “tebak” ema nia hanoin iha kakutak laran. Hau fiar la iha cientista ida buka tebak Albert Einstein nia hanoin maibe sira buka estuda buat nebe Alberto Einsten hakerek no hosik hela. Hosi ne sira buka desenvolve teoria nebe iha ou hamosu teroria ho conceito foun. Padre Martinho parece tau an as hanesan ho Maromak hodi hatene ema nia hanoin hotu, mas tuir ami nia lian mambae dehan “sutan kleo’o” (hanoin “miring=inclinado”). Hau mos la hatene Pe. Martinho nia hanoin mak ida nebe, tanba buat sira nebe mosu iha nia artigo, la’os nia hanoin, maibe hanoin F. Nietzsche ho Jean Piaget nian. Interpreta ema sira ne nia hanoin. Hau la hatene se ema sira ne sei moris ou lae, caso sei moris e hetan Pe. Martinho nia interpretação, hau la hatene se sira concorda ou lae. Porque ema barak mos interpreta sala ema nia hanoin no ema nain sira quando hatene interpretação sala, sira desmente kedas.

Sexto, karik Padre Martinho matenek duni, tuir lolos nia hatene interpreta, pois, hau dehan nune iha hau nia primeiro artigo “... mai corrige deit parte balu hosi Padre Martinho nian hanoin balu nebe la iha fundamento ou banaliza sasan no conduz opinião publica ba buat nebe sala”, ne signifika la’os hanoin hotu-hotu sala. Sira nebe hau corrige mak sala no sira be la corrige ne los. Hau la comprende tanba sa mak buat fasil oan ne’e mos Padre Martino la percebe, e ema beikten sira hotu hatene, ida ne halo hau tenki gaba tan Padre Martinho nia beikten tan dala ida.

Sétimo, Pe. Martinho hanoin so ema foin mai hosi liur deit mak bele hakerek e sira nebe iha rai laran la hatene hakerek, por isso, nia afirma nune’e: “Entaun senhor ne’e bele fohin mak mai husi rai liur...”. Ne hatudu tan dala ida nia beikten iha ninia conclusão tanba subestima Timor oan hotu iha rai laran ninia capacidade.

Oitavo, hau la defende media massa nia papel, hau defende buat nebe los, la’os ida halo conclusão falso katak media massa maka “influencia labarik sira sai tolokdor ho media massa sira maka provoca divorcio”. Hau la hatene Pe. Martinho le livro cientifico ruma ou le romance ruma. Karik le livro romance ruma mak ninia conclusão hanesan ne então hau fiar, tanba hakerek tuir imaginação nian, la’os tuir estudos ruma nian.

Padre Martinho matenek duni, maibe precisa semana hira kedas hodi responde hau nia artigo. Hau nia artigo publika iha Fórum Haksesuk desde 14 de Abril. Hau haruka ba Timor Post mos iha altura neba kedas. Hau la fiar Pe. Martinho foin le hau nia artigo iha segunda semana, 10 de Maio, e foin responde. Semana hira ona hau visita hela deit Fórum Haksesuk hodi hein Padre Martinho nia resposta, maibe la iha. Foin horiseik mak colega ida fo hatene hau katak Padre Martinho responde hau nia artigo iha Timor Post e nia haruka scann copia ida mai hau. Parece sei ba consulta ho livros ho matenek sira seluk hodi bele responde ema beikten ida nia artigo karik!? Por isso, lori semana tolu resin foin hetan resposta. Ida ne mos publico bele nota, intelectual ida sekelas Pe. Martinho kok “suri dek ma toro lek mon” (susah payah menjawab artikel si bodoh) Sacadura, apalagi subar tiha parte ida halo correcção ba nia hanoin sira sala. Ou buka investiga hela Martinho Sacadura ne’e se no hela iha nebe. Mas quase fulan ida investiga la hetan, ho desesperado tem que tebak de’it ona, tanba la descobre terpaksa dehan Martinho Sacadura naran clandestina nian. Halo ita nia kabun sai makili fali. Hau nia identidade ho endereço completo iha Redacção e Redacção labele fo ba ita boot tanba sira cumpre código de conduta jornalismo nian.

Hau tem que reconhece duni hau la desenvolve conceito Kitsch iha hau nia artigo ida uluk ho ida agora. Problema ba hau la’os conceito ne mak sala, buat nebe sala mak ita boot la usa base cientifico ruma hodi justifica conceito ne’e. Oinsa mak hau bele fiar Presidente PN (ema ida de’it), decano ida (ema ida de’it), inan-aman hira (numero la jelas), estudantes UNTL hira (numero la jelas) bele representa sociedade Timor tomak katak la contente ho livro Ministério Educação nian? Ninia base cientifika iha nebe? Posição Presidente Republica, Primeiro Ministro, Membros Governo, deputados tomak, rede feto, ho sociedade sivil tomak ho sidadaun anónimo sira nia posição iha nebe? Labele kaer amostra musan oan hira ne hodi halo conclusão hanesan ema Timor hotu sente desgosto hotu kedas. Sira be la gosta livro ne bele interpreta hanesan fenómeno ida, maibe maioria nebe nonok de’it ne fenómeno ida hotu ou lae? Fenómeno ida como facto ida, maibe facto ne ninia representividade to’o iha nebe? Diak liu ba estuda tan, se lae “sok pintar” maibe cria tan “kitsch” ida, tanba armado matenek no considera ema seluk beik maibe hakerek arbiru de’it, porque base la iha.

La gosta media ida hodi generaliza media hotu-hotu aat, media hotu-hotu mak halo labarik sira sai tolokdor, media sira maka provoca divorcio, ne mos hamosu de’it “kitsch” tanba padre sira mak dehan defende buat verdade ho moral, maibe conduz ema ba hanoin sala sei cria de’it kitsch. Padre Martinho bele hanoin nia hakerek sira ne furak no ema tolan hotu, maibe haluha tiha katak sei hamosu kitsch tanba la hakerek buat be verdade nian. Hau intervem atu tau buat verdade iha nia fatin, la’os halo generalização hodi denegri media sira nia imagem.

Hau hatene diak tebes conceito “kitsch” hanesan mos qualquer Timorense ida. Padre sira la ho kareta vidro metan mos bele cria “kitsch” hotu, tanba ema bele desconfia iha “kiss” ruma iha kareta laran karik? Padre sira dansa kalan tomak, bele hare como buat normal ida, gosto tebes ba Padre sira, mas bele mos hamosu kitsch tanba sosiedade Timor nian seidauk toman hare Padre sira dansa. Husi buat oan sira ne bele explica ona percepção “kitsch” nian, neduni lalika mai ho arrogância dehan ema seluk la hatene conceito Kitsch. Los duni, iha alemão nia língua mak ema la hatene, maibe se temi “gurikh” tuir ami mambae nian, concerteza mambae sira hatene. “Gurikh” ninia sentido hanesan alemão nian “kitsch” nebe signifika ita hanoin halo buat ida diak ou los, maibe buat diak ho los ne bele lori descontentamento, desgosto, depresa, repudio ho seluseluk tan ba ema seluk. Tanba ida ne mak hau dehan, ema la eskola mos hatene Kitsch nebe la seluk ida hanesan “gurikh” ne.

Ema hatene hela buat ne nusa mak tenki obriga hela de’it ba ema no repete beibeik? Ne la significa ita considera ema Timor beik neduni ita tenki hanorin hela de’it kitsch ne lorloron ba sira? Iha caso ida ne hau bele to’o conclusão Padre Martinho sente nia an ema matenek boot no ema seluk beik hotu neduni nia tenki hanorin. Padre Martinho nia sente an matenek ne la’os ema seluk mak dehan. Mas nia mak foti an rasik liu hosi afirmasaun nebe hau hakerek ho letra mahar/bold e: “Hare husi ne’e mak hau hanoin, katak, reasaun husi Deputadu balun no inan/aman sira, esplikasaun Vice-ME, reasaun tutan husi Presidente PN, inklui dekanu husi UNTL no estudante UNTL ne’e seriu teb-tebes; la’os “buat bai-bain deit”. Klaru, sira rasik la hatene saida mak Kitsch. Maibe, hau mak hatudu katak reasaun hasoru livru ME ne’e mak Kitsch, ho nivel ida ne’ebe “reflete liu sira nia kualidade nudar intelektual, riku ho norma no valor, no nakonu ho sensibilidade”.

Baseando ba afirmação Pe. Martinho nia iha leten, ita nota ho claro tebes, nia hatudu an nudar matenek boot, no considera Presidente Parlamento, decano UNTL ho estudantes UNTL, mesak beikten hotu, tanba nia mak “hatudu” ou seja hanorin sira sobre “kitsch”. Padre Martinho dehan iha Timor hau mesak mak beiten, maibe iha ninia primeiro artigu nia dehan ema hotu mesak beikten, tanba ne’e nia mak “hatudu dalan”. Falta de consistencia. Maibe ami mambae, inklui Presidente Parlamento ho decano no estudantes sira hosi grupo etnico mambae, ami hatene hela “gurikh”, neduni ami la precisa Pe. Martimho nia lição, sa tan lição sira “menyesatkan”. Hau fiar katak iha grupo etnico sira seluk iha Timor laran mos hatene ida ne’e.

Lição sira menyesatkan mak tuir mai ne’e, nebe hau corrige tiha ona iha hau nia primeiro artigo mas hau repete tan dala ida hodi Pe. Martinho labele nega hanesan São Pedro nega Jesus to’o dala tolu.

Padre Martinho iha ninia primeiro artigo afirma nune’e: “… wainhira inan-aman sira la kuidadu labarik sira atu hare publikasaun iha Sabadu-Sabadu, ka tip-tip sex, gosip-gosip selingkuh, entaun labarik sira aprende katak publikasaun jornal nian ne’e “buat baibain”, “normal”, la vulgar, la erotica. Ita hare took, ohin loron inan-aman barak laran susar no lamenta, tan sa mak labarik ki’ik oan sira tolok malu iha luron hodi halimar deit. Balun lamenta, Eskola Katolika nia estudante sira mos tolok taka-matan nian! Hau hanoin, ida ne’e rezultadu husi media massa ne’ebe Sabadu-Sabadu halo publikasaun massiva kona ba isin molik ka na’an lulik sira, ne’ebe infelizmente, jornalista sira defende an hodi ‘liberdade de imprensa’, ‘liberdade de espresaun’!

-

Hau nia resposta iha primeiro artigo hodi corrige Pe. Martiho nia hanoin nebe sala e agora hau hatun fila fali e la muda virgula ida mak ne: “Conclusão Padre Martinho nian iha leten be dehan publicação jornal sira nian iha Sabado-Sabado mak halo jovem sira ohin loron sai tolok dor, hanesan los makikit joga anin, tanba joga mamuk. Padre Martinho se nudar ema critico no sensibilidade makas, tuir lolos halo uluk pergunta de partido sira ne: Jovem sira hahu tolok malu arbiru iha dalan hahu hosi sa tinan? Jornal sira publica buat sira be Padre Martinho fo naran tip-tip sex ou buat sira kama-laran ne hahu hosi sa tinan. Hosi pergunta rua ne mak bele hatene katak media mak influencia jovem sira tolok ka la’os. Nune mos bele husu, jovem sira be iha foho la le jornal mos tolok ne hetan influencia hosi se ou saida?

Hau hanoin Padre Martinho iha dificuldade boot atu hatan ho preciso (tepat) ninia acusação ne tanba baze la iha. La iha factos ho dados hodi justifica ninia acusação ba media sira.

-

Atu fo hanoin deit Padre Martinho ho ema hotu nebe hit an to’o Amerika, Europa, no Australia katak, jornal, revistas, CD, DVD sobre buat sira pornografica, ema fa’an iha quiosque jornais ho revistas nian forma nadodon tuir estrada ibun, no balu fa’an iha loja ki’ik to’o centros comerciais bobot. Makas liu tan ida ne iha cinema proprio ba filme sira azul ka porno nian. Jovem sira la’o liu ba mai iha estrada sira, sira hare no balu curioso to’o sosa buat pornografico sira ne. Se bele siik, hau hanoin Padre Martinho mos hare hotu jornais ho revistas pornograficas sira ne tanba kleur iha Italia ou Europa. Hau nia pergunta mak ne, nusa mak iha rai boot sira nee, buat hotu-hotu nakloke e la subar hanesan Timor nian nebe sei limitadu tebes, nusa mak ita nunca rona malae oan sira la tolok malu arbiru iha dalan ho fatin publico sira? Nusa mak Padre Martinho mos la sai ema tolok dor tanba la escapa hosi jornais ho revistas sira ne momento sei estuda iha Italia?

-

Hare ba buat hirak ne, hau hanoin se Padre Martinho honesta no objectiva karik, tuir lolos reconhece katak edukasaun hosi inan-aman, eskola ho Igreja mak fraco, la’os tanba media. Se tanba media, tuir lolos iha America, Europa ho Australia aat liu, tanba jornais ho revistas hakerek buat sira ne aat liu dok Timor-Leste nian.

-

Diak liu lalika soe sala ba medias sira enquanto hun hosi fraquezas sira ne ita haree momos hela. Ladun diak buka bode expiatoria ou kambing hitam, tanba ne la educativo.

-

Perguntas sira seluk nebe precisa nia resposta mak ne: Tan sa educação moral la forti iha Timor Leste? Hahu hosi sa tinan mak edukasaun ba moral sai fraco? Hau hahu hosi ida ikus. Educação moral sai fraco hahu hosi tinan nebe Timor oan sira tama iha funu laran. Bele dehan hahu hosi 1975 no durante periodo ocupação Indonesia nian. Tanba primeiro, funu halo inan-aman balu mate, balu fahe malu, balu inan-aman fahe malu ho oan sira, nune mos iha biban nebe inan-aman sira serbisu hotu, la iha tempo hodi fo atenção ba oan sira.

-

Segundo escola sira mosu iha funu laran ladun fo atenção ba educação moral. Terceiro ambiente, militar Indonesia sira tolok malu arbiru iha jovem sira nia oin. Militar sira nia presença iha quinto-canto Timor tomak nian la hanesan jornais nebe concentra de’it iha fatin balu. Influensia hosi mos militar ho policia sira Indonesia nia oan nebe tuir inan-aman sira estuda iha Timor nebe koalia buat ki’ik ho bot taka ho “puki main” ho seluseluk tan.

-

Karik media, tuir lolos ema Ocidente nia oan sira tolok door aat liu ita dok, maibe ema la tolok malu iha dalan, iha fatin publico ou iha uma tanba educação moral nebe ema hanorin ho diak hosi ki’ik. Ema nia oan halo sala, sira la baku, maibe sira bolu hodi explica katak halo hanesan ne sala no los tenki hanesan neba. La’os hirus no baku, maibe buka fo resposta nebe educativo ba nia oan sira”.

-

Parte seluk nebe hau corrige Padre Martinho nia hanoin sala seluk e buka bode expiatoria hanesan afirmação nune: “Ita simu ka la simu, fenomena ‘divorcio’ (kawin-cerai) ne’ebe hahu ataka jerasaun foun ohin loron mai duni husi publikasaun media massa. Konseptu Familia nudar Sagrada hahu hetan konflitu boot no todan. Familia barak mak hasoru situasaun ‘terorizadu’ ida ne’e, laran kanek tan failla hametin sira nia domin, fuan moras tan tenki hateke ba infidelidade (ketidaksetiaan) husi fen-laen sira. Hau le livru psikologia lubuk ida kona ba “divorcio”. Impresionante tebes, katak, razaun balun sai banal hela – sira hakarak sai hanesan diva pop sira ne’ebe mosu bebeik iha media tan divorcio. Maioria ema sira ne’ebe hasoru divorcio mos dehan katak ideal familia ne’ebe mosu iha sinetron, publisidade (iklan) no foto oi-oin halo sira la iha kbiit atu atinji (hetan). Entaun, sira buka alternativa iha “liur”. A lias, selingkuh. Tan sira la sente “at home” iha uma kain ne’ebe sira harii. Sira sente “at home” iha media komunikasaun nia laran”.

-

Hau nia resposta iha primeira artigo e agora la muda virgula ida mak ne: “Exagera tebes quando Padre Martinho hola conclusão simplista ida hodi dehan divorcio provoka hosi media massa. Tuir estudos nebe hau hatene, divorsio baibain provoka hosi factor social, economica ho biologica. Se maka bele garante mai hau katak antes de media massa moris iha Timor-Leste, la existe divorcio?

-

Se ita fila ba ita nia cultura relação social nian, uluk liu ema rua atu kaben, la’os entre feto ida ho mane ida, maibe entre familia rua. Mane nia inan-aman ba husu feto ba nia oan mane. Familia feto nia aceita maka acontece ona casamento ne, maibe dala barak feto ho mane, ema rua be atu kaben la conhece malu ho diak. Sorti ba sira be kaben tiha ona foin mosu amor entre sira, maibe desgraça boot ba sira nebe la hadomin malu. Tanba la conhece malu ho diak no la entende malu neduni kalan loron hurun malu to’o balu tahan labele no fahe malu. Balu fali mesmo la iha domin ba malu, maibe tenki aguenta tanba de’it iha oan ona nune mos lori sacramento casamento hodi futu ho obriga tan atu ema labele fahe malu, maski ema rua ne la hadomin malu tiha ona. Feto ho mane barak sei terus, la hadomin malu ona maibe obrigado hela hamutuk nafatin tanba dehan kaben ona liu hosi Igreja. Se mak hakarak terus nafatin hodi cumpre de’it sacramento casamento hodi halo ema seluk contente maibe nia an rasik terus boot? So ema hanoin la racional mak hakarak mantem casamento ida nakonun ho violencia ho infelicidade.

-

Tanba ne hau la contra divorcio. Ema kaben ho forma familia atu moris diak, la’os moris sai terus no aat. Ema hotu buka moris diak ba an tanba ne quando nia sente la feliz ona nia tenki hosik hela terus ne hodi buka fali moris diak. Hau hanoin la’os crime quando ema hakarak buka moris nebe halo nia laran hakmatek ho sinti diak. Buat nebe halo ita moris feliz mak: hau kontente, imi kontente e ita hotu kontente. Maibe se imi mesak kontente e hau la feliz ho terus hela, hau tenki buka liberta hau nia an, tanba hau mak terus, la’os imi.

-

Familia balu hakarak iha oan, maibe oan la iha nafatin, ne mos resulta hotu iha divorcio. La iha ema ida hakarak kaben e lakohi iha oan. Objectivo ida hosi kaben ne mak atu iha oan. Ne significa oan importante liu do que casamento hosi Igreja ou registo civil. Se oan la iha ona, sira fahe malu ho kaben fali ho feto ou mane seluk hodi iha oan. Se mak lakohi iha ninia descendencia hodi continua ninia linhagem familia nian. La iha ema ida hakarak ida ne. So Padres sira de’it mak dehan labele kaben ho iha oan, maibe kaben hosi nakukun laran no haluha ou lakohi usa preservativo ou Kondom tanba kontra usa preservativo neduni halo isin rua feto balu no iha oan.

-

Problema economica mos halo familia sai rahun. Familia balu hakarak moris baibain de’it, no balu hakarak moris diak. Fen ho la’in nian rendimentu la hanesan mos sai problema. Rendimento economico nebe ki’ik no susar satisfaz necessidade economica lorloron nian, halo familia dala ruma la entende malu no trata malu ho insulta malu lorloron nebe hamosu pressão psicologica makas iha nebe bele resulta rasik iha divorcio. Familia balu lanu loron lanu kalan, joga loron joga kalan to’o osan hotu mohu no fa’an hotu sasan uma laran nian, buat hirak ne mos contribui hotu ba divorcio.

-

Problema psicologica ho biologica mos contribui ba divorcio. Tuir fiar Timor nian no doutrina Catolica nian, ema labele halo relação sexual antes de kaben. Infelizmente, depois de kaben, afinal mane impotem ou panaleiro ou feto mos iha moras balu be la satisfaz nia la’en, iha nebe halo sira sai stress ho frustrado, tanba mane la consegue hala’o ninia papel hanesan fen ho lain. Buat ne mos provoca problema sira kama-laran nian, tanba ne mak tenki iha conhecimento sobre buat hirak ne hodi bele evita. Ida ne la’os buat tabu ida, no iha psicologo sira especializado iha sexologia nian hodi halo acompanhamento ba casal sira hodi oin-sa mak satisfaz malu ho diak hodi labele hamosu problema nebe resulta ba divorcio. Buat hirak hanesan ne mak precisa publica sai iha media hodi ajuda familia sira resolve ninia problema, la’os ba bando ou subar tiha.

-

Globalização ho modernidade halo ema hotu ohin loron curioso atu hatene buat hirak nebe sira la hatene, tanba ne precisa educação nebe los hodi tulun ema hili buat be los ba nia an, la’os lori ai-kulit tuan hodi resove problema moderno nian nebe complexo liu.

-

Quado ema la hadomin malu ona, kadeli kazamentu nian nebe dehan halo ho osan mean no sagrado tebes mos folin la iha, tanba buat nebe ema ida-idak buka mak felicidade”.

-

Iha parte ida tan Padre Martinho dehan publicação sobre pedofilia pratica hosi cardeais, bispos ho padres sira hanesan ataca Igreja Catolica: “Krizi iha vokasaun ba Vida Religiosa – hanesan publikasaun kona ba pedofilia no abuzu seluk – hatudu mos oinsa media massa hili duni atu ataka Igreja Katolika (keta haluha: publikasaun kona ba pedofilia no kazu abuzu seluk hanesan parte ida husi komersiu no industria! La’os tan media massa iha konsiensia moral kona ba buat diak, maiba tan prinsipiu bad news is good news [berita-berita buruk adalah kabar baik])”.

-

Primeiro Padre Martinho tuir lolos labele halo generalização katak media ou ema sira critica pratica pedofilia hanesan ataca Igreja Catolica porque Igreja maka sarani tomak. Media ho ema critico sira, iha caso ida ne la critica sarani sira maibe critica cardeais, bispos ho padres pedofilos sira. Padre Martinho nia hanoin iha leten ita nota momos, oin-sa mobiliza sarani sira hodi subar cleros pedofilos sira. Mobiliza sarani sira hodi defende pedofilo sira iha sorin ida e iha sorin seluk lori sarani sira hodi halo pressão ba media ou ema critico hodi labele sobu sai hahalok amoral sira hosi padres, bispos ho cardeiais pedofilos sira halo.

-

Padre Martinho hakarak dehan media sira sala tanba loke sai hahalok at sira ne, se Media sira la loke sai, se tan mak atu loke sai? Se la loke sai ohin loron padres pedofilos sira sei subar an metin e nem iha desculpa ruma hosi Papa. Se la iha pratica pedofilia nusa mak Papa tenki husu desculpa? Ne significa pratica ne iha duni e sei iha barak liu tan mak seidauk loke hotu. Husu ba media sira loke nafatin. Karik medias la hanoin moral e hanoin negocio deit, tuir lolos sira hakerek buat sira pornografia de’it, lalika hakerek buat seluk. Padre Martinho hakarak dehan, so cardeais, bispos ho padres sira deit mak dono moral nian, tanba ema seluk mak koalia ne la’os moral maibe tanba hakarak ataca Igreja e hakarak hasae oplah hodi hetan osan barak. Problema mak ema sira dehan dono moral nian, sira mak pratica uluk hahalok amoral hanesan halo abuso sexual ba labarik sira”.

-

Hau la sei explica tan sobre educação sexual, tanba iha hau nia primeiro artigo claro no completo hela iha neba. Caso seidauk comprende, favor ida, husu ba F. Nietzsche ho Jean Piaget explica uluk, quando la comprende mak mai Sacadura Beikten bele explica ba matenek boot Pe. Martinho Gusmão.

Agora hau sente contente rona Pe. Martinho afirma nia mos defende educação sexual. Ita hein nia la sei kontra métodos sira contraceptivos ho usa preservativos ou “kondom” tanba ida ne halo parte educação sexual hodi evita moras at ho gravidez indejesados. Mas hau tem que dehan, iha primeiro artigo Pe. Martinho la claro iha ninia posição, pois nia afirma nune: ”Hau atu konkorda oituan, wainhira ME publika livru kona ba ita ema nia isin, ka parte lulik sira nudar “Estudo do Meu”. Atu nune’e, labarik sira hahu aprende husi ki’ik. Ho ida ne’e mak sira bele iha sensibilidade kona ba “… respeito pela dignidade da pessoa humana”, inklui sira nia isin-lolon atu la bele sai uzu komersial. Atu bele hetan “respeito” ne’e, entaun tenki iha mos edukasaun ne’ebe diak no forte. Maibe, los duni katak ita nia sensibilidade-cultural (lisan ka norma adat nian) seidauk toman atu ko’alia sasan sira ne’e ba labarik sira”.

Baseia ba afirmação ne, ita bele afirma, uluk Padre Martino seidauk konkorda, porque expressão “atu concorda oituan” hanesan posição ida duvidoso. Parece agora nia muda ideias ona no concorda total ne, quem sabe, Sacadura beikten nia ideias sobre educação sexual mak klaru liu e influencia matenek boot ne karik? Hau labele tebak ema nia hanoin, tanba hau la’os Maromak, so Padre Martinho maka bele tebak ema nia hanoin tanba nia bele nakfilak-an ba buat hotu-hotu.

)* Observador Problemas Sociais - Email: martisacadura@gmail.com

PS - Post Scriptum - conceito "beikten" nunca se uza para caracterizar a qualidade intelectual de um ser humano. Ninguem nasce inteligente mas nunca antes concebido como "beikten". Quero com isso dizer que "o autor estava fora de si quando escreveu este artigo. Algo vai contra outros conceitos 'fenomeno kitsch, educacao, sexualidade e cidadania' que o proprio autor tem defendido". Lamento! leitor FH