BALANSO POLITICO- EKONOMICO E SOCIAL 2009

Synopsis

Hakerek nain, liu husi artigo ida ne, konvida leitores sira atu halo digestaun ba ambiente politico–ekonomiko no social durante tinan 2009 . Durante fulan 12 no loron 365 governasaun AMP liderado husi Xanana Gusmao (XG) : halo ona saida atu hadia povo nia moris, liu husi programas de desenvolvimento ka lae; seguransa no estabilidade lao diak ka lae; manifestasoens de deskontemento povo nian mosu iha tinan 2009 ka lae; ofensivas politicas husi Oposisaun Maioria Parlamentar (OMP/FRETILIN) hetan sucesso ka lae; standard moris povo nian diak liu ho govenasaun FRETILIN ka lae.

Ho lia fuan badak, tinan 2009 governo AMP liderado husi PM XG nia politica, iha duni evidensias reais balu hatudo katak governo kontempla duni: grupo mais vulneraveis (fraku): ferik, katuas, aleizadus; veteranos da resistensia sira, martires da patria sira nia familias sira; seguransa no estabilidade diak liu governo Dr. Mari Alkatiri nian ka lae; povo sira hetan simpatia ho actual governo ka lae liu husi programas IV Governo nian.

Analisis

Politica pratika nebe ita hotu-hotu hare, assiste no akompanha iha Timor Leste ka iha kualker parte do mundo, ita bele simplifika ba aspectu rua: (1) ukun nain sira (governantes) usa poderes atu habokur sira nian-an, familiares no kronis sira; neste kasu governantes sira hanesan Primeiro Ministro ka Presidente, la respeita ka viola leis da boa governasaun, hodi usa ditadura no autoritarismo hanesan kilat hodi defende sira nia-an husi hahalok foer no koruptu.

Kuando governantes sira sente sira nia poder ameasadu husi povo entaun sira rekore meios de violensia (fahe kilat) forma grupos armados hodi defende sira nia interesses politicos, hanesan kasu ka krise de Abril de 2006, nebe sakrifika ema inosentes barak nia vidas, ba governantes sira nia ambisoens politikas atu kaer nafatin poderes.

Governantes sira ho karateristikas ditadores, sira nia komportamentos normalmente arrogantes, anti-democratikus, gosta lori ameasas hodi halo tauk governados sira. Exemplos hanesan ne'e, ita hotu hatene, governasaun Dr.Mari Alkatiri (MA) husi 2002- 2006. (leaun toba keta bo'ok, tsunami tun husi foho, hau maka patraun, hau maka iha direito tomak. etc..) Mesmo ke Partido FRETILIN lakon eleisaun 2 (Presidensial ho Legislativa) teimoso kaer nafatin kargu, SG, lakohi resigna volutariamente hanesan lideres democraticos sira.

Aspecto (2) Enkuanto governantes democraticos, respeita lei no tau intereses nasionais bo'ot liu interesse pessoal. Gosta lori dialogo, debate hodi buka solusaun ba problemas ka konflitos, gosta rona no buka aprende matenek husi ema seluk. La halo pratikas de KKN iha governasaun, buka tau mekanismos hodi kombate KKN hanesan estabelese Komisaun Anti-Korupsaun, areas rurais, nakloke ba kriticas husi sociedade civil.

Karateristikas Governantes sira nebe preokupa povo nia moris diak, rungu-rangan la mossu hanesan demonstrasoens hodi hatun governo, situasaun hakmatek, desenvolvimento aselara ba oin, investimento husi liur mos tama, nota kresimento ekonomiku ida dinamiko. Governo esforsa atu desenvolve infra-estruturas basikas hanesan: estradas, pontes, eletrisidade, be mos, saneamento, eskolas, postos sanitarios, kria mos fasilidades ba agrikultores sira hasae sira nia produsaun, buka meios oin sa loke kampos de empregos.

Governantes sira nebe ho attitudes hadomi povo, hare povo nia moris susar no terus, hetan konfiansa forte no makas, husi eleitorado sira kuando too periodu de eleisaun, votantes sira fo nafatin sira nia votos de konfiansa ba governantes sira hodi kaer ukun nafatin.

A. Governasau AMP iha 2009

.

Aspetu + relevante no signifikante husi 01 de Janeiro too 31 de Dezembro Seguransa no Estabilidade buat ida real ema hotu-hotu sente iha sira nia moris loro-loron. La nota demonstrasaun massal husi sociedade sivil (jovens) sira, hatudo sira nian deskontetamento ba politica IV Governo.

Faktus hadudo investimento bo'ot rua hahu iha tinan 2008 hanesan konstrusaun de Timor Plaza ho Orsamento besik $ 5 milloens no Pelikan Paradise Hotel de 5 estrelas ho valor besik $ 80 millioens.

Regista mos evento ida importante, kona ba Eleisaun de Lideres Komunitarias nebe lao ho sucesso bo'ot, nebe kores Partidos Politicos tau ses ba sorin, votantes sira ho animosidade bo'ot ba urnas de votos hodi hili sira nia lideres.

Iha fulan Agosto PM XG halo gebrakan bo'ot ida kona ba projectos ho naran “Pakote Referendu” nebe serka de 700 Empresas halo parte. Too 31 de Dezembro, 200 kompanhias atinge 100%, 400 e tal atinge 80%. Porsaun kiik ida maka atraza, tanba kondisoens udang.

Estrada Bairro Pite too Manleuana tau hotu alkatraun, passageiros sira kontente tanba la iha ona raikuak halo kareta tiding makaas; hanesan mos estradas Assalaitula-Ossu, Kassa–Jumalai, Lolotoe nian, Laga-Baguia, kuak bo'ot sira taka tomak.

Ho reparasoens sira, tempo de viagem bele habadak ona, lamentasoens passageiros ba estradas aat, resolve ona, passageiros ba sira nia deslokasoens hetan ona komfortibilidade.

Eletrisidade iha Dili, “lakan-mate” reduz barak ona, keizas ka kritikas husi konsumidores sira nebe ita assiste iha ekran TV TL mos menos barak ona.

B. Ofensivas Politcas Bankada FRETILIN 2009

Iha 2009 regista ofensiva politca husi Bankada Oposisaun Maioria Parlamenta (OMP/FRETILIN) iha Parlamento Nasional hasoru Governu AMP, nebe Bankada FRETILIN halo keixas ba Tribunal de Rekursso kona ba Inconstitucionalidade:

1. Kriasaun de Autoridade Nasional de Petroleo (ANP) nebe FRETILIN alega inconstitusional inisiativa no desisaun Governu hodi estabelese ANP;
2. Eleisaun Lideres Komunitarias nebe governo deside labele lori kores Partido nian; Tuir FRETILIN katak desisaun labele lori bandeiras Partido nian ba eleisaun Lideres Komunitarias ne “viola” Konstituisaun;
3. Hari Komissaun Inkerito Parlamentar kona ba sosa foz husi Ministerio Comercio Turismo Industria (MCTI) atu akuza korupsaun ba governu AMP;
4. Mosaun de Censura Parlamentar kona kasu Maternus Berek nebe PM XG assume responsabilidade total.

Interpretasaun Tribunal de Rekursu (TR)

.

1. Tribunal de Rekursso, orgaun kompetente tuir Konstituisaun atu interpreta kualker lei nebe governo kria, tuir dalan Konstituisaun ka lae. Se tuir lei, muito bem programa governu nian bele lao ba oin nafatin. Se la tuir lei, ou viola, program governu nian tenki para imediatamente. Em relasaun ba Kriasaun Autoridade Nasional do Petroleo, tuir interpretasaun Bankada FRETILIN sente katak Inkonstitusional, ne'e duni sira rekorre ba TR hodi fo legitimasaun ba sira nia argumento. Resultado interpretasaun hussi TR dehan katak Kriasaun Autoridade Nasional de Petroleo “konstitusinal” signifika la viola lei.

2. Kona ba Eleisaun Lideres Komunitarias, Bankada FRETILIN rekorre ba TR ho razaun katak viola lei Konstitusional. Lideransa FRETILIN fiar metin katak se la uza Bandeira FRETILIN kandidatus sira nian hetan derrotas iha fatin barak. Ho fundamento ida ne'e Bankada FRETILIN lori kasu ne'e, ba TR hodi hetan ligitimasaun ba sira nia exigensias.

Resposta husi TR dehan katak lei nebe Bankada AMP aprova iha Parlamento Nasional, “Constitusional” tanba tama ba parametros lei inan. Infelizmente, Bankada FRETILIN hetan 2a. derrota.

3. Komissaun Inkerito Parlamentar ba Foz

.

Issue sosa foz, sai polemika bo'ot iha media nasional no Internasional (Australia). ABC mos hatama nia kanuro tohar kona kompra de Foz iha Timor Leste. Alvo principal nebe propaganda FRETILIN husi (DR.Teixeira) no media ABC dirigi maka PM XG pratika, korupsaun hodi fo projecto foz ba nia oan feto Zenilda Gusmao. Issue ne'e lao tempo naruk, iha media nasional no Asutralia, mas ho tempo, mesak malirin deit tanba evidensias la forte.

Komisaun ne'e hari tiha ona, ho komposisaun mista husi Bankada hotu-hotu, maibe liu tiha ona 60 dias resultados husi Inkerito sei dauk sai ba publiko. Parese dados nebe Bankada Oposisaun hetan la favor ba sira. Se a favor karik DR.Arsenio Bano ho DR. Teixeira ibun bo'ot, la para iha media nasional no ABC Australia hodi akusa no difama PM XG.

4. Mosaun de Censura

.

Issue Maternus Berek (MB) nia implikasaun bo'ot tebe-tebes. Ema ida nia kasu dait ba buat barak. Se XG la assume kasu ne'e ho koragem no inteligensia bele kausa instabilidade bo'ot iha areas fronteiras no relasaun diplomatica entre Indonesia ho Timor Leste bele sai tensa.

Ponto central polemica maka interesse Nasional versus Justisa. Bankada FRETILIN tau em kestaun aspecto Justisa, enkuanto Governo koloka aspectu interesse Nasional. Buat rua ne'e los hotu, maibe bainhira tau iha dasi, tetu ba Konjuntura Politica actual, interese Nasional relevante liu do ke Justisa ba momento presente.

Aspetu Justisa bele tau nafatin iha konsiderasaun no agenda atu halo justisa ba ema hotu nebe involve iha assoens de krimes. Ema barak maka involve iha krimes graves. MB mos iha lista maibe nia suspeito ida nebe la dun iha autoridade bo'ot de Komando. Apenas agente ida de ezekusaun iha terrenu. Se julga entaun hahu husi sira bo'ot uluk maka tun mai. Problema ida ne'e komplexu tebe-tebes sei lori tempo naruk.

Bankada FRETILIN aproveita emosaun husi vitimas sira atu doko PM XG nia governu ho tentativas ba eleisaun antesipada atu hatun IV governu, husi poder exekutivo. Lideransa FRETILIN mos konfia katak, explora di-diak kasu MB nian, bele konvida ka provoka demonstrasaun mossu, no directamente tau em risko kredibilidade governasaun XG nian nebe tuir versaun FRETILIN viola Justisa tanba la respeita Konstituisaun RDTL.

Live debate iha Parlamentu Nasional nebe TVTL fo kobertura ba publiko tomak , kona ba issue Governu liberta MB, Bankada Oposisaun usa argumentos oi-oin, hodi ataka governu ho lia fuan kroat desmedidas.

PM XG to'o nia vez atu koalia, responde ho kalma no prudensia hodi klarifika ho argumentos logikos no rasionais, fundamento – liberta MB husi prisaun Bekora.

Bankada FRETILIN ho esperansa bo'ot, konta Victoria. Bainhira to'o votasaun, resultado hatudo kontra 39, nune Mosaun de Censura la passa. Deputados husi Bankada Oposisaun iha sira nia deklarasaun de votos ho frustrasaun balu hotar deputados AMP balo ho cinismo hasai lia fuan sarcasmos de gozos ba PM XG.

.

C. Aspecto Ekonomico

.

Reformas politica fiscal de taxas de merkadorias de importasoens husi 12% tun mai 5%, importasaun de viaturas husi 36% mai ba 5%, corporate tax 30% tun mai 10%, impostos ba salarios de vensimento de < (inferior) $ 500 livre husi taxas, sai hanesan “impulsu” bo'ot atu estimula actividades ekonimas atu floresce.

Por outro lado, despesas publikas ho montante bo'ot mos sai hanesan factor determinante ba kresimento ekonomico. Indikadores maka cidade Dili, ita enfrenta “kongestaun trafico de viaturas“. Se halo viagem ba interior ita hare antennas parabolicas, uma foun, geradores kiik iha uma kain barak, reparasaun de estradas a nivel nasional nebe permite emprega ema barak hodi hetan osan.

Politica Povo kuda no Governo sosa, fo animo no motivasaun atu populsaun sira aumenta sira nia produsaun ba produtos hanesan : mina nu, hare, batar, koto, foremungu, forekeli ,etc.

Estradas rurais nebe Komissaun Europeia finansia ba areas rurais fasilita ba populasaun sira halo eskoamento sira nia produtos ba merkado local, no Distrital por ultimo to'o Dili.

Impacto Pakote Referendu

Pakote Referendu PM XG nia inisiativa hodi komemora tinan 10 Referendu Popular 30 de Agosto de 1999.

Substancia vital Pakote Referendu:

1. Descentralizasaun de Procurement nebe lori tempu naruk hodi implementa projectos. Ministerios barak mesmo ke tinan Fiskal hahu iha 01 de Janeiro, por razoens diversas to'o Agosto ka Setembro CPV no kontratu mos la hahu. Alem de ida ne'e, konsentrasaun de processu de pagamento centralizado iha Ministerio de Finansas mos factor ida, nebe kontribui ba atrazu de implementasaun de projectos.

2. Factor de demora ka atrasu mos akontese iha processo de tenderizasaun nebe, iha influencias oi-oin. Iha kasus balu, tender projecto halo dala rua ka tolu. Influencias husi parte oi-oin ba adjudikasaun de projectos maka kausa demora de implementasaun de projectos. Nota mos, empresas sira nebe hetan “aman sarani” maka hetan projectos barak. Projectos linhas ministeriais Empresarios sira nebe manang projectos influencia directa Ministros (as) ho tendendias politica partidaria.

3. Issue de KKN mos, konstitue fundamento ida forte, hodi PM XG, buka forma foun hodi kombate. La iha ona meios + efectivos atu kombate “virus” de KKN kona ba adjukikasaun de projectos. Sistema ida sofistikada ona, atu kombate directamente bele tau em risko, estabilidade Governu AMP. Tanba dirigentes politicos barak halo parte iha Governo AMP, logikamente ho projectos buka aumenta sira nia eleitoradu ba eleisaun de 2012 nebe falta deit tinan 2.

4. Teste de konfiansa ba empresarios sira sai mos preokupasaun governo XG, se empresarios Timor oan iha duni kapasidade ka lae. Ho medidas de adjudikasaun directa la liu husi prossesu tender, PM buka atu hatene, sistema ida nebe mais apropriadu atu ezekuta projectos sira lalais, ho efisiencia no kualidade.

5. Resultados final husi Pakote Referendu 31 de Dezembro, ezekusaun de projectos total 80%, + de 200 projectos maka atinge ona 100%. Hare husi indikadores hirak ne'e, ita hotu bele konklui katak, sistema adjudikasaun directa tuir kategoria empresas ida-idak nian, bele sai modelo ida diak ba futuru hodi adopta.

Uma vez hatene ona modelo de adjudikasaun directa ba projectos maka diak, importante maka buka identifika frakezas nebe hassoru iha experiensia Pakote de Referendu tinan 2009, kona ba kolesaun de dados, desenhos, BOK, sistema de monitorizasaun no inspesaun ba kualidade de projectos, sistema de pagamentos mais pratiku no rapido.

Komentarios no feed-back husi Empresarios barak, sira louva no kongratula ba sistema do Pakote Referendu ba tinan 2010.

D. Aspetu Sosial

1. Kamadas social vulneravel, kontente ho Pakotes de Asistensia Sosial grupo Vulneraveis. Deslokados sira hotu kompletamente husik tendas de akampamento, familia ida-idak fila fali ba sira nia hela fatin.
2. Konflito entre jovens iha territorio tomak la iha, deskontamento geral em formas de demonstrasaun publika hasoru IV Governo mos la akontese iha tinan 2009.
3. Jovens primeiro grupo aranka ba Koreia do Sul hodi hetan treinamento, estudantes primeira remessa ba Philipinas hodi estuda.
4. Vensimentos funsionarios publikos aumenta iha tinan 2009, hanesan mos ba PNTL ho FDTL. Rekrutamento foun ba jovens sira tama FDTL 700 ho klasifikasaun, lisensiados ba Ofisiais, sira ho habilitasaun ensino sekundario (SMA) ba klasse de Sargentos, sira ho ensino Primario ba Soldados. Komponente Femenino mos toma iha konsiderasaun ba Rekrutamento Forsas Armadas.
5. Aspeto Social ita hotu bele konklui katak maioria 99% kontente ho politica IV Governo nian tanba ne'e, maka disturbios ka perturbasoes la mossu iha tinan 2009.
6. 1% representa husi Oposisaun maka la kontente tanba la kaer poder. Sira nia desgosto ka deskontentamento legitimo no normal iha sociedade democraticu.

Direito Grupo Oposisaun reage negativamente ba politica IV Governu ne'e importante no vital atu Governu consciente ba nia komportamento no assoens, kompativeis ba lei no normas, atu labele abusa poderes. IV Governo nia politica iha 2009, ba aspetu Social positivu tanba IV Governo fo atensaun makas ba kamadas sociais hotu-hotu, hanesan kondisaun “sine quo non" indispensavel atu assegura no garante seguransa no estabilidade nasional atu alkansa bem estar social.

Konklusaun

Tinan 2009, tinan ida kritiku ba Governu AMP assegura no garante estabilidade governativa. Ho esforsos dispensados, IV Governu AMP ho sucesso bo'ot ultrapassa duni desafios bo'ot atu halakon “eleisaun antesipada”;

Seguransa no Estabilidade, factor determinate atu garante ezekusaun de programas no projectus domesticos, no fasilita investimento externu . Nune'e iha tinan 2009 investores bo'ot rua investa duni iha Timor Leste. Timor Plaza ho Pelikan Paradise ho valor investimentu cerca de US $ 85 milloens;

IV governu kossegue ho sucesso impleta Orsamento Geral do Estado, 84, 5% ho valor nominal $ 575, 5 milloens (sources: Ministerio das Finansas) 31 Dezembro de 2009.

Esmagadora maioria povo Timor Leste, satisfeito ho programas do IV governu ba tinan 2009 . Timor oan hotu-hotu espera katak tinan 2010, IV governu, halo mossu programas barak liu nebe iha relasaun directa, no vital atu hadia povo nia moris iha cidade ka iha areas rurais.

Votos de: + empenho + sacrifios + esforsos + dedikasaun atu alkansa lia fuan sucessu iha tinan 2010 ba PM XG ho nia membros Governo tomak, Directores no funsionarios sira hotu.

.

Vicente Maubocy
- Analista Politika