Target Estrategia Fretilin ho Mari Alkatiri (Malkatiri) oras ne´e dadaun maka Parlamentu Nasional

Nodik* Alberto Reis Maklear

Koligasaun interesse ho Presidente Republika José Ramos Horta

Presidente Republika (PR) José Ramos Horta sei disolve Parlamentu Nasional, se wainhira la iha Quórum, ka deputadu sira falta bebeik. PR ninia kritika destinu liuliu ba AMP (Aliança Maioria Parlamentar). Fretilin husi ninia Sekjen Malkatiri to´o ba ninia chefe Bankada Aniceto Guterres aproveita diskursu infeliz PR nian hodi dehan PN la funciona ho diak, neduni buka oinsa maka explora maximu funcionamentu PN.

Hatan expekulasaun husi PR no bankada Oposisaun maioria parlamentar (OMP), Presidente Parlamentu Nasional (PPN) iha ninia deklarasaun iha sub-distritu Hatulia, Distritu Ermera (09/05), ne´ebe TVTL haktuir liu husi Telejornal katak “La iha ida maka sei koalia konaba krizi politika iha rai laran. Se krizi tenke hakat liu lai hau ka langkahi dulu mayat saya", dehan Lasama (TVTL, 11/05/2009).

Aproveita frakesa oinsa maka hatudu ba publiku konaba falta quórum iha PN

Fretilin ho Mari Alkatiri dala barak maka explora falta «Quórum» iha PN tamba deit sala ne´e AMP nian. PR mos boleia ba issu ida ne´e, wainhira PR José Ramos Horta ba halo dialogue ho populasaun iha Oe-Cussi iha fulan Marsu nia laran. Dehan PR se la iha quórum iha Parlamentu Nasional be-beik hau sei «Disolve PN», nia kritika liliu ba Partidus CNRT no PD. Arguementa tan katak PSD ho ASDT ne´e badinas ka disciplina tamba sira nia lideres hanesan Avo Xavi no Ir.Mario Carrascalao mesak ema disciplina deit.

Se karik argumentu PR José Ramos Horta nian maka los karik analogia ba CNRT ho PD tamba deit Kay Rala Xanana Gusmão ho Fernando Lasama de Araújo mesak ema baruk tem deit? Tuir Padre ida (lakohi dehan naran) waihira hasoru malu ho Deputadus balun husi AMP dehan nune´e:”Lalika fiar ba José Ramos Horta tan, tamba kalan nia mehi saida aban nia koalia kedan. Maibe nia la hatene buat ne´ebe nia koalia ne´e ninia impaktu ne´e bot tamba deit nudar figura nº. 1 Estadu nian. Haktuir tan Padre ne´e, José Ramos Horta afektadu psikologikamente”.

Iha plenariu loron 15 Fulan Junho, husi AMP ba OMP (Oposisaun Maioria Parlamentar) hotu-hotu hananu ho lian ka muzika hanesan ho lian fuan hanesan: AMP arepende fó tulun ba José Ramos Horta sai nudar PR no OMP dehan PR ne´e ibun mamar,.. sst.

Tan saida maka José Ramos Horta atake Presidente CNRT ho PD? Tamba koresponde ba duplo ambisaun José Ramos Horta nian: Ida; Target José Ramos Horta atu ba kaer kargu PM iha 2012 no Rua; Target José Ramos Horta, oinsa maka bele re-kandidatura ba segundu mandatu nudar Presidente Republika iha 2012. Objektivu rua ne´e atu atinji buka atakes ba ninia adversarios direktus no forsas politika ne´ebe pertence ba.

Maibe Presidente Republika se iha duni autoridade moral nudar Cefe Estadu labele uja sasukat ba avalia orgaun soberania seluk ho falta «Quórum» hodi disolve Parlamentu Nasional. Iha circunstansia saida maka PR iha knar no kbit hodi disolve Parlamentu Nasional. Tuir Konstituisaun RDTL(K-RDTL) iha ninia artigo…º (konaba disolve Parlamentu Nasional), iha situasaun sira tuir mai ne´e: governu ne´ebe minoria la assegura estabilidade institucional, programa governu la passa dala rua tu-tuir malu no mosaun censura ba governu. Iha kontextu ne´e Presidente Republika iha knar tuir K-RDTL hodi disolve Parlmanetu Nasional.

Problema quorum iha Parlamento Nasional, ne´e kestaun orgaun soberania seluk, PN iha ninia rejimentu rasik hodi regula deputadus sira, se maka indisciplinadu ka faltousu hetan sansoens tuir regimentu. Maibe kritika ka litika PR nian ba PN no ameasa hodi disolve ne´e buka sani ka le hanesan agenda politika ne´ebe maka PR José Ramos Horta atu atinji maka: Ambisaun atu sai cefe Governu iha 2012 no rekandidatura ba mandatu ba dala ruak nudar Presidente Republika.

Tuir sasukat produtividade iha 1ª lejislasaun to´o oras ne´e, ne´ebe maka produtivu liu. Produs lijislasaun hira, partisipasaun aktivu husi Membrus Parlamentus iha haksesuk malu, no sst. Se kompara lejislatura uluk ho oras ne´e, hare husi participasaun no produsaun lejislasaun iha saltu qualitativu. Maske se falta mos barak konaba inicitiva lejislasaun husi ita nia parlamentares tamba dala barak maka sira ladun produs Lei rasik maibe hein deit draft Leis ne´ebe haruka husi Konseilu Ministrus, ne´e fakta ida ne´e ita labele nega no preisa biban naruk hodi ultrapassa.

Bandeira monu, AMP mos monu? MAlkatiri maka monu karik?

Festa restaurasaun independência iha loron 20 Fulan Maio tinan ida ne´e, wainhira hatun bandeira, bandeira kois no monu, Malkatiri interpreta hodi hakilar katak: ”«Bandeira monu ne´e hatudu katak Good bye AMP ho Xanana»”. Malkatiri kala sai duni sik dor,maibe ninia sik iha Timor-Leste la los hotu,waihira AMP foin atu ukun nia dehan AMP dura fulan nem (6) deit, nia hasae ba tinan ida (1), oras ne´e ukun kompleta ona tinan rua (2) ona. Neduni Mari Alkatiri ninia sikdores ne´e faila maka barak liu. Dala ruma tamba Malkatiri nunka rekonyece Timor ne´e la iha lisan karik. Oinsa maka Malkatiri bele sik sinais iha rai ida, se nia rasik la fiar ba Lisan Timor nian?

Governu Malkatiri nian Selu Assessores Internasionais (AI´s) ho Osan Povu nian

Iha biban ne´eba maka Mari Alkatiri kaer ukun selu AI´s ho osan povu nian. Hare tabela tuir mai ne´e: Tuir mai hakerek AI´s sira ne´ebe maka Governu anterior selu hodi Osan Povu Maubere nian, hakerek tuir dadus ne´ebe maka hatou husi konferensia imprensa ne´ebe PM Kay Rala Xanana Gusmão hatou iha tersa-feira (12/05), temi balun deit tamba dossiê bot ida ho naran sira ne´ebe manan osan bot,hili deit AI´s nain 7:

1. Arquitetu ida, ho tempo ba kontratu badak, nia manan $426 mill USD
2. Asesor ba Taxas iha Ministeriu Finansas, nia manan $330 mill USD
3. Xefe ba projektu Aprovisionamentu, nia manan $396 mill USD
4. xefi ba Projektu Finansas, nia manan $392 mill USD
5. Asistencia Juridika ida ho part time, nia manan $210 mill USD
6. Konsultan ida iha Agrikultura, nia manan $568 mill USD
7. Konsulta ida ba loron 23,nia manan $23 mill USD

Estratégia fase roupa Foer no etika politika:

Mari Alkatiri nudar líder historiku no fundador ba Nasaun Timor-Leste, la hatudu ninia sentidu estadu no exemplo diak ba jerasaun foun atu banati tuir lalaok ba kaer ukun. Tamba Mari Alkatiri waihira ba visita ba liur, sempre fase roupa foer ka lori sasan uma laran ba fase iha ema seluk nia uman. Iha fulan Junho tinan 2008, Mari Alkatiri ba halo visita iha Portugal, iha ninia diskursu hatudu katak ema ne´ebe maka tau iha nia ulun «Vingansa no ódios» makas ba ninia adversários politikus sira, hare husi sorin ida. Husi sorin seluk, hatudu katak Mari Alkatiri kalan toba la dukur,oinsa maka bele fila ba Ukun lalais,buka rumus ka formula oi-oin hodi hatun lalais Governu AMP no PM Kay Rala Xanana Gusmão, liu husi provoka krisi institusional, krisi politika, Marcha da Paz, no sst.

De faktu iha koalia (diskursu) no De Yure waihira husu Osan:

Mari Alkatiri dogmatiza tiha ona iha diskursu oficial katak Governu AMP ne´e de faktu maibe husi kotuk Mari Alkatiri hakerek husu osan rekonyece De Yure Governo AMP.

Hare husi Karta ne´ebe maka Malkatiri haruka ba Ministério Finanças (19/02 i 25/08 2008) hodi husu osan no facilidade ba hadia nia uman, selu seguransa,no sst. Hare lolos Malkatiri nia autoridade moral no koerencia ne´e iha ne´ebe. Obriga militantes sira seluk hakilar nafatin katak “Governu AMP ne´e de faktu”, enquantu nia rekonyece Governu AMP husi kotuk hodi tane liman. Haruk membrus Parlamentares husi Fretilin la lika simu kareta Estado maibe nia rasik simu Kareta Prado husi Governu tamba nia interpreta «Lei Imoralidade» ne´e nia rasik produs hodi fó beneficiu ba nia an maka «Lei Pensaun Vitalicia».

Marsa ba Paz vs marcha ba kotuk:

Iha fulan Outubro tinan 2007, Fretilin halo ninia retiru iha aldeia Orema, Same, Manufahi, rejultadu husi surumutuk ne´e: “Oinsa maka Fretilin bele fila hikas ba kaer poder”. Atu fila ba poder, liu husi meius konstitucionais la loke dalan ba ne´eba,buka meius seluk liu husi «Show Force», sei lori Sunami mai Dili, no sst. Kalendariu dehan atu halo iha Outubro, Novembro tinan 2008. Iha tan ajustamentu estrutura partidu Fretilin iha Distritu Kovalima foin dadaun Mari Alkatiri dehan iha tinan 2010 sei taka fronteira timor ho Indonesia tamba deit Fretilin atu halao Marcha da Paz (hare STL 10/08/2009). Se taka fronteira, sr. Malkatiri tenke provoka krisi bot ka funu bot hodi taka fronteira para ema ida labele halai sai, tamba interpretasaun konstitucional autoridade hanesan Forsa Defesa no Forsa seguransa maka iha knar no kbit ba toma medidas sira hanesan ne´e, laos lider partido politiku ida hanesan sr. Malkatiri.

Iha mos estratégia Marcha ba kotuk, tamba saida?: Fretilin maka sai nudar mata dalan ba movimentu ba Libertasaun Nasional, husi Fretilin movimentu maka hamosu CRRN (Conselho Revolucionário da Resistência Nacional), muda ba CNRM (Conselho Nacional da Resistência Maubere) no ikus transforma ba CNRT (Conselho Nacional da Resistência Nacional). Maibe Fretilin nudar partidu no liliu husi ninia líder Malkatiri atu lori fali historia ne´e lao tuir sira nia visaun no misaun. Visaun maka Fretilin ba grupo elites oan ida maka kaer no monopólio. Misaun maka oinsa maka domina sistema politika, ekonomika no judicial, atu nune´e bele ukun to´o tinan lima nulu (50) tuir mehi Mari Alkatiri nian.

Tamba sira nia mehi kotu iha dalan, la konsegue kaer ukun iha tinan 2007 hodi forma governu, Fretilin ho Mari Alkatiri oinsa maka ba kaer ukun liu husi meius ne´ebe deit, bainhira deit, sei halakon sira ne´ebe ka movimentus sira ne´ebe sai hanesan aisatan netik ba sira ka teri netik dalan ba sira. Tamba ne´e Fretilin ho Mari Alkatiri iha dadaun planu oinsa maka halo Marcha ba kotuk, liu husi dehan atu sai husi Parlamento Nasional tamba deit Fretilin ne´e identik tiha ona ho Mari Alkatiri, tamba Mari Alkatiri maka Fretilin no Fretilin maka Mari Alkatiri. Neduni Mari Alkatiri dehan A militante sira tenke hananu ho musika «Amen».

Fretilin 1ª linya no 2ª linya:

Fretilin iha grupo Mari Alkatiri nian, ida primeira linya (1º linya) ne´e maka sira grupos ka lubung oan ida husi Mozambique mai, «Mari Alkatiri ho nia Ferik oan, Ana Pessoa, Estanislau da Silva, José Teixeira, no sst». Sira segunda linya (2ª linya) sira be tuba rai metin nafatin, tuba iha fatin deit, tuba fatin tamba laos sira maka simu rebusadu ka hetan beneficiu. Sira ne´e maka representa husi diskursu hanesan Aniceto Guterres, José Manuel Fernandes, David Ximenes, Francisco Branco, no sst.

Fretilin 1ª linya, simu kargu husi Governu AMP, Ana Pessoa Pinto ba Prokurador Jeral Republika, Marina Alkatiri simu kargu nudar Embaixadora iha Mozambique, Mari Alkatiri simu kargu nudar representante Estado no Governu ba Guine-Bissau no maun alin balun simu projektu ba halo muro iha pantai kelapa.

Iha facilidades hanesan uma mesak luxu ka mewah hanesan Mari Alkatiri nia uman iha zona elites iha Darwin Casuariana, ne´ebe nem ema Timor oan kuelker bele hela ba, uma iha Melborn no fatin seluk tan. Mari Alkatiri bandu 2ª linya la bele uja buat ne´ebe ka sasan ne´ebe deit mai husi Governu AMP, hanesan Deputadu Fretilin sira la bele simu kareta Parlamentu nian, maibe Mari Alkatiri husu osan,kareta no facilidade seluk ba Governu AMP. 1ª linya simu rebusadu husi Governu AMP. 2ª linya simu ordem husi 1ª linya no tuba rai metin nafatin.

Fretilin Radikal vs Fretilin Mudansas:

Dinamika ne´ebe maka Fretilin mudansas halo tun ba base no partido seluk iha AMP nian bele kativa eleitoradus barak husi Fretilin ka sira beé vota ba Fretilin iha 2007. Husi parte FM konsegue lori estrutura F iha distritus Covalima, Oe-cussi, no sst tama ba FM. Neduni Mari Alkatiri buka oinsa maka troka estrutura Fretilin iha distritu Kovalima no Oecussi. Tamba FM hatene joga estratégia, hamutuk ho Xanana/CNRT no kontinua nudar Fretilin.

Iha Fretilin radikal, hare husi sira nia diskursu fahe ba grupo tolu (3): grupo ida diskursu baratu, naran dehan saida deit, koalia deit; grupo ida seluk representa aktivista iha Fretilin, kontra hotu mai husi se no husi ne´ebe deit, maibe la hatudu solusaun ruma ba problemas konkretus. Grupo ida ikus hakarak joga husi kotuk no la tama ba iha estrutura (la tur iha Parlamento) maibe hakarak kontrola Fretilin husi kotuk.

Grupo ida uluk representa husi diskursu Aniceto Guterres, hare exemplo konkretu deit, nia maka radikaliza diskursu la simu kareta, enkuantu deputadus barak hakarak simu tamba kareta laos Governu AMP nian maibe Estadu nian, só uniku Deputada Cipriana Pereira maka konsisten hodi simu kareta.

Grupo ida fali, maka representa husi dikursu Arsénio Bano, kontra hotu-hotu, hanesan foin dadaun nia ho Teixeira foti issu korupsaun hodi hatun PM Kay Rala Xanana Gusmão, ne´ebe la hetan oval husi militante Fretilin sira seluk, hare deit grupos empresários Fretilin hanesan Júlio Alfaro, Óscar Lima, Ricardo Nheu, Milita Alves kontra probaganda Arsénio Bano ho José Teixeira nian. Iha sira ninia radikalizasaun no frontal ba hasoru PM no Presidente CNRT, enkuantu Sekretariu Jeral Malkatiri desenvolve esforsu oinsa maka bele atrai fali eleitoradu Fretilin nian ne´ebe desfia sira nia votu ba CNRT/FM. Maibe atitude Arsénio Bano no José Teixeira, bele iha koordenasaun ho Mari Alkatiri no bele la tuir Malkatiri nian. Se Arsénio Bano no José Teixeira maka tuir duni orientasaun mos problema no la tuir mos problema ba Malkatiri.

Se Arsénio Bano no José Teixeira tuir orientasuan Mari Alkatiri nian, ninia konsekuensia maka difícil ba Fretilin no Mari Alkatiri atu hakbesik ba CNRT tuir estratégia ne´ebe maka Malkatiri no Fretilin oras ne´e dadaun hakbesik ba CNRT no Xanana Gusmão. Tamba Estratégia ne´ebe maka Malkatiri ho Fretilin hatudu katak koalia husi oin ida no kotuk seluk. Se estratégia ida ne´e maka lideransa Fretilin liliu Malkatiri desenvolve dadaun, ne´e sei la produktif ba Fretilin no liliu ba Malkatiri.

Se Arsénio Bano no José Teixeira la tuir ordem ka orientasaun husi Malkatiri, tamba sira atake Xanana Gusmão liu husi media ka pers Austrália nian hodi atake Xanana no ninia família. Tatktika ida ne´e sei la fó beneficiu ba Malkatiri, tamba se Arsénio Bano no José Teixeira adopta taktika hodi ataka Xanan ho ninia família, loke dalan ba partidarius husi AMP ka liliu CNRT hodi ke fali korupsaun ne´ebe maka família Mari Alkatiri waihira sei Ukun ka kaer ukun. Bele mos hare katak tatika ne´ebe maka Arsénio Bano no José Teixeira adopta ne´e bele kee hela kuak tan ba Malkatiri. Bele mos le tatika Arsénio Bano no José Teixeira nian ne´e hatudu katak sira nain rua ho grupos ne´ebe suporta ba sira hakarak hadau lideransa husi Malkatiri.

Diskursu ajitasaun husi Mari Alkatiri:

Iha tinan 1974/75, Malkatiri halo diskursu dehan katak «Fogo Inimigo». Iha 2007 iha eleisaun ba Presidencial no Lejislativa 2007, Malkatiri dehan «Timor la iha lisan». Interpretasaun ba diskursus rua husi Malkatiri nian maka iha tinan 1975 iha funu uma laran «Perang saudara ka Guerra Civil» militante sira foti opositores sira soe hotu ba sunu moris. Iha tinan 2007, militante balun kaer sunu uma lulik balun. Se hare husi autores krimis,iha ne´e ita bele distingui se maka autores moral i intelektua,sorin ida. Sorin seluk, autor material. Malkatiri autores intelektual i moral,tamba nia maka hasai diskursu ajitasaun hanesan: «fogo inimigo no Timor la iha Lisan».

Fogo Inimigo:

Iha tinan 1975 Malkatiri hasae slogan ka diskursu ajitasaun «Fogo Inimgo», wainhira Fretilin kontrola liu husi kontra golpe hasoru UDT iha tinan 1975. Militante Fretilin sira kaer sira ne´ebe laos Fretilin ka pertence ba Fretilin kaer oho, sunu moris iha uma laran, dada ho kareta no balun hakui moris. Sira nebe pratika krimi sira ne´e autor material deit maibe autor moral no intelektual maka Mari Alkatiri.

Timor-Leste la iha Lisan:

Iha eleisaun 2007, Mari Alkatiri dehan “Timor-Leste la iha Lisan”. Militante Fretilin rona husi cefe Mari Alkatiri ninia hanorin no diskursu tun ba sunu apoiantes ka partidarius sira seluk nia uman no sunu mos uma lulik ne´ebe sai hanesan simbol lisan emar Timor nian. Malkatiri dehan uma lisan la iha sunu uma lisan. Neduni povu Timor keta vota tan ba Fretilin ho lideransa Malkatiri nian, se nia maka kaer ukun bele sunu uma lisan Timor-Leste nian mos hotu. Tamba Malkatiri atu harii fali lisaun foun tuir ninia lisan rasik.

Korupsaun maibe la simu KAK:

Fretilin liu husi ninia diskursu formal, issu ne´ebe sira foti makas maka Korupsaun iha Governu AMP. Maibe forma ka mekanismu ne´ebe atu harii hodi kombate Korupsaun hanesan Komisaun Anti-Korupsaun (KAK). Parlamentu Nasional aprova ho maioria Lei ba harii KAK. Fretilin kontra, ita la hatene ninia komitment ba kombate korupsaun ne´e liu husi ne´ebe. Ka hakilar kontra Korupsaun hanesan deit estrategia ida oinsa maka buka bolu atensaun ba opiniaun publika konaba Korupsaun iha AMP,enqunto Mari Alkatiri mos buka oinsa mak Korupsaun ne´ebe envolve ninia família rasik waihira nia sei kaer ukun nudar Primeiro-Ministro iha I Governo Konstitucional.

Tamba Mari Alkatiri tauk tamba se suporta KAK bele loke mos dalan ba dossie Korupsaun ne´ebe envolve familia Malkatiri nian. Tamba iha Malkatiri ninia ukun ninia familia maka monopoliu no manan tender, hare deit: Kompanyia Kuda Fuik, lda maka manan ba single source hodi sosa munisoens, kartus no equipamentus seluk ba PNTL. No sasan PNTL nian sira ne´e ikus mai fahe ba milicia sira ne´ebe maka Malkatiri ho Rogerio Tiago Lobato harii hodi provoka krise politika i militar iha tinan 2006. Kompanyie mina rai familia Malkatiri nian Bellak Fuels maka iha direitu exklusivu ba ensi mina kareta estadu nian. Iha kompanyia mina rai naran Tafui Oil, lda liu husi single source maka suplai mina ba EDTL. Kompanie nebe pertence ba familia Malkatiri no ninia associadus sira maka manan no monopliu tender ba projektu bot. Se Fretilin suporta ba harii KAK ne´e kria hela precedente ladiak ba Malkatiri ho ninia familia rasik, cedu ka tarde kasu korupsaun iha 1º Governu Konstitucional sei loken, se loke kasu familia Malkatiri nian mos.

Maibe Fretilin liu husi orientasaun husi Malkatiri,buka suporta ba PDHJ ninia servisu tamba ida ne´e maka instrumentus ne´ebe maka Fretilin maka kria no Malkatiri maka kontrola. Hare deit iha 1º Governu Konstitucional Malkatiri ninia Ukun, relatoriu husi Inspektor Jeral (IJ) apresenta 56 kasus, ne´ebe barak liu maka indicius kriminais no witoan deit maka infraksaun disciplinares, maibe saida maka akontese,kasus sira ne´e aarquivos hotu no tuir orientasaun husi Malkatiri nian atu PDHJ labele bok kasus sira ne´e. Ne´ebe Malkatiri sira kanta kontra Korupsaun maibe la iha autoridade moral!

*Hakerek nain haknar an nudar Aileba iha Merkadu Taibesi!