Diskursu CEMG F-FDTL Brigadeiro Taur Matan Ruak

Diskursu Sua Esselensia
Senhor General Taur Matan Ruak,
Chefe Estadu Maior General F-FDTL,
Bainhira hala’o serimónia komemorasaun
Aniversáriu ba Tinan 34 FALINTIL nia moris.

Senhor Prezidenti Republika Timor-Leste,
Esselensia,

Senhor Prezidente Parlamentu,
Senhor Primeiru Ministru no Ministru Defeza i Seguransa,
Senhor Prezidenti Tribunal Rekursu,
Esselensias;

Senhores membrus Parlamentu Nasional,
Senhor Sekretariu Estadu Defeza no
Senhores membrus Governu tomak;

Senhores ez-titulares ba pasta:
Presidensia Republika Timor-Leste,
Presidensia Parlamentu Nasional,
Primeirus-Ministrus, I no II Governu Konstitucional,
Nebé hau respeita;

Reverendíssimus Senhores:
Amo Bispo Dioseze Dili,
Reprezentantes Kleru Igrejas hotu-hotu
Nebé presente iha Serimónia ida ne;

Senhores:
Reprezentante Secretariu Geral ONU,
Representantes Korpus Diplomatikus,
Komandante ISF,
Komandante UNPOL no
General Komandante GNR;

Senhores,
Veteranos no kombatentes, nebé hau hadomi;

Senhores,
Komandantes PNTL, Ofisiais, Sargentus, Ajentes no Sub-Ajentes;

Senhores,
Oficiais no Sargentus F-FDTL,
Militares tomak Forsa Defeza Timor-Leste,

Senhores,
Ilustres konvidadus tomak,

Senhoras i Senhores,

Povu Timor Loro Sae.

30 de Agostu ka fulan ida, kompleta tinan 10 , mak Komunidade Internasional legitima ita nia ambisaun hanesan Nasaun Independente. Ohin, 20 Agostu, ita selebra loron FALINTIL nia moris.

Iha tinan 30 resin hat liu ba, Komité Sentral FRETILIN harí FALINTIL, núdar Forsa Armada Libertasaun Nasional Timor-Leste. Hori úluk kedas, FALINTIL nia istória metin, núdar húsar talin ida, ba Timor-Leste nia istória.

Durante períodu Timor-Leste nia istória kontemporânea ne, FALINTIL hamrík nafatin, iha faze ka tempu hotu-hotu, nebé hala’o dezenvolvimentu no konstrusaun iha ita nia Nasaun laran; ohin loron, ka hori úluk kedas, Forsas Armadas mak sei hatudu’an, núdar sosiedade Timor-Leste nia fútar isin, no núdar instituisaun nebé fundamental, hanesan aliserse, ka fundasaun ida nebé kli’ik, hodi harí ita nia knar, núdar Nasaun soberana, no núdar garantia ba liberdade Estadu Timor-Leste.

Ohin loron, ka hori úluk kedas, ita la simu katak, ita bele harí Nasaun Timor-Leste, se ita la iha Forsas Armadas ida. FALINTIL, mak hanesan biti ida, nebé náhe ba Nasaun ne atu hamrík, tamba nia mak hala’o duni, servisu nebé todan no desizivu, iha tempu nebé deit mak Estadu ida ne, komesa hamrík, núdar Estadu ida independenti, demokrátiku no soberanu.

Durante tinan tolunulu resin hat nia laran ne, militares FALINTIL nebé defende Timor-Leste nia direitu, sempre hatudu, kalan ka loron, ezemplu bot ida konabá dedikasaun, espíritu defeza, espíritu rezistensia no orgulhu, hodi husik sira nia ran suli, atu defende ita nia Pátria. Durante ita nia istória kontemporanea ne, nebé ita bele dehan, núdar FALINTIL nia istória rasik, forsas barak mak sai asuwain, tamba sira nia brani, tamba sira nia espíritu sakrifísiu, no dedikasaun tomak, atu defende ita nia rain, hodi nuné, ita nia Pátria Timor-Leste, sei tútur hela túsan bot ida, liuliu ba mane ho feto sira nebé, balu mate ona balun seluk iha vida sivil, no seluk fali oras ne sei serve nafatin, iha FALINTIL-FDTL nia laran.

Hau kala labele temi duni, heróis hotu-hotu nia naran, iha funu ida ne nia laran, tamba hau fiar katak, hau sei la temi hotu, maibé, husik ba hau temi netik, Komandante Nicolau dos Reis Lobato nia naran.

Nia núdar ema ida nebé, ho neon ás, barani no fíar’an, Nicolau Lobato sai duni figura bot ida, tamba nia knar nebé, hanesan Na’i Úlun, tamba nia determinasaun, disiplina, no matenek núdar militar, nebé nia hetan kedas, molok hahú Resistensia, to’o nia sai Úlun Bot, nuné mos, tamba nia hahí nánis kedas, hanoin atu ita bele hétan, autonomia ekonomika no politika, no, nia fiar katak, ita Timor oan sira tenke fiar an, fo han ba ita nia an, no ukun rasik an, núdar liafuan nebé, nia kaer metin katak: “Ita ne matenek, no ita bele duni, tamba ne, mak ita tenke manan”.

Lori fiar metin ida ne, mak leno nia dalan, maibé, lori mos nia dissiplina, mak hodi bele harí organizasaun, no lori nia lealdade, mak nia bele sai ema ida, nebé legendáriu ba ita tomak, katak ita hotu sei la haluha nia, maibé liu-liu ita hotu, sei la haluha mos katak, nia mak exemplu dissiplina, nia mak sentidu responsabilidade, no dedikasaun, ba Timor-Leste nia kauza, no tamba ne, mak ohin loron, nia ezemplu, lideransa, espiritu sakrifisiu, no abnegasaun, ba defeza ita nia Pátria, sei sai hanesan be mátan ida, nebé ita hotu sei ba hému, núdar legadu, nebé diak liu, mak nia rai hela ba ita.

Ho grupu militante armadu ki’ik ida iha nia sorin, nia fo neon metin ba sira, nia hanorin no fo kbit ba sira, hodi hetan dalan foun, atu hasoru desafiu nebé, ita nia Nasaun hasoru, iha funu ba independensia no libertasaun nia laran, nuné mos, hodi hákur ho néon metin, súsar hotu-hotu nebé, luta armada sísi mai ita.

Iha tempu nebé súsar liu, ita sempre hétan ema mane ka feto nebé, hatene tau an iha fatin, atu defende interese, nebé sagradu liu ba ita nia rain, hodi entrega sira nia vida, sira nia interese pessoal, atu hahí no defende povu ida ne, no ita nia Pátria.

Ita bele sente haksolok, tamba ema sira ne, bálun, sei hamutuk hela ho ita iha ne, iha duni komemorasaun ida ne nia laran, no, tamba ne, hau fo honra bot ba sira nia prezensa.

Maibé, atu koalia soin sala deit, konabá ita nia istória, obriga fali hau, atu temi mos akontesimentu importante ida, nebé halo ita nia Nasaun nia destinu fila’an, bainhira iha Marsu 1981, ita hala’o reorganizasaun iha FALINTIL nia laran, hodi fila hikas ba organizasaun foun ida, nebé kompletu liu, iha ita nia Rezistensia laran. Iha ne, ita hetan tan ezemplu diak ida, konabá kapasidade lideransa, no hahalok kli’ik ida, iha Komando FALINTIL nia let, husi ita nia Komandante Kay Rala Xanana Gusmão, nia ezemplu, dedikasaun, brani, no laran metin ba ita nia fiar no knar, núdar Nasaun, hodi hatudu ezemplu diak seluk mai ita, nebé merese duni, ita hotu nia rekonhesimentu.

Ohin loron ne, liu dok uluk, ita hotu tenke halo tuir ezemplu, ita nia heróis nasionais sira, hodi labele haluha liafuan murak nebé, moris ho ita nia Estadu, atu bele sai demokratiku, atu bele hakiak moris damai iha ita let, no atu moris duni tuir ema nebé sidadaun, hodi nuné, ita hotu nia kontribuisaun, ba dezenvolvimentu no progresu, bele sai duni realidade.

Hori kedas nia loron moris, FALINTIL sempre hatene katak, nia tenke hakru’uk ba poder politiku. Tamba ne mak nia oan, F-FDTL, nebé hetan legadu liafuan murak, tradisaun, no esperiensia husi nia inan FALINTIL, sei kontinua servisu nafatin ba dezenvolvimentu, progresu, no defeza ita nia Nasaun no Povu, sei hala’o nafatin, koordenasaun no kolaborasaun metin, ho instituisaun tomak, iha Estadu Timor-Leste nia laran.

Hau sei temi mos iha ne, ezemplu diak ida, konabá kolaborasaun no kooperasaun metin, nebé ita hotu hala’o iha operasaun Halibur, nebé F-FDTL no PNTL, hala’o knar diak teb-tebes, hodi hatudu sira nia kompetensia, no profesionalismu kle’an, hodi fahe ba malu, sira nia matenek no esperiensia, hametin sira nia fiar, nuné bele kontribui ba harí, relasaun kooperasaun nebé metin liu tan, iha instituisaun rua Estadu nian ne, hodi hatudu ba emar hotu katak, ita la’o ona iha dalan los, husi dalan profesionalismu no kompetensia, atu serbí duni ema hotu, hodi hatudu momos kedas katak, laran kanek nebé mosu iha tempu uluk, só tempu no ita emar nia vontade duni, mak sei halo ita hotu haluha.

Kolaborasaun ida ne positivu teb-tebes, tanba ne, mak Forsas Armadas sei prontu nafatin, atu hala’o relasaun entre instituisaun rua ne, atu bele sai diak liu tan, efektivu, no metin liu tan iha futuru.

Hau aproveita oportunidade diak ida ne, atu hato’o apelu bot ida ba Governu Timor-Leste: Tau matan nafatin ba PNTL ho F-FDTL nia planeamentu estrategiku, hodi bele hetan dezenvolvimentu ida nebé kabal, integradu, konsensual, no aseitável ba ita nia sosiedade, ba regiaun no mundu, no tuir duni prinsípius no valores nebé Estadu Demokratiku ida hahí no defende, atu nuné, ita bele hétan Forsas de Defeza no Seguransa ida nebé kredível no profesional, hodi bele serbí ita nia Rai, ita nia Regiaun no bele halo parte karik iha apoiu ruma ba Forsas de Paz iha Mundu rai liur.

F-FDTL núdar FALINTIL nia oan, husi kedas nia moris to’o agora, liu nanis husi reformas bot barak, maibé, reforma sira ne, husi sorin ida, la ses husi nia knar, núdar instituisaun dólen Estado nian, hodi kaer metin nafatin, ba liafuan múrak no prinsípius, nebé ita simu husi beiala sira, ba nia knar núdar airin bot unidade Estadu, no koezaun Nasaun, no núdar mos liman kroat ba ita nia seguransa hasoru ema liur, ka, atu fo tulun ba ita nia politika esterna.

Husi sorin ida fali, F-FDTL mak katalizador ba mudansa nebé ita hasoru, bainhira iha karik alterasaun ruma, iha situasaun politika internasional ka regional, katak, bainhira ita hasoru mudansa ruma, iha politika ka estrategia nebé hala’o iha mundo ne, liu-liu, konabá exigensias foun nebé mosu, iha materia seguransa no defeza, tamba doutrinas ka teknologias foun nebé mosu tan mai, hodi la haluha nafatin, atu tetu sasan nebé ita presiza, ho kbit ema, ka osan, nebé ita soi.

Maibé, ami sei fo atensaun no fiar nafatin katak, atu halo aktualizasaun teknologia ba F-FDTL, ita ema né, mak elementu nebé desizivu, liu fali máquina, ka aparelhu militar hotu-hotu.

Tanba ne, mak foin dadauk iha fulan Maio kotuk, F-FDTL foin hala’o remata tan rekrutamentu ida, hodi simu tan ema militar foun na’in 579, atu prepara ba Ofisiais, Sargentus no Prasas, hodi integra ba ita nia Komponente Terrestre no Naval, ka, ba Forsa Rai Maran no Tasi nian.

Simu tiha militar foun sira ne, ita sei kompleta ita nia estrutura organika, nebé oras ne ita hala’o hela revizaun, atu lori ita nia instituisaun militar, hodi sai forsa ida nebé moderna no efisiente, nuné bele hatán dezafius no misoens nebé nia simu.

Oras ne, ita haka’as an hela hodi fo formasaun ba ita nia kuadrus sira, atu fo matenek, hodi kaer knar komandu, no atu bele mos maneja equipamentu militar, nebé sei entrega ba sira.

Nuné, ita nia Ofisiais no Sargentus sira, sei kontinua frekuenta nafatin, kursus qualifikasaun no formasaun iha Timor-Leste, no mos iha rai belun seluk, hanesan: Portugal, Australia, Nova Zelandia, Estadus Unidus Amerika, Brazil, Malazia, Singapura, Indonezia, China, Irlanda no Kuba. Iha fulan Setembru tinan kotuk, ita ba dala úluk, partisipa iha exercício FELINO 2009 iha Portugal, hamutuk ho Forsas Internasionais sira seluk, husi CPLP, hodi hatudu katak, ita hetan esperiensia nebé diak no murak, ba ita nia militares sira.

Ita agora, harí daudauk ita nia Forsas Armadas ba futuru, hodi fiar metin, atu fo resposta ba jovens sira nebé, oras ne hakarak hétan buat ruma diak, iha sira nia vida hanesan militar. Ita hakarak harí Forsas Armadas nebé modernas, no efikazes, ho unidades nebé kikoan, ho orgauns nebé bele adapta, ba ita nia rai nia dimensaun, maibé, sira tenke móveis, no fleksíveis teb-tebes, simu equipamentu diak, no simu mos treinu nebé diak, prontu kedas, bainhira deit, atu hala’o servisu oin barak, no atu hala’o knar, iha instituisaun nebé deit nia okos, nuné, bele hala’o defeza militar ba ita nia Rain, hala’o misaun foun seluk iha rai liur, no hala’o mos misaun, atu ajuda populasaun nia intereses, tamba so nuné, mak ita bele kaer metin Forsas Armadas ho ita nia Sosiedade, ka Povu tomak.

Ita sei hasoru difikuldades, no susar bar-barak, nebé ita hotu tenke fo atensaun, maibé, hau hakarak husik hela iha ne, liafuan konfiansa ida nebé kléan, no fíar nebé metin iha futuru, hodi rekonhese, no sente orgulhu ba esforsu bot, dedikasaun, kompetensia profesional, no espíritu disiplina, nebé ita nia aman no maun sira, hatudu tiha ona durante istória tinan 34, nebé sira hala’o servisu ba ita nia Rain.

Ohin hau hakarak hakláken:

BA SENHOR PREZIDENTE REPUBLIKA NO KOMANDANTE SUPREMU FORSAS ARMADAS:

Fo lisensa mai hau átan, atu koalia rasik ho militares foun sira, nebé oras ne simu hela instrusaun, no, foin mak ba dala úluk, hola parte iha serimonia militar ida ne:

“Ami hein katak imi hotu, nebé oras ne, mai hamutuk ho Forsas Armadas, bele buka konhese no kompriende didiak, liafuan múrak sira, nebé hametin, no lori instituisaun ida ne, ba harí ita nia Nasaun, no ba imi hotu atu aprende katak: hahí no hanai ba, memória ema sira hotu, nebé aprende tiha ona, simu sira nia mate, hodi husik hela ita hotu agora, bele simu no aprende atu moris.

Molok atu remata, hau apela ba ita hotu, atu tau iha néon, legadu ás liu, nebé mak ita nia avo sira, áman no maun sira husik hela mai ita, núdar ohin, ita hotu hanoin no selebra hamutuk iha ne:

Fiar metin ba futuru ita nia Rain, no servisu nafatin ba damai no moris diak ba ita nia Povu.

Maromak sei tulun ita hotu.

Obrigado.