VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20090708

Vicente Fernandes Brites kandidatu forte ba Adjuntu PJR

Dili - Konseilu Superior Ministeriu Publiku (KSMP) rekomenda naran tolu (3) ba Presidente Republika (PR) hodi fihir no hili ba troka Ivo Valente ne´ebe resigna-an husi Prokurador Adjuntu iha loron 30 Fulan Junho. Naran tolu ne´ebe KSMP rekomenda ba PR maka: Vicente Fernandes Brites, Angelina Saldanha no Zélia Trindade. Iha sorumutuk entre PR Dr. José Ramos Horta no PJR Dra. Ana Pessoa Pinto, iha Palacio Presidencial Aitarak Laran, Dili, Segunda-Feira (06/07), PJR nudar Presidente KSMP hato'o naran tolu ba PR hodi fihir no hili naran ida hodi troka Ivo Valente. Tuir fonte ne´ebe jornal ne´e iha acessu ba kontiudu sorumutuk entre PR ho PJR iha Palacio Presidencial katak “Vicente Fernandes Brites ne´e kandidatu forte ba troka Ivo Valente”. Tenik tan fontes ne´e, ”tamba ninia kompetencia teknika no profisional nudar prokurador kareira, husi sorin ida. Sorin seluk, PJR ne´e Feto maka Ana Pessoa Pinto, neduni Adjuntu PJR tenke mai husi Mane”. Tuir Konstituisaun RDTL iha ninia artigu 86-…) “Presidente Republika maka iha kna'ar no kbi'it hodi fihir no hili Adjuntu PJR”.

PR hodi ninia kompetencia fihir no hili Dra. Ana Pessoa Pinto nudar PJR, tuir deit kriteriu politika no pessoais PR nian. PR obedece ba kirtieru politika tamba Dra. Ana Pessoa Pinto laos Prokurador Kareira no nunka exerse funsaun profisional hanesan PJR. Nia pertence ka militante no master mind Partido Fretilin nian. Husi kriteriu pessoais, Presidente Republika hili nia kaben ba kaer kargo nudar PJR, neduni relasaun emosional iha decisaun PJR nian. Tamba hili Ana Pessoa Pinto ho base ba kriteriu politika partidária no pessoais/intimu husi PR, neduni PJR Dra. Ana Pessoa Pinto tenke obedece ba ordem patraun rua; ida maka simu husi diresaun partidu nian no seluk husi ninia la'in rasik. Hare deit, desizaun Sra. PJR nian hatudu lolos «Preseguisaun Politika no interferensia poder politika», wainhira PJR fó ordem ba Prokuradora Angelina Saldanha hodi haruka PNTL/UNPOL ba passa revista Direktor Pualaka, Américo Lopes nia uma, iha loron Segunda-feira (01/06). Aksaun ne´ebe maka PJR hala'o ho baze ba denunsia ho dokumentus falsus husi João Alves, eis-Ministro husi Governu Fretilin nian. PJR aselera wainhira nia la'in PR haruka karta atu investiga, Ministra Justisa, Lúcia Lobato, nia lain, Américo Lopes, nudar Direktor Pualaka.
Paulo Remédios la ba Adjunto PJR derota bo'ot PR rasik
Iha fulan Marsu Presidente Republika, liu husi dekretu Presidencial, hili no fihir Paulo dos Remédios atu troka Ivo Valente. Ironika maka ne´e: Dekretu Presidencial ne´e hasai iha inisiu fulan Marsu enkuantu Dekreto Presidencial fihir no hili Dra. Ana Pessoa Pinto foin hasai iha loron 25 Fulan Marsu, publika Jornal Republika loron 26 Marsu no nomeasaun formal iha loron 27 fulan Marsu ne'e. Tuir fontes sira ne´ebe mak Jornal ne´e hetan husi Palácio Presidencial Aitarak-Laran no knua CCF katak “Presidente Republika ho Mari Alkatiri iha akordu ida hodi sakrifisiu sira nia belun Paulo dos Remédios, atu nune opiniaun publika la bele deskonfia ba sira ninia objektivu fundamental maka domina sistema judisial no lori adversáriu politiku sira ba tama kadeia”. Iha mos objektivu politiku seluk, oinsa maka koligasaun Ramos Horta ho Mari Alkatiri ba kaer ukun no monopólio iha sistema politika, ekonomika no poder judisial.
*Revista da Imprensa, 08.07.2009 Fontes: STL (08/07,paj.15), JND (08/07,paj.14) i Timor Post (08/07, paj.1 i 19)

Sem comentários:

Enviar um comentário

Nota: só um membro deste blogue pode publicar um comentário.