MARKADA IHA ISTÓRIA: HAU NIA FORMA LIBERTASAUN

Husi AgioPereira*

Besik atu halo dékada ka tinan sanulu ona Timór-Leste sai hanesan paíz libertadu, independente no soberanu, ne’ebé ita bele mós reflete kona-ba ita nia experiênsia iha luta ba libertasaun nasionál. Ita sei husu ba ita nia an-rasik, katak primeira dékada libertasaun ida ne’e signifika sáida lós ba ita ida-ida, ba ita nia povu no ba ita nia paíz hodi sura oinsá ita bele to’o iha ne’e i ita atu lori lós destinu nasaun ida ne’e ba to’o ne’ebé.

Iha balansu ida ne’e, ita foti kestoens pertinentes relasiona ho entendimentu di’ak entre fatores hirak ne’ebé halo ita haksoit aas tebes iha prosesu luta no fatores hirak ne’ebé halo primeira dékada ida ne’e sai nu’udár períodu ida ne’ebé merese duni ita hotu nia orgulhu. I, karik bele koko hatán: impaktu sáida mak mai husi Organizasaun Nasoens Unidas ba susesu governasaun Timór-nian; oinsá ita bele avalia ka sukat kontribuisaun ne’ebé ita nia Povu rasik fó ba dezenvolvimentu ne’e tomak iha ONU nia mahon; papél komunidade internasionál, doadores no parseirus dezenvolvimentu iha sosiedade foun Timór-nian laran. Kestoens hirak ne’e ho seluktán ne’ebé ita idaidak hakarak foti no enfatiza ka realsa bele halo parte mós ita nia reflesaun.

Ha’u hakarak,reflete kona-ba mensajen husi poeta boot Timór-oan, Borja da Costa, kona-ba buat ne’ebé nia temi katak, ita nia ain-fatin, liu-liu, oinsá ita marka iha Istória ita nia libertasaun nia lala’ok.

Ó nia Ain-fatin

Frantz Fanon, iha nia livru ‘Black Skin, White Masks’ (Kulit metan, maibé taka ho Máskaras Mutin), alerta tiha ona kona-ba perigu alienasaun kulturál i oinsá ita “dezaliena rasik ita an” husi efeitu koloniál ida ne’e; akulturasaun katak simu rai seluk nia kultura no soe fali ideais indíjenas ka ita nian rasik tanba valores ne’ebé la’os ita nian maibé mai husi prosesu koloniál, ne’e mak sai hanesan nia preokupasaun boot. Preokupasoens hirak ne’e, iha dékada sesenta, ka tinan 1960 laran ba leten, sai nu’udár inspirasaun ba revolusionárius sira iha terseiru mundu tomak maibé blasfémia ka sala boot ba kolonialistas sira. Iha nia obra ikus-liu nian “The Wrethched of the Earth” (Dezerdadus ka abandonadus iha Mundu”, autór ne’e aprezenta nia teze kona-ba efeitus tortura ba personalidade Afrika-nian, espesífiku liu, mak ida ne’ebé forsas koloniais Fransa nian sira halo ba kombatentes libertasaun Aljéria. Frantz Fanon konsege influensia ativistas rihun-ba-rihun iha terseiru mundu, mundu ema dezerdadus sira nian, iha prosesu emansipasaun ba ema ne’ebé oprimidus ka moris iha térus laran.Borja da Costa, mós, iha nia poema ‘Ó nia Ain-fatin”, nia alerta ba ita hotu kona-ba realidade podér koloniál ne’ebé husik hela nia ain-fatin ne’ebé estraga buat barak,hasoru kultura no tradisaun kolonizadus sira, hasoru povus sira seluk nia ambisoens atu moris iha armonia laran no dignidade. Borja haklaken ba ema kolonialista nune’e ‘ho ó nia Baioneta tutun” ó marka ó nia ain-fatin” maibé “ho ha’u nia baioneta tutun”, ha’u sei marka iha Istória, ha’u nia forma libertasaun”. Borja la mesak, wainhira nia adverte ka aviza ba kolonializmu kona-ba faktu ida ne’e. Nia hakerek iha tempu ida ne’ebé Luta kontra kolonializmu, kontra imperializmu, kontra explorasaun ema ba ema, sei hanesan moda, i to’o ona iha auje ka pontu revolusionáriu ida ke aas liuhotu.

Hahú husi Gana to’o Malázia, kolónias sira sai independente daudaun, hodi inspira povus oprimidus atu luta ba emansipasaun ka libertasaun nasionál.Ita mós, hamutuk, konsege satan netik anin boot ne’ebé hú maka’as husi tasi atu mai taka metin fali ita nia ibun hodi labele hakilar ba libertasaun. Hanesan epítome ka avizu kona-ba forsas estranjeiras ne’ebé mai tama iha “terra nullius” ka “rai mamuk” hodi okupa no koloniza, mak Borja da Costa adverte tiha ona ita hotu kona-ba valór unidade ho nia poema ida seluk ‘Kdadalak’, katak partes hotu-hotu tenke hamutuk hodi nune’e bele hasoru no satan netik anin boot no laloran mai hus tasi klaran.Tinan 24 liutiha, iha 30 Agostu 1999, ita nia Nasaun tomak hamriik, besik atu rai nakaras, katuas no ferik, aleijadus no labarik sira hotu marxa kilómetrus-ba-kilómetrus, tuir sira nia dalan ne’ebé besik daudaun ona ba libertasaun, hodi hatudu prova ida ke klaru tebes kona-ba forsa unidade nasionál. Dadér nakukun, ema votantes rihun-ba-rihun la’o no bá halibur-malu ona iha sentrus votu hodi hatudu sira nia determinasaun katak, hakarak tebes duni halakon forsas hirak ne’ebé kontra fali ita nia vontade boot atu moris nu’udár povu livre. Só hamutuk, la iha deskriminasaun ideolójika, hanesan buat ne’ebé Borja da Costa haklaken iha ‘Kdadalak’, mak ita konsege manán.

Deklarasaun katuas ida nian ne’ebé ita labele haluha, depois-de nia ba vota, hodi dehan katak “ha’u bele mate ona”, hatudu momoos ita nia povu nia determinasaun atu hakotu nia susar no térus tanba okupasaun. Nia liafuan hirak ne’e maka reflete tomak ona ema hotu nia hakarak, ema hotu nia mehi no ambisoens ne’ebé haklaken liuhusi poema ‘Ó nia ain-fatin”. Katuas ne’e hatene duni katak, finalmente, depois-de luta durante nia vida tomak atu sai ivre, ita nia povu konsege duni iha tempu badak ida ne’ebá hatudu buat ne’ebé Borja da Costa haklaken hanesan “ ha’u nia forma libertasaun”.Ita nia luta ba libertasaun hahú ho prosesu formasaun libertadores Pátria ne’ebé todan tebes, versaun pós-moderna ida ne’ebé iha tinan 1960 ba leten ita hanaran ‘Ema foun’, versaun ida halo tuir kuadru sosialista atu liberta mundu husi opresaun, fasizmu, explorasaun ema ho ema, dezigualdades no injustisas sosiais. Iha altura ne’ebá, kualkér tipu igualdade sein explorasaun haré hanesan utopia ka mehi ida, maibé ohin loron, tanba hanesan tentativa liberál ida atu hafútar kapitalizmu ho “klamar” sosiál, mak konjuntu mandamentus foun kona-ba dezenvolvimentu mundu hanaran “metas dezenvolvimentu miléniu”. Iha altura ne’ebá, prosesu militânsia ne’e tomak hanesan revolusaun “quasi-sacerdótica” ka sagradu ida, kultura ida ke di’ak duni atu ema barak bele kompreende – iha faze Luta ida ne’ebá – kona-ba tansá ativistas sira halo sakrifísius i, liu-liu kuadrus rezistênsia sira. Kultura ne’ebé predomina iha tempu ne’ebá, seidauk toman ho ema ne’ebé goats hakilar kontra tanba konsidera hanesan “revolusionárias’ liu.

Ohin, prinsípius hanesan ne’e,kampu ideolójiku konservadór mak defende fali i, sai revolusionáriu, la haré ona hanesan buat ne’ebé mai husi mundu/rai seluk.Iha ita nia luta, depoisde tinan 24 ho susar no térus, ho milagres no ema mate barak, iha funu ida ne’ebé forsas rua la hanesan, ita bele kompara ho istória iha Bíbilia ne’ebé David luta hasoru jigante Golias, ita konsege to’o duni iha loron 30 Agostu 1999, momentu ida ne’ebé okupasaun mós lakon totál; i la’ós tanba ho forsa iha baioneta tutun, maibé ho de’it pregu ida, atu ita nia povu votante bele ba hedi/tú nia votu hodi hakotu,dala ida de’it i para sempre, jugu/opresaun koloniál sekulár.ba ONU, hanesan mós momentu singulár ida iha nia istória. Komité Espesiál 24 ne’ebé lida ho prosesus deskolonizasaun, ho direitu inalienável ba independênsia povus kolonizadus sira nian, kleur tebes ona mak la hetan susesu boot ida hanesan ne’e. Experiênsia Sahara Osidentál no Frente Polisáriu (akrónimu husi Frente Popular de Liberación de Saguía el Hamra y Río de Oro), la hetan rezultadus tanba Governu Marrokus iha influênsia boot tebes ba Governu Madrid no iha mundu árabe, hodi nune’e kompromete direitus inalienáveis Povu Sarauí nian. Kazu referendu Timór-Leste nian, loos duni, sai hanesan marku importante ida iha istória deskolonizasaun, tanba maski envolve Estadu ida ho maioria musulmana, hetan vitória diplomátika ida ne’ebé importante tebes i la iha komparasaun, ba mós Portugál i ba ONU rasik.

Iha momentus ne’ebé nakonu ho emosoens, antesde 30 Agostu, ha’u fiar metin ona katak ita nia povu sei hakilar mós hanesan Prezidente Gana. Iha loron independênsia Gana, primeira kolónia Afrika nian ne’ebé hetan independênsia iha 6 Marsu 1957, Prezidente Kwame Nkruma, iha sidadauns Gana rihun-ba-rihun nia oin, nia haklaken aas tebes, ba Áfrika no ba mundu tomak, atu ema hotu bele rona: Ghana, ó nia paíz doben ida ne’e livre para sempre ona!

Nune’e, iha 30 Agostu 1999, ita mós hakilar: Timór, ó nia paíz doben ne’e livre para sempre ona ka ba tempu rohan laek!Rai livre, povu livre, loos duni; maibé liberdade ida ne’e signifika sá ida ba labarik, inan ho idozus sira? Iha relevânsia sá ida ba juventude ne’ebé hakarak harí nia moris, nia família, ho dignidade? I, iha kapítulu foun ida ne’e, ne’ebé nia letra hakerek ho rán, ho susar no térus, signifika sá ida ba ita nia realidade nasionál prosesu vida ida tomak, ne’ebé ita liuhusi kondisaun hanesan subjugadus ka oprimidus hodi ba sai independentes?

Reposta reál ba dezafius boot hirak ne’e mak hanesan klamar ba vitória ida ne’e, ne’ebé la iha nia presedente, ne’ebé ita nia povu ho aten-barani asegura ona ba ita, ho nia votu, iha tinan sanulu liubá.

loro-matan foun sa’e dadaun ona husi eskombrus ka ahu-kudesan paíz martirizadu ida ne’e

Iha inísiu revolusaun timór-nian, depoisde Revolução dos Cravos ka Revolusaun Ai-funan, iha 25 Abril 1974, iha Portugal i, durante tinan 24 laran luta hasoru okupasaun ilegál Indonézia nian, ita aprende linguajen no kultura ne’ebé importante tebes ba ita nia moris nu’udár povu no Nasaun. Ita aprende, moris no harí ho motes hanesan: ‘Mate ka Moris, Ukun Rasik Aan’, ‘Unidade no Luta’, ‘ Vitória hein deit Tempu” “Reziste katak Manán” no “Luta kontinua iha Frentes hotu-hotu”..Ita aprende, ho fó-an ba mate, signifikadu boot tebes Unidade Nasionál nian. Wainhira foin hahú defende “Unidade i Luta”, iha divizoens iha ita nia leet, ho konsekuênsias ne’ebé dezastrozas ka aat tebes, i nia sikatrizes ka fitar, toó ohin loron, sei afekta ita nia polítika tantu iha nível partidus, komu iha nível individuál no nasionál.Iha kuadru polítiku foin liu daudaun ne’e, ita aprende katak “ imperializmu hanesan tigre ida halo ho surat tahan” ka tigre falsu ida ne’ebé sura de’it ona nia oras. Buat hirak ne’e hotu sei reflete iha ita nia Inu Nasionál rasik: “Pátria, Pátria”; ita manán ona kolonializmu moribundu ka ne’ebé besik atu mate hodi haklalak, hatún imperializmu, atu ita bele iha rai ida ke livre, povu livre, hodi hakilar “lae, ba explorasaun”.

Ho votu iha 30 Agostu 1999 ne’ebé halo ita sai livre ba tempu rohan laek, mak ita nia povu sente katak, de-faktu no finalmente, ita livre duni ona. Livre husi violênsia TNI nian ho nia milísias sira; livre husi ‘mau-hús ho bi-hús’ sira, livre husi kalan la toba tanba ta’uk ema atu kaer ka halakon, livre husi tortura, husi krimes, husi inseguransa,husi hamlaha no bele sai lakon. Ita to’o iha faze ida ne’ebé últimu Governadór kolonial português, Alves Aldeia, iha Palásiu Governu, iha Dili, liutiha tinan haatnulu, sadik ita hodi dehan: Oras to’o atu arranka!Tanba 30 Agostu 1999, mak ita nia povu, finalmente bele haré loro-matan foun sa’e fali ona husi eskombrus ka ahu-kudesan paíz martirizadu ida ne’e.

Ita livre duni ona ka lae, husi insertezas vida tomak? – Ha’u hanoin lae. Atu ita bele mantein nível sertezas iha ita nia moris ne’e, ne’ebé di’ak liu nian, importante liuhotu mak ita tenke alerta nafatin, tenke hatene idaidak nia responsabilidades iha prosesu morozu ka kleur tebes nian ida ne’e atu harí ita nia Estadu-de-Direitu Demokrátiku. Atu jere ho responsabilidade ita nia Povu nia expetativas tomak, ne’e dezafiu ida ke boot liu dezafius hotu-hotu ba ita nia Nasaun nia líderes sira; se la kaer metin responsabilidade, ita nia Estadu mós bele monu, ita sei soe hela ita nia Nasaun martirizada ne’e. Maibé iha oras atu arrranka ne’e, iha rejime demokrátiku no soberanu, ita tenke buka halo buat hotu atu bele arranka hamutuk, tuir diresaun ida de’it ho velosidade ne’ebé hanesan; maski, karik ita lae konkorda malu iha buat hotu, pelu menus ita tenke konkorda katak ita bele diskorda malu ka liafuan la hanesan.

Mundu Foun ida

Iha 30 Agostu 1999, ita nia povu liberta nia-an husi estadu izolamentu ne’ebé Indonézia halo hodi mai hakuák mundu, ho perspetiva foun ida atu “sai”, atu “eziste” no atu “fiar” katak, afinál, ita hotu iha direitus hanesan, ne’ebé hanesan mós direitus hirak ne’ebé garante ba povu sira seluk. Nune’e, ita tama iha independênsia, ho sentidu kle’an liu kona-ba direitus umanus no respeitu ba direitus ema ida-ida nian. Maibé, durante luta ba libertasaun nasionál ita hatoman ita nia-an hodi denunsia lós de’it abuzus ba direitus umanus i la’ós atu harí no haburas direitus hirak ne’e ba sidadauns tomak – nasionais no estranjeirus – rezidentes iha paíz libertadu ida ne’e.

Haré ba mundu foun ida ne’e ho povu ne’ebé livre, independente i soberanu, mak ita nia povu foin hatene katak mundu ohin loron la hanesan ona uluk. Mundu foun ida, nakfilak-an ona, mundu ida ne’ebé kbiit polítiku hetan kuaze influensia tomak, tanba kultura demokrasia liberál. Karik kolonializmu besik atu mate duni ona ka ita tenke hatún imperializmu, ne’e la’ós ona kestaun boot ida ba ita nia povu nia hanoin.Buat ne’ebé ita nia povu hakarak mak páz, armonia, nutrisaun ho kualidade, edukasaun, estradas di’ak, bee mós, asesu ba saúde profisionál no ema hotu bele moris di’ak. Maibé, atu hetan buat hirak ne’e ita nia povu hatene katak ita presiza mós garantia husi parte seguransa no defeza nasaun ne’e nian.Iha âmbitu/kontextu rejionál, ita nia Estadu moris iha tempu ne’ebé demokrasia mós komesa moris no buras maka’as iha ita nia rejiaun. Ita nia demokrasia no demokrasia povu Indonézia nian moris kuaze hanesan depoisde hasoru hamutuk situasaun difísil tanba ditadura no injustisas. Ita nia prosesu libertasaun nasionál iha mós elementus ho simbolizmu ne’ebé aas no boot tebes iha istória umanidade nian, istória ida ne’ebé hametin amizade entre povus irmauns rua – Indonézia ho Timór-Leste, nu’udár fenómenu pós-kolonial ida ne’ebé singulár ka úniku tebes. Foin liu tiha funu tanba okupasaun no iha serimónia komemorasaun independênsia, de jure, iha 20 Maiu 2002, Prezidente Repúblika Indonézia, Megawati Sukarno Putri, fó onra ba ita, hodi marka nia prezensa. Hanesan jestu ida ke di’ak tebes husi ita nia Povu irmaun Repúblika Indonézia.

Jéneze ka prosesu evolusaun mundu ho ita nia independênsia

Depoisde inkursoens armadas tama liuhusi ita nia fronteira terrestre ka rai-maran, iha 7 Dezembru 1975, Indonézia invade Díli, ita nia kapitál, hodi okupa ita nia Paíz ho hanoin atu hela nafatin ona iha ne’e.Iha 25 Outubru 1983 ho nia operasaun militár hanaran ‘Operação Fúria Urgente’, iha tempu prezidênsia Ronald Reagan nian no lidera koligasaun Organizasaun Estadus Karibe Orientál (OECS), Estadus Unidus Amérika invade Granada. Maibé, fulan rua liutiha sira hakiduk fali; enkuantu-ke jenerais Indonézia nian sira halo fali planu atu hela nafatin iha Timór!

Invazaun Timor-Leste husi Indonézia akontese iha tempu ida ne’ebé mundu mós asiste namanas Estadus Unidus Amérika hakiduk husi Vietname. Iha mós tempu ne’ebé EUA hasoru hela eskândalu boot ida naran Watergate, Prezidente Nixon mak halo.Hasai tiha Nixon, vise-prezidente Gerard Ford ne’ebé troka nia, ho nia Sekretáriu Estadu ida ke konhesidu no iha kbiit boot tebes, Henry Kissinger, iha 5 Dezembru 1975, mai to’o Jakarta atu kovense Prezidente Suharto katak bele invade Timór hodi asegura katak sei la iha konsekuénsias diplomátikas nefastas ka ne’ebé aat liu.Sira hili hamutuk loron 7 Dezembru, loron ne’ebé Japaun ataka Pearl Harbour iha 1941, hodi nune’e jenerais Indonésia nian sira bele invade no konkista kapitál Nasaun Timór-Leste.

EUA komesa preokupa maka’as tanba efeitu dominó husi Lenine. Sira ta’uk invazaun komunizmu ne’ebé, hahú husi Indoxina, tuun mai dadaun ona iha Sudoeste Aziátiku, Pasífiku no bele bá to’o Nova Yorke. Vultu ka fantazma komunizmu ida ne’e, husi parte ida tanba kultura gerra fria (funu malirin?), halo be interese ba ita nia povu tau tiha ba kotuk iha palku polítika internasionál. Ita nia destinu sai difísil tebes tanba efeitu gerra fria iha Portugál, ne’ebé komunistas sira nia podér halo EUA sai ta’uk liután. Ta’uk tanba Portugal bele mós husik NATO no tama ba Paktu Varsóvia i bele influensia, to’o pontu ida, trajetu ka dalan polítika ema portugál sira nian. Governus provizórius troka tuituir malu, konstituisaun mós foun,eleisoens, asasinatus ka oho malu, golpes no repatriadus, buat hirak ne’e hotu okupa tomak palku polítiku portugál nian.Ita nia povu nia ambisoens la sai hanesan prioridades ba Portugál foun. Tanba abandona ka soe hela ita, mak mosu gerra sivíl, ne’ebé Timór-oan sira oho fali malu, ida ne’e foin akontese iha ita nia istória moderna; depoisde oho tiha jornalistas na’in lima ne’ebé mai husi Austrália atu mai haré no relata kona-ba situasaun iha Timór ba mundu tomak, iha 16 Outubru 1975, tuir mai Indonézia mós invade husi rai, lalehan no tasi hodi okupa territóriu, desde Oe-Kusi Ambenu to’o Jaku.

Enkuantu ita nia Rain, Indonézia okupa daudaun, halo ema rihun-ba-rihun fakar ran no mate iha funu ba libertasaun hamutuk ho sira ne’ebé luta kontra, mosu Gorbachev ho nia revolusaun soviétika. Impériu forte Bolchevista USSR, Lenine, Estaline no Trotsky, mate duni hanesan tigre surat-tahan. Revolusaun glasnost no perestroika Gorbachev nian, tekitekir, hakotu impériu Soviétiku. Funu foun entre etnias mosu iha Europa Orientál, balu to’o agora seidauk rezolve.

Rejista mudansa radikál ida iha xadrêz podér mundu tomak nian. Nasoens Unidas hetan fali sentidu no kbiit boot foun ida, liuhusi kultura rezolusaun konflitus via pasífika ka dalan dame.Kofi Annan, ne’ebé lidera prosesu reprezenta ONU iha Kamboja, simu kargu hanesan Sekretáriu Jerál Nasoens Unidas, depoisde Boutros-Boutros Ghali ema Ejiptu. Iha mundu anglo-saxóniku, podér konservadór metin liután, tanba Ronald Reagan husi Estadus Unidus no Margaret Thatcher husi Grã Bretanha mak defende metin.

Iha foho leten no ai-laran Timór-Leste nian bá, oho malu daudaun, gerra sivíl ida tan, golpe Skylight. Ne’e traisaun husi parte Indonézia,hodi nune’e ema barak tama prizaun, barak mak mate i funu entre maun-alin sira ne’ebé rejime Suharto maka halo kontinua nafatin; maibé sira mós la konsege manán funu hasoru Timór-oan sira. Tama ona iha tinan 1980 ba oin, luta libertasaun nasionál husik hela estratéjia zonas libertadas hodi pasa ba faze foun ida: faze gerrilha ida ne’ebé loloos nian, ho tátika mobilidade máxima. Ba primeira vez, Kay Rala Xanana Gusmão define katak ita nia funu, tuir ita nia realidade no konjuntura, tenke buka atu oinsá bele “moris hamutuk ho inimigu”.

Finalmente, depois de kombatentes rihun-ba-rihun mate, husi parte lideransa kuaze oitenta pur sentu lakon, no besik un-tersu populasaun lakon, ita nia luta komesa hetan dimensaun loloos nian hanesan funu gerrilha, iha luta ba libertasaun nasionál, hodi nune’e husik tiha estratéjia uluk nian kona-ba protesaun ba “zonas libertadas”.

Mundu foun kontinua evolui. Muru Berlin monu, Alemanha Orientál hamutuk fali ho Alemanha Osidentál.Ne’e fenómenu ida ke Aliadus II Gerra Mundiál halo tun-sa’e atu satan netik. Frakeza impériu Alemanha nian ho Fransa nia kbiit i beran ne’ebé sa’e tan, la relevante ona ba mundu foun.

Enkuantu ita nia povu luta ba libertasaun nasionál, iha foho leten bá no iha sidades prinsipais barak ne’ebé kaer podér internasionál, Komunidade Europeia hetan fórmula di’ak ida atu inventa Uniaun Europeia, ho Tratadu Maastricht, asina iha 7 Fevereiru 1992. Ironikamente,Timór halo parte mapa foun Europa nian ne’e, tanba hatama iha Konstituisaun Portugál nian, hanesan rai ida ke de jure pertense ba Portugál. Faktu ida ne’e kria uitoan problema ba Fransa, tanba enkuantu Portugál ho apoiantes Timór nian sira iha Europa Osidentál foun ida ne’e, hamutuk liután no rekonhese direitu ba autudeterminasaun Timór nian, Fransa buka kontrola Nova Kaledónia, nia kolónia ida iha Pasífiku Sul, ne’ebé movimentu indíjenu KANAKY luta maka’as ba independênsia no luta kontra exterminasaun étnika tanba halo sira mate-mohu to’o hela de’it 42.5 pur sentu.

Uniaun Europeia konsege hamout tiha rivalidade ka kompetisaun istórika entre Fransa ho Alemanha hodi kria ambiente polítiku foun ida ne’ebé iha influênsia boot ba polítika internasionál. Ba Timór, ho frente luta foun ida ne’ebé mosu iha Uniaun Europeia; hamosu ímpetu ka forsa ida iha dezenvolvimentu solidariedade iha Portugal, Espanha, Fransa, Olanda, Béljika no mós iha paízes Eskandinávia.

Iha ita nia paíz, Unidade Nasionál mós hetan enerjia ka kbiit foun;hatama ema hotu iha frente luta, la iha deskriminasaun ba sesé de’it, bele halibur fali jovens sira, halo sira sai ativu hodi bele simu responsabilidade atu lidera frente krusiál: mak juventude nasionál. Komandu Luta hamriik hanesan foku ka sentru koordenasaun lideransa, apartidária i suprapartidária, hodi bele viabiliza unidade ne’e. Nune’e, asoens jovens sira nian, tuir diretivas Komandu Luta ne’ebé sentralizadu i unidu, bele halo mundu fiar katak Timór-oan sira prontu ona atu hamoos no halakon jenerais rejime Suharto sira nia ain-fatin, hodi bá independênsia.

Timór Foun ida mosu mai, ho klamar metin ba Unidade Nasionál, ho espíritu katak ho uniaun mak ita hotu bele manán, katak se ita kontinua luta hasoru malu, tanba diferênsas ideolójikas, ita mak sei térus nafatin i inimigu sei halo festa ba sira nia vitória finál.

Realsa fali moto sekulár ida, ‘Fatuk no Rai, Be no Âhi’, epítome ka mensajen ida husi uluk kedas katak, maski ita kiik ita bele sai forte liután karik ita tau hamutuk ita nia kbiit no beran hanesan parte husi uniaun boot, ne’ebé ema sei la sobu no harahun; tanba hanesan fatuk ne’ebé toos maibé bele nakfilak-an husi rai,no ahi bele hamate ho bee ne’ebé moos no malirin,mak ita nia paíz sei sai husi destruisaun tanba nia unidu tebes duni.

Nune’e, ita bele alkansa ita nia liberdade ho independênsia hanesan produtu husi prosesu ida ne’ebé umanidade rasik atravesa.Durante tinan 24 halo Luta, ne’ebé maski ita nia paíz izoladu tebes i tenke hasoru inimigu ida ke iha forsa bélika ka militár boot tebes, maibé ita nia Povu la lakon nia aten-barani, ita mós asiste daudaun Europa Osidentál ida ne’ebé halo esforsu maka’as atu halakon nia pezadelus ka mehi aat i ida ne’e mós akontese ho Europa Orientál, husi parte seluk Estadus Unidus Amérika térus boot tanba efeitus husi nia ambisoens ejemónikas ka hakarak domina mundu, i Indonézia ho Soeharto no Filipinas ho Marcos térus aat liu tanba konsekuênsia husi sira nia ideoljias autoritárias. Ita Timór-oan tomak, konsege hamutuk fali, buat ida ke nunka akontese, hodi halo ita nia marxa naruk durante tinan 24 i mai to’o iha 30 Agostu 1999 ho de’it kartaun votu no pregu oan ida, atu tú-ku’ak retângulu ida ho logo CNRT nian i deside, dala ida de’it i para sempre, ita nia paíz nia destinu.

Impaktu sáida mak Orgnaizasoens Nasoens Unidas iha (ka sei iha) ba susesu governasaun Timór-nian? Akordu 5 Maiu 1999 prevê ona katak la haré ba rezultadu votu iha Konsulta Populár, ONU sei asume, interinamente, goveru iha territóriu, atu bele implementa povu nia hakarak ne’ebé expressa ona liuhhusi votu, iha kazu ida ne’e, independênsia.

Ita nia Povu simu ona termus akordu ne’e no mós misaun ONU naran UNTAET ne’ebé mai iha ne’e ho lideransa husi ita nia belun boot ne’ebé mate ona, Sérgio Vieira de Mello. Tinan rua halo tranzisaun, períodu ida ke bele dehan badak tebes, depois, prolonga tan prezensa ONU nian ba tinan tolu ho UNMISET, tinan ida tan ho balu ho UNOTIL i agora besik atu halo ona tinan rua ho balu ho UNMIT.

Prezensa Nasoens Unidas, desde inísiu, fó fatin importante tebes ba ita Timór-oan tomak, atu bele rekupera fali husi pezadelus durante tinan 24 halo funu ba libertasaun. Fó espasu no oportunidade balu mai ita atu bele diskute ita nia futuru, atu hamenus rivalidades katak sadik no kontra fali malu hodi organiza malu didi’ak; tempu ne’ebé osan-mean tebes atu ita bele aprende di’ak liu kona-ba kompleksidades governasaun Estadu ida ne’ebé soberanu i de-direitu demokrátiku.

Hakat ida ba ida i ho serenidade ka kalma hanesan uluk ita halo iha funu laran ne’ebé ita aprende halo kombate liu duni husi kombate, i durante era demokrasia no independênsia, ita aprende mós Governasaun liuhusi kaer rasik governu.

UNTAET kontrola buat hotu, hanesan ita hotu espera ona, tuir espíritu no letra rezolusaun ONU nian. Reprezentante Espesiál Sekretáriu Jerál ONU no Administradór Tranzitóriu, bazeia ba desizaun Konselhu Seguransa, administra territóriu ne’e tuir buat ne’ebé ONU hanoin katak di’ak liu.Harí Konnselhu Konsultivu ida kompostu husi ema mesak Timór-oan, tuir ekuasaun/kontajen podér haré tuir persentajen ne’ebé rejista ona iha Konsulta Populár. ONU halo ensaiu iha Timór liuhusi Governus Tranzisaun rua ho durasaun badak tebes, hanesan de’it atu ka asaun ida ne’ebé tenke halo tanba presaun polítika kona-ba “timorizasaun iha tranzisaun” ida ne’e, no mós estabelese Konselhu (lejislativu) Nasionál (CN). Ho baze iha rekomendasoens CN nian, ONU organiza eleisaun ba Asembleia Konstituinte ida atu bele hakerek Konstituisaun ida ne’ebé sei sai hanesan baze hodi harí Estadu-de Direitu Demokráiku ida, no mós, ho baze ne’ebé hanesan, pela primeira vez iha ita nia istória, povu mak hili rasik liuhusi sufrájiu universál ita nia Prezidente Repúblika.

Membrus Asembleia Konstituinte deside atu fila-an sai Deputadus iha Primeira Lejislatura hodi nune’e, bele forma Governu ida bazeia ba dispozisoens tranzitórias Konstituisaun nian ne’ebé sira rasik mak ho sira nia esperteza hatama. UNTAET tenke termina nia mandatu iha 20 Maiu 2002 maibé kria fali kedas UNMISET atu kontinua ho knaar ne’ebé UNTAET hahú halo ona, inklui kaer nafatin sektores defeza no seguransa to’o 20 Maiu 2004.

Komunidade internasionál atua liuhusi ONU no Uniaun Europeia. Ida-ida, paízes Eskandinávia, Irlanda, Japaun, Xina, Koreia Sul, Alemanha,Portugal, Brazíl, EUA no ASEAN mós fó sira nia apoiu, la’ós de’it liuhusi akordus multilaterias maibé iha nível bilaterál. Sistema ida ne’e mak sei kaer nafatin iha paíz hodi benefisia ita nia povu, la’ós de’it tanba lakohi husik ita izoladu maibé tanba importânsia polítika Podér no globalizasaun ekonómika mak halo be ita tenke kaer metin nafatin aliansas hirak ne’e no hametin konfiansa ba malu entre Estadus. Nune’e, relasoens polítikas no ekonómikas i relasoens jeo-estratéjikas iha kontextu defeza no seguransa, tantu ho Indonézia komu ho Austrália, no mós ho ASEAN tomak, importante tebes duni. Nune’e mós kona-ba relasoens ho CPLP i PALOPS, iha importânsia boot tebes i tenke haburas no defende nafatin maski todan.

Impaktu sáida mak arkitetura apoiu nasionál no internasionál iha ba formasaun sosiedade foun Timór-nian? Prioridade foun ba sosiedade Timór-nian tomak mak oinsá bele jere soberania no independênsia ho responsabilidade.Komplementa responsabilidade ida ne’e signifika instiga ka aselera prosesus dezenvolvimentu iha âmbitu kuadru konstitusionál no kaer metin ba prinsípius sakrosantus rua iha dezenvolvimentu nasionál maka: sustentabilidade no ekuidade.

Ein suma ka hanesan rezumu, katak ida ne’e maka kultura demokrasia liberál ida ne’ebé harí liuhusi kontratu sosiál ida entre sidadaun ho Estadu, artikula iha Konstituisaun, ne’ebé tenke interpreta tuir teoria no ezekuta iha prátika. Iha âmbitu governasaun no reál polítika, atu bele garante susesu ba prosesu edifikasuan ka konstrusaun Estadu independente i soberanu ho ekonomia ida ke saudável i kompetitiva, ita tenke hatene interpreta polítikas ne’ebé akomoda prioridades globais tuir globalizasaun ekonómika, i la presiza bazeia ba presupostus doutrinárius.

Einvezde ‘ luta kontinua iha frentes hotu-hotu’ hanesan uluk ita haklaken beibeik iha tempu luta ba libertasaun nasionál, ohin loron ita tama iha era ne’ebé ema luta ba podér polítiku atu bele ukun, halo leis, bele iha influênsia, bele deside kona-ba ita nia povu nia destinu, tuir dalan dezenvolvimentu no justisa sosiál. Ohin, la presiza ona aprende halo gerrilha maibé oinsá halo planu estratéjiku, oinsá bele halo leis, oinsá bele hetan osan liuhusi doadores, parseirus dezenvolvimentu, oinsá bele avalia susesus no frakasus governasaun no projetus dezenvolvimentu. I importante liuhotu, oinsá bele lidera paíz furak ida ne’e, ne’ebé kiik; haré ba nia luan ho populasaun hanesan Fiji, maibé ho tán enklave importante ida mak Oekusi, boot liu Singapura. Ita nia paíz realmente rai ida ne’ebé kompleksu tebes, iha aspetus hotu-hotu.

Ha’u sei lembra tempu ne’ebé halo debates naruk iha Parlamentu Nasionál durante oras no loron no rona liafuan foun hanesan: ‘pontu-de orden’, ‘defeza-da onra’, ‘deklarasaun-de votu’, liafuan hirak ne’e maka Distintus Deputadus sira hotu, ho sakrifísiu boot i ho todan, uza dala-barak, ba demokrasia nia di’ak. ‘Rejimentus’, ‘orgânikas’, ‘diploma lejislativu’, ‘lei’, ‘dekretu’, ‘diploma-du governu’, ‘diretiva’, ‘despaixu’ mós hanesan terminolojias foun, hanesan kilat atu halo funu foun ida.

Iha âmbitu finanseiru no fiskál, aprende mós matriz ba ‘planus i projetus’, ‘aprovizionamentu’, ‘lei tributária’, ‘impostus’, ‘reseitas’ i ‘despezas’, ‘makro’ i ‘mikro ekonomias’; no, ho Banku Mundiál, aprende ‘backlogs’ ka engarrafamentus, kompromisus no notas, fundo fidusiáriu ba Timór-Leste ka TFET no aprende tan lida ka servisu ho Ajênsia Dezenvolvimentu Internasionál ka Internasionál Development Agency (IDA) bainhira iha akordus ne’ebé tenke asina hamutuk ho Banku Mundiál.

Ba ita nia realidade, kultura foun só bele buras wainhira iha sentidu sidadania ne’ebé forte. Ita nia povu evolui ka dezenvolve sai Estadu liberál, iha prosesu ida ne’ebé sistema kapitalista seidauk estrutura didi’ak atu bele fó ba sidadaun ida-ida nia devér atu selu impostu no nune’e bele ekilibra entre direitus ho deveres, hodi ezije ba Governu atu halo boa governasaun, hatuur metin iha prinsípiu justisa sosiál. Ita nia povu presiza tan postus empregus ka loke tan servisu,presiza eskola tan i hetan formasaun téknika profisionál ne’ebé di’ak. Nesesáriu tebes artikula polítikas formasaun ho integrasaun sosiál no hametin polítika unidade nasionál. Só ho ida ne’e mak ita bele avansa ho Estadu-de Direitu Demokrátiku sein problemas boot ba estabilidade no seguransa nasionál.

Instrumentu boot liuhotu ne’ebé Governu iha mak povu nia vontade boot atu moris iha Páz, Armonia no Estabilidade laran. Vontade ida ne’e mak loke nia laran tomak atu bele koopera, kontribui no dezenvolve, vontade ida ne’e hori uluk kedas hametin ona durante tinan hirak ne’ebé ho susar no térus ita halo funu ba libertasaun. Governu tenke hasai lisaun kle’an husi luta ba libertasaun atu bele hametin prosesu polítiku ba governasaun demokrátika. Lisaun ne’ebé hasai husi lisoens tomak husi tempu gerrilha ne’ebé ita bele sintetiza ka habadak ho liafuan ida de’it: Onestidade ka laran moos.

Ho onestidade ne’ebé gerrilha hatudu ba povu mak bele garante susesu iha funu gerrilha. Líderes gerrilha sira la halo promessas irrealistas ba ita nia povu. Sira la promete katak paíz balu sei hatún aviaun, kilat no soldadus atu mai liberta ita. Sira hateten de’it katak ita sei kontinua reziste tanba só ho rezistênsia mak ita bele hetan vitória i ho mós opsaun seluk katak ita bele mate mohu hotu, ne’e mak ita labele haluha. Povu ezije ba ita nia gerrilheirus asuwa’in sira, katak karik tenke mate sira bele mate iha ai-laran, povu prontu atu mate iha ne’e, iha inimigu nia liman.Espíritu patriótiku ida ne’e maka uluk Monsenhór D. Martinho Lopes haklaken ho firmeza, katak: Karik ita hotu tenke mate, ita tenke mate hamriik! Hanesan mós buat ne’ebé Martin Luther King Jr.: hateten: Se mane ida la iha kauza ka buat importante ida atu bele fó nia vida, entaun nia vida ne’e mós sei la vale).

Ba buat sira ne’e hotu, ba inspirasaun umana no digna ne’e tomak maka umanidade prova ona nia karáter transkontinentál no transrasiál katak atravesa kontinentes ho rasas.Sosiedade foun Timór-nian sei sai sosiedade ida ne’ebé riku liután ho nia ekonomia, relijiaun, kultura i tradisaun. Tanba ne’e duni maka, ita nia paíz no ita nia povu sei sai parseirus importantes, hamriik hamutuk i hanesan, ho paízes e povus sira seluk.

Ita nia sidadauns hotu, namkari lemo mundu tomak sei sai hanesan ita nia embaixadores ba valores hirak ne’e tomak, hodi kontribui ba promosaun no respeitu entre povus,respeitu ba povu sira seluk nia relijiaun, respeitu ba diversidades kulturais no, ha’u fiar katak ita nia maun-alin sira naklekar iha mundu tomak sei sai mós hanesan ajentes Povu nian ba promosaun relasoens umanas hodi hametin valores universais.

Mai ita hahí no hasa’e ba leten aas liu, sakrifísius ne’ebé ita nia kombatentes tomak ba libertasaun nasionál halo, hori uluk kedas, liu-liu sira ne’ebé mate ona.
Ida ne’e maka dehan katak ita nia ain-fatin ne’ebé loloos nian, tanba ho ida ne’e mak bele marka iha istória: “ ha’u nia forma libertasaun”.

*Tradusaun husi Portugues ba Tetum husi Jose Estevao Soares no Exklusivo para Forum-Haksesuk