Filipe Rodriguês Pereira
Iha dia 9 de Desembru 2008 tinan liu ba’a, MNEC Timor-Leste oficialmente haruka Recall Letter ba’a embaixador TL iha Indonesia, Ir. Ovidio de Jesus. Bolu-fila embaixador Ir. Ovidio hamosu kestoins tamba Ir. Ovidio foin mak ba’a hala’o ninia misaun nudar embaixador iha fulan 20 nia laran. Ita mos sidauk hetene klaru, durasaun misaun embaixador ida ba’a iha rai leur ho tempu tinan hira?! Maibe primeiro embaixador Timor-Leste ba’a Indonesia, Rev. Arlindo Marçal hala’o ninia misaun de trabalho durante tinan hat nia laran. Bolu fila embaixador ida hodi mai simu kargu foun iha estrutura governu ka estadu buat ida normal, sei la normal no hamosu interpretasaun oi-oin, wainhira estadu ka governu bolu-fila embaixador ida nebe’e sidauk to’o ninia tempu, no fila mai Timor-Leste sem simu kargu foun. Embaixador nebe’e mak bolu fila ho kategoria ne’e hamosu interpretasaun iha publiku nia let. Publiku bele hare katak embaixador nebe’e refere hala’o servisu ladiak wainhira hala’o ninia funsaun, ou bele mos tamba razaun politika, governu hakarak tau ema ka individu nebe’e mak besik ba’a governantes sira nia intereses.
Relasiona substituisaun embaixador Timor-Leste ba’a Indonesia, estadu Timor-Leste haruka ona naran foun ba’a estadu Indonesia hodi substitui Ir. Ovidio de Jesus nia fatin nebe’e mak agora dadaun sei vaga. Tuir informasaun nebe’e namlekar iha sosiadade nia let, antes haruka Recall Letter hodi bolu fila Ir. Ovidio de Jesus, governantes Timor-Leste propoin officialmente ba’a Indonesia naran Ir. Manuel Serrano mak sei ba’a substitui embaixador Ovidio. Ir. Serrano agora dadaun sei hala’o k’nar nudar Konsul Timor-Leste iha Bali.
Proposta governo no estadu Timor-Leste nebe’e propoin Ir. Serrano hodi sei ba’a sai nudar futuru embaixador Timor-Leste iha Indonesia hamosu lamentasoins iha sosiadade Timor-Leste nia let, buat nebe’e mak hanesan Hermenegildo Kupa fo’o sai ba’a publiku liu husi imprensa. Tuir Kupa ninia intervista ba’a media iha Timor-Leste hateten katak Ministro Zacarias halo praktika nepotismu hodi hili Ir. Serrano. Kupa mos haktuir katak Ministro Zacarias haruka Ir. Serrano nia naran ba’a Indonesia sem iha conhecimento husi Primeiro Ministro. Tebes?, nudar PM, Xanana no Ramos-Horta la hatene kona ba’a desizaun ne’e? Maibe kestoins no lamentasoins nebe’e mak mosu husi sosiadade hatudu katak governantes sira la preparadu, buka hasimples prosesu no mekanismu i sem iha konsiderasaun maduru kona ba’a desizaun politika hodi hili kandidatu futuru embaixador nebe’e refere. Por ezemplu, bolu-fila embaixador Armindo Maia, Ovidio de Jesus no iha tempu badak mai sei bolu-fila mos Manuel Abrantes hatudu katak governu no estadu tempu neba’a la iha konsiderasaun tasak hodi halo disizaun hili embaixador sira. Praktika sira ne’e hatudu inefesiensia no bele fo’o impaktu finanseiras.
Mosu lamentasoins iha sosiadade Timor-Leste nia let dalaruma tamba la’iha mos transparensia husi governantes no lideranda nasaun ne’e nian kona ba’a prosesu no mekanismu ida diak. Kona ba’a kazu Ir. Serrano nian, sosiadade dehan mos katak la’iha transparensia husi governantes sira. Sira balun haktuir mos katak sera que formalmente governantes nasaun ne’e deside ona Ir. Serrano mak atu ba’a kaer k’nar nudar futuru embaixador maibe to’o agora dadaun Ir. Serrano sei hala’o hela nafatin ninia k’nar nudar Konsul Timor-Leste iha Bali. Atu la hamosu tudingan oi-oin, governu Timor-Leste presiza haruka ona mos Recall Letter ba’a Ir. Serrano atu mai hein iha Timor-Leste to’o estadu Indonesia fo’o resposta. Tamba kondisaun hodi husik Ir. Serrano kaer nafatin k’nar nudar Konsul hamosu mos tudingan husi sosiadade nebe’e hateten katak Ministro Zacarias Albano mak haksumik prosesu ne’e, tamba se wainhira Ir. Serrano bolu-fila hodi mai hein iha Timor-Leste, no wainhira husi parte Indonesia rejeita Ir. Serrano nia naran maka Ir. Serrano sei bele kontinua ka’er nafatin k’nar nudar Konsul Timor-Leste iha Bali. Sosiadade balun lamenta hodi dehan katak Ministro Zacarias sei maluk ho Ir. Serrano maka Ministro Zacarias mos lakohi atu Ir. Serrano lakon fatin rua ne’e hotu.
Liu husi buat nebe’e mak temi iha leten hatudu katak governu hakarak substitui ema tuir governantes sira nia gostu maibe governu rasik la iha preparasaun no la prontu atu hala’o prosesu ida nebe’e normal. Se atu troka Ir. Ovidio ho Ir. Serrano, maka MNEC tenki halo substituisaun mos ba’a fatin Ir. Serrano nian nudar Konsul iha Bali ho ema seluk, se no kazu sidauk iha kandidatu maka governantes sira lalika ansi a’an atu bolu fila embaixador Ovidio. Terlepas husi embaixador Ovidio iha ninia limitasoins barak ba’a k’nar nudar embaixador maibe sei diak liu husik lai embaixador Ovidio aguventa oituan duke husik embaixada vaga embaixador ida iha tempu ida naruk.
Embaixada Timor-Leste iha Jakarta dalaruma sei vaga ho prezensa embaixador tamba Indonesia oras ne’e dadaun tau liu atensaun ba’a Eleisaun Legislativia nebe’e sei hala’o iha tempu badak mai. Iha kazu ne’e ita bele hare mos katak governantes Timor-Leste la buka atu tetu no hare kona ba’a prosesu aseitasaun husi parte Indonesia nian la’o oin sa. Iha Indonesia tuir ita hotu hatene katak ema ida atu ba’a hala’o k’nar nudar embaixador iha Indonesia presiza hetan mos ‘aseitasaun’ husi parlamentu Indonesia nian. Ho eleisaun legislativa nebe’e mak Indonesia sei infrenta iha fulan tolu nia laran nebe’e mak sei mai, dalaruma Indonesia nia parlamento mos la’iha tempu atu prosesa Timor-Leste nia proposta kona ba’a embaixador foun iha tempu badak, se nune’e maka embaixada Timor-Leste iha Jakarta sei vaga embaixador iha tempu ida naruk. Se no kazu estadu Indonesia loron ikus mai mak rejeita mos tan Ir. Serrano nia naran maka embaixada Timor-Leste iha Jakarta sei vaga iha tempu ida naruk liu tan.
Kestoins kona ba’a figura Ir. Serrano la’os mosu deit iha Timor-Leste maibe iha mos lamentasoins husi parte Indonesia nian. Membru parlamentu nasional Indonesia, Yusron Izha Mahendra hato’o mos ninia komentariu (newslinkweb, 26/12/2008) nebe’e dehan katak karik Ir. Serrano sei kaer pasporte rua (pasaporte Indonesia no Timor-Leste) maka Parlemento Nasional Indonesia sei rekomenda ba’a governo Indonesia atu rejeita kandidatu futuru embaixador ne’e. Komentariu Yusron Izha Mahendra iha relasaun ho ‘tudingan’ husi rai-laran nebe’e mak dehan Ir. Serrano durante ne’e sei kaer mos pasporte Indonesia nian, no iha tempu da resistensia Ir. Serrano inklina ba’a linha politika pro-integrasaun.
Relasiona ho issu kona ba’a back round politika iha tempu ne’e, hamosu mos kestoins hodi ita halo refleksaun. Ho no liu husi funu-klandistina nia laran, se’e los mak integrasionistas isin, oportunistas isin no independensistas isin iha nasaun ne’e?! Ita atu uza kriteria validu saida mak atu bele koloka ho proporsionalidade ida klaru kona ba’a ‘istas’ nebe’e mak mensiona dadaun ba’a ema ka grupu ida iha Timor-Leste prezente?!
Se karik Ir. Serrano ka Timor-o’an seluk ruma hetan fiar husi Nai-Ulun Timor-Leste, no uluk sira inklui a’an iha grupu pro-integrasaun, maka dalaruma governantes Timor-Leste konsidera mos back round politika ne’e hodi deside hili Ir. Serrano ba’a sai futuru embaixador Timor-Leste iha Indonesia duke hili figura seluk. Dalaruma governantes sira hakarak hatudu ba’a Indonesia katak politika rekonsiliasaun Timorenses la’os koalia deit iha ibun-tutun maibe aplika mos iha pratika, husi ministro tama to’o nivel kraik, husi rai-laran sai to’o ba’a rai-leur. Maibe intendimentu diak husi parte Timor-Leste ne’e sei hetan tanggapan diak husi parte Indonesia?!, ka dalaruma Indonesia sei hare fali oin seluk, por ezemplu, Indonesia bele dehan katak eis kolaborador politika ida uluk servisu hamutuk ho Indonesia atu alkansa politika integrasaun afinal halo jogada politika rua iha tempu pasadu. Wainhira Indonesia hare husi ponto de vista ida nune’e maka dalaruma Indonesia sei rejeita Ir. Serrano nia naran atu sai futuru embaixador Timor-Leste ba’a Indonesia. Wainhira mos husi partes Indonesia tau ninia razaun ho pontu de vista hanesan mensiona dadaun iha leten, no husi partes maluk sira iha Timor-Leste nebe’e la aseita ho kandidatura Ir. Serrano nian tamba ho razaun pro-integrasaun, maka automatikamente kondisaun ne’e lori Ir. Serrano mak sai nudar vitima iha prosesu ida ne’e nia laran. Parte rua hotu la aseita Ir. Serrano nia prezensa hodi sai nudar futuru embaixador ba’a no mai Indonesia. Figura Ir. Serrano atu ba’a sai embaixador Timor-Leste iha Indonesia tau mos PM Xanana Gusmao iha dilemma nia laran.
Hare ba’a problema nebe’e mosu relasiona ho kandidatura embaixador Timor-Leste ba’a Indonesia, ita hein katak ita hotu sei kaer kazu nebe’e mak agora dadaun mosu nudar lisaun diak ba’a futuru. Haruka embaixador ida ba’a nasaun seluk ladun difisil, maibe atu kandidata individu ida ba’a sai embaixador iha Indonesia prezente presiza tetu ho tasak. La’os hare deit husi parte Timor-Leste, maibe tenki hare mos husi parte Indonesia nian. Tamba relasaun entre Timot-Leste ho Indonesia (government to government ka people to people) iha oras ne’e dadaun sei bele konsidera nudar tempu ida sensitivu teb-tebes. Sensitivu tamba entre Timor-Leste ho Indonesia iha istoria pasadu ida metan. Presiza tempu atu hadia gradualmente relasaun entre nasaun rua ne’e. Ezemplu simples kona ba’a sensitividades hakait ho kazu ne’e, lideransa Timor-Leste seidauk iha korajen politika atu escolha Ir. Mario Carrascalao ka Clementino do Amaral mak atu ba’a sai embaixador Timor-Leste iha Indonesia prezente.
Pro-kontra nebe’e mak agora dadaun mosu relasiona ho kazu proposta Ir. Serrano ba’a embaixador bele fo’o hanoin ba’a governantes sira atu wainhira internalmente kandidata individu ruma ba’a embaixador iha nasaun seluk alem de buka tetu kondisaun nebe’e mak relevansia, presiza tetu mos ema nia kapasidade, saúde, fiziku no sel-seluk tan. Ita mos hein katak sei la iha tan embaixador ka diplomatas ruma nebe’e mak ba’a hala’o misaun diplomatika iha nasaun seluk uza oportunidade atu estuda iha distinu nasaun. Diplomata nebe’e uza oportunidade hala’o misaun hodi mos estuda iha universidade dalaruma hatudu imajem ladiak, hakruk a’an ba’a nasaun seluk nia lei, buat nebe’e mak la premiti iha regras diplomatika. Se sei hakarak ser universitariu, hili hodi eskola los deit, lalika halo double misaun iha distinu nasaun, labele sai diplomata e universitariu iha ao mesmu tempu. ***END****
Iha dia 9 de Desembru 2008 tinan liu ba’a, MNEC Timor-Leste oficialmente haruka Recall Letter ba’a embaixador TL iha Indonesia, Ir. Ovidio de Jesus. Bolu-fila embaixador Ir. Ovidio hamosu kestoins tamba Ir. Ovidio foin mak ba’a hala’o ninia misaun nudar embaixador iha fulan 20 nia laran. Ita mos sidauk hetene klaru, durasaun misaun embaixador ida ba’a iha rai leur ho tempu tinan hira?! Maibe primeiro embaixador Timor-Leste ba’a Indonesia, Rev. Arlindo Marçal hala’o ninia misaun de trabalho durante tinan hat nia laran. Bolu fila embaixador ida hodi mai simu kargu foun iha estrutura governu ka estadu buat ida normal, sei la normal no hamosu interpretasaun oi-oin, wainhira estadu ka governu bolu-fila embaixador ida nebe’e sidauk to’o ninia tempu, no fila mai Timor-Leste sem simu kargu foun. Embaixador nebe’e mak bolu fila ho kategoria ne’e hamosu interpretasaun iha publiku nia let. Publiku bele hare katak embaixador nebe’e refere hala’o servisu ladiak wainhira hala’o ninia funsaun, ou bele mos tamba razaun politika, governu hakarak tau ema ka individu nebe’e mak besik ba’a governantes sira nia intereses.
Relasiona substituisaun embaixador Timor-Leste ba’a Indonesia, estadu Timor-Leste haruka ona naran foun ba’a estadu Indonesia hodi substitui Ir. Ovidio de Jesus nia fatin nebe’e mak agora dadaun sei vaga. Tuir informasaun nebe’e namlekar iha sosiadade nia let, antes haruka Recall Letter hodi bolu fila Ir. Ovidio de Jesus, governantes Timor-Leste propoin officialmente ba’a Indonesia naran Ir. Manuel Serrano mak sei ba’a substitui embaixador Ovidio. Ir. Serrano agora dadaun sei hala’o k’nar nudar Konsul Timor-Leste iha Bali.
Proposta governo no estadu Timor-Leste nebe’e propoin Ir. Serrano hodi sei ba’a sai nudar futuru embaixador Timor-Leste iha Indonesia hamosu lamentasoins iha sosiadade Timor-Leste nia let, buat nebe’e mak hanesan Hermenegildo Kupa fo’o sai ba’a publiku liu husi imprensa. Tuir Kupa ninia intervista ba’a media iha Timor-Leste hateten katak Ministro Zacarias halo praktika nepotismu hodi hili Ir. Serrano. Kupa mos haktuir katak Ministro Zacarias haruka Ir. Serrano nia naran ba’a Indonesia sem iha conhecimento husi Primeiro Ministro. Tebes?, nudar PM, Xanana no Ramos-Horta la hatene kona ba’a desizaun ne’e? Maibe kestoins no lamentasoins nebe’e mak mosu husi sosiadade hatudu katak governantes sira la preparadu, buka hasimples prosesu no mekanismu i sem iha konsiderasaun maduru kona ba’a desizaun politika hodi hili kandidatu futuru embaixador nebe’e refere. Por ezemplu, bolu-fila embaixador Armindo Maia, Ovidio de Jesus no iha tempu badak mai sei bolu-fila mos Manuel Abrantes hatudu katak governu no estadu tempu neba’a la iha konsiderasaun tasak hodi halo disizaun hili embaixador sira. Praktika sira ne’e hatudu inefesiensia no bele fo’o impaktu finanseiras.
Mosu lamentasoins iha sosiadade Timor-Leste nia let dalaruma tamba la’iha mos transparensia husi governantes no lideranda nasaun ne’e nian kona ba’a prosesu no mekanismu ida diak. Kona ba’a kazu Ir. Serrano nian, sosiadade dehan mos katak la’iha transparensia husi governantes sira. Sira balun haktuir mos katak sera que formalmente governantes nasaun ne’e deside ona Ir. Serrano mak atu ba’a kaer k’nar nudar futuru embaixador maibe to’o agora dadaun Ir. Serrano sei hala’o hela nafatin ninia k’nar nudar Konsul Timor-Leste iha Bali. Atu la hamosu tudingan oi-oin, governu Timor-Leste presiza haruka ona mos Recall Letter ba’a Ir. Serrano atu mai hein iha Timor-Leste to’o estadu Indonesia fo’o resposta. Tamba kondisaun hodi husik Ir. Serrano kaer nafatin k’nar nudar Konsul hamosu mos tudingan husi sosiadade nebe’e hateten katak Ministro Zacarias Albano mak haksumik prosesu ne’e, tamba se wainhira Ir. Serrano bolu-fila hodi mai hein iha Timor-Leste, no wainhira husi parte Indonesia rejeita Ir. Serrano nia naran maka Ir. Serrano sei bele kontinua ka’er nafatin k’nar nudar Konsul Timor-Leste iha Bali. Sosiadade balun lamenta hodi dehan katak Ministro Zacarias sei maluk ho Ir. Serrano maka Ministro Zacarias mos lakohi atu Ir. Serrano lakon fatin rua ne’e hotu.
Liu husi buat nebe’e mak temi iha leten hatudu katak governu hakarak substitui ema tuir governantes sira nia gostu maibe governu rasik la iha preparasaun no la prontu atu hala’o prosesu ida nebe’e normal. Se atu troka Ir. Ovidio ho Ir. Serrano, maka MNEC tenki halo substituisaun mos ba’a fatin Ir. Serrano nian nudar Konsul iha Bali ho ema seluk, se no kazu sidauk iha kandidatu maka governantes sira lalika ansi a’an atu bolu fila embaixador Ovidio. Terlepas husi embaixador Ovidio iha ninia limitasoins barak ba’a k’nar nudar embaixador maibe sei diak liu husik lai embaixador Ovidio aguventa oituan duke husik embaixada vaga embaixador ida iha tempu ida naruk.
Embaixada Timor-Leste iha Jakarta dalaruma sei vaga ho prezensa embaixador tamba Indonesia oras ne’e dadaun tau liu atensaun ba’a Eleisaun Legislativia nebe’e sei hala’o iha tempu badak mai. Iha kazu ne’e ita bele hare mos katak governantes Timor-Leste la buka atu tetu no hare kona ba’a prosesu aseitasaun husi parte Indonesia nian la’o oin sa. Iha Indonesia tuir ita hotu hatene katak ema ida atu ba’a hala’o k’nar nudar embaixador iha Indonesia presiza hetan mos ‘aseitasaun’ husi parlamentu Indonesia nian. Ho eleisaun legislativa nebe’e mak Indonesia sei infrenta iha fulan tolu nia laran nebe’e mak sei mai, dalaruma Indonesia nia parlamento mos la’iha tempu atu prosesa Timor-Leste nia proposta kona ba’a embaixador foun iha tempu badak, se nune’e maka embaixada Timor-Leste iha Jakarta sei vaga embaixador iha tempu ida naruk. Se no kazu estadu Indonesia loron ikus mai mak rejeita mos tan Ir. Serrano nia naran maka embaixada Timor-Leste iha Jakarta sei vaga iha tempu ida naruk liu tan.
Kestoins kona ba’a figura Ir. Serrano la’os mosu deit iha Timor-Leste maibe iha mos lamentasoins husi parte Indonesia nian. Membru parlamentu nasional Indonesia, Yusron Izha Mahendra hato’o mos ninia komentariu (newslinkweb, 26/12/2008) nebe’e dehan katak karik Ir. Serrano sei kaer pasporte rua (pasaporte Indonesia no Timor-Leste) maka Parlemento Nasional Indonesia sei rekomenda ba’a governo Indonesia atu rejeita kandidatu futuru embaixador ne’e. Komentariu Yusron Izha Mahendra iha relasaun ho ‘tudingan’ husi rai-laran nebe’e mak dehan Ir. Serrano durante ne’e sei kaer mos pasporte Indonesia nian, no iha tempu da resistensia Ir. Serrano inklina ba’a linha politika pro-integrasaun.
Relasiona ho issu kona ba’a back round politika iha tempu ne’e, hamosu mos kestoins hodi ita halo refleksaun. Ho no liu husi funu-klandistina nia laran, se’e los mak integrasionistas isin, oportunistas isin no independensistas isin iha nasaun ne’e?! Ita atu uza kriteria validu saida mak atu bele koloka ho proporsionalidade ida klaru kona ba’a ‘istas’ nebe’e mak mensiona dadaun ba’a ema ka grupu ida iha Timor-Leste prezente?!
Se karik Ir. Serrano ka Timor-o’an seluk ruma hetan fiar husi Nai-Ulun Timor-Leste, no uluk sira inklui a’an iha grupu pro-integrasaun, maka dalaruma governantes Timor-Leste konsidera mos back round politika ne’e hodi deside hili Ir. Serrano ba’a sai futuru embaixador Timor-Leste iha Indonesia duke hili figura seluk. Dalaruma governantes sira hakarak hatudu ba’a Indonesia katak politika rekonsiliasaun Timorenses la’os koalia deit iha ibun-tutun maibe aplika mos iha pratika, husi ministro tama to’o nivel kraik, husi rai-laran sai to’o ba’a rai-leur. Maibe intendimentu diak husi parte Timor-Leste ne’e sei hetan tanggapan diak husi parte Indonesia?!, ka dalaruma Indonesia sei hare fali oin seluk, por ezemplu, Indonesia bele dehan katak eis kolaborador politika ida uluk servisu hamutuk ho Indonesia atu alkansa politika integrasaun afinal halo jogada politika rua iha tempu pasadu. Wainhira Indonesia hare husi ponto de vista ida nune’e maka dalaruma Indonesia sei rejeita Ir. Serrano nia naran atu sai futuru embaixador Timor-Leste ba’a Indonesia. Wainhira mos husi partes Indonesia tau ninia razaun ho pontu de vista hanesan mensiona dadaun iha leten, no husi partes maluk sira iha Timor-Leste nebe’e la aseita ho kandidatura Ir. Serrano nian tamba ho razaun pro-integrasaun, maka automatikamente kondisaun ne’e lori Ir. Serrano mak sai nudar vitima iha prosesu ida ne’e nia laran. Parte rua hotu la aseita Ir. Serrano nia prezensa hodi sai nudar futuru embaixador ba’a no mai Indonesia. Figura Ir. Serrano atu ba’a sai embaixador Timor-Leste iha Indonesia tau mos PM Xanana Gusmao iha dilemma nia laran.
Hare ba’a problema nebe’e mosu relasiona ho kandidatura embaixador Timor-Leste ba’a Indonesia, ita hein katak ita hotu sei kaer kazu nebe’e mak agora dadaun mosu nudar lisaun diak ba’a futuru. Haruka embaixador ida ba’a nasaun seluk ladun difisil, maibe atu kandidata individu ida ba’a sai embaixador iha Indonesia prezente presiza tetu ho tasak. La’os hare deit husi parte Timor-Leste, maibe tenki hare mos husi parte Indonesia nian. Tamba relasaun entre Timot-Leste ho Indonesia (government to government ka people to people) iha oras ne’e dadaun sei bele konsidera nudar tempu ida sensitivu teb-tebes. Sensitivu tamba entre Timor-Leste ho Indonesia iha istoria pasadu ida metan. Presiza tempu atu hadia gradualmente relasaun entre nasaun rua ne’e. Ezemplu simples kona ba’a sensitividades hakait ho kazu ne’e, lideransa Timor-Leste seidauk iha korajen politika atu escolha Ir. Mario Carrascalao ka Clementino do Amaral mak atu ba’a sai embaixador Timor-Leste iha Indonesia prezente.
Pro-kontra nebe’e mak agora dadaun mosu relasiona ho kazu proposta Ir. Serrano ba’a embaixador bele fo’o hanoin ba’a governantes sira atu wainhira internalmente kandidata individu ruma ba’a embaixador iha nasaun seluk alem de buka tetu kondisaun nebe’e mak relevansia, presiza tetu mos ema nia kapasidade, saúde, fiziku no sel-seluk tan. Ita mos hein katak sei la iha tan embaixador ka diplomatas ruma nebe’e mak ba’a hala’o misaun diplomatika iha nasaun seluk uza oportunidade atu estuda iha distinu nasaun. Diplomata nebe’e uza oportunidade hala’o misaun hodi mos estuda iha universidade dalaruma hatudu imajem ladiak, hakruk a’an ba’a nasaun seluk nia lei, buat nebe’e mak la premiti iha regras diplomatika. Se sei hakarak ser universitariu, hili hodi eskola los deit, lalika halo double misaun iha distinu nasaun, labele sai diplomata e universitariu iha ao mesmu tempu. ***END****
Sem comentários:
Enviar um comentário
Nota: só um membro deste blogue pode publicar um comentário.