Hau nia eskolha iha semana ida ne'e

hosi: Celso Oliveira*

I. Mari Alkatiri prefere uza dalan "ajita massa" do ke ba tribunal rekursu

Mari Alkatiri, Sekretariu Jeral Fretilin, halo afirmasaun hodi dehan katak IV Governu Konstiituisional laiha diferensa ho momentu Indonesia invade Timor Leste iha tinan 1975. Ilegal, Imoral, i, Inkonstituisional. Iha razaun ka laiha? Politikus Indonesios sira kuandu rona afirmasaun ida ne'e bele hamnasa.

Tamba razaun ida ne'e maka Mari Alkatiri prefere uza dalan "ajita massa" do ke ba Tribunal Rekursu hodi hatu'un IV Governu Konstituisional. Ramos Horta, Presidenti da Republika Timor Leste, konsidera afirmasaun ne'e grave tebes. "Se IV Governu ne'e inkonstituisional, entaun, Presidenti da Republika nia desizaun maka inkonstituisional. Se karik nune, entaun Presidenti da Republika maka tenki resigna-an", dehan Ramos Horta.

Konaba politika "ajita massa" iha kazu Timor Leste laos buat ida foun. Ho povo nia mentalidadi nebe foin sai hosi funu, kampanya atu "ajita massa" bele provoka imediata konfrontasaun ou violensia foun iha Timor Leste. Mesmu ke organizadores promete katak sei laiha violensia, maibe laiha garantia ba buat ne. Atu halo aktividadi hosi IV Governu Konstituisional labele lao ba oin, massa sei ba okupa instalasaun governu no parlamentu nasional i massa ASDT sei ba okupa instalasaun nebe maka ministerius hosi membros ASDT-mudansa uza.

Brigadeiru Taur Matan Ruak, komandante F-FDTL, hateten iha Timor Semanal edisaun 108: "Hanesan iha intervista ida iha 12 de Maiu 2006 hau hateten, iha koalker nasaun, iha forma tolu atu hatun guvernu ida. Forma ida maka uza ema nia deskontentamentu, forma seluk maka uza militares no forma terseiru maka eleisoens. I hau nia rekomendasaun ba Politicu sira hotu maka tenki tuir eleisoens, tuir ita nia Konstituisaun. Independentemente ida nebe deit ema hili hodi dudu desenvolvimento politicu iha ita nia Nasaun, Forsas Armadas ninia posisaun ida no mesak ida deit: tuir no halo tuir sistema politicu nebe hakerek ona iha Konstituisaun!"

II. Forsa hosi komunikasaun sosial iha Timor Leste

Tempo semanal edisaun 108 hatu'un reportajem ida furak tebes, bele konsidera hanesan "jornalismu investigasaun". Ho titulo "SMS: MJ Fo Projektu ba An Rasik no Ninia Belum Sira", jornal tempo semanal esplika detail konaba oinsa funsiona KKN iha MJ nia laran. Iha rai demokratiku, reportejem ne'e la signifika katak MJ halo sala tiha ona, maibe hosi reportajem hanesan ne'e bele sai indisiu hodi Ministeriu Publiku hahu'u halo investigasaun. Kuandu provadu sala automatikamente MJ resigna-an kedas tamba hahalok hanesan ne'e la reprezenta "governasaun diak".

Ho reportajem hanesan ne'e hatudu mos oinsa komunikasaun sosial dezenpenha funsaun importanti, i, bele fo garantia ba demokrasia iha Timor Leste. Ne'e duni, bele konsidera katak komunikasaun sosial iha Timor Leste hanesan forsa ida hosi forsa seluk-seluk nebe maka existe iha Timor Leste hodi bele kontrola governu AMP nia lalaok iha palku politika nasional i internasional.

III. Remodelasaun

Planu hosi IV Governu Konstituisional atu halo remodelasaun iha tempu badak nia laran bele konsidera hanesan passus ida diak tebes hodi bele fo garantia ba planu dezenvolvimentu nasional nebe trasa tiha ona. Iha kualker parte, remodelasaun iha governu ida nia laran buat ida ke akontese normal, laos tamba deit razaun "KKN ou governasaun ladiak", maibe liu-liu tamba remodelasaun bele halo efisiensia governu nia servisu.

IV. Mario Viegas Carrascalao hatudu exemplo ida diak

Mario Viegas Carrascalao, ema nebe merese hetan respeitu hosi povo Timor hateten katak lakohi kandidata-an ba proximo presidente PSD iha kongressu PSD nebe atu halo daudaun. Mario Carrascalao hatudu exemplo ida diak iha panorama politika Timor Leste nian.

Iha Timor Leste, problema krisi lideransa iha partidu historiku sira nia laran merese hetan atensaun hosi partidu historiku Fretilin i UDT. Laos povo Timor maka laiha konfiansa ba Fretilin ou UDT maibe ema antigu ho hanoin sei kontinua antigu sei la lori pregressu i dezenvolvimentu ba partidu. Ne'e duni, ohin loron kuandu Fretilin i UDT hetan krisi laos tamba razaun seluk maibe tamba kestaun lideransa.

*Koloborador Forum Haksesuk, hela iha Inglaterra!