Historia Real Hosi Jerasaun Funu

Historia Real Hosi Jerasaun Funu*

(Hau nia hanoin konaba livru A childhood fighting for East Timor, autor: Naldo Rei)

Kuandu hau rona katak Naldo Rei, publika nia livru konaba historia funu iha Timor, hanoin primeiru nebe mosu iha hau nia ulun maka “historia lo-lós ida tan hosi Timor oan, liu-liu representa jerasaun foun nebe sei halo riku mundu historiku i mundu literariu Timor nian”.

Naldo Rei hakerek livru laos atu manan osan ou atu sai riku. Klaru. Livru nebe Naldo Rei hakerek ho objektivu: atu fo sai ba ema seluk (publiku) konaba oinsa funu iha Timor Leste lao. Oinsa labarik ho klosan sira koloka sira nia-an iha prosesu ba independensia. Moris entre mundu rua, ida hanesan labarik no klosan meresa goja sira nia liberdade ou direitu (maibe la konsege), ida seluk oinsa labarik ho klosan koloka sira nia-an iha processu ida be difisil tebes-tebes ba ukun rasik-an. Ne’e duni, hau rasik seidauk lê livru ida ne’e, maibe bainhira ita lê livru hanesan Naldo Rei nian, signifika iha ita nia liman laran laos iha historia fiksaun maibe historia real, ou, livru real ida.

Hare hosi grau experiensia hosi propriu autor iha processu funu nia laran, livru Naldo Rei merese sai best seller iha Austrália.

Hau konhese Naldo Rei iha Jacarta iha tempu badak nia laran kuandu halo servisu klandestinu. Ida-idak servisu tuir ni-nia ritmu/irama. Hanesan osan moeda ida maibe ninia sorin rua la hanesan.

Tantu Naldo Rei ou ema seluk, sei senti orgulho hanesan ema Timor. Maski moris iha rai seluk ou estranjeiru maibe kontinua fo kontribuisaun moral i fiziku hodi dezenvolve rai Timor. Buat saida maka Naldo Rei halo, hanesan exemplo diak ida ba Timor oan hotu, liu-liu ba jerasaun foun. Naldo Rei hakerek rasik ninia historia bazeia ba ninia experiensia brani nebe nia liu. Laos iha ne’e deit, maibe, Naldo Rei buka fo sai ba ema seluk konaba verdadeira luta Timor oan nian.

Konaba Timor nia historia merese Timor oan maka hakerek i dezenvolve rasik. Iha rai liur, liu-liu iha Portugal, hau lê livru barak konaba Timor maibe autor Timor oan rasik bele sura ho liman fuan. Livrus barak konaba Timor ho autor, entre Portuguêz i Australiano maka hakerek barak.

Portuguêz hatene i gosta simu ema Timor iha sira nia rain (Portugal) hafoin, rona ema Timor nia historia, ikus mai portuguêz sira publika ou hakerek livru konaba ema Timor nia historia. Enkuantu funu, ema Timor maka halao, senti kanek no mate maibe historia konaba funu iha Timor hetan liu fatin iha ema portuguêz ninia interesse hodi hakerek ou dezenvolve. Ne’e duni, saida maka Naldo Rei halo iha Austrália merese Timor oan hotu nia basa liman/tepuk tangan i parabéns.

Iha tempu aktual, Timor Leste presija investimentu maka’as iha kampu historiku i literariu, tamba formasaun rai no povu Timor mosu iha tempu uluk tiha ona (ou molok Cristu moris) maibe liberdade lo-lós hetan iha tempu pós-modernu. Ne’e duni, Timor Leste husik hela historia real barak ba iha kotuk ou hakoi hela. I, direitu ema Timor oan atu hakerek i dezenvolve.

Ikus mai, parabéns ba Naldo Rei, parabéns ba Timor Leste, i, parabéns ba Universidade Quensland Press Austrália nebe publika livro A childhood fighting for East Timor, autor: Naldo Rei.

* Celso Oliveira, poeta Timor oan, hela iha England.