TAN DEIT HO KADEIRA 8, ITA NIA PROKLAMATOR, MR. XAVIER SAI SAI FALI MR. LAMBE KABEN

TAN DEIT HO KADEIRA 8, ITA NIA PROKLAMATOR, MR. XAVIER SAI SAI FALI MR. LAMBE KABEN

* ). J. MONTEIRO (jmonteiro87@yahoo.com)

Ema barak hakfodak ho stratezia politika ne’ebe ASDT atu forma ho FRETILIN. Populasaun Timor Leste barak, no komunidade internasional nebe tuir no asiste hela prosesu dezenvolvimentu Timor Leste sempre hatene no rekunnese hela katak ASDT sei iha laxu governasaun iha AMP nia laran. Ema barak sai bilan, tamba sa maka ASDT nebe uluk kontra la halimar governasaun featuring Lu-Mari ohin loron realiza fali asina akordu ho FRETILIN ho reqerimentu kadeira 8 mak FRETILIN sei fo a ASDT. Desizaun Mr. Proklamator nudar Presidente ASDT nee, halo para ema lidere partidu sira, NGOs, akademikus, observadores sira, sarani Mr. Xavier hanesan halo stratezia politika primitivu ida ho partidu FRETILIN. Liu-liu mos, ema sei sarani fila fali Mr. Xavier hanesan lideransa nebe tafui kaben no ikus mai lambe fila fali. Stratezia polika ida nee mos bele hanaran, stratezia politika oportunista alias la konsisten ho ninia ideolozia fundamental no prinsipiu.

RAZAUN; ASDT HALO KOLIGASAUN HO FRETILIN

Nudar sidadaun Timor Leste, ema hotu iha direitu atu involve no afilia iha partidu politiku nebe deit, tuir konsiensia ida-idak nian. Prinsipiu ida nee konsagra mos iha ita nia Lei-inan ka Konstituisaun. Ita la iha kbit atu trava ou hapara netik ema ida nia hakarak atu tuir/tama-sai partidu ida, ba fali partidu seluk. Hau hanoin, partidu hirak nebe’e agora dadauk iha AMP nia laran mos sei la iha dereitu atu empata hakarak nebe lideransa no membrus ASDT desidi ona. Desizaun ASDT hodi hases-an husi AMP no se oin fila fali ba ninia inimigu, FRETILIN ne’e, sai hela ambigo ida. Ema lubuk ida mak valoriza desizaun ASDT atu halo koligasaun ho FRETILIN ne’e la iha razaun nebe klaru. Deklarasan Mr. Xavier ne’ebe dehan katak AMP, lidera husi Mr. Xanana komesa buras ho pratika Kolusaun, Korupsaun no Nepotismu (KKN). Sorin seluk, Mr. Proklamator mos hare katak governasaun Mr. Xanana hodi resolve problemas rai laran mos la iha signifikasaun. Hakerek nain rasik hare deklarasaun hirak ne’ebe Mr. Xavier fo sai ne’e la iha provas. Suspeitus hirak nebe agora dadauk detekta husi Provedoria dos Dereitos Humanos e da Justica (PDHJ) nee moris iha governasaun anterior, governasaun Lu-Mari nian. Durante AMP ukun iha fulan hirak nia laran, PDHJ seidauk indentifika membru governu AMP ou lideres AMP ida katak sira halo pratika KKN, liu-liu korupsaun. Katak, Mr. Xavier nebe dehan servisu AMP lao la los no la iha rezultadu nebe singnifikativu, hau hanoin ida ne’e opiniaun mamuk ne’ebe hanesan mosu husi lian karau/bibi atan ida iha pasture ida, tamba nia (karau/bibi atan) ne’e bilan no la hatene oin sa maka hein no tau matan ba ninia karau/bibi para keta tama/estraga ema nia toos no ai-han. Povu Timor Leste, lideres nasional, diplomatas no komunidade internasional barak mak aprisia governasaun AMP nebe lidera husi Mr. Xanana. Problema nasional nebe mosu iha tinan 2006 liu, barak maka atu besik rezolvidu ona.

FRETILIN ABANDONA TRABALHO DE CASA (TPC) BARAK BA AMP

Konkorda ka lae, governasaun anterior featuring Lu-Mari abandona TPC barak ba guvernu actual AMP agora. Problema nasional hirak ne’ebe agora dadauk buka hela nia solusaun ne’e mosu iha Mr. Lu-Mari nia tempu. Ho arogansi, inkapasidade nebe Lu-Mari iha, halo sira la konsege rezolve duni problema ne’e. Problema nasional ne’ebe governu anterior husik ba AMP ne’e mak hanesan fatuk bo’ot ida ne’ebe sei taka hela susesu guvernasaun AMP nian. Guvernu grande eksklusivu nebe AMP harii nee governu ida ne’ebe hatene rona no simu ema seluk nia aspirasaun. Governu ne’ebe loke-an ba sosiadade sivil no autoridade hotu-hotu. Formula ne’ebe agora dadauk AMP uza atu rezolve TPC ne’ebe FRETILIN abandona, iha ona sinal ne’ebe pozitivu no iha progresiu ne’ebe bo’ot, maske foin ukun iha fulan hirak nia laran. Problema petisionariu, IDP no problema relevante seluk, besik ona linha final nian. Iha ne’e, Mr. Xavier lolos tenke open minded hodi fo kontribuisaun moral ba AMP too 2012. Laos kanta no hakilar hanesan ema ne’ebe hein manu-lin iha natar, tamba manu han maka’as hare, tan deit natar-nain toba dukur hela. Nudar lider Senior, lolos tenke influensa maka’as lideres Junior no populasaun liu-liu, para tau hanoin hamutuk hodi fo importansia ba interese nasional nian, laos hare fali ba interese grupu ida ka interese partidaria.

ASDT FEATURING FRETILIN tamba titulu “PROKLAMATOR”

Razaun ida mos ba publiku katak ASDT realiza Memorandum of Understanding (MOU) ho FRETILIN tamba titulu “Proklamator” ne’ebe FRETILIN haraik hela ba Mr. Xavier iha loron meiudia. Naran “Proklamator” ne’ebe fo ba Mr. Xavier ne’e, hare ba sai hanesan honra ne’ebe fo iha loron meiudia, laos dadersan. Se karik maka uluk kedas FRETILIN rekunnese Mr. Xavier nudar “Proklamator” entaun Lu-Mari sarani kleur ona Avo Xavier ho titulu “Proklamator”. Ida ne’e ita bele hare husi deklarasaun ne’ebe Lu-Mari fo sai iha publiku katak FRETILIN la rekunnese Avo Xavier nudar Proklmator. Text “Proklamasaun” ne’e FRETILIN mak halo no Avo Xavier hein le’e deit, nune’e lolos Avo Xavier merese para bolu deit leitor Proklamasaun, laos “Proklamator”. Ida nee, bele haforte ho deklarasaun Lu-Mari ne’ebe Agencia Lusa fo sai ….”Laos Xavier do Amaral maka proklama 28 Nov. 1975, maibe CCF maka proklama RDTL. Mari Alkatiri dehan tan, ami hakerek text Proklamasaun Independencia hafoin fo ba nia , Mr. Xavier Amara,l ba le deit (Lusa, Outubro 2003). Razaun ne’ebe ASDT, Mr. Xavier kaer hodi alkansa stratezia politika ho FRETILIN, ikus mai bele sai hanesan paranoia deit. Akordu ne’ebe FRETILIN halo ho ASDT bele mos sai hanesan kurtinna deit. Ho ida ne’e, ikus mai ASDT bele sai hanesan ema ida ne’ebe fihir-an iha espellu nakfera ida, tamba nia (ASDT) la kunnese lolos ona se mak nia. Tantu MoU entre ASDT-FRETILIN ne’e sai hanesan pasu fenomenal ida iha palku politiku partidu rua ne’e nian. Maibe, liu-liu vantazen bo’ot sei uza husi FRETILIN tamba ASDT bele sai hanesan Taxi ida ne’ebe tula hela Lu-Mari ba Airo-portu tamba aviaun besik atu semo ona. To’o tiha Airo-portu, sira (Lu-Mari), ho lalais tenke check in no tama waiting room tamba aviaun besik atu semo. ASDT, Mr. Xavier nebe sai Taxista iha momentu ne’eba sei sai frustradu no stress tamba Lu-Mari nudar pasajeiru la selu fali Taxi no husu obrigado mos la iha. Iha momentu ne’eba, Mr. Xavier bele baku rentos no trata ho lia fuan at, maibe buat hotu tarde ona. Bele mos, Lu-Mari fo tan lia fuan la tama laran ba Taxista (ASDT-Mr. Xavier) hodi dehan “kacian dech loh”, Emang Gua Pikirin (EGP).

Ikus liu, nudar sidadaun Timor oan ida ne’ebe hatene direitu no dever sidadania, husu hela ba Avo Xavier atu keta nakdader ho manobra politika ema ida-rua nian. Maibe, sai lideransa ida nebe bele open minded hodi fo kontribuisaun ba nesisidade povo nian. Keta halo ba, desizaun nebe Avo Xavier toma dadauk ne’e hafoer tiha figura Presidente ASDT, ne’ebe ema rekunnese hanesan luta lain. Mr. Xavier keta hanesan nehek tata, ne’ebe hakfodak lalais ba tendensia politika foer ema balun nian. Titulu “Proklamator” ne’ebe foin dadauk FRETILIN fo ba Mr. Xavier ne’e tarde ona. Atu FRETILIN la rekunne mos, hakerek ona iha historia nasional Timor Leste nian katak Avo Xavier mak “Proklamtor” nafatin. Povu Timor Leste tomak uluk kedas sarani tiha ona Avo Xavier nudar “Proklamator”. Ne’e katak, titulu nebe Lu-Mari liu husi FRETILIN haraik ba Avo Xavier ne’e tarde ona no simbolikamente deit. Maoria populasaun ne’ebe fo honra ba Mr. Xavier nafatin ho neon bo’ot katak, nudar Proklamator keta toma sala desizaun. Liu-liu, keta toma desizaun ne’ebe la reprezenta populasaun maioria nia hakarak.

*). ESTUDANTE FAKULDADE DIREITU (SMT. 4)
UNIVERSIDADE NAROTAMA SURABAYA, INDONEZIA.