RAMOS-HORTA NO POLITIKA GRATIDAUN

Filipe Rodrigues Pereira*
Analista Politika no Sosial

Fulan ida liu baa depois de fila husi Darwin kura kanek nebee hetan husi aksaun atentadu 11 de Fevereiro, Presidente da Republika, Ramos-Horta halo deklarasaun liu husi imprensa nebee mak halo sosiadede Timor-Leste laran hakfodak.

Deklarasaun Presidente da Republika hanesan: 1). Du’un elementus balun iha Indonesia hanesan Metro TV no Dessy Anwar ‘terlibat’ iha matebian Alfredo Reinado nia movimentos, (deklarasaun du’un PR nian nee dalaruma bazeia a’an baa deit indikasoins, la’os evidensias) tamba nee mak ikus mai Presidente Horta dada fali ninia deklarasauan du’un nebee nia deklara. 2). Hakarak fo’o indulto baa Rogerio Tiago Lobato, no 3). Eleisaun Antisipada iha 2009.

Relasiona ho eleisaun anticipada halo publiku hakfodak tamba PR ninia deseju politiku nebee hakarak atu hala’o eleisaun antisipada nee iha biban ida la merese. La merese tamba politikamente nasaun ho povu agora dadaun tama iha biban ida post Alfredo Reinado, iha biban ida Salsinha ho ninia elementos importantes entrega a’an ona baa prosesu justisa, iha biban ida kazu petisionarius ho IDP’s iha progresu ida nia laran atu alkansa solusaun, iha biban ida governu no Parlamento Nasional sei hala’o efektivu hela sira nia knar, iha biban ida nebee F-FDTL no PNTL komesa iha koopersaun diak hodi hasoru problemas sigaransa nasaun nian, iha biban ida nebee autoridades legal sira efektivu hala’o sira nia knar, no iha biban ida nebee 65 - 70% povu komesa moris hakmatek.

Legalmente, ita mos hare sei la iha rasaun legal-konstitusional ruma mak PR bele uza atu dudu Timor-Leste tama baa eleisaun antisipada. Legal-konstitusionalmente eleisaun antisipada so bele hala’o wainhira programa governo nian hetan rejeitasaun dala rua husi Parlamento Nasional. Razaun legal seluk la iha.

Presidente Horta sinti katak baze ka razaun legal-konstitusional la forte atu obriga eleisaun antisipada maka Presidente Horta hola inisiativa hodi soromutu ho lideransa ASDT semana hirak liu baa. Hakerek nain hare katak akordu politiku 1 de Maiu entre ASDT ho Fretilin la’os tu-tur mosu deit husi avô Xavier, maibe dalaruma akordu 1 de Maio iha korelasaun ho sorumutu nebee mak Presidente Horta halo ho ASDT. Akordu 1 de Maio entre ASDT ho Fretilin iha kontribuisaun husi Presidente Horta. Iha tendensia bo’ot nebee hatudu katak Presidente Horta buka suku-bok atu nunee bele hamonu governo AMP, nebee ho primeiru pasu buka harahun bloku AMP nebee ASDT mos inklui iha laran, tamba wainhira AMP la solid maka dalaruma bele loke dalan baa eleisaun antisipada 2009 tuir Presidente Horta nia hakarak liu husi nia deklarasaun.

Lalaok Presidente Horta nian hetan reaksaun no kounter politika husi AMP nebee lidera husi Xanana. Reaksaun politika nebee mak mosu ita bele hare fo’o out put politika hodi halo UNDERTIM afilia baa AMP, PD no PSD id-idak sei firmi nafatin iha sira nia pozisaun, no ASDT rasik halo politika laran rua-rua, iha parte ida asina akordu ho Fretilin maibe iha parte seluk seidauk ‘barani’ no sei moe-moe a’an atu husik bloku AMP. Lideransa topu ASDT ninia pozisaun politika mos deferente ho ninia deputados balun iha Parlamento Nasional.

Sukat baa reasaun politika nebee liu husi Xanana ho AMP hanesan hato’o iha leten no out put politika nebee mosu hasoru akordu 1 de Maio 2008 entre ASDT-Fretilin, Presidente Horta deklara fali katak nia sei iha konfiansa baa governasaun AMP nebee lidera husi Xanana no hateten tutan tan katak la’iha razaun atu hamonu governo nebee Xanana lidera. Deklarasaun ikus nebee mak Presidente Horta fo’o sai katak sei tau konfiansa baa Xanana ho AMP hodi governa rai nee kontradis ho deklarsaun Presidente Horta nian nebee sei atu hakarak halo eleisaun antisipada iha 2009.

Hanoin no hakarak atu halo eleisaun antisipada sem buka atu hare baa kondisaun politika, sosial, siguransa, ekonomika iha rai laran maka sei rezulta disvantajem bo’ot baa estabilidade iha rai laran. Tamba presidente Horta deklara atu halo eleisaun antisipada iha tinan 2009 maka hamosu esperansa bo’ot husi parte opozisaun. Opozisaun agora dadaun prepara no organiza a’an atu hasoru eventu politika nebee mak sei halo iha 2009, eleisaun antisipada. Ita hotu presiza hatene katak iha nasaun ida, atu publiku hare katak nasaun nee estabil, maka barometer ida mos bai-bain ema uza hanesan tempu ida klaru atu halo eleisaun (ketepatan waktu pemilu). Se no kazu data atu halo eleisaun nain ulun sira so’e konforme sira nia gostu politiku maka nai ulun sira tau nasaun nee iha destabilizasaun nia laran.

Mosu perguntas, tamba sa mak Presidente Horta joga kartaun politiku nebee bele dehan drastiku tebes? Publiku tomak hatene katak Ramos-Horta sa’e ba tur iha kadeira PR (tuir deklarasaun Fretilin nian tempu nebaa dehan Xanana-Horta halo politika troka kuartu), tamba Horta hetan suporta makas husi Xanana no kubu opozisaun tempu nebaa.

Hakerek nain hare iha hipoteza rua mak halo Presidente Horta fila a’an hodi defende ideias eleisaun antisipada:

1. Presidente Horta hetan influensia husi grupu oan balun nebee agora dadaun hadulas hela nia a’an. Ita bele hare iha Presidente Horta nia eis-esposa, Ana Pessoa, Alcino Barris, Roque Rodrigues no sel-seluk tan. Ita hotu hatene katak grupu nee mai husi partidu Fretilin. Iha tendensia Presidente Horta hakarak fo’o fali governo nee baa Fretilin atu hodi ukun. Iha nee ita bele hare Presidente Horta halo politika satisfikasaun atu hodi hetan salvasaun politika. Dala ruma Presidente Horta hakarak ukun iha periode ida tan, tamba nee mak la’os deit planu baa eleisaun antisipada 2009, maibe Rogerio Lobato mos Presidente Horta hakarak fo’o indultu, buat nebee ita tomak hare secara procedural-kondisional no legalmente la admite atu halo. Presidente Horta sinti katak nia la’iha dukungan massa iha baze tamba nee mak nia buka hakbesik a’an baa partidu Fretilin. Presidente Horta sinti katak iha eleisaun presidensial nebee sei mai nia sei la hetan suporta politika husi Xanana, tamba Horta iha tia ona hanoin katak Xanana hakarak hatu’un nia liu husi grupu atentadu 11 de Fevereiro 2008.

2. Gosta ka la gosta, simu ka la simu, publiku interpreta katak deseju politiku Presidente Horta bele hare mos hanesan ‘politik balas dendam’, tamba Presidente Horta monu baa hanoin ida hanesan ho grupu nebee mak durante nee diskonfia no du’un katak Xanana mak orkestor baa aksaun atentadu 11 de Fevereiro 2008. Psikologikamente depois de aksaun atentadu 11 de Fevereiro relasaun pessoal entre Horta ho Xanana la’o ladiak, Presidente Horta buka atu falun metin relasaun psikologika pessoal nebee la’o ladiak entre sira nain rua (Xanana-Horta), maibe iha eventu no lalaok balun hatudu sai baa publiku katak iha ‘buat ruma’ mak satan hela sira nain rua nia relasaun. Relasaun psikologika nebee mak la’o ladun diak mak transforma sai baa relasaun politika nebee mak agora dadaun ita tomak akompanha no sinti.

Baseia baa diskripsaun nebee mak hato’o iha leten no trik-trik politika nebee mak Presidente Horta halimar dadaun maka ita hare sei la fo’o impaktu positivu baa progresu solusaun problemas politiku-sosial nebee governu anterior husik. Kazu petisionarius nebee ninia progresu ba solusaun la’o ona kuaze 70% bele fika kanselada. Trik politika nebee Presidente Horta hatudu sei sai satan baa IDP’s atu fila baa id-idak nia hela fatin. Sei mosu hanoin iha IDP’s sira nia ulun, diak liu halo tia eleisaun antisipada mak sira fila baa sira nia hela fatin. IDP’s bele tauk, keta halo iha eleisaun antisipada 2009 sei mosu tan konflitus karik.

Politiku no ulun bo’ot sira hanoin katak eleisaun antisipada normal atu halo tamba iha nasaun barak implementa. Iha nasaun balun governu ida hamrik semana oin, semana aban bele monu atravez husi mosaun no eleisaun antisipada. Ida nee buat ida normal iha politika moderna. Maibe nain ulun sira tenki tau iha ulun katak, iha nasaun seluk suprastruktur no infrastruktur politiku nasaun la hanesan ho Timor-Leste nebee fragile iha aspektu hot-hotu. Obriga a’an atu halo eleisaun antisipada iha Timor-Leste sei lori tan sofrimentu baa povu iha tempu badak nee mai. Se mak bele fo’o garantia katak iha eleisaun antisipada mai sei la hamosu tan vitimas?!

Ho maneiras politikas nebee mak ita nia ulun bo’ot no politikus nain sira halimar iha nasaun ida fragile hanesan Timor-Leste hatudu katak politikus no ukun nain sira lakon konsiensia, hakarak halo tuir id-idak nia gostu no fika kontenti wainhira hare povu ki’ik moris terus baa nafatin. Se no kazu problema rebeldes sei sai ameasa boot baa nasaun, problema petisionarius sidauk iha naroman ida atu hetan solusaun, problemas IDP’s marcha iha fatin, maka wainhira Presidente Horta iha hanoin atu halo eleisaun antisipada maka klaru ita tomak sei fo’o suporta, maibe problemas nebee mak governo anterior husik iha ona naroman atu hetan id-idak nia solusaun iha governo AMP nia liman.

Tamba nee, atu ajuda hadia situasaun sosial politika iha rai laran li-liu trabalho da casa nebee mak governu anterior husik, maka iha tempu badak mai Presidente Horta presiza atu deklara baa publiku katak estadu sidauk iha hanoin atu halo eleisaun antisipada iha tinan 2009. Deklarasaun nee importante atu nunee bele fo’o garante ba’a estabilizasaun politika no ekonomia iha rai laran. Deklarasaun Presidente Horta nian nebee mak ikus mai dehan sei tau konfiansa baa governasaun Xanana no AMP sidauk to’o ou sidauk sufisiente atu fo’o kepastian politika ba povu no investor sira. Publiku presiza deklarasaun ida mais klaru husi Preidente da Republika kona baa eleisaun antisipada iha tinan 2009, no ita mos presiza hatene katak ita nian populasaun ladun a par sira nia a’an ho deklarasaun hiperbolistiku husi ita nia nai ulun sira.

Atu ajuda Timor-Leste iha tempu naruk nebee sei la’o ba oin, politikus nain sira presiza iha ona hanoin hola medidas ruma atu muda sistema politika semi-presidensial baa sistema presidensial. Sistema politika semi-presidensial nebee mak uluk Asembleia Kontituante opta tamba ho razaun politis nebee buka atu akumula pozisaun baa lideransa historikus sira. Iha periode rua nia laran ita akompanha konflitus vertikal nebee mosu entres pessoal PR no PM, ikus mai hada’et sai ba konflitus horizontal entres populasaun. Uluk Xanana ho Marii, agora dadaun Xanana ho Horta. Hare husi aspeitu politika, sosial no ekonomika, sistema presidensial baa Timor-Leste sei sai modelu ida diak liu wainhira ita kompara ho sistema semi-presidensial nebee mak agora dadaun vigora no implementa iha rai nee. Harií sistema presidensial ho politiku Parlamentar nebee forte sei lori nasaun nee la’o baa oin ho diak no sei hamenus konflitus politiku vertikais iha nasaun nee nia laran.

*Analista Politika no Sosial, hela iha Dili!