Governu AMP, Xanana Gusmão i Major Alfredo Reinado

Hosi: Celso Oliveira*

Governu AMP hanesan formasaun hosi governu Unidadi Nasional, nebe iha tempo funu ba Libertasaun Nasional, Xanana Gusmão (aktual PM Timor Leste) promete: (1) ba interesse nasional: ba povo Timor, juventude Timor, Igreja Katolika Timor. (2) Xanana Gusmão promete ba movimento pró-demokrasia iha Indonésia. (3) Xanana Gusmão promete ba komunidadi internasional.

Ne’e duni, hare hosi interesse nasional i internasional, formasaun IV Governu Konstituisional, lideradu hosi PM Xanana Gusmão, laos buat ida foun. Se karik foun, entaun sei foun ba sira nebe uluk lahalo parti iha tempu ba luta ukun rasik-an nian.

Se karik ita hare fila fali ba kotuk –alias- ba planu CNRM «maubere» (nebe iha fulan Abril tinan 2008, iha Peniche, Portugal - muda fali naran ba CNRT «Conselho Nacional da Resistência Timorense»), entaun ita bele hatene kedas katak iha 1ª fase Timor Leste sei opta ba: Governu Unidadi Nasional. Signifika, laos partidu A ou B maka sei ukun iha 1ª fase.

Maibe, realidadi sai oin seluk tiha, kuandu (tuir artigu Xanana Gusmão nian, iha Teoria konaba Konspirasaun, publikadu iha STL, fulan Novembro tinan 2006) hatete nune: Hanoin ba katak bainhira Fretilin haketak malu ho CNRT, iha fulan Agostu tinan 2000, halo prosesu demokrátiku sai fraku liután no ;…. Eleisaun fulan Agostu tinan 2001,halo atu hili kuadru siraba Asembleia Konstituinte….Koalia loloos, ita bele hatete katak interese hirak ne'e sei kaer metin nafatin, hanesan: Asembleia Konstituinte ne'ebé muda automatik ba Parlamentu Nasionál, ne'e faktu ka realidade ida! Ema balu reklama duni maibé sei respeita nafatin mudansa ne'e! Ita bele sura katak, dala barak tebes, maka interese partidu maioria nian, sei kaer metin nafatin! Ema sei lahaluha fraze sélebre (ema hotu hatene) hanesan: " Ami sei lamuda nein pontu ka vírgula ida"!...

Ohin loron, ita hotu hanesan komponenti nasaun nian, iha direitu i dever nebe garantidu iha Konstituisaun nia laran, atu koalia buat nebe maka sei servi ita nia povo no rai Timor.

De faktu, Xanana Gusmão (aktual PM Timor Leste) laos politiku bo’ot nebe hasai kursu doutor iha Mozambiki ou rai Europeia nian. Maibe, iha faktus barak hatudu ona katak Xanana Gusmão iha vontadi diak atu hadia povo nia moris. Xanana Gusmão hanesan konstrutor ba paz (dame) iha Timor, liu hosi politika rekonsiliasaun nasional. Xanana Gusmão hanesan konstrutor ba harií metin Igreja Katolika iha Timor, liu hosi relasaun diak i harmonia ho bispos, padres, madres, i, elementus seluk-seluk tan. Xanana Gusmão hanesan “pensador” nebe dedika nia hanoin no moris ba servi povo, liu hosi politika Unidadi Nasional nebe oras ne’e lao dadaun.

Simples lia fuan, ema politiku ida diak laos hatene halo deit manipulasaun hodi explora povo nia moris, maibe, ema politiku ida diak tenki iha vontadi diak atu hadia povo nia moris. Hosi ne’e, bele dehan katak atu halo komparasaun entre PM Xanana Gusmão ho Mari Alkatiri (eis PM Timor Leste), hare hosi aspetu humanu, sira nain rua iha diferensa bo’ot. Xanana Gusmão laos ema politiku ida diak maibe Xanana Gusmão hanesan politiku ida diak i iha vontadi ida diak atu hadia povo Timor nia moris. Enquantu Mari Alkatiri hanesan politika ida diak tamba moris iha liur iha tempu barak, maibe laiha vontadi diak atu hadia povo Timor nia moris (ekonomikamente). Mari Alkatiri preokupa liu ho nia ideolojia marxista leninista (politikamente).

Iha hau nia artigu Teoria konaba Kauza i Efeitus, hau hakerek nune: Agora, iha poder rua hanesan figura sentral iha panorama Timor oan sira. Ida, poder Governu maka Xanana Gusmão. Ida seluk, poder arma/kilat maka Major Alfredo Reinado.

Presija hare filafali ba kotuk, ba referendo 1999. Iha momentu neba, povo Timor hasoru represália politika i militar maka’as hosi militar Indonésia. Xanana Gusmão (momentu neba hanesan komandanti das Falintil) husu atu Falintil labele halo reasaun hasoru militar Indonésia. I, Falintil lahalo duni reasaun hasoru militar Indonésia. Iha situasaun ida neba, Timor Leste fo’o garantia ida ba mundu tomak katak: futuro rai no povo Timor laos formadu hosi arma/kilat. Alias- laos lori arma/kilat maka ita sei hanorin no hadia povo nia moris. Laos lori violensia maka ita atu hanorin jerasaun pós-refendedum 1999, i, konstrui paz (dame) iha Timor.

Ne’e duni, se iha tinan 1999, povo Timor hatudu ba mundu tomak “politika da paz” hasoru militar Indonésia, tanba sa maka ohin loron, iha tempu pós-modernu, iha tinan 2008, ita sei uza arma/kilat i violensia hodi halo ameasa ba malun?

Povo Timor presija hare katak laos lori kilat/arma maka atu resolve problema Major Alfredo Reinado nian, maibe, liu hosi tuur hamutuk (dialogo).

* Poeta i hakerek nain (escritor) Timor oan hela iha England