EKSPLORASAUN BA MINARAI HO GAS IHA TASI TIMOR

Projeito Minairai ho Gas - BAYU UNDAN iha Tasi Timor

Hanesan referencia ida ba ita hotu katak distancia husi area Bayu Undan ba Timor Leste (distrito Suai) mais ou minus 250 kilometro no ba Darwin-Australia 500 kilometro. Hare’e husi distancia ida ne’e kuando ita marka uluk Maritime Boderline antes halo ekplorasaun katak ne’e 100% tama iha area Timor Leste nian mais realidade ita sedauk marka maritime borderline governo Timor Leste fo ona autorizasaun atu halao eksplorasaun iha area Bayu Undan ne’e entaun ita tengkeser fahe rendementu husi eksplorasaun ne’e ho governo Australia mos. Hanesan ne’e tiha Governo Timor Leste mos la kria kondisaun diak ba ema Timor oan sira para bele envolve iha projeito minarai iha area ida ne’e. La kria kondisaun diak tamba laiha bargaining ida nebe diak entre Governo Timor Leste ho Governo Australia no Kompania nebe mak halo eksplorasaun hodi fo treinamentu ba ema Timor oan ho periodiku para Timor oan bele barak liu tan envolve ou servico iha projeito ida ne’e, hodi nune’e depois tinan sanulu tuir mai Timor oan sira barak mak iha ona esperencia iha minarai nian no depois tinan sanulu halo eksplorasaun traiblhadores iha projeito ne’e lolos 75% tengkeser ema Timor oan sira mak kaer ona mais realidade iha tereno la kria situasaun ida ne’e, entaun hare’e husi politika ekonomi, Timor Leste sei moris iha kolonialista Australia nia okos. Maske hanesan ne’e ita Timor oan sira barak mak la realiza politika ekonomia nebe mak halao husi Governo Australia ba Timor Leste.

Koalia kona ba projeito MINARAI HO GAS IHA TASI TIMOR, Timor oan balu hatene katak eksplorasaun minarai ho gas iha BAYU UNDAN ne'e kuaze lao ona tinan ne'en nia laran (komesa halo konstrusaun fasilidade REFINERY iha 2002 too hahu halo produsaun ba crude oil hanesan propane, Butane no Condensate iha fulan febereiro 2004) no depois dada pipeline LNG (Liquified Natural Gas) nian ba DARWIN no plantasaun gas iha Darwin ne’e hahu halo produsaun iha tinan 2005 mais too ohin loron, ita lahatene ema Timor oan nain hira mak envolve iha projeito eksplorasaun ne'e. Buat nebe ita rona husi Timor oan balu nebe mak servico iha eksplorasaun minarai ho gas BAYU UNDAN tasi Timor nian katak 98% (novento i oito pursento) trabailhadores sira nebe mak halao servico iha neba mesak ema estrenjeiro deit, barak liu mak husi Philipina no Australiano maske nune'e governo Timor Leste la tau importancia ba asunstus ida ne'e. Ita rona governo no politiko nain sira koalia bar-barak iha media masa no elektronika, iha kampanha politiko partido nian, no iha Parlemento Nasional mos foka barak liu mak kona ba rendemento nebe Governo Timor Leste hetan husi eksplorasaun ne'e mais nunka koalia kona ba halo nusa mak bele envolve ema Timor Oan barak mak servico iha projeito ne'e. Hanesan ema Timor oan ida, hau triste tebe-tebes tamba governo Timor Leste husik ninia rekursus naturais ba ema estrenjeiro mak hetan benefisio barak liu duke ema Timor oan hanesan rai nain nasaun ida ne'e ninian. Karik kondisaun ida ne'e mak mantein bebeik hanesan ne'e too eksplorasaun ba minarai ho gas iha Bayu Undan ne'e supa sai reservado minrai ho gas iha tasi kidun Timor too hotu mos sei la afeita ba povu Timor Leste nia moris. Karik Governo Timor Leste mak hanoin diak no hanoin ema Timor Leste, lolos projeito ne’e lao ona iha tinan hira nia laran, minimu 30% ema Timor oan tengkiser servico iha fatin ida mais too agora governo momos lahatene ema Timor oan nain hira mak service iha nebe no sira nia posisaun iha seda deit. Ida ne’e mos kestaun ida nebe mak ita Timor ona tengkeser ijiji nafatain ba Governo no kompania nebe mak halao eksplorasaun iha area neba. Plantasaun Gas nian husi Bayu Undan nebe mak halo iha Darwin-Australia mos laiha ema Timor oan ida mak envolve iha neba, entauan dala ida tan, Timor Leste nia rekursus nataurais ne’e so ema estrenjeiro deit mak aproveito hodi hariku sira nian ann, ita Timor oan mak hare’e hodi tata liman fuan hela deit husi loron ba loron. Hanesan ema Timor oan ida hau tristeza teb-tebes ho kondisaun sira ne’e mais ita sobele hare’e deit tamba Governo Timor Leste nebe reprezenta povu Timor Leste mos sei la koalia kona ba interese povu i dalaruma osan husi minarai ho gas ne’e taka tiha sira nia matan ho neon.

Projeito Minarai ho Gas - Elang Kakatua iha Tasi Timor

Iha mos projeito eksplorasaun minarai ho gas seluk iha tasi Timor mak ho naran ELANG KAKATUA, eksplorasaun ba minarai iha area ida ne'e hahu kedan iha tempo Indonesia nian mais ita mos nunka hatene ema Timor oan nain hira mak envolve iha eksplorasaun ida ne'e. Dala ruma ema Timor oan balun mos hatene katak Governo Timor Leste permeiro ho governo Australiano hari'i ona instituisaun ida nebe bolu TSDA (Timor Sea Designated Authority) nebe atu estabiiliza regulamento ou kondisaun ba eksplorasaun minarai ho gas iha JPDA (Joint Petroleum Development area) nia laran maibe iha neba mos sira nunka koalia kona ba asuntu trabailhadores ninian mais sira so koalia deit mak Policy kona ba OHSE (Occupational Health, Safety and Environment) nian deit. Entaun se mak iha responsabilidade para atu bele koalia kona ba envolvementu traibalhadores Timor oan sira hodi envolve iha projeito eksplorasaun minarai ho gas iha Tasi Timor??? Ida ne'e perguntas ba ema Timor oan hotu-hotu. Projeito minarai ELANG KAKATUA ne’e too oras ne’e abandona tiha ona tamba reservado minarai iha area ida ne’e supa sai hotu tena. Maske minarai iha area ida ne’e supa sai hotu tena mais ema rai estrenjeiro mak hetan benefisio barak liu duke ema Timor Oan sira. Iha projeito Elang Kakatua ne’e ema husi Indonezia no Australiano mak serviso iha neba, entaun Timor Leste husik ninia rekursus naturais ba ema seluk hodi goja maske Timor oan barak mak sei moris iha linha poverty nia okos.

Eksplorasaun ba Minarai ho Gas iha area GREATER SUNRISE Tasi Timor

Plano entre Governo Timor Leste, Australia no Kompania Woodside nebe sei sai hanesan operador ba eksplorasaun minarai ho gas iha area ida ne’e sei hahu iha 2008/2009 depende ba progresso negosiasaun kona ba pipeline gas nian hodi dada mai iha Timor Leste ou ba tan iha Darwin-Australia. Ita espera katak ho esperencia husi projeito eksplorasaun minarai ho gas nian hanesan; Bayu Undan ho Elang Kakatua, governo AMP sei halo mudansa diak ruma iha negosisaun kona ba eksplorasaun GREATER SUNRISE nian. Ho espreanca boot katak mudansa nebe mak governo AMP sei halo ho kompania Woodside sei foka barak liu kona ba treinamento ba ema tekniku Timor oan sira hodi bele envolve barak liu tan iha projeito eksplorasaun nebe sei hahu iha tinan hirak oin mai. Atu bele realiza kondisaun sira ne’e laiha tan opsaun seluk katak governo AMP tengkeser estabiliza kondisaun ou regulamento kona ba servico minarai ho gas nian iha Tasi Timor hodi regula ema nebe deit mak sei envolve iha servico eksplorasaun ne’e nia laran. Karik kondisaun ou regulamento ne’e bele estabelese ona, governo Timor Leste iha ona baze legal ida hodi halo negosiasaun diak ho Woodside kona ba oinsa hametin no haforsa rekursus humanus Timor Leste nian iha area tekniku minarai ho gas nian iha eksplorasaun minarai ho gas iha GREATER SUNRISE nian. Hein katak governo AMP sei halo negosiasaun diak liu tan kona ba eksplorasaun minarai ho gos iha GREATER SUNRISE hodi bele fo benefiso barak liu ba dezenvolvimento Timor Leste ba futuru nebe iha prosperidade ba ema Timor oan hotu.

Governo AMP mos tengkeser kria kondisaun ida hodi prevene importasaun traibalhadores sira husi rai liur.

Timor Leste nasaun foun nebe hetan indepedencia iha era milenium sei hasoru obstakulu barak teb-tebes atu halo dezenvolvimentu nebe efektivo iha area infrastruktura liu-liu halo prioridade ba hari'i kapasidade ba rekursus humanus iha setor hotu-hotu tuir nesesidade Timor Leste nian. Rekursus humanus hanesan parte importante ida ba dezenvolvimento nasaun ida ninian entaun Governo Timor Leste sempre tau importancia ba asuntu ida ne'e komesa agora ba oin. Iha media masa no electronika dala ruma ita le'e no rona husi nai ulun balun nebe servico ba governo Timor Leste halo komentario bar-barak katak rekursus humanus Timor Leste nian ne'e suficiente ona atu ita huza ita nia rekursus rasik maibe realidade hatudo ba ema hotu katak Timor Leste sei importa ema matenek nai'in husi rai estranjeiro hanesan dadaun agora ne'e ita bele hare'e katak kuaze dotor especialista nebe servico iha hospital no klinika iha Timor laran tomak ne'e mesak ema estrenjeiro deit, laos ida ne'e deit ema nebe servico hanesan traibalhadores sira mos barak mak importa husi rai liur atu servico tuir iha projeito infrastruktura ninian nomos trabailhadores sira nebe servico iha eksplorasaun minarai ho gas iha tasi Timor ne'e mesak ema husi rai liur deit. Entaun ita bele kestiona, tamba seda mak traibalhadores deit mos tengkeser ema husi rai liur? Kuando ita dehan ho razaun tamba ema Timor oan sedauk iha kapasidade no esperencia, entaun nusa mak governo Timor Leste la hanoin atu kria instituisaun ida nebe bele halo formasaun diak ba ema Timor oan para hodi bele envolve iha projeito sira nebe lao dadaun iha Timor laran hanesan eksplorasaun minarai ho gas iha BAYU UNDA Tasi Timor? Nusa mak ema phillipina sira bele servico iha eksplorasaun minarai ho gas ne'e mais ema Timor oan labele envolve iha projeito ida ne'e. Hau hanoin ida ne'e responsabilidade Governo Timor Leste nian hodi bele estabelese kondisaun ida nebe diak para bele envolve ema Timor oan sira barak liu tan iha futuro oin mai. Hanoin katak atu bele envolve ema Timor oan barak liu iha projeito nebe mak lao dadaun iha Timor laran sempre halo fromsaun diak ba ema Timor oan sira nomos sempre estabilza regulamento ida kona ba importasaun traibalhadores sira husi rai liur, katak se deit mak tama iha Timor Laran hodi servoci iha Timor teengkeser tuir criteria-kriteria nebe mak iha hanesan servico nebe mak ema Timor oan sira bele halo entaun labele tan importa traibalhadores sira nebe skills ou kbi’it hanesan ema Timor oan. Atu realiza kondisaun sira hanesan, importante katak governo tengkeser estabele regulamento ida kona ba traibalhadores hodi regula servico nebe mak halao iha Timor laran tomak, selae ema ida-idak halo tuir ninia hakarak no tinan sanulu mai ita Timor oan sira mak sei tata liman hela deit.

Konklusaun

Atu prevene importasaun traibalhadores husi rai liur barak tan iha futuro, Timor Leste presija lei ida nebe forte ba kompania ou instituisaun privado sira seluk nebe investe iha Timor Leste katak bain hira halo operasaun iha Timor Leste 75% traibailhadores sira nebe mak servico ba sira tengke husi ema Timor oan sira. Karik kompania ou instituisaun privado sira ne'e mak la halo tuir tengke halo multa maka'as ba sira selae kompania sira ne'e halo tuir deit sira nia hakarak hodi huza sira nia ema deit husi liur, hahalok ida hanesan ne'e sempre halakon ona iha Timor Leste. Atu prevene hahalok sira hanesan ne'e governo Timor Leste tenke matan mos no halo kontrola periodiko hodi bele tau matan ba asuntu sira ne'e ho efektivo.

Governo Timor Leste sempre hanoin ona atu oinsa bele fo formasaun profisionais ida nebe diak ba ema Timor oan sira nebe iha interese no talenta ba area petroleum no enganharia hodi bele envolve Timor oan barak liu iha kualker projeito eksplorasaun minarai ho gas nian iha Tasi Timor nomos iha Rai maran Timor Leste nian iha futuro oin mai. Hanoin katak ho rendementu nebe mak Governo Timor Leste agora dadaun ne'e hetan husi eksplorasaun minarai ho gas husi BAYU UNDAN suficiente ona hodi bele huza hahu haruka Timor oan sira nebe iha interese no talento iha area petroleum ho enganharia ninian ba rai liur hodi estuda. Karik hahu agora ba oin governo Timor Leste implementa programa haruka ema ba estuda tekniko minarai ninian iha rai liur hanesan iha Norwegia, Australia no sel-seluk tan, entaun iha tinan lima oin mai ita iha ona ema nebe prontu para bele servico iha eksplorasaun minarai ho gas nian. Karik ema Timor oan barak mak envolve iha kualker eksplorasaun minarai ho gas iha Tasi Timor, rendementu ba Timor Leste mos sei aumenta no parte ida bele kontribui ona ba prospriadade ou moris diak ema Timor oan sira ninian.

Hakerek nain,
Jose Tilman
Tekniko Produsaun Liquid & Gas
Bayu Undan Recycle Project Timor sea
Email: jose.d.tilman@conocophillips.com
Phone: +61 86363 1248