REDE DIREITO DOS CONSUMIDORES TIMOR-TELECOM

Press – KOMUNIKADU DA IMPRENSA

Liu husi oportunidade diak ida nee no loron diak ba Timor Leste tomak, ami hotu halibur malu iha fatin ida nee, atu expressa ami nia hanoin, sugestaun, rekomendasaun immediatu ba Timor Telecom no institusaun kompetente ba assunto Telekomunikasaun nian husi parte Governo no Parliamentu, atu halao fila fali revisaun no auditoria ba iha Timor – Telecom nia lalaok durante existensia operasional iha Timor – Leste tomak, iha tinan 5 nia laran nebe konsidera implementa ona infrastrutura basiku ba funsaun Telekomunikasaun iha Timor – Leste laran tomak. Ho hanoin katak buat nebe Timor Telecom halao ona seidauk iha sustentabilidade, akuntabilidade no servisus ida ke diak, atu suporta desenvolvimentu ba Timor – Leste.

Ami halao revisaun no evaluasaun ida heteten katak, durante tinan 5 nia laran nee, Timor – Telecom ho nia arogansia no inkompetensia atu implemente servisu basiku ida nebe atu asegura interese povo nian liu husi programa ajuda komunitaria ba apoios Telekomunikasaun. Programa apoio edukasaun no fornese acessu graituita ba estudante sira moos la fo importansia ba clientes sira nia direitu atu hetan facilidades ida ke favoravel, ho hahalok ida nee hateten katak, Timor Telecom la iha seriadade no la fo importansia ba interesse desenvolvimento ba iha sector edukasaun no fo supporta ba juventude no estudante.

Ami, moos hare ba relatorio nebe Internet World status nebe fo sai ba iha ASIA nian hateten katak utilisaun Internet iha Timor – Leste sem atingi too 1% ida nee hateten katak, tamba utilisa sistema ida nebe la efisiensia, sistema nebe karun, acessu ba internet nebe konsidera karung liu iha Mundo. Ho relatorio ida nee hatudu katak, susar la halimar atu dada moos investor sira mai iha Timor – Leste, kuando iha area henesan Telecomunikasaun nee kontinue karun nafatin i nia facilidade de servisus nebe limitadu no funsaun Telekomunikasaun balun ke la funciona ho diak.

Ho Acessu Internet ida nebe karung, halo estudante no juventude, private sector, Governo no institusaun seluk, la iha possibilidade atu kontinua regularmente ba acessu iha Internet.

Iha mundo Globalisasaun ida nee precisa Telekomunicasaun ida ke forte no iha flexibilidade ba fungsaun hotu, sem hare ba mercadoria limitadu ou menus klientes, rasaun ida nee maka Timor – Telekom sempre foti sai, ida nee la loos ida, la iha rasaun ida katak tamba merkadoria limitadu no menus clientes, maka halo Timor – Telekom la iha interesse atu desenvolve tan no aumenta tan fungsaun balun hanesan acessu ba 3G, Haruka Email ba Mobile liu husi Internet, VOIP koalia liu husi Internet, acessu ida nee maka Timor – Telecom taka tia nia accessu, hahalok ida nee viola tia ona Konvensaun Internasional ba utilisasaun acessu Telekomunikasaun ba liberdade de expresa.

Ami husu moos ba Governo, atu hamenus ona acessu linha Telefone entre local no entre Departamentus Governo nian nebe selu karung tebes ba Timor – Telekom, hodi kria kondisaun ida ke diak ba insfrastrutura no sistema VOIP nian nebe sei graituita sem selu linha telefone, tamba sa maka Governo selu tia ona acessu Internet ida karun, la usa meius VOIP hanesan balansu ida ba linha Telefone nebe seluk karung tebes mesmu ke atu halo ligasaun externu liu husi facilidade VOIP.

Iha parte seluk, Timor – Telekom moos sempre halo deskontente ba nia klientes sira, kuandu, linha Telefone ou Internet monu ou down link, Timor – Telekom nunka reconhese nia falhansu no fo sai informasaun klaru ba klientes, tamba sa maka asessu nee monu. No iha kontrato barak ke Timor – Telekom halo ho klientes sira, sem hakarak aceita iha responsabilidade ida katak, se linha geral Internet nian monu iha tempo ida ke kleur ou liu loron ida ou horas hira nia laran Timor – Telekom sei recompensa kontrato no pagamento mensal, mas pressiona nafatin klientes sira atu kontinua selu hanesan kontratu normal. Problema ida nee maka klientes barak hasoru desafuis nebe Timor Telekom tau todan ba nia klientes sira, liu – liu ba Institusaun boot hanesan Governo, Finance Sector, Business Sector, nebe loron loron necissita duni acessu sira nee iha tempo ida ke importansia, mas Timor – Telekom utilisa sala tia nia poder nebe nia hetan husi Governo hodi hanehan tia decisaun Governo nian, kuando Governo rasiik nia Internet monu ho tempo ida ke kleur e halo ameasa boot tebes, tamba iha sector hanesan Finance nee precisa aplikasaun balun ke hetan supporta husi Internet.

Governo Timor – Leste, selu karung tebes ba linha Internet ho Telefone, nebe nia gastos makaas tebes, ho gastos Internet nebe folin karung tebes mas nia impaktu moos boot tebes ba Governo, kuando linha Internet no telefone la lao ho diak e pior liu tan Timor – Telekom ignora tia funsaun importantes ida nee.

Ezemplu kongkretu ba falhansu Timor – Telekom maka la konsege asegura trafiku out going no incoming call ba linha Telefone, nebe kuando iha menitus ho segundos iha Dili deit kuase ema 3000 deit halao sira nia ligasaun telefone ou mobile iha mesmu tempo, halo ona trafiku pendente no “network is busy” ou ligasaun okupadu, ida nee hateten katak Timor – Telekom la konsege durante tinan hirak ona atu resolve assunto tekniku ida nee, nia impaktu maka halo lakon klientes sira nia komprimissu ruma ba negocios nebe tengki halao duni iha tempo no horas nia laran ho sira nia parceiros de negosius no iha Finance Sector. hahalok ida nee implika tebes, no bele lakon sira nia investimento boot tebes mesmu ke iha tempu ida ke badak.

Kuestaun Telekomunikasaun, hanesan pilar importante ida ba desenvolvimento nasaun ida nian, Telekomunikasaun sei fo beneficio diak ba iha area hotu – hotu iha Timor – Leste tomak.
Iha tempo semana ida nia laran mosu tan, probelama ida ke grave tebes ho apresentasaun iha Plenaria Parliamentu, nebe fo sai gravasaun voice husi konversa liu husi mobile nian.

Nudar moos hanesan observador ba ICT nian, fo alerta ba assunto polemika ida nee hanesan tratamentu seriu ida katak, se kuando Timor – Telekom maka fo duni acessu gravasaun ida nee ba iha Bancada Parlamento, ida nee grave tebes ba orgaun Soberania RDTL hodi bele proteje no defende direitu konsumidores ou Klientes Timor Leste hanesan konsagra ona iha konstituisaun da RDTL Decretu Lei No. 11/2003 (Que Estabelece as Bases das Telecomunicações). No viola moos konvesaun internasional ba iha Telekomunikasaun. Aktu espionagen ba iha Telekomunikasaun nian nee hanesan ameasa boot ida ba iha sociadade civil no povo tomak katak hatudu ona iha kontrolu no abuso de poder nebe usa husi Timor – Telekom nebe la protege nia klientes sira tuir lei nebe vigora iha Timor – Leste.

Ho rasaun fundamental hirak iha leten nee, ami ejiji tebes ba Orgaun Soberania tomak, liu-liu ba Parlimento no Governo RDTL IV Kontitusional atu toma konsiderasaun ba reklamasaun no pedidu tuir mai nee:

1. Halao Avaliasaun immediatu ba kontratu nebe assina ona entre I Governo Konstituisional ho Timor Telecom tuir Programa nebe mak hakerek ona iha Programa IV Governo Konstituisional, hodi hare no garante Direitus no Intereses Konsumidores no Povu Timor Leste. Presiza mos fo sai ba publiku transparensia Kontratu entre Governu ho Timor Telecom hodi nune entidades Timor Leste tomak nebe mak iha interese bele partisipa iha prosesu avaliasaun hodi bele garante prosesu avaliasaun ida nebe transparente no seguro.

2. Iha tempo badak nia laran husu moos ba Parlamento no Governo atu hari ona Komissão Consultativu ida tuir Artigu No. 7 Decretu Lei No. 11/2003. Hodi nune Kommissão ida ne bele halao funsaun akompanhamentu no akonselhamentu iha area Telekomunikasaun nian.

3. Asegura Direitu Liberdade Espresa liu husi meius Komunikasaun.

4. Basea ba relatoriu nasional no internasional nebe refere ba desenvolvimento Telekomunikasaun iha Timor – Leste, precisa atu loke dalan ba konkorensia ba kompanhia Telecomunikasaun nian hodi bele fo alerta ida ba Timor – Telekom atu esforsu sira nia servisu ho kualidade no protege klientes sira nia interese.

5. Husu ba Parliamentu no Governo no liu – liu ba Departamentu Aircom, atu retira halao sira nia funsaun didiak hodi kontrola Timor Telecom no husu ba Timor – Telcom atu hasai tia blokia ba VOIP. Ho retira ba sistema ida nee sei fo benefisui boot tebes ba desenvolvimento acessu ba informasaun no Governo ho povo sei halo ona poupansa ida ke boot tebes.

Ikus liu, ho entidades no grupo tomak, husu ba Parlamento no Governo atu realisa immediatu investigasaun fundamental ida be processu espionagen de informasaun iha area Telekomunikasaun nian, laos deit ba linha Telefonika maibe ba moos iha Radio Komunikasaun nian.

Ho respeita tomak, ami hotu fo sai ami nian hanoin ida nee atu alkansa Timor – Leste nia Telecomunikasaun ida ke professional, transparente no akuntabilidade no protege interese ema timor oan hotu nian.

Dili, 23 Outubru 2007

Partisipantes REDE DIREITUS KONSUMIDORES husi: AJTL, CNJTL, FONGTIL (Grupo de trabalho Assunto Ekonomia ho ICT), ICT TIMOR, KSTL