Mari Alkatiri maka halao uluk konspirasaun hasoru Xanana Gusmão (2)*

Tuir deklarasaun MA nian ba STL (18/10) no hakerek iha Blog Forum Haksesuk (FH) konaba “Mari Alkatiri maka hahu uluk konspirasaun kontra Xanana (http://www.forum-haksesuk.blogspot.com)”. Mari Alkatiri ninia akusasaun coincide ho polemika konaba eskuta telefonika, iha deklarasaun eis-PM na STL katak “Xanana maka halo konspirasaun politika kontra Fretilin iha krise politika militar iha tinan 2006 nia laran (STL, 18/10)”. Iha hakerek nebe FH hatun ona no iha hakerek ne´e hakarak argumenta deit katak: se maka hahu uluk? Se maka halo uluk aksaun hafoin iha reaksaun. Neduni se tuir Mari Alkatiri, Xanana Gusmão maka halao Konspirasaun tamba deit ninia eis-cefe Gabinete mos envolve iha KPM iha tinan 2006. Maibe hakerek hakiduk fila fali hodi hare kronologia konaba Krise Politika Militar (KPM), se maka nudar kausa no problema? Hanesan hakerek ona “Mari Alkatiri maka Kausa no problema ba KPM (http://www.forum-haksesuk.blogspot.com)”.

Hare fila fali kronologia KPM nian, se maka hahu uluk konspirasaun?

Ida (1); Krise iha F-FDTL nian, hahu iha Krise ne´e Mari Alkatiri la dehan buat ida, nem hakarak buka dalan ba resolve problema ne´e. Posisaun Mari Alkatiri ho eis-Ministro da Defesa, Roque Rodrigues nian hatudu katak ”Sira fo suporta ba kualker decisaun nebe maka hierarquia F-FDTL hola hodi resolve problema F-FDTL Petisaun”. Waihira hierarquia F-FDTL hola decisaun hodi expulso 600 militares (1/3) husi F-FDTL, saída maka Mari Alkatiri ninia posisaun? Nia fo suporta deit ba decisaun ne´e hodi dehan katak “Buka rekrut fali F-FDTL foun (in Timor Post, 10/03/2006)”.

Rua (2); Decisaun hierarquia F-FDTL nian nebe hetan suporta husi executivo Mari Alkatiri nian, aproveita biban nebe maka Prezidente Republika (PR) Xanana Gusmão la iha Timor LoroSae, tamba halo hela visita mai Portugal. Aksaun hierarquia F-FDTL nian ne´e Laos deit indiciplinar tamba ausência PR, maibe mos inkonstitucional tamba kuelker aksaun konaba «Forças Armadas (FA)» tenke iha konsulta ho PR tamba PR nudar komandante supremo FA nian (artigo 74) Konstituisaun RDTL hakerek.

Tolu (3); Partidarizasaun Forças Segurança (FS) no Forças Armadas (FA). Mari Alkatiri ho ninia Governo buka oinsa maka partidariza FS ho FD atu nune bele fo garantia ba sira nia governasaun no sira nia ambisaun. Tamba deit Fretilin ho Mari Alkatiri ninia ambisaun maka «Ukun to´o tinan 50». Sira konsegue partidariza FS tamba tau ema konfiança maka nudar Ministro do Interior (MI), Rogério Tiago Lobato (RTL). RTL nudar MI asumi funsaun dupla nudar cefe administrativo nebe konpetencia nudar ministro maibe asumi mos nudar cefe operacional. Aksaun MI nian ne´e koresponde ba Estratégia nebe maka Mari Alkatiri ho ninia executivo trasa hela. Oinsa maka politiza FD? Tuir report “The Internationa Crises Group (ICG)”, sira nia report konaba KPM iha tinan 2006 katak “materializasaun konaba politizasaun FA liu husi; nomeasaun Roque Rodrigues nudar MD nebe besik liu ba Taur Matan Ruak. Oinsa maka hadok FA husi influencia Xanana Gusmão nian no oinsa maka joga desentendimento entre Xanana Gusmão ho Taur Matan Ruak (ICG report, October 2006)”.

Hat (4); Mari Alkatiri autoriza F-FDTL nudar FD ba toma konta Segurança iha Dili, hahu husi loron (28/04/2006). Tuir K-RDTL iha ninia definisaun konaba matéria «Segunraça e Defesa» klaro los. Segurança nebe kompetencia PNTL nian (artigo 147) no defesa ne´ e kompetencia F-FDTL nian (artigo 146). F-FDTL bele atua wainhira iha situsaun «emergência», nebe tuir K-RDTL PR nudar Komandante supremo FA nian maka konvoka F-FDTL ba tulun PNTL. Fakto maka ne´e Mari Alkatiri «Desautoriza Poder nebe PR» nian, maibe bolu F-FDTL ba toma konta segurança nebe hahu iha loron (28/04/2006). Husi aksaun «Inconstitucional» eis-PM Mari Alkatiri nian ne´e maka provoka akontecimentu tragiku hanesan: Aksaun F-FDTL hasoru manifestantes iha Taci tolu no Rai kotu (28/04/2006); sunu Moris Família ida iha Dili, inan, oan mate sunu mutuk deit (24/05/2006), Tiru malu F-FDTl ho PNTL iha kuartel PNTL Dili nebe mate PNTL nain lubung ida no kanek mos barak; mate mos husi parte F-FDTL nian tamba tiru malu iha Taci Tolu entre F-FDTL ho Grupo Rai Los (nebe Mari Alkatiri ho RTL maka kria no fo arma) tamba sira halao servisu nudar Serviço Sekreto Fretilin nian. Husi deicisaun sira ne´e hotu ninia konsekuencia mos, deslokadu barak, divisaun Lorosae/Loromonu, no sst.

Se Mari Alkatiri dehan Xanana Gusmão maka halo Konspirasaun kontra Fretilin iha KPM tinan 2006? Neduni se maka hahu Konspirasaun kontra Xanana Gusmão: maka Mari Alkatiri!

*António Ramos Naikoli
Timor oan hela iha Lisboa