Sekjen PD: Sofre asaltu iha Dili Beach

Dili, Forum Haksesuk (FH, 14/07). Sekjen PD, Mariano Sabino “Asanami”, hetan asaltu ho molotov iha Dili Beach hori kalan (14/07) no nia kareta vidro rahun, haktuir fonte FH iha Dili. Akontecimentu ne´e mosu iha biban nebe importante ba politika rai Timor nian. Mariano Sabino alias Asanami nudar Sekjen PD, partido nebe hola parte ba koligasaun Maioria Parlamentar (AMP) nebe tuir Ukun Fuan Inan (UFI) bele sai hanesan alternativa ba Governo Minoria nebe Fretilin sei harii.

Tamba molok PD ba hola parte ba AMP, Fretilin mos tenta halo aproximasaun ba PD, liu husi surumutuk nebe maka delegasaun Partido rua halao iha Hotel Timor nebe´e frakasu iha quinta (05/07), maibe PD hili liu dalan ba halo koligasaun ho partido seluk do ke ho Fretilin. Frakasu Mari Alkatiri ho Fretilin hodi dada PD ba koliga ho Fretilin, ne´e derota ida ba Mari Alkatiri no Fretilin tamba sira hakarak hatudu ba Xanana ho CNRT.

Foin dadauk ne´e mos Mariano Sabino “Asanami” halo deklarasaun ba STL katak “Fretilin buka explika ba ninia base konaba interpreta UFI waihira partido nebe manan la hetan maioria la bele Governa (in STL, 11/07).

Iha semana kotuk (07/07), Fretilin ninia Komisaun Politika (KP) halao hela konferencia imprensa, teki-teki mosu ema klosan lubung ida nebe hakilar ho lian kroat katak «Oho Mario Carrascalao» nudar ulun bot PSD nian, partido nebe hola parte ba AMP (hare Lusa, 07/07).

Tuir analista sira katak ”Fretilin sei la simu waihira AMP maka harii Governo, ne´e hanesan hatun sira”. Tenik tan analista nebe lakohi dehan naran, ”Sala ne´e Fretilin nian, tamba sira maka hakerek UFI ka Konstituisaun RDTL nian no sira rasik maka la lao tuir”. Haktuir tan analista ne´e, ”tamba tuir UFI iha ninia artigo 106 ne´e hatudu dalan rua (2), dalan ida Fretilin harii Governo minoria (29%) no dalan seluk AMP bele harii Governo ho maioria iha Parlamento”. Hatutan ho ironia katak, ”keta UFI ka Konstituisaun RDTL ne´e keta kopi deit karik, se kopi deit rai seluk nian, neduni sira hakerek maibe la hatene le UFI RDTL ne´e rasik”.

Ameaça ba Mario Carrascalao (PSD) no atake kontra Mariano Sabino Asanami (PD), neduni lider sira seluk nebe hola parte ba AMD tenke waspada ka matan moris no neon nain. (FH)