Koligasaun Maioria iha Parlamento ne´e tuir Ukun Fuan Inan

Mari Alkatiri no FRM Hamlaha ba Poder

Oras ne´e dadaun haksesuk malu iha politika Timor nian maka ne´e, se maka harii Governo nebe atu kaer Ukun iha tinan lima (5) nia laran mai ne´e (2007/12). Iha dalan rua (2) tuir ita nia Ukun Fuan Inan (UFI) iha ninia artigo 106, dalan ida (1) partido nebe´e maka manan eleisaun legislativa nia maka hili PM foun hodi hatou ba Presidente Republika hodi «Nomeia». Dalan seluk, koligasaun nebe tau hamutuk partido seluk nebe hetan deputados ka Lia Nain sira barak liu iha Uma Fukun ka Parlamento.
Ba dalan ida uluk, Fretilin nudar partido nebe manan iha eleisaun legislativa bele kaer Ukun no harii Governo, maibe lian bot ba Fretilin maka ne`e molok no oras ne´e ninia hanoin no hakarak konaba oinsa maka kaer Ukun.

Molok (antes, red) iha biban ba kampanye ulun bot Fretilin nian sira,sira ninia lia menon no tatolin ba emar Timor tomak maka ne´e: se Fretilin la hetan maioria, Fretilin ba Oposisaun. Hare husi Presidente, Lu´olo no Sekjen, Mari Alkatiri ninia diskursu, militante seluk hanesan Francisco Branco, Cipriana Pereira, Arsenio Bano, no sst. Maibe to´o loron nebe Fretilin la atingi maioria hanesan mehi nebe maka ulun bot Fretilin nian atu manan ho barak liu ka maioria absoluta hanesan iha tinan 2001 (57%) no eleisaun legislativa 2007 (29%). Hare katak Fretilin ninia votasaun monu makas no sira ninia objektivo politika oinsa maka bele Ukun Nafatin maske la hetan percentagen (%) barak, hakarak Ukun nafatin tamba Mari Alkatiri ho Fretilin Radikal Maputo (FRM) hamlaha ba poder. Neduni sira iha biban ba kampanye dehan oin ida, se Fretilin la hetan maioria absoluta Fretilin prontu ba Oposisaun. Oras ne´e diskursu oin seluk, hakarak Ukun Nafatin, liu husi hakbesik ba Oposisaun sira seluk hodi tau hamutuk votus, liliu hakbesik ba PD, maibe PD mos la simu proposta nebe maka FRM hatou, tamba tuir Prezidente Fernando Lasama, ami konsulta base PD nian la simu atu koliga ho Fretilin (in Expresso, 07/07/2007). Neduni hare husi estrategia PD nian iha liu vantagem ba «estabilidade no koligasaun parlamentu maioria» ba Timor, do ke koliga ho Fretilin hanuruk liu tan krise institusaun demokratika nebe la kontribui ba resolve konsekuencia husi Krise Politika Militar (KPM) nebe Mari Alkatiri ho FRM maka ninia kausa ka lia nia hun no abut. Iha mos argumentu no razaun seluk tan sa maka Mari Alkatiri ho FRM hakarak Ukun Nafatin, tamba sira iha kumprimissu barak: ekonomika, justisa (ça) no politika.

a) Ekonomika, se Mari Alkatiir ho FRM la Ukun tan,lian bot nebe maka sira sei hasoru maka ne´e: Governo foun no Koligasaun parlamento sei harii fila «auditoria ba conta» Governo Mari Alkatiri/FRM iha tinan lima (5) nia laran, auditorio ne´e sei ba buka hatene: oinsa maka Mari Alkatiri ho ninia familia sai riku bot iha tinan lima nia laran, sira nia fundos no fontes mai husi nebe? Membros Governo balun nebe riku matak ba foti osan husi nebe?Tansaida maka Governo Mari Alkatiri/FRM sempre fo tender manan ba familia Alkatiri hodi hetan acesso ba Osan Estado nian ka povo nian hanesan: tender manan iha proyek bobot sira,suplae hahan ba F-FDTL, kareta estado/Governo obrigatoria ba tau gazolina iha familia Alkatiri ninia fan gazolina fatin, Empresa Kuda Fuik ba hola kilat musan ba PNTL, no sst. Auditorio ne´e sai hanesan kumprimisso eleitoral no politika husi Partido sira nebe maka halo koligasaun ba Ukun iha Timor Lorosae (Leste).

b) Justisa(ça), Mari Alkatiri ho FRM ninia preokupasaun seluk maka ne´e: oinsa maka bele kuda sistema Judicial (SJ) nebe fo mahon ba sira atu kaer nafatin Ukun iha Timor. Mahon ba sira (Mari Alktiri no FRM), atu nune kasu Mari Alkatiri ninia envolvimento iha KPM ne´e kontinua arquivo iha Ministerio Publiku (MP). Se Fretilin la Ukun, koligasaun (CNRT, PD, ASDT, PSD, UNDERTIM ho PUN) maka Ukun kasu Mari Alkatiri nian bele loke fila fali, SJ no MP bele iha kondisaun ba servisu hodi investiga fali kasu Mari Alkatiri nian. Neduni iha biban badak Penghuni iha Perumahan Becora neba sei simu tan penghuni ida naran Mari Bin Amunudin Alkatiri.

c) Politika, ba Fretilin iha Governo nafatin iha tinan lima mai ne´e bele rekupera ninia imagem nebe afekta ho KPM no penalizasaun nebe eleitorado hatudu liu husi eleisaun presidencial 1º no 2º volta no ikus mai eleisaun legislativa nebe Fretilin monu. Neduni Mari Alkatiri ho FRM buka oinsa maka kaer Ukun Nafatin. Se Mari Alkatiri ho FRM maka la kaer ukun ona, dificil atu rekupera eleitorado nebe la vota ba Fretilin. Se Mari Alkatiri ho FRM maka la kaer Ukun, fo vantagem ba Fretilin Mudanças (FM) sira fila ba kaer fali Ukun iha Fretilin.

Unika argumentu nebe maka Mari Alkatiri ho FRM ninia interpretasaun ba Ukun Fuan Inan (UFI) liliu iha ninia artigo 106, hanesan artigo hakerek iha blog Forum-Haksesuk: ”Uma coligação maioria Parlamentar, é, Constitucional
(http://forum-haksesuk.blogspot.com)”. Tamba hanesan hakerek ona iha leten konaba artigo 106 UFI. Tuir interpretasaun ba UFI iha dalan rua: Ida; Fretilin nudar partido nebe manan eleisaun bele harii Governo no hili PM foun hodi Ukun iha tinan liman nian laran (2007/12), maibe Ukun ho minoria no la hetan maioria iha parlamento ne´e implika krise institucional, iha sorin ida. Husi sorin seluk, KPM nebe hadait to´o oras buka iha solusaun. Ho governo minoria aka ukun dada naruk liu tan krise. Rua; Koligasaun Maioria iha Parlamento nebe bele fo suporta ba governo hodi governa no garante ba estabilidade. Husi dalan rua ne´e tuir Ukun Fuan inan, iha ne´e buka hili dalan nebe maka bele lori Timor ba estabilidade Institucional no hodi buka resolve no buka solusaun ba konsekuencia husi KPM!

* António Ramos Naikoli, Timor Oan, Hela iha Lisboa