Campanha ba Eleisaun Presidencial hotu ona

Campanha ba eleisaun presidencial Timor Lorosae nian hotu ona. Tuir lolos atu taka campanha iha loron 7 -04-2007, maibe koincidencia ho semana Santa, Pascoa,populasaun Timor nian 90% Católico neduni hakotu campanha iha loron 4-04-2007.

Iha loron 4 atu halo reflesaun didiak hotu hanoin no fihir kandidatu nebe´e maka bele ba troka Xanana iha Palacio Ahukedesan, Kaikoli neba. Sira nain 8 ne´e hotu-hotu bele hetan bilhete ba tur iha Palacio das cinzas, maibe atu hetan carta ida ne´e, uluk nanain sei manan lai teste iha eleisaun loron 09-04-2007, hafoin ba segunda volta ka lae? Se ba segunda volta ita sei hein tan semana ida ka rua hodi hatene se maka ba tur iha Xanana nia fatin.

Iha kandidatu nain ne´e nain rua maka destaka iha imprensa ka media Portugal nian, Lu´olo husi Fretilin no Ramos Horta,independente maibe hetan apoio husi F-M, UNDERTIM, PSD Millenium, antigocombatentes sira no cidadaun Xanana.

Kandidatu rua nebe maka iha liu meius material hodi suporta sira nia campanha no hetan liu mediatismu do ke kandidatu sira seluk. Ida sira nain rua kaer kargo bot iha Nasaun nian, ida nudar Presidente Parlamento Nasional no seluk nudar PM Timor Lorosae nian. Se sira nain rua ne, ida maka manan, ne´e laos novidades no sira nain rua ba segunda volta mos laos novidade. Novidade maka ne´e , se sira nain rua la ba segunda volta no la manan. Tamba makina eleitoral sira maka domina.

Maibe iha klima campanha nian mos mosu kasu hanesan Major Alfredo Reinado, nebe halo deklarasaun hodi apela ba povo labele vota ba kandidatu rua ne´e: Lu´olo no Ramos Horta. Posisaun Alfredo Reinado ho Peticionarius mos importante tebes, mos sei muda cenariu barak iha eleisaun ne´e rasik. Eleitorado maka sei penaliza duni resultadu politika nebe´e maka sira nebe´e kaer ukun iha biban sira ne´e la hatan ba lian sira nebe´e maka povo infrenta.

Neduni ita hein,ita nia emar maka decide ho ulun malirin no ninia matenek rasik.


Lisboa, Portugal, 05-04-2007

Forum Haksesuk