VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20070310

FUNU MANUFAHI*

Antonio Ramos Naikoli

Funu Manufahi no Dom Boaventura nudar simbol nacionalista Timor Loro Sa´e nian. Saida maka Funu Manufahi? Se maka Dom Boaventura? Tansa maka ASDT/Fretilin liu hus ninia diresaun: Nicolau Lobato, Xavier do Amaral, Ramos Horta, Borje da Costa, Leopoldo Joaquim, José Luis Guterres ba hasoru malu ho Dom Boaventura ninia Ferik Oan iha Kakuit Betano-Manufahi iha fulan Juni tinan 1974?

I. TANSA MAK MOSU FUNU NO FAKTOR-FAKTOR SAIDA MAK SAI HANESAN “CAUSA KA SEBAB” HUSI FUNU MANUFAHI NIAN

a) Revolta tamba hasae imposto (logika ekonomika). Waihira iha funu tamba iha ninia deskontentamentu, hanesan mos tuir autor sira balun nia hakerek konaba ba Funu manufahi, hanesan Geoffrey Gunn haktuir katak ”Funu Manfuhai ne mosu tamba autoridade hasae Imposto husi pataka ida sae ba pataka rua ho manu tolun sanulu”. Tuir hakerek iha Portugues nune: «A proposta das autoridades coloniais de aumentar de impostos de capitação de uma pataca para duas patacas e dez ovos (“in” Gunn, 1999: pp. 201)». Iha revolusaun ka revolta hotu hotu motif ekonomika ba funu sempre iha, hanesan mos funu Manufahi.

b) Mudansa Regime Iha Portugal husi Regime Monarka ba Republika. Hanesan faktor seluk maka kontribui hudi mosu Funu Manufahi mos katak tamba mudansa regime iha Portugal “Husi Monarkia ba Republika”. Tamba mudansa ba regime ne maka hanesan provoka resentimentu kontra ka funu hasoru kolonial iha timor liu husi Funu Manufahi. Maibe hare ba historia mos katak, Dom Boaventura funu hasoru malae mutin ka ”Kolonial Portugal” iha Timor Loro Sa´e, tamba funu Manufahi no funu sira seluk iha Timor halo hasoru malae mutin, Funu iha Luca, iha Baucau, no fatin seluk no funu iha Manufahi ida uluk (I) iha tinan 1895 Dom Duarte da Costa nebe nia oan maka Dom Boaventura, Funu Manufahi dala rua (II) iha tinan 1907 no ikus Funu Manufahi iha tinan 1911/12 (III).

c) Influensia husi “Ideiais independencia” hudi funu duni Malae Mutin husi Timor. Ligasauan ho movimentu libertasaun ka independentista sira iha Iha Filipina, Indonesia ninia influencia tama iha Timor. Tuir autor Frances Pélissier iha nia livru “Timor en guere” dehan katak Funu Manufahi mosu iha biban nebe maka iha mos funu iha fatin sira hanesan iha Flores, haktuir autor: «Ao segundo Péliser aponta, que das rebiliões armadas hajam ecloidido na ilha das flores entre 1911 e 1912 (Pélisser,19…; pp. 293)». No mos hanesan hakturi iha livro Geoffrey Gunn katak: ”«É também legitimo especular sobre se num circulo de uma dúzia de individuos em Dili haverá quem dejesasse a independência de Timor; seria Dom Boaventura uma desses Homens (Gunn, 1999: pp. 202)»”.

Influensia husi “Ordem Maçónico” nebe sira ninia lema maka “Trilogia Liberdade-Igualdade-Fraternidade” nebe tuir autor Frances (cita) dehan katak Dom Boaventura iha ligasaun ho “Ordem Maçónico” nebe maka iha tempo neba mos hahu kuda sira nia Hanoin (pensamento, red) no harii sira nia knua iha Dili. “Ordem Maçónica” sira ninia funu ba transformasaun no revolusaun barak hanesan iha mundo, hare ba Revolusaun Liberal nebe materializa liu husi Revolusaun Industrial iha, influensia ba Deklrasaun ba Independencia iha Estado Unidos Amerika (USA) nebe sira nebe maka proklama independencia Amerika nian hanaran “-Brother Foundation/Irmaõs Fundadores-” hanesan Thomas Jefferson, Jorge Washington sira hotu pertence ba “Ordem Maçónica”, Revolusan Frances nebe maka ordem ne iha ninia influensia hudi deklara prinsipiu ba revolusaun Francese maka tuir lema “ordem maçónica” nian maka: Liberdade-Igualdade-Fraternidade, no ikus maka “ordem maçónica” mos iha ninia papel importante hudi halo konspirasaun ba transformasaun husi regime Monarka iha Portugal ba Repúblika. Baseia ba autor Frances ne ninia hakerek katak, argumentu nebe maka Malae sira uja hudi hakerek katak Funu Manufahi ne tamba iha konsekuensia husi Transformasaun ba regime iha Portugal ne, laos atu mantem regime nebe maka utiliza «meios represiva» maibe hakarak halo mudansa liu husi duni sai Malae Mutin (kolonial Portugal, red) tan saida:

1. Dom Boaventura ninia ligasaun ho “Ordem Maçónica”, tamba ordem ne maka kria konspirasaun hudi halo transformasaun ba regime husi Monarka ba Republika iha 1910 iha Portugal. Ita bele dada hanesan iha ligasaun tamba tuir Tuir Luis Mateus, hakerek livro konaba “Maçónaria em Lisboa 2003” haktuir katak Fernando Ossorio, Jurista nebe maka forma iha Universidade Coimbra ba servisu iha Administrasaun Dili. Haktuir tan autor katak Fernando Ossorio maka harii knua «Loja Ocenia Dili, Timor 1991, no. 321, Grande Oriente Luzitano (Mateus, 2003; pp.86)».

2. Ideal nebe maka inspira Dom Boaventura ne maka “duni sai malae mutin ka kolonial Portugal”, tamba iha momentu nebe hanesan haktuir ona iha movimentu independencia iha rai-rai iha Asia, hanesan Filipina, Indonesia, no sst. nebe iha ona ligasaun.

3. Dom Boaventura mos laos foin partisipa iha Funu maibe nia mos ajuda nia Aman Dom Duarte hudi halo funu hasoru malae mutin iha tinan 1895. Tuir Abilio Araujo dehan iha ninia livru katak: «O rei de Manufahi, Dom Duarte, enviou o seu filho Dom Boaventura a Cailaco, Atsabe, Balibo e outros reinos ao fim de obter apoios para uma revolta em larga escala (Araujo; 1977; pp.147)». Funu hasoru malae mutin ne hahu ona husi nia aman to oan. Hatutan tan Abilio Araujo katak: «D. Boaventura representou o símbol de um esforço patriotico na conjugação dos reinos de Timor para uma acção unitaria (Araujo; 1977: pp.158)».

Neduni ho argumentu sira hatudu katak Funu Manufahi iha ninia inspirasaun politika maka «Oinsa maka duni Malae Mutin husi ita nia rain». Kontrariu ba argumentos kolonialista nian katak tamba «rescentimentu tamba iha mudansa regime iha Portugal». Argumentus sira koloanialista nian hakarak deit «Menimiza historia Funu Manufahi».

Ita bele halo hanesan analisa komparativa ida, oinsa maka procesu “independência” iha Haiti iha tinan 1804, ne resultadu husi Funu atan (Escravo, red) sira to´o ikus sira proklama “Independência” iha loron 1 fulan janeiru tinan 1804.

II. EFEITU KA AKIBAT HUSI FUNU MANUFAHI

a) Emar barak maka mate no material (husi Manufahi no Kolonial). Iha funu hotu-hotu kustus humanos, emar mate barak, barak maka kaer ba kastigu . Husi sorin Manufahi oinsa maka organiza resistensia hudi funu hasoru Malae ka Kolonial Portugues. Autoridade Kolonial Portugues hahu fulan desembro Funu nakfera iha Manufahi no dait to´o tinan 1912 iha Timor Loro Sa´e tomak. Hanesa haktuir Abilio Araujo “iha loron 5 fulan Outubro tinan 1911, Governador Filomeno da Câmara konvida Leurai sira hotu husi Timor tomak mai halo festa hudi komemora halo tinan ida proklamsaun Republika”. Hatutan tan Abilio (idem) “Iha biban ne Leurai sira halo juramentu hudi halo funu hasoru Malae iha Timor laran tomak”. Neduni Funu wainhira nakfera iha Manufahi mos dait ba fatin hanesan funu hasoru Malae iha Baucau, Venilale, Lospalos, Viqueque, Suai, no ikus liu maka iha Oecussi, ne katak iha asaun nebe maka iha koordenasaun nasional. Autoridade kolonial Portugues konsentra liu sira nia forsa ba iha Funu Manufahi. Kustus materiais, implikasauan ekonomika bot hodi halo operasaun kontra Funu Manufahi. Governador Filomeno da Câmara husu tulun husi Angola, Mozambique, Goa no Macau. Governador mos hahu ona konvoka Mordor sira husi Manatutu no Laklo iha Dili. Hahu estrategia militar hudi ataka Manufahi husi frente tolu: ida, konsentra forsa husi Ainaro ho koloborasaun husi Liurai Ainaro nian maka Naikau hudi ataka Manufahi husi sorin loro monu. Rua, husi Divisaun Infanteria nebe husu reforso husi Macau no Goa nebe mesak Malae Portugues tau sira nia base iha Aileu, forsa husi Angola no Mozambique maka ataka husi Maubissi ba Aitutu hudi ba Kablaki. Iha Kablaki Funu Nain nebe maka Dom Boaventura tau nudar komanda Funu iha neba naran Asae Maunkoli nia iha surik rua ida naran Beri Sika no ida seluk Naran Bere Laka. Tamba autoridade kolonial ninia forsa makas liu, neduni Kablaki mos la tahan, Kablaki monu ba liman autiridade kolonial iha loron 27 Maio tinan 1912. Tolu, Ataka husi Manatutu ba Turiskai, sai tun ba Tutuluru to´o ba iha Betano hudi cerku Manufahi. Tamba ataka maks husi fatin hotu-hotu, neduni iha loron 22 fulan Juli tinan 1912 Foho Riak monu ba kolonial sira nia liman. Hanesan haktuir testemunya Jaime Inso nebe nudar “exercito Portugues” nebe participa iha ataka ba Manufahi katak operasaun ne envolve emar barak, hatun bomba ba foho Leo laku nebe maka sei resiste. Hanesan haktuir iha Abilio Araujo ninia Livro katak: «Jaime do Inso que participou nesta guerra de 1912 como oficial da Marinha servindo na conhoneira “Patria” que também bombardeou Manufahi relata-nos que os sitiados eram em grande número “talvez mais de 12000”. No dia 9 de Agosto choveram balas sobre o último reduto em resistência (Araujo; 1977; pp.156)».

b) Hahu ona hari liurai no cefe suku sira nebe maka obedece ba knar Kolonial nian. Autoridade Kolonial Portugues halo «mis tiha» ita nia Leurai no Dato sira be hudi rai moris maka Ukun Timor Loro Sa´e. Nebe autoridade sira hili sira nebe maka hanesan «fiel» ba koloniala maka nudar Leurai hudi Ukun, hudi troka Leurai ka Dato sira nebe maka Reno rasik maka hili. Sira uja ona sistema oinsa maka kontrola emar Timor buka tau sira nebe maka sira nebe maka «fiel» ba kolonialista Portugues.

c) Reforsu ba autoridade kolonial liu husi Administrasaun lokal, militar, no sst. Hahu ona harii administrasun lokal nebe maka bele ukun no kontrola populasaun. Iha parte Militar nian hahu ona harii forsas ba rua maka: Forsa Permeira Linya no Segunda Linya. Ninia objectivu maka oinsa maka bele envolve emar Timor oan rasik iha defesa ba «Bandeira no autoridade Portugal nian».

III. KONSEKUENSIA BA FUNU MANUFAHI

a) Politika Kolonial nian maka “Divide Et Impera”

Oinsa maka bele Ukun no hametin sira nia knar buka tau pratika politika Kolonial nian maka «divide Et Impera ka Dividir para Reinar». Hili sira nebe maka «fiel» maka Ukun ka nudar leurai, foti sira nebe maka fiel ba ukun iha reino sira nebe maka «Funu hasoru kolonialista». La respetu ba knar politika, sosial no ekonomika emar rai nain nian nebe hudi rai moris iha kedan ona. Hanesan ne maka sira bele ukun, tamba hamis tiha knar nebe maka emar rai Timor iha hudi rai moris mai.

b) Manufahi oan ba servisu nudar atan ka «escravo»

Hodi servisu nudar «aselear» ba malae hudi servisu ba tos komunal ka estadu nian. Tuir Geoffrey Gunn haktuir katak: ”hahu loron 23 fulan Agusto tinan 1912, Governador Filomeno da Câmara, disidi regiaun Raimera, Riak no Leo laku sai nudar sasan estadu nian no kuda sasan sira nebe maka fo ba autoridade kolonial sira nian, hudi tau naran tuir autoridade kolonial sira nian (in, Gunn,1999; pp.205).

c) Heransa husi Funu Manufahi nebe rai hela iha realidade Timor nian maka Sub-distritu Fatudu tama ba Ainaro

Hahu Funu Manufahi, husi funu ida dala uluk (I) iha tinan 1895 to´o ikus iha tinan 1911, Ainaro maka hatudu ninia «fidelidade» ba autoridade kolonial sira. Ainaro serve hanesan base ba forsa kolonial nian hudi ataka Manufahi. Hanesan haktuir Capitaun Jose Martinho iha ninia Livru “Timor quatro século de Colonização Portugal”, katak iha regulos barak maka hanesan fiel ba Malae hudi halo Funu hasoru manufahi hanesan autor dehan: «E entre eles, há que distinguir o velho Nai-Cau do Súru, que da tranqueira de Ainaro, exposta aos ataques do Boaventura, mandou um dia a Atsabe, ao comandante Cândido Bernardo, que ai dirigia as operações de ataque aos súcu rebeldes, emissários com este recado; “dificilmente nos poderemos aguentar sem auxilio. Mas se formos vencidos, procurem o meu corpo debaixo das pedras da tranqueira”, (Martinho, 1943: pp. 69)». Buat nebe maka Nai-Cau halo ba Malae Mutin, sira mos la haluha kolen nebe maka hudi tulun ba Funu Manufahi. Grato (Imbalan, red) nebe maka fo ba Nai-Cau no Ainaro maka ne “Waihira hotu Funu manufahi, sira be fo tulun ba Funu Manufahi lori emar Manufahi ba sai hanesan atan (escravo/budak, red), maibe Nai-Cau husu ba Governador Filomeno da Câmara katak «Ami Same-Ainaro mesak feto san uma deit neduni haketa maka rai mai ami». Hahu iha neba Fatudu tama ba Ainaro.

Fatukuak fo ba sira Laklo (Manatutu). Iha Funu Manufahi mos, autoridade kolonial sira mos mobiliza Mordor sira husi Manatutu ho Laklo hudi ba ataka Manufahi. Nebe tuir Cap. Jose Martinho dehan katak: “Filomeno da Câmara, num largo golpe de vista, orden a concentração, em Dili, de todos os elementos que é possivel trazer de leste, principalmente recrutados entre Moradores de Manatutu e Lácló (Martinho, 1943; pp. 60)”. Murdor sira ninia komandante maka Luiz Noronha nebe atake tun husu Manatutu ba sai husi Betano. Waihira Funu hotu Governador Filomeno da Câmara fo hanesan knar no ukun iha Fatuk-Kuak ba sira husi Laklo. Hametin liu tan knar no Ukun husi sira Laklo iha Betano, liu husi Mestre Mario Noronha husi Manatutu ba kaben ho Dom Boaventura nia oan Feto, atu nune ligitima liu «Knar no Ukun». Neduni Fatuk-Kuak iha Betano fo ba sira husi Laklo maka kaer.

IV. FUNU MANUFAHI NUDAR SIMBOL NASIONALISTA

1 - Dimensaun Funu nian kompara ho funu sira seluk, ninia konsekuensia material no humanos bot husi sorin Manufahi.Husi sorin Kolonial nian mos dala uluk maka hasoru funu bot ida ne tuir autor sira balun nia hakerek. Tamba iha esperiencia Portugal nian iha ninia kolonia sira foin dala ida maka hasoru Funu ida nebe ninia dimensaun bot iha momentu neba. Obriga Portugal hasai osan hudi mobiliza operasaun ba Funu Manufahi. Osan hudi selo forsa nebe maka desloka husi Afrika hanesan Angola no Mozambique, Macau no Goa, nebe maka iha ninia kustus ekonomika ba operasaun ne bot ba Portugal.

2 - Funu hasoru Malae Mutin nebe maka Ukun Emar Timor. Ideal nebe maka Funu Manufahi representa simbol nasionalista tamba ninia principiu fundamental maka oinsa maka «duni Malae Mutin» husi Timor Loro Sa´e.

3 - Fretilin maka banati tuir dalan nebe maka Dom Boaventura ninia dalan. Iha fulan Juni tinan 1974, delegasaun ASDT/Fretilin ba hasoru malu ho Dom Boaventura nia ferik oan iha Kakuit Betano.Iha neba Nicloau Loubato, Xavier do Amaral, Ramos Horta, Borja da Costa, José Luis Guterres no sst.ba hatou ba Leurai feto katak «Ami halo tuir buat nebe maka ami nia Avon Dom Boaventura maka mata dalan». Hanesan iha nebe dadoli nain ida nebe maka naran Bere Siku tatolin lian nudar lian nain hudi simu delegasaun husi ASDT/Fretilin nune: “«Loriku rain nain, lian daudaun! (Araujo; 1977; pp. 8)”».

V. DOM BOAVENTURA MATE NO NIA RATE IHA NEBE?

Tuir autor barak koalia, tuir Geoffrey Gunn dehan katak: “iha kemungkinan ka hipotes rua, Dom Boaventura kastigu iha Atauro ka Ai-pelu, iha neba maka nia mate iha kadeia”. Tuir Emar Manufahi, Boaventura sai hanesan mitu katak: ”Nia lakon mosu, ka mate moris”. Iha ne bele justifikasaun tamba saida maka nem autoridade kolonial iha momentu neba hatudu katak ninia Rate iha nebe, kala mate maibe rate laek.

Iha versaun/versi husi Avon sira balun husi Manufahi konta katak: “Dom Boaventura Malae Kaer iha foho Ria tu-Manufahi, lori ba kastigu iha Ai-Pelu (besik Likisa). Emar sira be hein kadeia Ai-Pelu ne emar Metan sira husi Afrika (Angola), Angola oan sira mesak lanu tem deit (hemu tua dor). Hatutan Avon nebe iha momentu Funu Manufahi sei kiik ho tinan nem (Nia Mate ona iha Tinan 1989 iha Same) katak (idem) Waihira Dom Boaventura Malae kaer lori ba dadur iha Ai-Pelu, sira husi reno no uma Lulik Webikun (Atambua ho Kupang, red) mai buka kedan Dom Boaventura ne iha nebe, sira hetan iha Ai-Pelo, tamba sira hare katak Malae Metan sira husi Angola oan mesak lanu tem deit, sira ba husu ba Malae metan sira nune «Se maka ema nia aman nebe imi futu iha lutu laran ne? Malae Metan sira hatan Nia maka Leurai Manufahi nebe maka Funu hasoru Kolonial, tamba ne maka ami futu nia hudi hatama iha sela ka kadeia ne. Sira husi Reno no Uma Lulik Webikun dehan nune ba Malae metan sira «Ami iha Tua sabu se imi hakarak ami fo ba imi hudi troka ho katuas ne fo mai ami lori». Hatutan tan Avon ne “Metan sira hare tua kaben sulin no hamrok hanesan be, sira hemu tua to lanu, no sira reno husi Uma Lulik Webikun lori kedan halai Dom Boaventura ba mota sorin (Atambua-Kupang, red)”.

Versaun ne hatudu katak, husi autoridade kolonial sira mos la fo sai katak Dom Boaventura nia mate los iha nebe, ninia rate mos la iha, la iha historiador ida maka hakerek konaba ninia mate iha sa tinan no hakui iha rate nebe. Tamba ninia rate la iha, maka mosu versaun ida husi emar Manufahi katak “Dom Boaventura ne Mate-Moris ka Lakon-Mosu”.

VI. UKUN RASIK AN NE MEMORIA KOLEKTIVU

Haknauk ba hakerek Nain ka Poeta Timor oan ida naran Fernando Sylvan katak «A Independencia é a memoria de um Povo que não Morre». No tuir matenek nain ida naran Frederick Engel ninia hateten katak «A emancipação de um povo será a obra do próprio povo». Banati Fernando Sylvan no F. Engel katak ita nia Funu ba Ukun rasik an laos foin hahu ho revolusan “25 de Abril 1975” iha Portugal, no laos foin hahu waihira Indonesia autoriza ita halo «referendum», maibe hahu hudi uluk kedan husi gerasaun Dom Boaventura nian hanesan Mata Dalan, to´o iha iha gerasaun Nicolau Loubato, Vicente Reis “Sa´he” no sira seluk hudi Funu duni kolonial Portugal no hasoru Indonesia no ikus Gerasaun Xanana no emar Timor oan tomak funu hudi duni sai Indonesia husi Timor no ita Ukun An (Independência, red) liu husi Referendum iha “Loron 30 fulan Agusto tinan 1999”. Neduni respeito no homenagen ba historia-Loron 24 Fulan desembro ne loron nasional ka loron “Kebangkitan Nasional”. Ne husik ba disisaun politika husi: Governu no Fretilin nebe maka hahu foti Dom Boaventura no Funu Manufahi nudar simbol “Nacionalismo”. Homenagen no respeitu ba historia hanesan iha hafahe (divisaun, red) ba provincia ka wilayah bele tau kapital ba provincia zona centro nian iha Manufahi ka Same. Hanesan Igreja atu loke dadauk “Diocese iha Same”, ne hatudu ba respeitu ba ita nia memoria historia nudar emar (Povo, red) no Rai (nasaun, red). Iha Fundasaun hudi naran Dom Boaventura (Fundaboa), iha Universidade maka hanaran Universidade Dom Boaventura, iha loron ukun rasik an ka Independència iha dia 20 Maio 2002 hanesan homenagen ba Funu Manufahi liu husi “Tebe ka dansa Funu Manufahi. Ikus husik ba autoridade rai Timor nian hanesan: Governu, Parlamentu no Prezidente RDTL maka foti loron 24 Fulan Desembro iha tinan 1911 hahu Funu nakfera iha Manufahi sai hanesan loron bot ka nasional.

Funu Manufahi mos, sai hanesan simbol ba klosan sira nebe maka Funu hasoru iha Indonesia nia Ukun iha Timor. Hanesan Fernando La´sama, eis-Secretario Geral Renetil no Prezidente Partido Demokratiku (PD) nian waihira Indonesia sira kaer ba Kadeia iha Jakarta nia ba defende ninia “Pleidoi” iha Tribunal Jakarta katak «Ami nia Funu laos foin hahu iha tinan 1975 maibe hahu husu Dom Boaventura iha Funu Manufahi».

Ba Libânio Soares,estudante Ciência Politica iha Universidade Nova Lisboa no Militante Partido Socialista Timorense (PST) katak ”«Funu Manufahi maka hanesan ita nia patrimonia historika, neduni ita buka respeitu no fo homenagen ba loron ida nebe maka ita nia bein ala sira halo funu hudi duni kolonialista husi ita rain»”.

Tuir Francisco Guterres, estudante iha Faculdade Economia Universidade Coimbra no militante Fretilin dehan katak «Uluk Fretilin ninia formasaun politika-idiologika maka hanorin konaba Funu Manufahi nian no Dom Boaventura nian».

VII . BIBLIOGRAFIA/FONTES

1. Livros

a) Geoffrey C. Gunn,(1999): ”Timor Loro Sa´e 500 anos”. Livros do Oriente. pp.193-208
b) Cap. Jose S. Martinho (1943) ”Timor quatro seculo de colinização Portuguesa”, edi. Livraria Progredior, Porto.
c) Araujo, Abilio (1977) ”Timor Leste-Os Loricos Voltaram a Cantar. Fotocomposição de prografe Impressão “offset”de Trama. Lisboa. pp.144-160.
d) Sylvan, Fernando (1993): “Obra de Oan Timor”, Lisboa. pp.12
e) Jolliffe, Jill (1989); ”Timor-terra sangrenta”. Edi. ojornal. publicação projornal.
f) Mateus, Luis (2003) “Moçonaria na história de Portugal”. Palacio Maçónica do Grande Oriente Luzitano.
g) René, Pélissier, Timor en Guerre: Le Crocodile et les Portugais (1847-1913), orgeval,1996, pp. 254-255.

2. Historia Oral

a) Husi ita nia Bein sira iha Manufahi nian maka konta. b) Klosan Sira nia hanoin.

- Hotu -

*Autor: Antonio Ramos Naikoli. Publika: STL, Janeiru 2004. Artigu ne'e sei kontinua halo investigasaun ho dadus ne'ebe hetan, husi Livrus no autores ka Lia-nain sira!


Sem comentários:

Enviar um comentário

Nota: só um membro deste blogue pode publicar um comentário.