Esquadrão da Morte de Alkatiri (3)

1. Harii fila fali Unidade nacional Timor nian

Krise politika nebe maka afekta Timor oras ne, justifika duni katak Lorosae kontra Loromono? Ka issu ne mosu tamba agenda no ambisaun politika elites balun nian?

Fakto maka ne, iha manifestasaun nebe FNJP (Frente Nacional Justiça e Paz) maka promove ne lori emar barak husi distritu sira husi Loromono, maibe hare iha estrutura FNJP ne vice-koordenador maka Marito Reis, husi Bukoli, Baukau, hatudu katak laos ona Lorosae kontra Loromono, maibe iha kontra politika nebe maka Governo Alkatiri nian, liliu ninia atuasaun iha krise nebe maka afekta ba Timor iha fulan hirak ne nia laran.

Manifestasaun apoio Alkatiri husi distrito sira Lorosae: Baukau, Lospalos, Viqueque (Ossu), mobiliza halo manifestasaun hodi husu ba Prezidente Republika «reconsidere» ba ninia decisaun hodi demite Eis-PM Mari Alkatiri. Massa barak maka husi distritu sira nebe temi iha leten ne,maibe iha ne iha mos sira nebe maka mobiliza massa maka Sekjen Adjunto, José Reis (Marito Reis, vice-koordenador FNJP nia alin), hodi apoio Mari Alkatiri nebe husi Sub-Distrito Bazartete, Distrito Liquisa. Neduni hare lolos la iha buat ida Lorosae maka kontra Loromono, maibe kontra politika Mari Alkatiri nian no pro-Mari Alkatiri ninia politika.

Apoiante Mari Alkatiri/Lu´Olo nian hakarak hatudu ba opiniaun publika katak ”Mari Alkatiri ne vitima iha krise politika Militar nebe afekta ba Rai Timor”. Buka oinsa maka minimiza «Esquadrão da Morte de Alkatiri» nebe tuir komandante Rai Los katak ”Eis-Ministro do Interior Rogerio Lobato hetan orientasaun husi eis-PM Mari Alkatiri hodi harii grupos armados sira ne”. Rogerio Lobato, iha deklarasaun ba media ka pers konfirma katak fahe duni kilat ba grupos Railos nian (Público, 30/06). Iha ne manifestasaun pro-Alkatiri utiliza teknika Marketing Politika «Spin Doctor», terminologia Aglo-Saxonica katak” Buka minimiza faktor negativos konaba ema ida ninia figura”. Transforma Eis-PM Mari Alkatiri nudar «Vitima iha krise politika ne». Lian nebe maka Timor LoroSae (Leste) hasoru iha biban badak, kala iha tinan sanulu (10) nia laran maka ne: Oinsa maka harii fali unidade nacional, identidade nacional nebe ita harii ona maibe monu latan ba rai tamba krise ida ne. Krise ne ninia lia hun no abut maka jogos politika, hahu husi Governo eis-PM Mari Alkatiri nian. Neduni atu hametin liu tan ka hamoris fila fali konceitu estado-nasaun nian liu husi tesi no koalia ita nia lian husi ita nia knua, liu husi feto san no uma ne. Tamba emar Timor LoroSae (Leste) hodi rai moris kedan ita iha lisan maka feto san no umane, la iha funu ida maka mosu tamba feto san no umane, hare deit Timor oan husi Loromono ba hola feto iha Lorosae.

2. Oinsa maka harii fila fali PNTL no F-FDTL?

Governo Mari Alkatiri destrui ona Instituisaun Estado nian rua (PNTL ho F-FDTL). Oinsa maka harii fila fali hodi manan fila fali emar Timor tomak nia laran?

Tuir Jornalista Max Stahl (Jornalista Ingles nebe filma Massacre Santa Cruz iha tinan 1991) iha ninia deklarasaun ba Diário de Noticias (DN) katak ”dificil witoan atu harii fila fali «Força Segurança ka Policia» no «Força da Defesa» tamba populasaun deskonfia, tamba sei hare ba nia mai husi nebe (DN, 01/06/2006)”.

Prezidente Xanana Gusmao, iha ninia diskursu ba Nasaun iha loron (22/06) dehan katak ”PNTL ho F-FDTL naran foer ona,maibe nia sei lori sira ba monu ain ba povo (Diskursu Pres. Xanana, 22/06)”. Xanana ninia hanoin ne,hatudu ona katak oinsa maka rekonstroe fila fali Instituisaun Estado nian hanesan PNTL ho F-FDTL nebe destroe iha krise ne nia laran. Konstroe fali paradigma foun ida konaba konceitu «defesa» no «segurança» nasional, tamba ho krise ne hatudu katak Paradigma sira nebe maka Komunidade Internacional aplika iha Timor maka «faila». Hahu husi King College (KC), nebe halo estudo «konaba hari instituisaun defesa iha Timor», husi sira nia estuda maka fo rekomendasaun ba ONU ka PBB hodi harii F-FDTL nudar «exercito» ka Angkatan Bersenjata Timor Leste nian, ninia nukleo duro F-FDTL rekrut husi Falentil. Se paradigma King College nian faila ona, buka hamosu fali paradigma foun konaba «Defesa e Segurança».Lian litik foun mosu maka ne: Timor ne precisa iha «Forças Armadas?», ka konstroe paradigma foun konaba konceito «Defesa e Segurança» nebe ho base deit ba harii «Forças Segurança?».

3. Justisa ba sira nebe maka envolve iha «krimi» inkluindo eis-PM Mari Alkatiri

Mari Alkatiri tenke ba hatan iha Tribunal, husi faktus sira nebe maka imprensa foti ona ne, nia ba hatan duni iha Tribunal nudar aktor moral i material, ka nia la iha kanuru tohar ida ho «Esquadrão da Morte de Alkatiri».

Ida; Mari Alkatiri nudar aktor moral konaba EMA (esquadrão da Morte da Alkatiri), tamba nia nudar Cefe Governo no Sekjen Fretilin, direkta ka inderektamente hatene saida maka Rogerio Lobato fo ordem hodi harii «EMA». Sekjen Fretilin Mari Alkatiri no vice-Prezidente Rogerio Lobato konfirma katak iha surumutuk ho Komandante Railos, Mari Alkatiri dehan “Hasoru Malu ho Railos nudar Sekjen Fretilin ho militante partido nian (Público, 9/06 i 30/06) no Tuir Rogerio Lobato mos konfirma katak fahe duni kilat ba grupo Railos tamba konsidere hanesan serviço secreto PNTL nian (idem). Iha Xanana ninia diskursu ba Nasaun kestiona katak “Tansaida maka Rogerio Lobato, eis-Ministro do Interior, demite husi Ministro maibe promove ba kaer kargo nudar vice-Presidente Partido Fretilin (haknauk husi Diskursu Pres. Xanana, 22/06/2006)”. Iha reportagem nebe maka TV ABC fo oinsa maka konfirma ba ligasaun Triangulo ne, tamba iha reportagem Railos koalia ho Rogerio no Rogerio promete dere kedan ba Mari Alkatiri, programa TV ABC nian oras ne iha gravasaun CD nebe fan iha Dili 5$ sosa ida no to´o ona Portugal, tuir mai cita dada lia Railos ho Rogerio Lobato (...): Railos: Camarada Rogerio Lobato, ami hetan ataka husi F-FDTL petisaun sira, Railos nia emar sira tiru kilat tarutu. Rogerio Lobato: Mantem deit imi nia posisaun; hatan tan Railos: Camarada Mari hatene ka lae? Hatan Rogerio Lobato: Hau dere ba camarada Mari Alkatiri agora (hare fali CD nebe cirkula iha Dili).

Bele mos kestiona relasaun Triangulo: Mari Alkatiri-Rogerio Lobato-Railos. Se hanesan ne Ministeriu Publika (MP) buka investiga iha ka la iha suspeitu participasaun kriminal Mari Alkatiri nian.

Rua; Mari Alkatiri nudar aktor material, tamba deklarasaun komandante Railos nian katak “Nia hasouru malu ho Mari Alkatiri”. Sira nain rua hasoru malu, koalia saida deit? Neduni buka iha explikasaun iha Tribunal no ba Ministerio Publiku. Mos Komandante Railos iha ninia deklarasaun balun katak “Nia ho nia grupo só entrega kilat waihira Mari Alkatiri ba iha Tribunal (Publico, 20/06)”. Ikus mai Mari Alkatiri sira hari fali grupo ida ho ninia lider maka Abilio Mesquita, husi PNTL, objectivo grupo ne oinsa maka ba elimina tiha «Grupo Railos nian», to´o ikus grupo Abilio nian Força Internacional sira prende no kilat lori hotu ba entrega ba Prezidente iha ninia uma Balibar no Abilio Mesquita kaer dador kedan.***

Esquadrão da Morte de Alkatiri (2)

1. Destrui Instituisaun Estado nian, hanesan PNTL ho F-FDTL

Mari Alkatiri, se nia maka iha vontade no hanoin diak ba Timor, nusa maka la buka resolve problema nebe mosu iha F-FDTL nia laran? Tuir relatoriu husi Komisaun nebe Prezidente Xanana fo hanesan rekomendasaun ba Governo konaba krise ne iha tinan 2003. Nusa maka Abel Ximenes Larisina, eis-Ministro do Desenvolvimento iha ninia deklarasaun ba RTP i RDP katak “Hau alerta ba PM konaba krise ne iha fulan Feveriro (RTP i RDP, 08/05/06). Tansa maka Mari Alkatiri husik deit, hodi fo problema nebe ba Hierarquia F-FDTL maka resolve problema ne hodi expulso 600 F-FFDTL Petisaun. Mari Alkatiri fo suporta ba decisaun Hirarquia F-FDTL, signifika Mari Alkatiri maka hakarak duni destrui F-FDTL, provoka odio husi povo ba Instituisaun nebe maka harii «Unidade nacional iha Funu nia laran», Mari Alkatiri ninia hakarak maka ne oinsa maka destrui tiha Instituisaun hanesan F-FDTL. Tamba F-FDTL nebe maka Mari Alkatiri hakarak maka F-FDTL nebe nudar «Liman kroat ba partido ida», neduni buka sobu tiha hafoin harii fali hodi defende ba Partido Fretilin nebe faksaun Alkatiri/Lu´Olo ninia hakarak. Partidariza F-FDTL hetan konfirmasaun husi Diskursu Xanana nian iha quinta (22/06) hodi cita Brigadeiro Taur Matan Ruak nebe ba koalia ho Presidente hodi dehan (...) Ami rona demais Roque Rodrigues no Alkatiri nebe hakarak lori F-FDTL ne ba defende fali partido Fretilin (http://www.forum-haksesuk.blogspot.com).

2. Golpe Constituicional ka Ditadura Constitucional?

Mari Alkatiri ho Ana Pessoa sira nain rua dekora iha sira nia ibun tutun maka termo sira furak hanesan «Golpe Constitucional» tamba sira akusa Xanana maka «halo Golpe Constitucional», maibe sira Alkatiri + Pessoa) haluha tiha katak sira rasik maka viola «Constituição», hare deit iha pontus sira tuir mai ne:

Ida; Mari Alkatiri nudar PM harii Gabinete krise nebe envolve Ministerios tolu (3): Ministerio Estatal e Administração, Ministro do Interioro no ikus Ministerio da Defesa. Decisaun Gabinete krise nian maka ne: Autoriza F-FDTL ba tiru manifestantes sira iha loron (28/04). Nebe tuir «Constituição» katak F-FDTL atua waihira hetan autorisazaun ka decisaun final husi Prezidente Republika nudar komandante Supremo F-FDTL nian. Ikus mai MD ho MI demite tamba sira nain rua pertence ba Gabinete crise nebe PM Mari Alkatiri rasik maka harii, maibe Mari Alkatiri sai, se maka atu troka tuir hirariquia Governo maka Ana Pessoa nebe pertence ba Gabinete Crise nebe hola decisaun hodi haruka F-FDTL ba tiru manifestantes sira.

Rua; PM Mari Alkatiri ho Ana Pessoa subar an metin iha «Constituição» nia kalilin okos, maibe sira mos la iha coragem dehan katak «Fahe Kilat ba ema civil ne» kontra ka favor ba «Constituição?». Tamba tuir «Constituição» PNTL ho F-FDTL maka iha knar kaer kilat laos civil, se fahe kilat ba Civil ne kontra «Constituição», maibe ba Mari Alkatiri i Ana Pessoa fahe kilat ba civil ne «Favor ba Constituição?».

Tolu; Iha definisaun iha «Constituição» RDTL nian konaba Funsaun PNTL no F-FDTL nian. PNTL tuir artigoº iha «Constituição» konaba Seguransa Nacional no Funsaun F-FDTL iha «Constituição» maka Defesa nacional. Maibe Mari Alkatiri bolu fali F-FDTL ba fo seguransa hodi desautoriza ba PNTL, ne laos kontra «Constituição?». Hahalok Mari Alkatiri nian nebe provoka masakre iha loron (25/05) nebe F-FDTL tiru mate PNTL nain 12 no kanek besik 30 (Lusa, 25/05, DN i Público, 26/05). Alkatiri ho Pessoa konsidere asaun ne maka «Favor ba Constituição?».

Neduni Mari Alkatiri ho Ana Pessoa subar an iha «Constituição» nia okos hodi protege an husi sala nebe maka sira rasik «Viola Constituição». Se Viola Constituição tuir Mari Alkatiri ho Ana Pessoa maka «Constitucional», ne maka mosu fali termo foun ida «Ditadura Constitucional». Mari Alkatiri ho Ana Pessoa ninia hakarak maka ne «Harii Estado Nasaun ne ho Partido Uniko», hodi argumenta maka «Constituição» maibe sira rasik viola «Constituição», sira aplika modelo Afrikano nian «Ditadura Constituicional ou Democracia tutelar», associa ba agenda pesoal no ambisaun Mari Alkatiri no Ana Pessoa. Harii Estado Nasaun liu husi dalan «Demokrasia tutelar», tuir Edwar Shill no Gabriel Almond katak” autoridade centra deit iha Partido Dominante no ninia relasaun ho executivo i administrasaun”. Waihira Mari Alkatiri no Ana Pessoa, senti katak sira nia ambisaun hetan «ameasa bot» se lamanan iha Partido laran liu husi Kongresso, la manan eleisaun ho maioria hodi pratika «Demokrasia tutelar ka Ditadura Constitucional» sira halai ona ba ultimo rekurso maka harii «Esquadrão da Morte de Alkatiri».

Esquadrão da Morte de Alkatiri (1)

Esquadrão da Morte de Alkatiri (1)

Tuir TV ABC iha edisaun (09/06), Australian nian fo liu husi ninia reportagem konaba eis-Guerrilheiro nain tolu nulu (30) nebe kaer kilat automatika FNC no Medralhadora, nebe tuir pers ocidente nian klassifika nudar : «Esquadrão da Morte de Alkatiri (EMA)». Tuir porta voz EMA, Komandante Raylos katak “harii grupo ne hetan instrusaun husi eis-PM Mari Alkatiri no nudar Sekretario Jeral FRETILIN”. Hatutan, iha sira nia lista emar sira nebe atu Oho maka: Militares Peticionarios sira no grupos Major (Alfredo, Tara i Tilman), oposisaun interna iha Fretilin no oposisaun politika no kritiku sira no liliu sira «Opnion Maker» sira tama iha lista negra EMA nian”. Gastao Salsinha ninia deklarasaun ba Jornal Público edisaun (08/06) katak “ iha membros CCF balun maka fahe kilat ba Civis sira (Publico,08/06) “.

Ba Osho, Filosofo (Indiano) iha ninia livro «Liberdade» dehan nune (...) Não se deve dar o poder a um revolucionario-porque ele sabe como sabotar, mas não sabe como criar; ele só sabe destruir. (idem) Ele deve ser honrado, respeitado, receber medalhas de ouro e tudo, mas não lhe dêem o poder (Osho, 2004, pp. 106).

Sira nebe maka uluk iha tinan 1975 hatene Oho deit nudar autor moral ka material, ikus mai mos hatene maka halo ida ne deit, haknauk ba Xanana ninia lian katak «Sira be hamrok ran». Uluk iha tinan 1975 Timor oan ho Timor halo Funu no mate barak, revolucionarios sira mosu mai ho diskurso katak «Sira mesak traidor, fascista, no sst.», ikus mai iha biban Ukun An mos, sei pratika aktus sira ne no harii EMA.

Neduni wainhira rona no hare iha TV ABC fo sai lian tatoli konaba «Esquadrão da Morte de Alkatiri» la dun hakfodak ida, tamba:

a) Tuir definisaun konceitu «Oposisaun» ba Alkatiri nudar «Inimigo» no laos konsidere «Oposisaun ka kritika» sira nudar elementus fundamental iha «Demokrasia». Ba José Luis Guterres (JLG) iha ninia plano kandaidatura ba Sekjen Fretilin nian fo hanesan ponto nebe ninia perioridade mos dialog ho oposisaun,sociedade Civil i Igreja Católica (DN,12/05). Tenik tan JLG, oposisaun hanesan «parceiros» iha demokrasia nebe «saudavel», laos inimigo (idem). Tamba Mari Alkatiri konsidere oposisaun hanesan inimigo, neduni buka elimina liu husi «EMA», hare deit husi Komandante EMA ninia deklarasaun sira simu orientasaun atu elimina oposisaun interna i externa husi Fretilin, opinion maker sira, no sst. Maibe porta voz ka juru bicara «EMA» Railos dehan katak «Sira la executa plano sira ne, tamba ho objektivo ladiak no la klaro».

b) Fila Fali ba 1975, ne hanesan «herança» nebe Funu iha tinan 1975 nian; Fila ba kotuk tamba sira nebe maka uluk hatene Oho ema seluk, neduni sira ne hatene maka «destrui» deit maibe la hatene saida maka konstroe «Paz» ka moris hakmateik. Tuir Jill Jolliffe iha ninia reportagem ba Revista Visão (edisaun, nº 691, 1 a 7 Junho 2006), katak: “«Fretilin iha lideransa Mari Alkatiri/Lu´Olo nian hakiduk ba tinan 1975, maka iha deit Partido ida (Partido Uniko), funu iha uma laran (guerra civil, red), fahe Timor ba Lorosae vs Loromono»”. Fila ba tinnan 1975, tamba Mari Alkatiri ho Lu´Olo buka oinsa maka partidariza emar ka populasaun Timor tomak ne mesak Fretilin deit, se maka laos Fretilin laos Timor oan. Se maka Fretilin maka hetan «beneficio» husi Estado, no sst.

Mari Alkatiri maka hakarak duni «kria instabilidade no konstroe estabilidade», waihira ambiente politika la favorece ba Mari Alkatiri ho ninia grupos, neduni buka kria instabilidade liu husi harii «EMA».

Mari Alkatiri mos hakiduk ba tinan 1975 hodi banati tuir modelo kolonialista oinsa fahe emar Timor oan ba Lorosae hasoru Loromono, tamba Mari Alkatiri hatene katak ninia Camaradas sira nebe maka kontra nia iha Partido laran ka sira nebe maka halai taru ho nia ba lideransa Fretilin nian, hotu-hotu mai husi Lorosae hanesan: Vitor Costa, Vicente Maubosy, Reis Kadalak, eis-Ministro do Desenvolvimento, Abel Ximenes Larisina no eis-kandidatu ba Sekjen José Luis Guteres. Neduni Mari Alkatiri ho ninia grupos probagandas sira ba foti issue Lorosae kontra Loromono.

c) Hare husi Kronologi oinsa maka Mari Alkatiri to´o poder hatudu katak “«Mari Alkatiri tauk lakon ba poder,neduni buka oinsa maka joga kartus sira nebe maka nia iha, inkluindo elimina oposisaun sira hotu liu husi EMA». Hahu husi Kongresso Fretilin iha fulan Maio, tuir lolos votasaun nebe «Segredo» maibe sira opta fali modelo «Estalinista» foti liman deit, nebe tuir Jill Folliffe klasifika hanesan «Ditadura iha Tempo Kim Il sung iha Korea Utara». Tuir José Luis Guterres (JLG), eis-kandidato ba Sekjen Fretilin halo deklarasaun tansaida maka «retira» ninia kandidatura: ”Fretilin viola rasik ninia tradisaun demokratika. Dehan JLG processo ba hili kandidato ba tuir kongresso liu husi «voto secreto», maibe agora foti liman deit ne anti-demokratiku, degan Guterres (In Lusa,18/05, Público i DN (19/05)”. Se Partido Politik (PP) halo parte ba «Organização do Poder Politico», tuir artigo 65 koalia konaba «Eleições» katak: ”Universal (umumu), livre (bebas), directo (langsung) , secreto (rahasia)“. Se hanesan ne, duvida nebe maka Prezidente Xanana Gusmao foti iha ninia diskursu konaba Kongresso Fretilin ne «Ilegal» tamba kontra rasik principio Ukun Fuan Inan ka Constituição, maibe hein interpretasaun husi Tribunal recursos tamba grupo José Luis Guterres haruka ona karta ba Tribunal konaba «Ilegal» no kontra Konstituisaun RDTL. Mari Alkatiri ho Ana Pessoa hatene katak se processo votasaun liu husi «Voto secreto» sira lakon, neduni ita mos kompreende Mari Alkatiri fo ordem ba Rogerio Lobato, eis-Ministro Administrasaun Intern (MI) hodi harii «Esquadrão da Morte de Alkatiri» iha Fulan Maio laran molok hahu Kongresso. Mari Alkatiri no Ana Pessoa hatene liu husi presaun Psikologika ba delegados sira liu husi: Ida; «Vota Foti Liman» no Rua; sosa voto, haknauk ba Deklarasaun Xanana (Lusa, 22/06). Ida uluk, vota ho foti liman hanesan «ameaça» bot ba sira delegados sira, tamba barak liu maka hetan «benefecio» husi Governo tamba barak maka servisu iha Administrasaun publika, barak maka kaer kargo bot iha Distrito no sub-distrito, neduni sira lakohi lakon, se sira vota kontra sira hetan risko bot, tamba sira iha familia no precisa Servisu. Sira mos tauk, se foti liman kontratrariu hetan «ameaça» husi «Esquadrão da Morte de Alkatiri». Seluk, Mari Alkatiri ho Ana Pessoa pratika modelo ida «Compra voto» ka sosa voto, fo osan ba delegados sira, atu nune bele vota ba sira (hare Deklarasaun Pres. Xanana, 22/06).