Se maka Manan ho Akordo Ne?

Se maka Manan ho Akordo Ne?

Akordo nebe maka “Hirarkia Igreja Catolika no PM RDTL assina” konsekuensia husi manifestasaun liu loron 19 nia laran nebe Hirarkia Igreja Catolika maka organiza.
Reivimdikasaum (tuntutan,red) husi Igreja maka “la simu se Relegiaun no Moral ne Fakultativo tuir plano pedagocico eskola nian”,nebe tuir Governo ninian. Maibe husi sorin rua la hakiduk iha ida-idak ninia posisaun hafoin Igreja Catolika mos organiza manifestasaun hodi husu ba PM no Governo hakiduk husi sira nia posisaun. Liu loron sanulu resin sia hafoin iha “Akordo” nebe Bispo Catolika nain rua (D. Ricardo da Silva,Bispo Dili no D. Basilio do Nascimento,Bispo Baucau) nudar representantes Hirarkia Igreja Catolika,no husi Governo RDTL,PM Marie Alkateri maka assina,ho mediasaun Prezidente Republika RDTL, Xanana Gusmao.
Ho Akordo ne,iha hare no hanoin husi sociedade Timor nian oi-oin,balun dehan Governo maka manan ho Akordo ne,balun fali dehan Igreja maka manan,balun fali dehan sira nain rua manan hotu. Ho hanoin sira sakat konaba Akordo ne,iha ne hakarak koloka kestaun maka ne:Se Maka Manan ho Akordo ne?Molok atu hatan ba kestaun ne,uluk nanain buka kontextualiza tansa maka mosu akordo no akordo ne mosu hodi hatan ba saida?
Akordo ne mosu hanesan hatan ba konflitus nebe maka envolve “Igreja Catolika vs Governo RDTL”, maka “Relegiaun no Moral ne Obrigatorio ka Fakultativo”. Tamba ida ne maka mosu manifestasaun hanesan “Reaksaun” ba “Aksaun” nebe maka Governo foti. Waihira Igreja Catolika no Governo RDTL tur hamutuk hodi assina Akordo ida hodi buka solusaun ba problema ida ne. Iha Akordo tamba partes sira envolve iha konflitus ne entende ba malu. Se Igreja Catolika liu husi Bispos nain rua assina akordo ho PM Marie Alkateri ninia interpretasaun maka ne:

Ida(1);Waihira assina akordo tamba sira nain rua aceita kontiudo akordo ne.Se parte ida deit maka manan,karik la iha akordo ka la iha entendimentu husi sori rua.Situasaun reflekte waihira “Governo no Igreja Catolika “ida-idak mantem ninia posisaun,molok no depois Paskoa, to´o ikus Hirarikia Igreja Catolika organiza manisfestasuan nebe dura loron sanulu resin sia. Tamba ida-idak hakarak defende ninia “Status Quo”.

Rua(2); Iha akordo hotu-hotu manan,haknauk ho lia seluk dehan katak, husi parte rua hakiduk iha posisaun molok to´o akordo. Husi Governo RDTL hakiduk hodi simu “Relegiaun no Moral ne Obrigatorio”,maibe Governo mos hatou Klausula ida iha Akordo maka ne”Husik Inan no Aman maka decide ka lia ikus se hakarak sira nian oan tuir edukasaun Moral no Relegiaun”. Iha maka ne,obrigatorio iha kurikulum eskola nian maibe liberdade ba inan ho Aman maka determina se oan bele tuir kadeira ka mata pelajaran Relegiaun no Moral.

Tolu (3); Iha akordo ne iha pontus ida maka Igreja mos hatama tan materia hanesan “Aborto e Prostituição (Pelacuran,red)”, nebe dehan katak “ aborto no pelacuran “ konsidere krime ba se maka pratika tuir kodiku Penal RDTL nian iha aban bai rua. Iha pontu ida ne Vitoria bot ba Igreja Catolika no rekuo ida ba Governo RDTL. Tansaida?
Laos lia hun ba konflitus husi Igreja ho Governo husi sorin ida no husi sorin seluk, Materi nebe maka seidauk deskuti no polemika maibe hatama ona iha akordo.

Hat (4); Akordo ne ninia karakter politika do ke ninia natureza Juridika, tamba saida? Tamba estrategia Governo nian oinsa maka bele hakotu ho Manifestasuan nebe ninia prejuizo makas ba Governasaun no Imagem PM Marie Alkateri. Hakiduk hodi simu reivindikasaun (tuntan,red) husi Hirarkia Igreja Catolika nian no hodi hatama tan materia nebe maka polemika hanesan “Aborto no Prestituisaun ka Pelacuran” konsidere krimi iha Kodiku Penal Timor LoroSae nian.

Lima (5); Konsekuensia husi Manifestasaun nebe maka Hirarkia Igreja catolika nian maka iha mudansa iha PM Marie Alkateri ninia diskursu. Diskursu nebe maka molok aksaun nebe Hirarkia Igreja Catolika organiza PM sempre hatudu ninia diskursu nebe “Arogante no Teiomosia”,maibe oras ne hare PM ninia diskursu moderado hare deit “ Mensagen nebe PM hasae iha Segunda (09/05) nebe husu ba Inan no Aman sira nebe eduka oan sira nebe iha moral “, apelo ida hatudu katak Alkateri mos apreende buat ruma ho manifestasaun nebe hirarkia Igreja Catolika nian.

Nem (6); Mos iha Manifestasaun ne mos hatudu lisaun ida nudar cidadaun,hanesan iha PM Marie Alkateri ninia haktuir iha ninia mensagen katak “Semana tolu ne iha lisaun ba afirmasaun cidadania iha Timor LoroSae”. Manifestasaun nebe maka iha semana tolu nia laran lao pacifiku, nebe se situasaun nebe hanesan maka mosu iha rai sira foin Ukun Rasik An, liliu iha Afrika ka Amerika latina nebe karik mos bele provoka konflitus nebe bele lori ba to´o violencia fisika,maibe iha Timor ne la akontece. Hanesan haktuir Nuno pacheco iha Editorial Jornal Público (10/05): ”Que outro país,se não Timor, seria tal desfecho? “. Hatan ba Nuno Pacheco katak manifestasaun pacifiku ne tamba iha buat tolu:1) Husi sorin ida,papel Igreja Catolika nian,nebe nudar organizadora ba aksaun ne, Igreja catolika nebe maka ninia raizes instituisaun nebe kuda kleur ona iha Timor LoroSae kuandu kompara ho “Valor laicição do Estado nebe maka foin kuda”,neduni aksaun ne hatudu katak Igreja Catolika mos iha implementasaun forte iha Timor. 2)Husi sorin seluk,PNTL ninia aktuasaun nebe maka la provoka konflitus,neduni mos tenke parabens ba PNTL no ba ninia hirarkia. 3)Maibe hatudu katak dala ruma mos, desobidencia ba hirarkia estado mos hanesan faktor nebe maka garante ba pacificasaun iha manifestasaun ida ne, se PNTL maka kumpri Marie Alkateri ho Rogerio Loubato nia ordem hodi “Uja Gas Air mata no bubar Manifestantes ho força karik” bele provoka violencia,dala ruma ida ne mos dados foun ida ba sira be halo analise katak “Desobideincia ba ordem hirarkia estado nian mos dala ruma iha los tamba bele evite violencia”. Kasu konkretu maka Mniafestasun nebe Hirarkia Igreja Catolika organiza ne, tamba “Waihira PNTL la obdece ba ordem Marie Alkateri no Rogerio Loubato tamba hakarak evita konflitus ho Manifestantes”.

Hitu (7); Acordo ka Joint Declaration ne ninia natureza politika deit,tamba sei la iha kontiudo juridika ida,hanesan karik iha lian Português bolu «Acordo dos cavaleiros», Akordo ne hatudu katak husi parte rua “iha boa vontade” hodi hakotu ho manifestasaun. Ba Governo mos ba Igreja konflitus ne dada naruk bele lori impaktu ladiak ba Sociedade Timor nian. Ba Governo ho manifestasaun naruk tan prejudika liu ninia imagem, projekta hahalok ladiak husi Governo Marie Alkateri nian ba liur (Exterior,red) no ba laran (Povo Timor LoroSae). Ba Hirarkia Igreja Catolika dada naruk aksaun ne mos bele projekta imagem ne ladun diak ba liur mos ba laran.

Ikus liu,hatan ba kestaun iha Leten: Se Maka Manan ho Akordo Ne? Haknauk ba PM Marie Alkateri ”Povo maka manan (STL,05/5)”. Katak Povo Timor LoroSae maka manan ho acordo ne,povo Catolika nebe Hirarkia Igreja Catolika representa no Povo Timor-Leste nebe PM RDTL representa, sira ne maka manan! Haknauk ho lian seluk katak “Jogo de Soma Positiva”, husi parte rua manan hotu.