Tansa maka Igreja Católika Husu PM Demite?

Tansa maka Igreja Católika Husu PM Demite?

Liu ona semana ida maka hirarkia Igreja Catolika Timor LoorSae nian organiza manifestasaun hodi kontra ka hasoru “Projektu Ukun Fuan ka Lei nebe koalia konaba Relegiaun no Moral iha pedagogia ensino nian”. Nebe tuir Governo ne “Fakultativo” maibe tuir Igreja tenke “Obrigatorio ka wajib”. Ho motivo ida ne maka Igreja mos defende ninia posisaun,husi sorin Governo mos defende ninia posisaun tamba ne baseia ba Ukun Fuan Inan(UFI) Timor LoroSae nian.

Maibe iha semana ida ne nia laran, negociasaun husi parte rua,Igreja Catolika no Governo la hetan dalan ka la iha solusaun. Igreja Catolika liu husi Bispos nain ruan,Diocese Dili no Baucau,liu husi komunikadu husu atu PM Dr.Alkateri demite no husu ba Fretilin hodi nomeia fali PM foun hodi forma Governo foun (Lusa,25/4,Público,26/4). Iha komunikadu ne hatudu katak laos deit “Lian sakat Relegiaun ho Moral” maka serve hanesan argumentu hodi husu demisaun maibe situasaun real Timor LoroSae nian,maka problema “Socio-Economika, politika Governo nian, no seluk tan”. Iha ne Igreja Catolika alarga ka haluan tan sira nia kampo intervensaun politika,laos deit maka argumenta nebe hodi hahu konflitus maka “Relegiaun no Moral hanorin eskola”,oras ne Igreja mos koloka ona kestaun sira nebe maka afekta ba sociedade no desenvolvimentu ba rai Timor LoroSae nian. Assuntos sira nebe maka durante tinan tolu nia laran oposisaun no sociedade civil sira foti maibe Dr.Marie Alkateri ladun fo hanesan atensaun no ignora deit,la promove dialog,tamba Dr.Marie Alkateri konfia ho Maioria ka barak liu iha parlamento, neduni litik sira nebe maka oposisaun,sociedade civil no cidadaun anonimo sira hatou la fo hanesan importancia. Hanesan mos waihira hahu konflitus ho Igreja Catolika, Dr. Marie Alkateri ladun hatudu postura nebe maka hodi buka solusaun, maibe waihira Igreja Catolika mos demostra liu husi manifestasaun,lori sarani sira mai husi Parokia sira husi Diocese rua mai halibur malu iha Dili, halo tende hodi halo hanesan “Kemping” especie rekreasi gratis ida, tamba mobilisazaun ne mos implika kustus financeiro ba Igreja Catolika,nebe kuelker Partido Politika Oposisaun nian mos la konsegue iha kapasidade no poder hanesan Igreja iha hodi mobilisazaun massa ka sarani ba Dili.

Maibe iha hakerek ne mos hakarak buka hodi hatan,tansa maka Igreja Catolika husu PM demite husi nia cargo no husu Fretilin hodi nomeia fali PM foun no forma fali Governo foun. Uluk nanain buka hare tempo ka momentu nebe maka mosu hanoin konaba husu atu PM Dr.Alkateri sai husi PM. Kestaun koloka maka ne, se PM Dr.Alkateri maka iha posisaun forte karik, forte iha sentidu politika,hetan apoio makas husu CCF no CCF rasik la iha divisaun, Governo mos forte no sentido coesao (Alkateri ho Horta sintonia iha Diskurso), la iha fuga informasaun ba liur (waihira Konseilu Ministro foun decide buat ida seidauk aplika ka komunika maibe berita bocor ona,publik hatene ona), desekontentamente popular generalizada ba politika Governo RDTL nian. Hare ba faktus sira ne hotu “Igreja Catolika husu atu Governo no PM RDTL demite”. Hakanauk ba formula Sun Tzu liu husi nia obra «Arte de Guerra», katak “Waihira adversario fraku ka buka ataka estrategia inimigo nian, Destroe aliansa lawan ka adversario nian,Ataka tropa inimigo nian. (idem)pior taktika maka ataka inimigo waihira nia iha posisaun fortes”.
Baseia ba formula Sun Tzu nia “Igreja catolika husu demisaun PM Dr.Marie Alkateri nian,iha biban nebe katak Dr.Alkateri iha posisaun fraku(laos tamba la iha razaun) maibe ladun iha apoios suficiente. Igreja mos destruir aliansa no buka aliansa foun maka alarga ona kampo intervensaun laos deit ona “Funu ba introdusaun Relegiaun no Moral,maibe preokupa mos ho problemas socio-ekonomika,problema governasaun,no sst”.

Iha hau nia hakerek ida uluk konaba tema ida ne “Lu´Olo,Rogerio vs Igreja Catolika”, hau koloka kestaun rua: ida(1),Husu ba posisaun Prezidente Republika RDTL nian no rua (2), Igreja ninia posisaun, se waihira PM nebe aban bai rua ne Timor oan no Catolika,maibe nia mos defende saida mka Dr.Marie Alkateri defende dadauk!Saida maka Igreja Catolika ninia posisaun? Hare fila fali iha (http://forum-haksesuk.blogspot.com/2005/04/luolorogerio-vs-igreja-catlica.html,etsa@yahoogroups.com/group/ETSA/message/3537).
Liu tiha semana ida, foun mosu hanoin sira hanesan buat nebe maka hau hataou tiha ona. MNEC Dr.Ramos Horta “Dehan katak posisaun Igreja nian ne husu demisaun ba PM Dr.Marie Alkateri tamba nia Islam no laos Catolika (Radio Antena1,25/4,Público,26/4)”. Tamba ne maka waihira Igreja liu husi komunikadu husu demisaun PM Dr.Marie Alkateri, porta voz Governo RDTL nian maka Dr.Rui de Araujo, Ministro de Saúde no Catoliko maka hatan ba Igreja Catolika la “desrespeito ba UFI Timor LoroSae nian” no iha loron rua nia laran MNEC Ramos Horta maka sai hanesan defesa ba Governo ninia posisaun hodi ba ba dialog ho Bispos sira (RTP,Lusa,26/4).
Mos ohin (terça,26/4), representante legos sira nian husu Diocese rua,Dili no Baucau liu husi komunikadu “Husu intervensaun sr.Prezidente Republika,Xanana Gusmao (RTP,Lusa,26/4)”. Tamba hanesan hau nia hakerek ida uluk,tuir UFI Timor LoroSae nian Prezidente Republika tenke buka atua nudar mediador ba konflitus ida ne,laos soe fali kasu ne ba Governo no Igreja, tamba Prezidente Republika tuir UFI sai nudar «Arbitru ka wajit» waihira iha jogo ida arbitru tenke hu lolos atu labele iha konflitus, jogadores sira purada malu iha kampo laran,exemplo arbitru iha futebol nian lori ba iha kampo organizasaun politika konstitusional ita nia Prezidente Republika tenke buka sai hanesan mediador,arbitru hodi buka solusaun.

Nota Bene: Ramos Horta,MNEC haktuir ohin ba Jornal Público katak “Elementos husi Embaixada USA mos hola parte iha Manifestasaun”. Se ne los duni,saida maka USA hakarak tan iha Timor LoroSae?