Estado,Igreja no Concordata

Estado,Igreja no Concordata



Konseilu Ministru elabora ona korikum eskola nebe “mata pelajaran agama ka relegiao ne fakultaf maibe laos obrigatoria (wajib,red) (Lusa,22/02).
(idem) Karta pastoral husi Bispos Diocese rua ne hatan hodi kontra decisaun Konseilu Ministru nian.Maibe hatan ba Karta Pastoral Igreja nian, PM Marie Alkateri dehan katak ne halo tuir deit konstituisaun (lusa,22/02)
Husi PSD iha lian ida ho Igreja Catolica ninia posisaun,katak PSD sei la simu planu kuriklum Nasiona nebe maka Governu apresenta (STL,26/02).

Estado Timor ne estado moderno,neduni ninia principiu maka “Separasaun poder Estado husi Igreja no Laicisasaun Estado,ne maka principiu Estado moderno”. Governo no Konseilu Ministro ninia posisaun klaru,defende no kumpri ba Konstituisaun RDTL nian. Maske iha ne iha deklarasaun balun husi Partido politika Oposisaun nian favor ba posisaun Igreja Católica nian.Ne interpretasaun normal ba Partido Politika(PP) oposisaun nian ba decisaun governamental.PP oposisaun tenta lori problema “obrigatoriu ka fakultatif relegiaun ka agama ne tama iha kurikulem nasional”. Se PP oposisaun hatudu katak sira defende duni interesse nasional nebe base ba konstituisaun RDTL nian,kestaun koloka maka ne ba PP oposisaun:Hanorin Agama ka Relegiaun ida nebe lai?Se hanorin maka doutrina dogma igreja católica nian,relegiaun sira seluk?Fiar Lulik (relegiaun asli Timor nian fatin iha ka la iha),Igreja Protestante,Muslim,no sst. Igreja católica deit maka Timor ninia identidade Relegiosa? PP oposisaun ho “movimento pro-Não Laizição do Estado” bele hatan katak “95% Timor oan Católica”,hau hatan 99%Timor oan ne Fiar Lulik(Animista),maske sira Católica ka Protestante ka Muslim maibe sira fiar ka kumpri nafatin dever tuir fiar Lulik nian,halo tuir lisan. 95% Timor oan católica maibe laos praticante,no 90% emar católica Timor oan maka la hatene saida maka catolicismo ka Cristianismo. Laos doutrina dogma Igreja católica deit maka hanorin moral,maibe ita nia Fiar lulik sira no Lulik nain sira iha ita nia uma Lulik sira mos hanorin saida maka moral no saida maka etika.


Igreja Católica hakarak iha papel importante iha sociedade Timor nian. Tamba emar Timor barak liu maka iha Fé Cristao ka católica. Mos Igreja iha ninia partisipasaun iha procesu Funu ba «Independência» hanesan hetan rekonyecimentu husi Estado liu husi Ukun Fuan Inan ka Konstituisaun (artigo 11º). Maibe influencia makas liu waihira Igreja introdus iha kurikulum eskola nian,husi SD hanorin ona “relegiaun ka Agama nudar ensino obrigatorio maibe laos fakultativo hanesan governo liu husi konseilu Ministro ninia decisaun”. Iha materia ida ne Governo ninia klaru ona,hanesan dehan PM Marie Alkateri«Halo tuir konstituisaun». Maibe Igreja lakohi,hakarak Igreja nian maka:Hanorin doutrina Igreja Católica nian hatama iha planu kurikular hanesan mata pelajaran nebe obrigatoria ka wajib,laos hanesan iha planu Governu nian nebe mata pelajaran ka cadeiara agama ne fakultatif deit. Tansa maka Igreja hakarak “Cadeira ka mata pelaran Relegiaun ka Agama ne obrigatoria?”. Iha sorin ida, iha Ukun Fuan Inan (UKI) iha artigu 12º koalia konaba Estado ho Relegiauns sira, maibe iha UKI ne bele obriga interpretasaun “Pro no Kontra” konaba decisisaun Governo RDTL nian konaba materia ida ne, tamba iha ne “abstrato hela” la iha definisaun klaru konaba “Estado-Laico”, uja maka termo iha artigo 12º maka”Promover e Cooperar”, iha ne igreja mos bele koopere iha Edukasaun hodi promove ba “Desenvolvimento Nasional”. Sorin seluk, Governo no sira be pro “Estado-Laico” argumenta katak “Separasaun husi Igreja no Estado”, maibe iha ne tenke defini lolos saida maka Estado,estado maka ai-rin sira nebe hamutuk hodi hanaran Instituisaun Estado nian (Governo,Prezidente da Republika,Parlamento no Tribunal) ne maka dimensaun Makro Estado nian, familia sira, movimento iha sociedade civil sira ne pertence ba dimensaun Mikro Estado. Se hanesan ne “Igreja ne mos pertence ba Estado tamba tama iha kategoria ba dimensaun Mikro Estado nian” tamba Igreka católica nudar Instituisaun ida mos pertence no iha raizes iha Soceidade Timor nian. Tuir UKI nebe “Abstrato hela” no definisaun Estado husi Dimensaun Makro no Mikro, bele obriga interpretasaun husi Igreja Católica katak “Sira nia posisaun mos ho base ba UKI”.

Maibe Igreja Católica ninia hakarak oinsa maka doktrinasi gerasaun foun Timor nian ho hanorin igreja nian, do ke la obrigatoria bele iha aban bai rua (futuro,red) Igreja lakon influencia. Se “Relegiaun ka hanorin doutrina Igreja nian la hatama iha kurikulum nudar cadeira ka mata pelajaran nebe obrigatorio maibe fakultatif bele fo hanesan liberdade ba aluno sira hodi hili ka la hili.
Iha ne planu kurikulum Estado nian klaru ona,kumpri deit maka Konstituisaun. Maibe iha ne laos deit kumpri konstituisaun,maibe oinsa maka prepara gerasaun foun nebe maka bele iha aban bairua kontribui ho sira nia kualidade formasaun intelektual no humana ba desenvolvimentu Timor nian,neduni iha ne laos problema “cadeira relegiaun ka mata pelajaran agama ne obrigatorio ka fakultatif”,maibe ninia importante maka ne:Oinsa maka hanorin ita nia gerasaun futuro sai matenek,kritis,sistematika,metodologika,analitika. Hare ba realidade ne ho base ba iha racionalidade maibe laos ho base iha dogmatismo. Ba hau tuir lolos “Cadeira ka mata pelajaran sira nebe maka sai hanesan Obrigatorio maka:Filosofia,Sociologia,Matematica,Fisica,Quimica,Língua no Kultura,Biologia,ekonomia,no ramu Ciências Sociais no exacta sira seluk. Laos exklui relegiaun no moral bele sai hanesan Fakultatif,tamba hanorin Moral no relegiaun laos iha eskola deit maibe iha espasu sira seluk bele hanorin,hanesan liu husi katekese,liu husi familia,ne dever igreja nian. Foti hanesan experiencia:Iha kurikulum Indonesia iha SMP ba to´o SMA/SMU ladun hanorin “Ilmu kritik ka Ciência critica” hanesan:Filosofia,Sociologia,no seluk tan. Ninia konsekuensia maka ne waihira tama iha Universidade aluno ka Mahasiswa ninia kapasidade analitika ne ladun makas ka fraku,tamba ladun iha fundamentu iha ensino basico, tamba la hanorin “Ilmu kritis ka ciência Critica”.

Hanesan iha esperiencia iha rai sira “maioria católica” no infleuncia Igreja nia makas iha vertente socio-kultural, hanesan iha Republika Portugal, Estado ho Vaticano halo acordo ida naran Concordata.
Iha fase ida maka Igreja ninia Funu maka ne oinsa maka bele iha Acordo ida husi Governo RDTL ho Igreja Católica hodi assina “Concordata”. Mos husi Governo liu husi Vice-MNEC,Olimpio Branco dehan katak “Governo hakarak assina Concordata ho Vaticano (in Lusa,17/12/2004)”. Foti hanesan experiencia,rai nebe maka assina Concordata ho Vaticano maka Prtugal. Concordata Governo Portugal iha António Oliveira Salazar maka assina ho Vaticano,liu tinan lima nulu (50) hafoin halo fali revisaun ba Concordata iha tinan 2004. Concordata ne hatudu katak “Igreja católica iha papel importante no ninia influencia iha identidade socio-cultural Portuguesa nian”. Igreja iha papel prefiligiadu iha soceidade,hanesan Padre sira mos bele simu gaji husi Governo,Padre sira la selu imposto ka pajak. Maibe ho revisaun Concordata Padre no Madre sira nebe iha rendimentu ka pendapatan bele selu ona Imposto ka Pajak. Hanesan mos iha cerimonio Estado nian,Bispo Católica mos iha fatin iha hirarkia Estado nia sorin,hirarkia estado nian mate tenke ba tau iha Igreja tamba tuir lei maka obriga, maske Prezidente República ka Prezidente Parlmaneto Ateu ka la fiar Maromak maibe obrigatorio ba tau iha Igreja hodi kumpri ritual Católica nian. Dala ruma ho intensaun ida ne mos,Igreja iha papel importante no prefiligiado iha soceidade Timor nian,laos fatin ba tur deit ka mate ba tau iha igreja,maibe se iha juramentu ba kargo publiku ka estado nian tenke jura ho Biblia. Kestaun maka ne Jura ho Biblia ka ho Konstituisaun?

Maibe merece mos analisa tansa maka Vice-MNEC,Olimpio Branco halo deklarasaun katak«Governo pronto assina concordata». Se hare deklarasaun Vice-MNEC no decisaun nebe maka Konseilu Ministro foti ne hare hanesan kontraditoriu, tamba saida: Konseleiu Ministro ninia decisaun katak«Relegiaun ka Agama hanorin hanesan fakultatif deit maibe laos obrigatorio». Maibe waihira assina Concordata katak«Igreja católica iha fatin especial,mos hanesan hanorin Relegiaun ne mos obrigatorio ona». Deklarasaun Vice-MNEC ne representa Governo RDTL,tamba husi Hirarkia Governu nian, nia maka numeru dois iha MNEC (Ministerio dos Negocios Estrangeiros e Cooperação),husi sorin ida. Husi sorin seluk,perfil liderança Olimpio Branco nian,nebe fiel ba ulun bot sira,liliu fiel ba Marie Alkateri (husi Mozambique to´o iha Portugal tama to´o Timor) no fiel ba José Ramos Horta. Neduni lian ikus maka ne deklarasaun Vice-MNEC nian ne mos representa Governo ninia posisaun.

Iha UKUN Fuan Inan ita nian ne ladun defini didiak,tamba iha maka Estado deit maibe la hakerek « ESTADO LAICO«, neduni tenke defini duni katak Estado Timor ne «Repubblikano no Laiko», iha UFI ida oras ne bele fo margem mos ba Igreja halo interpretasaun los ba ninia posisaun. Neduni buka iha Revisaun Konstitusional ka Amandament Konstitusi hodi hatama termo hanesan «Estado Republikano no Laiko».