MENSAJEN PREZIDENTE-da-REPUÚBLIKA KONA-BA PARLAMENTO NASIONAL KANSELA VIAJEN PR BA VATIKANU

MENSÁJEN HUSI PREZIDENTE-DA-REPÚBLIKA BA POVU TIMOR-LESTE

Inan-aman-oan sira iha Timor-Leste tomak!
Maun-bin-alin sira!
Povu doben Timor-Leste!

Tuir kompeténsia ne’ebé hatuur iha Konstituisaun RDTL, ita-nia Lei inan, Prezidente-da-Repúblika mak Xefe Estadu Timor-Leste.

Xefe-de-Estadu Timor-Leste mak reprezentante públiku as liu Estadu Timor-Leste nian, iha rai-laran no iha rai-liur.

Hafoin Restaurasaun Independénsia, Prezidente RDTL tolu liubá, Sr. Xanana Gusmão, Sr. José Ramos Horta no Sr. Taur Matan Ruak, bá rai oioin hodi promove Timor-Leste no habelar relasaun ho Xefe-Estadu sira seluk no komunidade internasionál.

Relasaun internasionál ne’e importante tebtebes atu ita buka-hetan, ho rai sira seluk nia tulun, oinsá lori dezenvolvimentu ba oin no hamenus kiak no mukit iha ita-nia rai doben.

Ha’u hakarak hatutan lala’ok ida ne’e, iha ha’u-nia mandatu, nu’ udar Prezidente-da-Repúblika! Ho kbiit no fiar Povu Timor-Leste nian, ne’ebé ha’u hetan, liuhusi eleisaun prezidensiál, ne’ebé universal, livre, diretu, sekretu no pesoál, iha Marsu 2017.

Hare’e ba importánsia lori Timor-Leste ba mundu no lori mundu mai Timor-Leste mak ha’u, tuir Konstituisaun haruka, husu autorizasaun hosi Parlamentu Nasional atu aprova ha’u-nia vizita-de-Estadu ba Portugal no Vaticano no vizita-de-Traballu ida ba Nasoens Unidas no Indonézia/ segunda vizita, iha tinan 2018.

Horseik Parlamentu Nasional vota kontra dala ida tan ha’u-nia vizita ba rai-liur ho razaun katak Prezidente-da-Repúblika tenke rezolve uluk situasaun impasse iha rai-laran. Vota kontra ne’e mai ho forsa maioria nian, hosi deputadu tolu nulu resin lima hosi partidu CNRT, PLP, KHUNTO, UDT no Frente Mudansa.

Ba ita timoroan, Estadu Vaticano espesial tebtebes tanba iha signifikadu rua. Nu’udar Sidade-Estadu no nu’udar Santa Sé, sede Igreja Katólika nian.

Sua Santidade Amu Papa Francisco mak Xefe-de-Estadu no ukun Estadu Vaticano ho kbiit hothotu. Sua Santidade Amu Papa Francisco mak atuál Xefe Supremu Igreja Católika nian, iha mundu.

Ho onra no orgullu tebtebes mak ha’ u simu informasaun katak Estadu-Vaticano simu ha’u-nia pedidu atu hetan malu ho Sua Santidade Amu Papa Francisco. Enkontru ne’e atu realiza iha loron 23 Novembru, 10 horas. Tuir Nota Verbal no enkontru ho Monseñor Joseph Marino, Núnsiu Apostóliku ba Timor-Leste no , Vaticano marka mós enkontru ida entre Prezidente-da-Repúblika Timor-Leste ho Kardeal Pietro Parolin, Sekretáriu Estadu Vaticano nian, titular ba kargu hanesan ho Primeiru Ministru no mós Arsebispu Monseñor Paul Gallagher, titulár ba kargu hanesan Ministru Negósius Estranjeirus.

Tanba Parlamentu Nasional vota kontra vizita- Estadu ne’e, Xefe Estadu Timor-Leste lakon oportunidade atu konvida pesoalmente Sua Santidade Amu Papa atu vizita ita-nia rain, iha tinan 2019, tinan ida ne’ebé ita sei selebra aniversáriu data istórika importante rua:

- ida mak 12 Outubru, aniversáriu ba dala tolu nulu, Sua
Santidade Amu Papa João Paulo II vizita Timor-Leste;
- ida seluk mak 30 Agostu, loron aniversáriu Referendu
ba dala rua nulu.

Vizita Papa nian iha tinan 1989 dada liután atensaun internasionál ba Povu Timor-Leste nia terus no hasa’e liután apoiu ba ita-nia luta libertasaun nasional. Liuhosi dalan oioin, Igreja Katólika kontribui mós ba mobiliza no enkoraja Povu atu vota iha Referendu 1999.

Ha’u fó hanoin katak iha tempu rezisténsia, Igreja Katólika sai nu’udar komponente ida ba ita-nia rezisténsia kulturál.
Ha’u fó hanoin mós katak manifestasaun públika ba dahuluk, iha 12 Outubru1989, hafoin missa papá, iha Tasitolu, mak loke dalan foun ida, ne’ebé efetivu tebtebes, atu hato’o ita-nia luta ba komunidade internasional.

Konstituisaun RDTL rekoñese papel Igreja Katólika nian, iha ita-nia luta libertasaun nasional no, nune’e, órgaun soberania hothotu tenke hatuir ita-nia Lei inan.

Maluk sira,
Povu doben Timor-Leste.

Karik vizita-Estadu ne’e halo duni no Sua Santidade Amu Papa mai Timor-Leste, ha’u fiar katak vizita rua ne’e sei hasae liután forsa espirituál maioria Povu nian no hametin no haburas liután relasaun Timor-Leste nian ho Santa Sé no Estadu Vaticano.

Ha’u fó hanoin mós katak, iha 14 Agostu 2015, Primeiru-Ministru Timor-Leste no reprezentante Vaticano assina Konkordata, iha Dili. Tratadu internasional ne’e refere ba ámbitu espirituál no mós ba edukasaun, solidariedade no fó asisténsia ba vulnerável sira. Liuhosi Akordu ne’e, Estadu Timor-Leste rekoñese ezisténsia no direitus Igreja Katólika no katóliku sira-nian, iha Timor-Leste.
Parlamentu Nasional, liuhosi Rezolusaun n. 18/2015, ratifika Konkordata ne’e iha 26 Outubru 2015 no, Jornal Repúblika publika Rezolusaun ne’e, iha 11 Novembru 2015.

Órgaun soberania ida-idak tenke onra kompromisu ne’ebé Estadu Timor-Leste asume ho Konkordata ne’e. Prezidente-da-Repúblika hakarak tebtebes onra Estadu nia kompromisu boot ida ne’e . Tanba ne’e mak husu ba Parlamentu Nasionál atu fó autorizasaun ba Prezidente Repúblika atu bá Vaticano.

Maibé Parlamentu Nasional, ho forsa deputadu tolu nulu resin lima, hosi partidu ne’ebé ukun ohinloron, fila kotuk ba vizita-de-Estadu ne’ebé importante tebtebes ba:

- Maioria katóliku, namkari iha Timor-Leste tomak no
- Estadu Timor-Leste tomak.

Prezidente-da-Repúblika lamenta tebtebes ho desizaun maioria AMP nian iha Parlamentu Nasional, hodi halakon oportunidade di ‘ak ida ne’e.

Ikus liu Prezidente-da-Repúblika mós manifesta ninia sentidu solidariedade ba fiar-nain husi konfisaun relijioza sira seluk, iha Timor-Leste, ne’ebé hatudu sira-nia espíritu solidariedade ba Prezidente Repúblika nia misaun, nu’udar Xefe-Estadu no Prezidente ba Povu tomak.
Istória universál hateten katak Faraó hodi nia fuan toos, la husik povu Israel bá Terra Prometida. Maibé, to’o ikus, Faraó rasik monu ho nia fuan toos.

Viva Timor-Leste.
Obrigadu!

Palásiu Prezidensiál Nicolau Lobato, 6 Novembru 2018

Fonte:Web Presidencia da Republica
    http://presidenciarepublica.tl/?lang=pt-pt