PM Mari Alkatiri: Unidade hametin soberania liu husi demokrasia

Primeiru-Ministru Dr. Marí Alkatiri iha abertura Kongresu Dahitu RENETIL

S.E. Primeiru-Ministru Dr. Marí Alkatiri hala’o abertura ba Kongresu Dahitu RENETIL (Resistência Nacional Dos Estudantes De Timor-Leste) nian ho tema “Revitalizasaun Papél RENETIL hodi hametin Soberania Estadu no Povu”, Centro das Convenções de Díli, 15 Marsu 2018.

Primeiru-Ministru molok hala’o abertura ba Kongresu hato’o ninia mensajen importante hodi hatete Kongresu ida ne’e ho nia tópiku atuál tebes, bainhira ita dehan hametin soberania maibé antes atu hametin tenke konkista, ita tenke manán uluk soberania depois mak ita hametin soberania.

RENETIL moris iha 1988 para atu hatutan tan luta foun hodi tama iha Frente foun ida mak Frente Indonézia nia let. Importante ita haree koensidensia bainhira Rezisténsia husi liur no rezisténsia militár komesa sente katak avansa iha luta militár susar tebes entaun loke tan frente ida mak frente externa mak Timor-Leste iha liur i interna tanba iha ligasaun bot ba Timor-Leste. RENETIL rasik mosu iha 20 juñu 1988. Bainhira ita nia estudante sira ke hahú hetan oportunidade estuda iha Indonézia ho objetivu la’ós atu transfere luta ba Indonézia maibé obejetivu atu manán ita nia joven sira para atu defende interese integrasaun nian, esplika Primeiru-Ministru kona-ba ezisténsia RENETIL nian.

Kapasidade i sentidu patriótiku rezisténsia tomak nian ke tranfere ba ita nia joven sira, halo ita nia joven sira foti inisiativa ida ke di’ak harii RENETIL iha Indonézia nia hussar ka sentru. Tempu ne’ebá hotu-hotu iha Unidade i Asaun ida siginifika hotu-hotu tenke hamutuk no ho asaun ida signifika kontra inimigu.

Iha tempu funu iha inimigu tanba ne’e mak ita tenke define didi’ak katak ita presiza unidade atu halo asaun kontra inimigu maibé ita haree momoos bainhira ita fila fali ba 1999 to’o ohin loron ita haree de’it ba salaun ne’e ita haree membru RENETIL balu partidu ida balun seluk partidu seluk, seluk fali laiha partidu signifika katak ho demokrasia Unidade RENETIL manten. Hotu-hotu iha unidade atu hametin soberania atu hametin soberania liuhusi dalan demokrasia, ne’e mak ita haree membru RENETIL sira espalla iha fatin hotu-hotu no ita bele dehan katak ida-idak ho nia opsaun maibé ninia uma mak RENETIL ne’e fatin ida ke bele halibur sira nafatin.

Tanba iha tempu demokrasia mak ida ne’e duni ita ida-idak tuir nia dalan para atu hanoin ho Liberdade, atu atua ho Liberdade ho objetivu atu kontribui ba patria ida ke demokrátika no estadu de direitu.

Bainhira nasaun ne’e presiza ita hatene iha ne’ebé mak ita bele tur hamutuk no la’o hamutuk ba to’o iha ne’ebé sempre buka atu inklui ema hotu.

Ohin loron ita nia asaun la’ós atu kontra inimigu maibé ita hotu hamutuk atu hala’o dezenvolvimentu no ita hamutuk para lori dezenvolvimentu mai rai ida ne’e.

Primeiru-Ministru akrestenta tan katak foin lalais ita manán tan luta ida ke importante tebes dala ida tan Xanana Gusmão lidera iha negosiasaun i lori Fronteira Marítima. Agora ita presiza fó prioridade bot atu proteje ita-nia fronteira marítima no ita nia territóriu soberania Timor-Leste nian. Se ita nia Fronteria Marítima ita lakonsege proteje no lakonsege defende entaun aban bainrua ita mak sala bainhira tráfiku oioin, droga ka kilat ka liuhusi ita nia rai ita mak sala tanba ne’e ita tenki aumenta kapasidade F-FDTL no PNTL nian hodi kontrola ida ne’e. Liutan ida ne’e ita mós tenke hamutuk ho konsensu nasionál ida atu trata kestaun dezenvolvimentu riku soin iha ita nia Fornteira Marítima.

Ha’u fiar ita sei konsege ida ne’e, ami hahú hamutuk no iha dalan klaran ami bele la la’o hamutuk mas to’o rohan ami sei hamutuk fila fali. Dehan Primeiru-Ministru. Tanba saida mak ha’u hakarak ba povu ida hanesan saida mak Xanana hakarak, hanesan saida mak Taur Matan Ruak hakarak saida mak ami hotu hakarak mai ita de’it atu hasai povu ida ne’e husi mukit no ki’ak, atu hasai povu ida ne’e husi nakukun. Uluk dehan bele lakon títulu maibé manán Pátria, agora manán Pátria ona no ita mós tenke iha títulu.

Tanba ne’e importante tebes para atu lori dezenvolvimentu ba rai ida ne’e ba ita bot sira no ita bot nia oan sira, ba ha’u nia bei-oan sira maibé tenki matenek liu ha’u no tenke hatene liu ha’u.

Se la matenek liu susar tebes atu ita dezenvolve rai ida ne’e no dezenvolvimentu mai ho matenek la’o mai de’it ho rekursu finanseiru. rekursu finanseiru iha maibé laiha matenek dezenvolvimentu sei la avansa.

Parabéns ba RENETIL iha VII Kongresu no ha’u kontente tanba VII Kongresu RENETIL ne’e akontese iha VII Governu Konstitusionál, Primeiru-Ministru hakotu lia ne’e no halo komik.

Fonte: Mídia GPM