VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
Bloku Unidade Popular Associação Popular Monarquia Timorense Kmanek Haburas Unidade Nasional Timor Oan Partido Esperança da Pátria Partido Socialista de Timor Partido Desenvolvimento Popular Congresso Nacional para a Reconstrução de Timor-Leste Partido Republicano União Democrática Timorense Partido Democrata Cristão Partidu Movimento Libertasaun Povu Maubere Partidu Libertasaun Popular Partido Democratico União Nacional Democrática de Resistência Timorense Partido Unidade Desenvolvimento Democrático Partido Timorense Democratico Frenti-Mudança Partido Social Democrata Centro Ação Social Democrata Timorense Partido do Desenvolvimento Nacional Frente Revolucionaria de Timor-Leste Independente
Securing our maritime rights will the end of Timor Leste’s long struggle for sovereignty. We will then finaly be able to enjoy, in peace and dignity, the rich and beautiful seas that are rightfully ours.

Just as we fought so hard and suffered so much for our independence, Timor-Leste will not rest until we have our sovereign rights over both land and sea.

Xanana Gusmao
29 August 2016
TIMOR-LESTE


Interview with
Fernando Lasama de Araujo: On the road to democracy, where the streets have no name

 
 
   

segunda-feira, 5 de fevereiro de 2018

“Lia-Los sei naburas husi rai no Justisa sei naturun husi Lalehan” (“Defesa de Honra” husi “Sacerdote Catolico” ida iha Tribunal Distrital Dili nia oin)

 Lia-Los sei naburas husi rai no Justisa sei naturun husi Lalehan
(“Defesa de Honra” husi “Sacerdote Catolico” ida iha Tribunal Distrital Dili nia oin)


Martinho G. da Silva Gusmão


O amor e a fidelidade vão encontrar-se. Vão beijar-se a justiça e a paz. Da terra vai brotar a verdade e justiça descera do céu. ... A justiça caminhara diante Dele e a paz, no rasto dos seus passos (Salmo 85, 11-12. 14).

Iha 26 de Maio tuir mai 6 de Outubro 2017; hatutan to’o 9 de Janeiro no 2 de Fevereiro 2018, Tribunal Distrital Dili (TDD) halo julgamento ba eis MOP Eng. Gastã Francisco de Sousa ho nian oan sira, nia chefi gabinete no hatama hotu há’u ho acusação nune’e: “O arguido Martinho Gusmão cometeu por cumplicidade material: a) Um crime de administração danosa, na sua forma continuada, p. e p. pelo arto. 274o n.os 2 e 3, por referencia ao no. 1, do mesmo artigo, arto. 41o e 34o, todos do Código Penal (em cumplicidade com o arguido Gastão de Sousa).

Caso simples ida – wainhira halao festa bicentenário (tinan 200) Santo Antonio sai mahein ba Manatuto, paroquia de Santo Antonio Manatuto husu ajudos ba Governo. Hanesan mos festa tinan 500 Portugues tama iha Timor, no Igreja Catolica moris iha rai ne’e, Estado fo tulun barak (iha Oe-Cusse, osan fakar tokon ba tokon, sosa ro-ahi sosa avião, maibe la iha krime). Nu’udar pároco, há’u hato’o pedido ne’e ba PM Kay Rala Xanana Gusmão, wainhira nia ba halo visita ida iha Manatuto. Há’u husu atu iha karik kareta, Paroquia Manatuto hakarak tuir leilão atu sosa netik ida. Maibe, dehan seidauk iha. Nune’e, Xanana Gusmão buka tutan fali ajuda hodi husu ba MOP atu “empresta” lai kareta ida atu bele acelera preparação ba festa religiosa no cultural. Há’u nunca husu direitamente ba MOP Gastão de Sousa atu fo empresta kareta Kijang Innova TLS 19-754. Festa hotu, careta hau entrega hikas ho condição óptimo ... la at buat ida; la rahun – há’u la fokit sai AC ka gravador hanesan partido nia ema sira halo iha governo ka parlamento laran.

Ikus fali liafuan mai husi anin to’o há’u nia tilun dehan katak kareta ne’e tama ona iha processo investigação Comissão Anti-Corrupção (CAC). Há’u surpresa: iha mundo ne’e so Timor de’it mak bele foti processo bo’ot ba caso ki’ik ida. Há’u la tauk no la hakfodak. Há’u rona hikas fali lian husi loriku aswain balun iha CAC nia laran, katak, la iha indícios sa tan motivo atu bele considera nu’udar corrupção. Nune’e, CAC haruka hikas dossier ba Procuradoria Geral da Republica (PGR) atu arquiva (rakatiki) tiha caso ida ne’e.

Maibe, ikus mai Ministério Público (MP) hanoin katak caso empresta kareta ne’e tenki loke hikas. Nune’e, husi Gabinete de Combate à Corrupção e Criminalidade Organizada (GCCCO), há’u nia caso loke hikas ba investigação.

Logica do delito”: Oinsa mak criminaliza há’u!

Liu husi investigação iha minuto 30 hanesan ne’e (iha Julho 2016), há’u nia sala mak hahu nune’e: “O arguido Martinho Gusmão, mesmo sabendo que a viatura e os serviços solicitados eram património do Estado, não se coibiu em contribuir para a verificação do crime, aproveitando-se dos seus resultados, em beneficio próprio” (= arguido Martinho Gusmão hatene hela katak kareta no tulun ne’ebe nia husu ne’e sasan Estado nian, la buka atu hatene lolos buat ne’e krimi, aproveita los husi buat hirak ne’e ba ninia di’ak rasik).

Molok ida ne’e MP hateten uluk ona katak “O arguido Martinho Gusmão exercia à data dos factos e continua a exercer as funções de sacerdote católico, na paroquia de Santo António no Município de Manatuto” (= arguido Martinho Gusmão hala’o ninia knar to’o loron be mosu facto ne’e no hala’o nafatin ninia knar nu’udar na’ilulik katoliku iha parokia Santo Antonio, iha Municipio Manatuto nian). Ne’e duni, wainhira Juiz sira iha TDD dehan katak “labele tau batina” iha processo julgamento, há’u rejeita. Há’u husu explicação konaba liafuan hirak ne’e, maibe TDD dehan F-FDTL no PNTL mos la tau farda. Ikus mai, há’u hatan katak TDD halo lai procedimento foun tuir artigo 19o ho 20o husi Concordata 14 Agosto 2015 ne’ebe Santa Sé no Estado Timor-Leste assina hamutuk ona (Resolução do Parlamento Nacional n. 18/ 2015, 11 de Novembro). Há’u hare, MP no TDD la hatene ka lakohi hatene. Sira taka matan de’it mak foti processo ne’e hasoru há’u.

Husi MP/GCCO nia liafuan hirak ne’e, há’u koko atu hatur ninia “lógio do delito” (nalar kejahatan), dalan ba to’o hahalok crime nian:
1)    Acusação ba há’u nu’udar “sacerdote católico”, ne’ebe halo crime ida wainhira hala’o hela knar nu’udar pároco Manatuto. Crime ne’e mak “empresta” kareta no husu tulun sasan husi Estado! Iha há’u nia moris tomak, ida ne’e mak ba dala uluk há’u hatene katak ita ba “empresta” no husu tulun, hotu tiha fo hikas fali ne’e bele sai crime fali.

2)    Maski hatene hela katak sasan (viatura; kareta) be há’u “solicitado” (há’u empresta de’it) ne’e Estado nian, maibe dehan katak há’u “não se coibiu em contribuir para a verificação do crime ...”! Há’u la compreende tan sa mak há’u ba fali halo “verificação do crime”, wainhira há’u nia intenção mak husu ajuda! Moral ho educação lolos nian la hanorin ema atu ba husu tulun, maibe buka tuir ema nia crime. La iha!

a.     Há’u sani iha CRDTL katak tribunais e magistratura judicial mak iha função nu’udar “órgão de soberania com competência para administrar a justiça em nome do povo” (artigo 118o n. 1). Nune’e mos código processo penal no código processo civil, há’u hatene oituan katak Tribunal mesak de’it mak iha poder atu halo processo “verificação do crime”. Iha sistema ida ne’e nia laran, temi de’it Ministerio Público ka Procuradoria Geral no Defensor sira. Há’u “sacerdote católico” ida, la iha competência atu bele halo “verificação do crime”.

b.     Há’u hatene katak Ministro Gastão de Sousa ne’e membro governo ida. Governo Timor-Leste ne’e la’os banda criminal ida, maibe órgão soberano no constitucional. Nia foti juramento nu’udar Ministro iha V-VI Governo nian iha Presidente da Republica nian oin, Presidente no Membro Parlamento sira nia oin, Presidente Tribunal de Recurso no Primeiro Ministro, ho Corpo Diplomatico sira nia oin. Ne’e “evidencia” bo’ot ida, no há’u lalika ba halo “verificação” buat ida se Senhor Gastão ne’e halo crime ka lae. La iha cidadão ida mak bele desconfia tiha governo, depois ba halo “verificação do crime”. Sasan hotu Estado nian ne’ebe Ministro ida kaer, ne’e ninia direito legal tuir lei orgânico governo nian. La iha ema ida mak bele ba halo “verificação do crime”.

c.      Husu tulun ba governo, la’os indicio ba hahalok criminal. La iha Estado Democrático ida iha mundo rai klaran ne’e mak considera katak cidadão ida mai “solicita património do Estado” bele tama iha hahalok crime. Fascista, comunista no ditadura sira mos la halo ida ne’e! Salazar no Soeharto mos lae! Ne’e primeira vez iha há’u nia carreira nu’udar docente senior ona, há’u hatene katak MP bele halo acusação hanesan ne’e. Nu’udar docente senior iha área ética filosófica ka filosofia moral, há’u hanorin ba há’u nia aluno sira katak Estado ninia “virtude institucional” (Estado ninia moralidade), mak atu halo ninia cidadão bele moris di’ak, isin no klamar nian.

Nune’e, CRDTL hakerek katak Estado Timor-Leste ninia objectivo ida mak “promover a edificação de uma sociedade com base na justiça social, criando o bem-estar material e espiritual dos cidadãos” (CRDTL artigo 6o alínea e). Tan ne’e, wainhira “sacerdote católico” ida husu tulun ba Estado, ne’e hanesan halo “cooperação ..., que contribuem para o bem-estar do povo de Timor-Leste” (CRDTL artigo 12o n. 2).

Saida mak há’u no sarani sira Manatuto halo iha festa Bicentenario (1815-2015) ba Santo Antonio ne’e mos hanesan “bem-estar material e espiritual dos cidadãos”. Se Dr. Mari Alkatiri (muçulmano ida) halo iha Oe-Cusse la’os crime, tan sa há’u (católico ida) halo iha Manatuto ba sai fali crime? Há’u husu justiça no verdade!

Iha Código de Direito Canónico (CDC) hatur ona dever sagrado ida ba “sacerdote católico”, katak, “287§1. Os clérigos promovam e fomentem sempre e o mais possível a paz e a concórdia entre os homens, baseada na justiça” (Na’ilulik sira hamoris no haburas di’ak liu tan ba damen no ema tomak bele simu malu, hatur iha justiça nia laran).

Husi CRDTL no CDC ne’e mak Estado Timor-Leste ho Vaticano celebra concordata hodi hametin cooperação entre Governo Timor-Leste no Igreja Católica iha Timor. Iha neba dehan “A Igreja Católica e a República Democrática de Timor-Leste reafirma que, cada qual na sua própria ordem, são independentes, soberanas e autónomas, e ambas se comprometem, nas relações reciprocas, a respeitar plenamente tal principio e a colaborar mutuamente para a promoção integral do homem, na justiça, na paz e no bem comum”.

Ho liafuan badak: saída mak PM Kay Rala Xanana Gusmão no MOP Gastão F. de Sousa halo ba “sacerdote católico” ida ne’e hanesan “comprometeram”, “colaborar mutuamente” atu halo promoção integral ba ema nia moris, ba justiça, ba damen no moris di’ak Timores nian. Tan sa mak há’u ba fali halo “verificação do crime”?

d.     Hare husi CRDTL no CDC há’u hanoin hela aat tebes ba Estado no Igreja Catolica wainhira “sacerdote católico” ida ba halo fali “verificação do crime” ba Ministro ida. Atu corruptor ka assassino ida mak mai confessa ninia pecado ida ba há’u, mos nu’udar “sacerdote católico” ida há’u la iha poder atu ba halo “verificação do crime”. “Sacerdote” fo de’it absolução ba pecador ida, no fo hanoin ba nia atu labele halo pecado tan. To’o iha ne’e de’it; la liu tan! MP labele obriga há’u atu hakat liu limite no fronteira nu’udar “sacerdote católico” atu hatudu hahalok hanesan ne’e. Ida ne’e bele tau iha causa integridade moral Igreja Católica nian. Iha Timor-Leste ne’e la iha “sacerdote”, nem Bispo ka Nuncio Apostolico, mak bele halo “verificação do crime”, wainhira Ministro ka naran ema ida confessa hotu nia pecado. Se MP criminaliza há’u tan “não se coibiu em contribuir para a verificação do crime ...”, há’u haksolok tebes! Há’u sei orgulho tan MP criminaliza há’u ba “não ... contribuir”.

Nu’udar Timores, MP haluha ka la hatene historia Timor-Leste wainhira luta iha rai laran. Historia hatudu katak Bispo Belo no Padre sira simu “viatura” husi ABRI ka Governo Indonesia nian, maibe usa fali ba “beneficio próprio”, tula material funu nian ba FALINTIL no subar “clandestina” sira. Ne’e “crime grave” hasoru Estado Indonesia. Maski nune’e, Bispo no Padre sira “não se coibiu em contribuir para a verificação do crime” ba guerilheiros FALINTIL ka “clandestino” sira! Exemplo bo’ot liu mak wainhira padre no bispo sira subar Kay Rala Xanana Gusmão, Taur Matan Ruak, Lere Anan Timor, Lu-Olo, Falur Rate Laek, no seluk tan iha residência nia laran. Los kedas katak “sacerdote católico” sira ne’e hatene katak ema sira ne’e mesak “gerombolan pengacau keamanan” (GPK), maibe sira la halo kedas “verificação do crime”. Ba Meritíssimo Juiz colectivo há’u dehan katak há’u labele duni halo “verificação do crime”, tan há’u labele loke ema nia crime iha publico. Principio iha Igreja Catolica katak “salus animarum suprema lex”. Di’ak liu há’u salva pecador ida nia moris no nia klamar, do que atu sai herói loron-mean boot há’u lori ema ida ba Tribunal tan há’u halo ona “verificação do crime”.

MP labele lasu há’u atu ofende soberania Estado Timor-Leste nian no dignidade Igreja Catolica nian. Justica labele tau sala ba buat ne’ebe los, no hanoin fali justo ba buat ne’ebe sala! Tuir CRDTL “É garantida a objeção da consciência” (artigo 45o n. 3). Nune’e tuir há’u nia religião no moral católica, há’u bele rejeita atu halo “verificação do crime” ba Senhor Gastão de Sousa. CRDTL mos protege há’u. Há’u la hatene se doutor jurista sira mai husi Maputo bele halo buat ne’e! Maibe, Timor oan labele halo ba timores.

e.      Nu’udar Timor oan, há’u nia educação la permite atu ita ba husu tulun ka “empresta” ema nia sasan, ho intenção atu halo “verificação do crime”. Ita Timor ne’e wainhira ba husu tulun ka empresta, ita hatene katak ema ne’e laran di’ak no laran luak. Maski nia sala nain, maibe ita buka hare tuir ema nia di’ak. Obriga há’u atu justifica hahalok “verificação do crime” ne’e hahalok mal-educado; la iha civilização ka mal costume!

3)    MP to’o dehan katak há’u “... aproveitando-se dos seus resultados, em beneficio próprio”. Tuir buat ne’ebe há’u hatene, Codigo Processo Penal hatur ona konaba “Admissibilidade dos meios de prova”, hau hare katak MP la halo “As inspeções ao local do crime” (CPP artigo 116o n. 4). MP la ba hare iha fatin oinsa mak há’u usa careta ne’e! MP taka matan no taka néon hodi acusa katak há’u aproveita careta ne’e ba há’u nia “beneficio próprio”. Programa bicentenário ne’e Presidente da Republica Taur Matan Ruak ba tuir, membro Parlamento Nacional nian balun, no Governo (Primeiro Ministro no Ministro), PNTL no F-FDTL nia boot sira mos ba tuir hotu, Núncio Apostólico, Bispo sira (inclui Bispo husi Larantuka, Indonesia), padre no madre sira husi paroquia seluk, sarani sira Manatuto-anan iha Timor no husi Indonesia. TVTL no RTL ho jornalista sira mos ba halo cobertura! Oinsa mak bele defini “beneficio próprio” katak hau usa duni viatura nee ba “interese privadu” (hanesan Timor Post 30 Maiu 2017 hakerek)?

Há’u mos informa ba Meritissimo Juizes colectivo, katak, há’u husu tulun barak husi entidade barak. Ajuda sira ne’e tau hamutuk, sai barak duni. Maibe, há’u nia consciência moral la fo sala ba há’u wainhira ita ho fuan no laran di’ak husu ema nia tulun. Tuir moral católica nian, hanesan mos Biblia dehan “Husu ba, ema sei fo buat ruma ba o; buka ba, o sei hetan; dere odamatan ba, ema sei loke odamatan ba o. Tan ema ne’ebe husu ema seluk sei fo, ema ne’ebe buka nia sei hetan; no ema ne’ebe dere odataman, odamatan sei nakloken ba nia” (Mateus 7, 7-8; Lukas 11, 9-10). Ne’e duni, buat ne’ebe tuir moral mak furak tiha, tan sa mak tuir lei sai fali crime ne’e mos bele?

4)    Ida ikus liu, MP hatur iha neba katak crime administração danosa ne’ebe Ministro halo ne’e iha provas tan “por confissão do arguido Martinho Gusmão”. Nia logica iha ne’ebe? Há’u mak fo “prova” katak sira comete crime administração danosa? Buat ne’ebe MP husu ba há’u iha inquérito mak kona de’it ba Kijang Innova TLS 19-754: konaba processo imprestimo no despesa ba manutenção! Konaba buat seluk iha MOP nia laran, há’u la hatene. Halo nusa mak MP bele acusa sira seluk ho há’u nia “confissão” de’it? Afinal iha processo ne’e há’u “clarifica” de’it katak há’u empresta duni Kijang Innova TLS 19-754, lori ba oficina atu troca roda (osan hira há’u la hatene) no hasai há’u nia osan rasik ba combustível. Agora há’u sai “arguido” ne’e se mak fo “confissão” fali? Nune’e, há’u foti conclusão katak MP ninia alvo mak oinsa bele atingi há’u – “os fins justificam os meios” (tujuan menghalalkan segala cara). Iha ne’e há’u hare katak iha ema ruma mak hakarak halo “perseguição”, “insinuação” no “calunia” ba há’u. Iha “provas” ne’e Senhor Gastão de Sousa no Senhor Diogo da Costa la mosu!

“Crime da Administração danosa”

Hanesan acusação hatur ona: “O arguido Martinho Gusmão cometeu por cumplicidade material: a) Um crime de administração danosa, na sua forma continuada, p. e p. pelo arto. 274o n.os 2 e 3, por referencia ao no. 1, do mesmo artigo, arto. 41o e 34o, todos do Código Penal (em cumplicidade com o arguido Gastão de Sousa).

Há’u le fila ba fila mai acusação ida ne’e, no há’u tetu mak há’u nia Português la sala karik, buat nebe hau compreende katak
1)    Administração danosa ... em cumplicidade” mosu wainhira ministro Gastão de Sousa lori hau atu ami tama hamutuk ba ninia ministério rasik hodi estraga sasan ka infração dolosa konaba regra ruma administração iha ninia gabinete. Ho respeito tomak ba sede justiça ida ne’e, há’u hanoin katak há’u nu’udar “sacedote católico” ho há’u nia sarani ida naran Gastão de Sousa ne’ebe mos Ministro V-VI Governo Constitucional ida, iha duni capacidade intelectual suficiente atu la halo cumplicidade beik ida hanesan ne’e!

Ho kakutak oituan no matenek oituan ne’ebe há’u no Maun Gastão iha, ami la halo ignorância atrevida ida ne’e. Há’u ba duni atu assina surat “termo de entrega” (empresta). Indonesia karik dehan, “hitam di atas putih”. To’o loron há’u usa hotu tiha, há’u entrega hikas kareta Kijang Innova TLS 19-754 ho condição di’ak hotu. La at buat ida. Nune’e mos há’u assina hikas surat ida hodi hatudu katak há’u la kaer ona kareta ne’e, no la rai hela iha Paroquia. Oinsa mak bele justifica hahalok ne’e nu’udar “administração danosa ... em cumplicidade”?

2)    Administração danosa” bele mos significa, katak, kareta Toyota Kijang Innova TLS 19-754 nebe hau lori sai ne’e, chave hau foti de’it no halai lakon nonok mak policia kaer toman iha dalan. PNTL iha Manauto ka Dili la kaer há’u iha dalan tan lori halai Governo nia kareta. Lae! Sira mos la ba halo “busca”, sa tan “prende”.

Wainhira MP husu konaba kareta Kijang Innova TLS 19-754, há’u hatan katak hau mak empresta duni atu usa ba preparação festa Bicentenário Santo Antonio iha Paroquia Manatuto. Há’u la sente sala buat ida, wainhira há’u husu tulun ba Governo ka ba ema ruma! Nu’udar Timor oan, há’u husu tulun duni ba há’u nia Estado. Ne’e legal no legitimo.

3)    Administração danosa” mos há’u intende katak, funcionário sira iha ministério nia laran la hatene, ka, sira hare hau lori lakon kareta nebe tuir lei (juridicamente) hamosu dano. Sira hatene, tan, sira iha ministério nia laran conhece momos há’u no hatene momos kareta ne’e. Sira la hateten netik ka bandu, ka haruka PNTL “prende” kareta Kijang Innova TLS 19-754 ne’e.

4)    Administração danosa” mos bele dehan há’u hamosu ona despesa boot, nune’e ema hotu bele hare katak hau hakat liu ona “risco permitido”. Exemplo, há’u sosa ro-ahi no sosa avião ka halo monumento hodi gasta US$ 5-10M (5-10 juta dólar), depois la halo relatório, hanesan Oe-Cusse. Maibe, há’u nunca rona sa tan hare, MP halo “verificação do crime” ba festa tinan 500 iha Oe-Cusse: osan, kareta, ro-ahi no avião.

Konaba kareta Kijang Innova TLS 19-754 ne’e, MP husu konaba gastus ruma ne’ebe há’u hetan husi MOP? Há’u hatan: há’u husu duni manutenção ba kareta ne’e. Osan hira? Há’u la hatene. Ikus mai, MP dehan katak US$ 532,35 (quinhentos trinta e dois dólares e trinta e cinco centavos). Maibe, Ministro rasik mak dehan, manutenção hotu sei tama iha MOP ninia conta. No há’u hare katak tuir Decreto Lei n.o 32/ 2008, de 27 de Agosto (liu-liu artigo 39o), saída mak há’u husu ne’e la sala!

Husi buat sira ne’e hotu, há’u la hare didi’ak saída mak hanaran “cumplicidade” ne’e! Há’u nia português mak la los karik.

Politika “Criminalização” ba Partido Democratico

Há’u buka tun sae informação tan sa mak iha CAC la hetan “provas”, maibe mosu fali iha MP/GCCO, há’u bele sala. Pergunta be mosu iha há’u nia ulun laran: tan sa Sr. Ministro Gastão de Sousa mak halo “crime de peculato e de administração danosa” ida iha ninia ministério laran, hau mos sala hotu tan “cumplicidade”? Tan sa iha “provas” la’os ema seluk mak halo “confissão” maibe tula ba “sacerdote católico” ida nia leten atu halo Ministro ida sai arguido no “sacerdote católico” ne’e mos sai hotu arguido?

Ninia resposta, Ana Pessoa mak halo queixa ida hodi hakerek nune’e: “É pública, a simpatia deste cidadão pelo partido político em que milita o Ministro Eng. Gastão de Sousa” (Ema hotu hatene, simpatia husi cidadão ida ne’e ba partido politico ne’ebe Ministro Gastão sai militante). Problema nia hun no abut, katak, Ana Pessoa la gosta há’u nu’udar simpatizante ba Gastão de Sousa ninia partido – Partido Democratico (PD). Ema hotu hatene katak, Ana Pessoa husi quadro militante partido Fretilin, eis Ministra da Administração Estatal husi Fretilin (2002-2007), eis Deputado Parlamento Nacional husi bancada Fretilin (2007-2010) no eis Procuradora Geral da Republica (2010-2014).

Atu halo Ana Pessoa ninia “libido politico” no sentimento aat ba PD bele sai fali termo jurídico positivístico, nune’e MP deduz ninia acusação hodi katak, “O arguido Martinho Gusmão cometeu por cumplicidade material: Um crime de administração danosa, na sua forma continuada, p. e p. pelo arto. 274o n.os 2 e 3, por referencia ao no. 1, do mesmo artigo, arto. 41o e 34o, todos do Código Penal (em cumplicidade com o arguido Gastão de Sousa).

Partido-Fretilin no Partido Democratico la iha problema. Maski ki’ik no fraco, PD mak fo liman ona ba Partido-Fretilin atu kaer ukun. PD mos continua hatudu ninia maturidade no capacidade atu la’o hamutuk ho Fretilin. Maski iha tempo di’ak nia laran Fretilin insulta no hateten aat líder foinsae PD nian, maibe iha tempo susar no todan nia laran, PD la husik Fretilin. Rona de’it oinsa mak Mari Alkatiri, Ramos Horta no Estanislau da Silva dala barak halo comentário negativo, ofende no halo insulto ba PD. Iha ona tempo susar nia laran mak há’u rona Maun Mari Alkatiri, Maun Ramos Horta no Estanislau da Silva gaba, hahi hana’i PD ... to’o militante no simpatizante PD sira mak ko’alia la di’ak d’iet. Maibe, ema hanesan Ana Pessoa ne’e la iha liu capacidade politica, maturidade intelectual la naton. Nia sei estraga Partido-Fretilin iha futuro. Ohin loron sentimento no respeito povo nian ba Fretilin sei naton. Maibe, to’o tempo no nia tempo to’o ona atu POVO tenki HALO’OT didi’ak tiha Fretilin. Fretilin labele sai de’it “instrumento” ba ema laran makerek sira atu hafoer dignidade Povo ida ne’e nian.

Atu dehan lolos, há’u nunca hateten ba publico katak há’u simpatizante PD nian. Nu’udar “sacerdote católico”, há’u labele tama politica atu sai quadro militante ka organizador ba simpatizante sira PD nian. Tuir Codigo de Direito Canonio (CDC) 285§3 no 287§2, “sacerdote católico” labele halo politica tuir partido nia hakarak, ka sai líder partido nian. Maibe, CDC mos loke janela no odamatan atu, Na’ilulik sira hamoris no haburas di’ak liu tan knaar atu hari damen no ema tomak bele simu malu, hatur iha justiça nia laran (can. 287§1). Ne’e katak há’u tenki “hatais batina” nafatin hodi ko’alia konaba justiça no lia-los, damen no moris di’ak.

Nu’udar Timores, há’u hetan garantia husi CRDTL katak, “Ninguém pode ser discriminado com base na cor, raça, estado civil, sexo, origem étnica, língua, posição social ou situação económica, convicções politicas ou ideológicas, religião, instrução ou condição física ou mental” (CRDT artigo 16o n. 2). Há’u dehan ba Senhora ne’e, katak, há’u Timores puro (respeito no hadomi mistiço ka lao rai sira), ho estado civil hanesan “sacerdote católico”, mane ida, origem étnica husi Makassae-Uaima’a, hatene língua Tetum, Portugues (maski la matenek hanesan Ana Pessoa), Indonesia, Ingles no Italiano, posição hanesan docente ho situação económica ne’ebe modesto (la riku la ki’ak), fiar metin katak Timor-Leste tenki ukun rasik-an no simpatizante ba PD (uluk la declara), há’u nia religião católica, hetan instrução iha Indonesia, Italia, Inglaterra no França, ho condição física normal no mental la fraku. Há’u nia aman uluk delgado FRETILIN (1975-1979) iha luta laran. Sala iha ne’ebe?

Hare tiha lalaok julgamento, há’u hare ema hanesan Ana Pessoa ne’e la’os atu mai fo solução ba problema nação nian, luta ba dame no justiça maibe vírus aat ne’ebe atu halo problema hela de’it. La’os de’it atu halo aat ba líder foinsae sira, maibe mos sobu Igreja Catolica nia relação di’ak ho Estado. Há’u hakarak hatene oinsa mak Ana Pessoa sei hatama Bispo sira, Padre sira no Madre sira, inclui Pastor Protestante no Ulama/ Ustad Islam sira iha processo julgamento nia laran. Tan la’os segredo, katak, iha religião hotu-hotu, sira nia líder religioso simu ajuda husi Estado no Governo tinan-tinan husi OGE (hahu tempo Xanana Gusmão kaer ukun). Boot liu no barak liu kareta Kijang Innova ida (empresta de’it)! Sa tan, líder religioso balun hatudu momos iha publico katak sira la’os de’it “simpatizante” maibe mos “militante” ba Partido-Fretilin.

Há’u hanoin Ana Pessoa sei la brani. Tan nia tauk, iha tempo hanesan ne’e mak hatama Bispo, Padre, Matre, Pastor, Pastora no Ulama ka Ustad sira iha tribunal, ne’e Partido-Fretilin halot kedas bandeira no simbolo resistência iha Museu.

Há’u be empresta kareta fo fali ne’e crime. Be sira be simu tulun no rai hela nu’udar património igreja (katolika no protestante) no mesjid nian, ne’e halo nusa? Sira mak la tuir julgamento karik, bela ka lae, kareta Kijang Innova TLS 19-754 ne’e fo fila mai há’u atu há’u labele sai criminiso?

Há’u rona katak Ana Pessoa ne’e jurista matenek husi Faculdade de Direito iha Maputo, ne’e los ka lae be? Husik ba. Há’u la hatene no lakohi hatene!

Maibe ho caso “criminalização” ba há’u no Maun Gastão de Sousa ne’e, há’u husu ba Ana Pessoa atu hapara ona hahalok aat ne’ebe gosta halo problema hodi Estado nia naran. Gastão de Sousa halo tebes corrupção ka lae, ne’e la’os há’u nia knar atu halo “verificação do crime”. Tuir CRDTL, so tribunais e magistratura judicial mak iha função nu’udar “órgão de soberania com competência para administrar a justiça em nome do povo” (artigo 118o n. 1).

Di’ak liu, nu’udar geração tuan husi Partido histórico Fretilin, Ana Pessoa hatudu to’ok nia matenek oituan de’it atu rona hikas saída mak Nicolau Lobato, Fundador FRETILIN lolos nian, Fundador FALINTIL aswa’in tuba rai metin nian, Fundador do Estado Timor-Leste mane maksoy duni ko’alia konaba UNIDADE. Liafuan “unidade” hanesan “geistlichen Hintergrund” (segredo do espirito) FRETILIN nian, no furak liu Ana Pessoa halo ba Partido-Fretilin.

FRETILIN ninia espirito, hanesan nia na’in rasik Nicolau Lobato dehan iha Diskursu 20 de Maio de 1978 (molok mate), “Em primeiro lugar, um apelo a unidade do povo de Timor-Leste. A FRETILIN surgiu da luta centenária do Povo Timor para unifica-lo e continuar a lutar. Hoje, passado quatro anos a FRETILIN identifica-se com o Povo, a FRETILIN torna-se Povo, o Povo é a FRETILIN”. Nia tau uluk kedas atu FRETILIN ninia hun no abut ne’e iha Povo nia laran, no halo Povo Timor-Leste hun ida de’it abut ida de’it, fiar ida néon ida – “UNIDADE”.

Tuir mai, Nicolau Lobato dehan, “Em segundo lugar, outro apelo a unidade. Unidade de todos os patriotas a volta do Comité Central da FRETILIN, a direção incontestável do povo maubere. A nossa unidade baseias se em princípios justos. A nossa unidade é de princípios, a nossa unidade é forjada na luta”. CCF ne’e luta duni ba UNIDADE, maibe liu husi “princípios justos”. Ana Pessoa sei iha CCF ka lae? Di’ak liu aprende liu tan, oinsa mak Povo Timor-Leste ne’e buka unidade nafatin, liu husi Uma-Lisan no liu husi Uma-Kreda.

Ikus liu, nia hatutan tan “Em terceiro lugar, ainda outro apelo à unidade, a unidade de esforços. A nossa unidade ideológica proclamada só será autentica quando a materializamos na pratica. Muitas vezes há necessidade de rever o caminho e rectificar os erros. Outras vezes é preciso juntar grande forças para removerem enorme obstáculos”. Atu hari’i UNIDADE ida ne’e, ema hotu-hotu hatur iha “pratica”, ita hotu koko ho liman hare ho matan (materializamos). Ita bele critica malu, fo hanoin ba malu atu hadi’ak sasan sira. Ida ne’e buat todan ida. Maibe, Nicolau Lobato hakarak atu ita hotu bele hasai tiha “obstáculo” ne’ebe bele hamate ita nia soberania.

Povo Timor-Leste hein no hakarak hare líder sira ne’ebe mai atu hadi’ak Povo nia moris. Liu-liu hari’i CULTURA DEMOCRATICA ida ne’ebe hatur respeito ba Constituição no Lei sira. La’os mai obral sira nia “libido politico” hodi sobu no sama belar fali Lei-Inan atu hatudu odio no vingança ba cidadão Timores. Partido-Fretilin labele sai fali fatin ba ema sira ne’ebe la hatene historia Timor-Leste nia luta, la hatene Igreja Catolica no Povo Timor. Labele lohi tan atu dehan “Fretilin mak Povo, Povo mak Fretilin”; “Fretilin mak Igreja Katolika; Igreja Katolika mak Fretilin”. Depois, PD “Maubere oan” fo de’it empresta kareta ba “sacerdote católico” ida atu “promove justiça, paz no bem comum” sai fali crime.

Maibe, la buat ida! Hanesan Xanana Gusmão dehan, “agora ukun iha sira nia liman”. Halo de’it ba, tan ida ne’e tempo Ana Pessoa nian. Ba Partido-Fretilin, hanesan mos ba CNRT, PLP no KHUNTO, há’u nia maluk nova geração iha PD no há’u rasik nu’udar “sacedote católico” hakarak harohan ba imi: “O amor e a fidelidade vão encontrar-se. Vão beijar-se a justiça e a paz. Da terra vai brotar a verdade e justiça descera do céu. ... A justiça caminhara diante Dele e a paz, no rasto dos seus passos (Salmo 85, 11-12. 14). Husi rai Timor-Leste ne’e lia-los sei naburas, no iha Timores nia ulun leten justiça sei naturun husi Lalehan.


(*) P.S. Artigo ida ne’e há’u foti husi processo julgamento 2 Fevereiro 2018, 14h30, iha Tribunal Distrital Dili.





Sem comentários:

Enviar um comentário

Nota: só um membro deste blogue pode publicar um comentário.