VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
DALIA iha "quarteto" LIAN NIA NONOK  
   

terça-feira, 21 de novembro de 2017

Mosaun Rejeisaun Husi Opozisaun Parlamentu ba Programa VII Governo Teste Pratika Consituisaun RDTL

Mosaun Rejeisaun Husi Opozisaun Parlamentu ba Programa VII Governo Teste Pratika Consituisaun RDTL
(Artigo ida ne’e refere liu ba VII Governo Minoria Ne’ebé Mak Ukun)

Husi: Moisés Vicente

Moisés Vicente
Hare ba situasaun polítika rai laran nian, hafoin eleisaun Parlamentar no tama iha faze forma Governu da hituk (VII), República Democrátika de Timor-Leste hasoru tan dala ida situasaun krusial ne’ebé bolu ita tomak atu fó oin hodi buka lisuk solusaun ba, atu hamutuk tahan netik anin bo’ot ne’ebé hu hadulas dadaun ita. Fontes: Konferensia Imprensa Husi Junta das Organizações da Resistençia para a Defesa da Soberania Nasional, Balide, Sesta 27 de Outubru de 2017. Iha ita nia Lei-Inan Constituisaun República Democrática de Timor-Leste 2002 (C-RDTL) artigu 1 alinea 1. Repúblika Demokrátika Timór-Leste katak Estadu ida-ne’ebé demokrátiku, soberanu, ukun-an no ida-mesak, harii husi povu nia hakarak no iha respeitu ba dignidade ema moris ida-idak nian. Nomos iha artigu 2 alinea 1. Soberania haktuur metin iha povu, ne’ebé hala’o soberania ne’e tuir Lei-Inan haruka. Alinea 2. Estadu hakruuk ba Lei-Inan no lei-oan sira. Alinea 3. Lei-oan sira no hahalok seluk  tan husi Estadu no kbiit autoridade lokál sira-nian foin sai válidu wainhira sira la’o tuir duni Lei-Inan haruka.

Polémika programa VII Governo nian ne’ebé la passa iha Parlamentu Nasionál tuir lolós hanesan teste ida ba ita nia Constituisaun da RDTL, ne’e hatudu katak Governu ida la bele hari’i ho kadeira ne’ebé la to’o 50%+1 ou koligasaun minoria ida. Ezersísiu constitusionál hatudu ona husi Mosaun Rejeisaun ba programa VII Governu Parlamentu Nasional: 19 Outubru 2017 no hetan afavór 35 deputados no vota kontra 30 deputados, komesa dadaun dezafia kontinuidade Governo ida ne’e ninia ezisténsia. Mosaun Rejeisaun ne’ebé aprezenta hetan apoiu husi Oposisaun Maioria Parlamentar Deputadu 35 kadeiras nu’udar evidénsia forte kona-bá importansia Governu no Parlamentu maioria ida hodi apoia funsionamentu Governo ida nian ba tinan lima (5) nia laran. Tanba ne’e maka presiza tebes Governo ida tenke mai husi votu barak liu (50%+1) ou koligasaun ida ne’ebé maka maioria iha Parlamentu Nasionál atu vialibiliza Governasaun ida maka estável no forte ne’ebé hakerek ona iha artigo 106 constituisaun da RDTL esplika katak 1. Primeiru-Ministru hili husi partidu ida ne’ebé iha votu barak liu ka husi aliansa partidu sira-ne’ebé iha nia ema barak iha Parlamentu no iha nomeasaun hosi Prezidente-Repúblika, wainhira rona tiha partidu polítiku sira ne’ebé iha reprezentante sira iha Parlamentu Nasionál. 2. Membru Governu sira seluk, Prezidente-Repúblika mak sei hili liu husi Xefe-Ministru ou Primeiro Ministro nia proposta.

Mosaun Rejeisaun ne’ebé passa mós sai razaun forte atu alerta fó hanoin hikas ba ita nia Prezidente Repúblika katak, indijitasaun Primeiru Ministru hodi forma Governu Minoritáriu ne’e desizaun la prudente no la kuidadu, hodi nune’e Prezidente Repúblika ho konsiénsia tomak sakrifika ona Governu ida ne’e ba situasaun risku nia laran. VII Governu iha dalan leut, risku no bele monu. Maibé seidauk tarde atu viabiliza hikas, dalan mak hahú hikas komunikasaun no halo Lobby simultaneamente ho líder polítika partidu sira ne’ebé agora iha Oposisaun-Aliansa Maioria Parlamentár (O-AMP) hodi nune’e ba segundo ronde aprezentasaun programa bele passa. Komunikasaun ida ne’e la bele mai husi Prezidente Repúblika deit, maibé tenke inísia husi líder partidu Governo nian hodi viabiliza sira nia governasaun. Hafoin Bloku Partidos Maioria Parlamentár submete no vota afavór ba mosaun rejeisaun ba VII Governu nia programa, espekulasaun no ejijénsia militante sira husi Partidu FRETILIN maka hakarak halo eleisaun antesipada.

Husi sorin seluk, Sekretariu Jeral Partidu FRETILIN, Dr. Mari Alkatiri hakarak halo referendum ba programa Governu nian no nia rasik jura no deklara katak sei la fila ba Parlamentu Nasionál atu aprezenta programa ba daruak nian. Artigo 109 constituisaun da RDTL apresiasaun ba Governu nia Programa) 1. Programa Governu nian sei hato’o ba Parlamentu Nasionál atu hetan apresiasaun, no Parlamentu la funsionál karik, tenki konvida ka konvoka sira ba asuntu ida-ne'e. 2. Debate programa Governu nian labele liu loron lima, no to’o remata, grupu ida-idak iha Parlamentu bele husu atu la simu, eh Governu bele husu votu konfiansa ida. 3. Atu la simu programa Governu nian, tenke iha apoiu mai husi maioria deputadu husi sira- ne’ebé sei hala’o hela knaar. (A rejeição do programa do Governo exige a maioria absoluta dos Deputados em efectividade de funcoes). Tenik maun Xanana Gusmão hodi hatutan, “Se’e governo monu ka governo sa’e, ne’e laos problema paz no estabilidade nian. Ida ne’e problema konstituisaun ninian. Ida ne’e problema demokrasia ninian.” “Governo monu ne’e problema Konstituisaun” Fontes: Nitizen jurnalizm/Grupo Media Nacional TV-GMNTV). Tuir pesoal hakerek na’in nia hanoin ita hotu atu konkorda malu atu la konkorda malu tuir constitusaun, maibé la’os atu inimigu ba malu no paz malu ba.

Antes fó conclui hakerek na’in foti hanoin balu husi Pe. Julio Crispin Ximenes Belo nia idea dehan kona-bá Eleição Antecipada katak, wainhira relaciona ho situação actual República Democrática de Timor-Leste nian, ita bele concidera nudar hipótese ida ho probabilidade suficiente, tanba molok to’o ba decreta Eleisaun Antisipada, Presidente República sei halo exercício constitucional lubuk ida, (1) halo uluk demissão ba VII governo, quando segunda apreciação ba programa governo la passa iha PN tan dala ida [art. 112.º (d) conjuga ho art. 86.º (g)]; (2) Rona tiha partido político sira ne’ebé hetan assento iha Parlamento Nasional (Governo monu, oposição mos remata, hela de’it bancada parlamentar sira) hodi hahu processo formação VIII governo, ne’ebé tem que hahu nafatin ho critério principal rua no critério determinante ida ne’ebé consagrado iha art. 106.º (n.º 1, 1.ª parte) KRDTL (katak indigita PM sei la liu husi artigo seluk, liu nafatin husi art. 106.º); mak iha loron 60 nia laran, la consegue forma VIII governo, PR Dissolve (bubarkan) PN [art. 86.º (f) conjuga ho art. 100.º KDRTL]. (3) Dissolve tiha PN, mak PR decreta Eleisaun Antisipada hodi aplica regras eleição nian (observa art. 65.º conjuga ho art. 7 KDRTL hodi cumpre art. 2.º n.º 1 no art. 1.º n.º 1 KRDTL) estipulado iha lei eleição parlamentar nian. Nunee halo eleição anticipada, la’os solução diak (kaer ba princípio menus malum) maibé solução ikus (kaer ba princípio último ratio) hodi tane aas nafatin regras democráticas tuir KRDTL.

*Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Hakerek Na’in Alumni Faculdade de Direito, Universidade da Paz, Díli, (2008). Iha sujestaun ruma bele haruka iha e-mail: moisesvicente.mahein@gmail.com.

Sem comentários:

Enviar um comentário

Nota: só um membro deste blogue pode publicar um comentário.