Prezidente-da-Repúblika ofisialmente nomeia Mari Alkatiri ba Primeiro Ministru

Prezidente-da-Repúblika ofisialmente nomeia Mari Alkatiri ba Primeiro Ministru

Palásiu Prezidente Nicolau Lobato, loron-14 Setembru, Prezidente-da- Repúblika Francisco Guterres Lú Olo ofisialmente deklara ba públiku nomeiasaun Sekretáriu Jerál FRETILIN Dr. Mari Bin Amudi Alkatiri sai Primeiru Ministru ba VII Governu Konstitusionál.

“Ohin ha’u mai fó hatene ba povu tomak katak Prezidente-da-Repúblika hola nia kompetensia konstitusionl tuir artigu 106 no 85 alinea d nian, nomeia Dr. Mari Alkatiri atu sai Primeiru Ministru ba VII Governu Konstitusionál liu husi dekretu Prezidente-da-Repúblika nian”, Prezidente deklara.

Nomeiasaun Primeiru Ministru ne’e bazeia ba lista tuir desizaun ne’ebé partidu koligasaun desidi hamutuk hodi aprezenta ba Prezidente-da-Repúblika horseik, iha loron-13 fulan-Setembru.

“Prezidente-da-Repúblika depois rona tiha sira-nia relatóriu no desizaun koligasaun nian maibé Prezidente-da-Repúblika hato’o ba sira katak hahu husi momentu ida ne’ebé ita boot sira mai aprezenta kandidatu ba kargu Primeir Ministru nian, Prezidente-da-Repúblika hola nia kompeténsia tuir konstituisaun, atu nomeia Primeiru Ministru ne’ebé ita boot sira indizita mai iha Prezidente-da-Repúblika, tuir desizaun ne’ebé partidu koligasaun hola no desidi hamutuk mak sira indizita Dr. Mari Bin Amudi Alkatiri atu sai Primeiru Ministru”.

Xefe-de-estadu mós husu ba sidadaun no povu Timor-Leste tomak para atu bele hakmatek nafatin, no la kleur tan, Prezidente-da-Repúblika sei fó tomada-de-posse ba VII Governu Konstitusionál.

Mídia PR