VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20170903

Homenagem badak ida ba Mestre Egidio Meles Dias Ximenes

HOMENAGEM BADAK IDA BA MESTRE EGIDIO MELES DIAS XIMENES

Hosi: Celso Oliveira

Diocese Baucau liu hosi Bispo Basilio de Nascimento foin daudaun ne’e entrega sertifikadu de rekonhesimento ba mestre Egidio Meles Dias Ximenes, mestre Atanásio da Costa Soares no mestre sira seluk tan. Sertifikadu de rekonhesimentu ne'e entrega iha Paróquia Sagrado Coração de Jesus, Venilale iha loron 19 de Augusto 2017.

Iha serimonia ne’e, representanti hosi familia mestre Egidio Ximenes hateten:

"Mestre Egidio husik hela memória barak tebes iha Venilale, husi familia Mestre Egidio sente orgulho wainhira familia bo’ot Venilale simu ami nakonu ho amizade. Espera katak aliansa nebe Mestre Egidio halo ho familia Venilale sei kesi ita hotu sai familia ida deit. La haluha hakarak mos agradese ba Amu Bispo Diocese Baucau, Dom Basílio do Nascimento, Paróquia Sagrado Coração de Jesus Venilale, Mestre Aleixo Ximenes no sarani tomak ba reconhecimento ida né. Ami nia hakuak bot ba familia Venilale!"

Historia Badak Konaba mestre Egidio Ximenes

Mestre, professor-katekista Egídio Meles Dias Ximenes, moris iha Laleia, konselho Manatuto, loron 01 fulan Setembro tinan 1915. Oan hosi aman-inan katoliku Francisco Dias Ximenes i Maria da Conceição.

Duranti moris tomak, mestre Egidio dedika-an hodi hari metin no haburas dutrina Igreja Katolika no prega metin dutrina Jesus Cristu iha Timor Leste. Ho tinan 9 (1924-1927) sai hosi Laleia ba Dili hodi hahu aprende primeira letra iha Escola Municipal de Dili. Iha tinan 1929 ba hahu eskola iha Soibada, i, iha neba hahu'u haklaken dutrina Maromak nian desde 1933-1936. Hosi tinan 1936 transferidu hosi Soibada ba Baucau (suku: baucau vila, Fatumaka leten no Fatumaka kraik, uailili, seluk-seluk tan) i Venilale (Sukus: Uatu-Haco, Uai-Oli, Fatulia, Baha-Mori i Badu-Ho’o). Servisu iha Baucau no venilale to’o tinan 1948. Desde 1948 transferidu filfali ba Manatuto to’o tinan 1967.

Desde 1967, filafali ba Dili, hodi hahu servisu hamutuk ho padre matebian Eduardo Brito iha Igreja Imaculada Conceição de Balide.

Kuandu hahu invasaun militar Indonésia iha Timor Leste, loron 07/12/1975, mestre Egídio ho família halai ba ai-laran duranti tinan 4. Kontinua iha Fé ba Aman Maromak, iha tinan 1979 fila hosi ai-laran ba Dili.

Iha tinan 1986, loron 3 fulan Dezembro, Mestre Egídio Meles Dias Ximenes simu homenajem Condecorasaun S. Pedro i S. Paulo hosi Santo Padre João Paulo II. Hamutuk ho mestre Egídio, simu mos medalha maka mestre Humberto Lopes da Cruz, mestre Atanásio da Costa Soares, mestre Mateus da Costa i mestre César do Carmo Pinto.

Mestre Egídio Meles Dias Ximenes, hela iha bairo Bemori, kontinua servisu iha Igreja Katolika Imaculada Conceição de Balide to’o mate iha tinan 1996, loron 25 fulan Abril.


Sem comentários:

Enviar um comentário

Nota: só um membro deste blogue pode publicar um comentário.