VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20170418

Sosiedade Timor-Leste; Entre Kultura Share Poverty no Retorika Poverty Eradication

Sosiedade Timor-Leste;
Entre Kultura Share Poverty no Retorika Poverty Eradication

Melhora maneira de pensamentu nebé mais kualidade, neneik ba bei-beik moris mukit sei lakon no moris diak sei akontese.
‘Hamutuk hisik kosar hodi eradika mukit iha Timor-Leste’

Por : Quintiliano Afonso Belo

Promove sosiedade area rural atu hetan moris diak, topiku trendi halakon moris mukit maka ajenda espesial no urjenti. Sera que ne’e espesial no urjenti duni? Ema sosiais sira hateten; Sosiedade solidaria, hanesan Timor-Leste “moris mukit” laos problema nia abut, maibe abut lolos maka perigu alienasaun kulturál ka akulturasaun globalizasaun modernu. 

Argumentu iha leten liga ho sosiolojista James Scott nia hanoin loos no laiha duvida. Basá nia fo ona hanoin katak, modernizasaun sei fo impaktu direta ba mudansa estrutura sosiedade sai sosiedade nebé mukit liu. Rajuan maka premeiru, sosiedade iha area rural ladauk preparadu ba modernizasaun ne’e rasik. Segundu, estadu promove aprosimasaun dezenvolvimentu output oriented liu husi utilizasaun tehnolojia moderna. Terseiru, estadu soe hela indíjenas lokal, haluha nesesidade lokal, no ignora potensialidade lokal durante elabora planeamentu ba dezenvolvimentu. 

Ema ekonomista sira argumenta oin seluk kona ba sosiedade area rural nia moris. Sira bai-bain hateten, sosiedade iha area rural sofre moris mukit no laiha kapasidade atu gasta osan hodi nesesita nesesidade uma laran. Sosiedade iha area rural identiku ho moris mukit no vitama ba limitasaun asesu sira (edukasaun, saude, ai-han no ect). Sera que ne’e loos? Hmmmmm.... bele loos, bele mos sala.....hanesan deskrisaun argumentu tuir mai.

Kategorizasaun moris mukit no limitasaun ba asesu sira iha Timor-Leste nebé ekonomista temin la kondisiona no laiha indikador koreta atu justifika, basá iha Timor-Leste nia realidade sarjana, profesor, mediku, ate ministro sira maioria oan no mai husi sosiedade area rural. Sira nia kondisaun uma la tuir estandarte maibe sira lakuran ai-han durante tinan naruk. Sira laiha konta bankaria hodi rai osan cash maibe numeru animal liu-liu animal bot (karau) sanulu ba leten. Sira komunga ekonomia moral duke ekonomia rasiosinu. Sira nia vida moris dura ate to’o idade 90 ba leten kompara ho sosiedade urbana. 

Argumentu ne’e realista no hetan tulun husi teoria nebé mai husi antropolojista Samuel Hopsking no Clifort Geerzt katak, sosiedade sira iha Asia rural valoriza kultura share poverty nudar forza ba fundasaun atu moris diak. Sira fiar ba lulik, sira fiar ba forza husi natureza no sira hanai valores kultural nudar fontes ba lisaun atu hetan moris diak iha futuru. 

Teoria iha leten bele mos irasional tuir perspetiva seluk, maibe atan hau iha provas ba realidade nebé hau rasik hasoru iha sosiedade area ruaral hanesan tuir mai; Hare husi dook uma nia kondisaun simples (uma semi permanenti, didin husi piku) hanesan uma sira seluk ho lutu husi ai-funan moris haleu metin. Tanba intresante hau koko atu hakbesik ba uma ne’e no hamrik iha uma nia oin. La kleur deit uma nain hase hau ho perguntas badak ba hau dehan; prezisa buat ruma? Lae! Hau hanoin uma ne’e mamuk, tanba ne’e hau liu mai atu hase foto. 

Tiu uma nain ne’e hatan hau hodi dehan, atu halo saida? hau la konsege hatan maibe hau koko hatan fali ho perguntas seluk urjentimente. Tiu hela mesak deit iha uma ne’e? Nia resposta mai hau hodi dehan Lae! Hau hela iha uma ne’e hamutuk hau nia kaben no hau nia oan sira. Rona tiha resposta ne’e, hau kontinua ho perguntas seluk tanba hau hakarak hatene barak liu. 

Sira ba hotu nebé? Hau nia kaben ba foti batar iha to’os atu fo han ba fahi nebé sulan hela iha luhan hodi hatudu luhan ba hau. Hau kontinua hodi hatan, Tiu nia oan sira? Hau nia oan feto nain rua sarjana ona no servisu iha Dili. Hau nia oan mane maka hamutuk ho ami tanba nia ferias hela husi nia estudu no hau haruka hela nia ba hare ami nia karau nebé ami hakiak iha area pastagem karau nian. Resposta ne’e konsege halo hau nonok no doko ulun, depois hau kontinua nafatin hodi husu; Tiu sira nia karau ne’e sura karik hamutuk hira? Nia hatan ba hau dehan kuase 40 kabesas ba leten. 

Hau nonok no dada is hodi kontinua husu, tanbasá mak la faan tiha balun hodi hadia uma ne’e? Nia hatan mai hau dehan, hau mos hanoin nune’e atu fa’an tiha balun lori halo uma ne’e, hau nia oan sira mos ezizi maka’as los, maibe iha momentu ida hau muda hau nia hanoin hodi halo desizaun no hateten ba sira dehan, diak liu imi mak halo uma diak hodi hela, Ami rua (hau no ama) mantein hela nafatin iha uma ne’e. 

Rona tiha ida ne’e hau ho idealizmu hateten, Tiu diak liu fa’an tiha karau balun no halo tiha deit tanba agora dadaun rai modernu ona no tenki moris iha uma nebé diak ho dignu tuir standarte, maibe nia hamnasa... no hamnasa hodi dehan ba hau; modernu ne’e saida? Modernu la mai hamaluk no la ajuda hau kuandu hau hetan susar, modernu mos la fo osan durante hau nia oan sira iha eskola to’o sarjana ate hetan servisu. Maibe ida nebé importante liu ba hau maka, oinsa mantein preserva valores kultural ezistenti nebé ami hanaran fahe naha todan ba malu hodi leba hamutuk duke hau moris izoladu tanba egoista, gengsi no individualista. La signifika mos katak moris diak la akontense iha futuru, basá objetivu final husi asaun hirak ne’e maka hakarak hetan moris diak hanesan ho sosiedade nebé hela iha sidade.

Rajaun seluk mak; kuandu hau halo uma nebé diak liu, nabilan no hela iha uma nebé diferenti iha sira nia le’et, hau rasik estraga hau nia eransa relasaun sosial nebé durante tinan atus ba atus ami nia bei ala sira husik hela. Tanba ne’e uma diak, nabilan no modernu la importante liu hau nia interasaun sosial, basá moris mukit lolos maka kuandu moris hanesan ema maluk laek iha hau nia sosiedade rasik. 

Hau rona ho tilun manas no konfuzaun dala ida, maibe ne’e maka realidade moris. Tanba tuir sira nia hanoin moris mukit sei sai mukit liu tan kuandu soe idea indíjenas no haluha kultura shared poverty. Sira laos lakoi modernizasaun totalmente, maibe sira presiza tempu nebé naruk atu halo adaptasaun no sira prontu modernizasaun nebé lao naturalmente. 

Rajaun sira iha leten rasional mos kuandu korela ho Sr. PH. Landis nia hanoin nebé hateten katak; Sosiedade area rural nia karater prefere halo adaptasaun laos adopsaun ba lalaok modernizasaun sira. Sosiedade area rural iha dalan rasik hodi inventa no hamosu idea foun hodi hadiak moris, maske sofre limitasaun atu asesu inovasaun tehnolojia. Sosiedade area rural desenvolve-an ho filosofia moris organiku no hadomi natureza. Sosiedade area rural fiar ba lulik no hakruk ba forza natureza. Sosiedade area rural prefere moris ho simples. Sosiedade area rural utiliza tempu nudar prosesu nebé guia sira ba moris diak. Sosiedade area rural hanai transparenti no konsensu maka fontes ba moris diak. 

Hodi taka artigus ne’e atan hau rekomenda solusaun alternativu balun ho maneira de pesamentu ida nebé mais kualidade no mais koretu, basá hakarak ka lakoi halakon moris mukit laos retorika maibe tenki akontese iha futuru. Maneira hirak ne’e maka; Promove mekanismu halakon kiak bazea ba realidade kultural no laos imajinasaun hodi halo retorika. Promove esforzu halokan kiak bazea ba indíjenas lokal, labele haluha nesesidade lokal no labele ignora potensialidade lokal liu husi planeamentu integradu no intersektorais laos ego sektorais. Promove seriedade politika hodi fo atensaun masimu ba prosesu no akompanha nafatin resultadu final husi prosesu ne’e rasik no laos fo espasu ba ignoransia. Promove halakon moris mukit iha area rural maka ajenda esensial no urjenti alemde prioridade sira seluk. Promove asaun nebé mai duni husi povu, ba povu, no fila fali ba povu laos haruka halo tuir hakarak sem justifikasaun. 

Sem comentários:

Enviar um comentário

Nota: só um membro deste blogue pode publicar um comentário.