Veteranos kontra Aniceto Guterres fahe Timor ba Lorosae ho Loromono

Veteranos kontra Aniceto Guterres fahe Timor ba Lorosae ho Loromono

.

Foto: Especial 

Liquiça, Forum Haksesuk (FH). Iha komisu  Kandidatu António da Consceição Kalohan ho numeru 8, iha kapital Municipal Liquiça, sexta-feira ne´e (17/03/2017), veteranos hanesan Rai Los (Liquiça),  Ernesto Dudu (Ermera)  no Deus (Baucau) kontra ema ne´ebe tenta atu fahe Timor-Leste ba Lorosae ho Loromono.

Tuir Veteranos Rai Los katak, "sira ne´ebe mak  tenta atu fahe Timor-Leste ba Lorosae ho Loromono tanba tauk atu lakon iha eleisaun Presidencial tanba sira hanoin katak atu manan iha primeira ronda maibe afinal lae, neduni sira lansa probaganda ida ne´e atu hamenus votus husi Kalohan Numeru 8". Haktuir tan Rai Los, " ne´e tanba tauk mak asina probaganda ne´e".

Iha fatin hanesan, Veteranus Ernesto Dudu haktuir mos katak, "ami uluk funu iha ailaran, ami la iha Timor ne´e ba Loromono no Lorosae, ami hemu café kopu ida ne mos ema nain 3 ka 4 hemu, aifarina bedasuk ida mos ema nain 2 ka 3 mak han". Hatutan tan Veteranus Ernesto Dudu, "Sira ne´ebe hakarak tur metin iha kadeira ne´e mak hakarak fahe Timor ba Lorosae ho Loromonu atu nune atu mantein Status Quo".

Ba Veteranus  Deus husi Baucau haktuir katak, "sira ne´ebe koalia Lorosae ho Loromono atu soe rai henek ba povu nia matan nune sira bele mantein nafatin iha poder". Hatutan Veteranos DEUS, "uluk sira mak fahe Timor-Leste ba Lorosae ho Loromono nune mak mosu krise, agora mai tan atu fahe ita, nune bele hetan votus  iha eleisaun Presidencial ne´ebe sei halao iha loron 20 fulan Março tinan 2017". Tenik tan DEUS, veteranus ne´ebe Luta tinan 24 iha ailaran ne´e, "probaganda ne´ebe lansa husi deputadu balun iha uma Fukun Parlamento Nacional ne´e la influensia ba vontade povu nian atu hili KALOHAN ba sai Presidente Republika  ba tinan 2017-22".

Hanoin fahe Timor Lorosae ho Loromono mosu husi deklarasaun Aniceto Guterres, Presidente Bankada Partidu FRETILIN no Vice Presidente Partidu FRETILIN akusa  kandidatu António da Consceição Kalohan uja probaganda metan fahe Timor ba Lorosae no Loromono (Telejornal TVTL, 13/03/2917). Hatutan Aniceto Guterres, "apela atu lalika vota ba kandidatu ne´ebe fahe Timor-Leste" (idem).

Kalohan

Hatan ba akusaun ne´e ekipa sucesu Kandidatu António da Consceição Kalohan numeru 8, Arcanjo Leite, "rejeita akusaun falsu no baratu husi Aniceto Guterres, presidente Bankada no Vice Presidente Partidu FRETILIN (idem)".

Tuir Francisco Vasconselos alias Ano nudar Conselho Superior Partido Libertação Popular (PLP) iha  komisi kandidatu António da Consceição Kalohan numeru 8 iha Kapital Municipiu Liquiça katak, "sira balun hahu tauk ona, hanoin facil los manan iha primeira ronda eleisaun Presidencial, maibe la facil ona,hahu soe rai rahun ba povu nia matan, hodi fahe Timor ba Lorosae no Loromono". FH & Fotos:Especial! 

Liquiça, 17.03.2017!