Transferensia Poder La'os Entrega Deit Iha Bandeija Maibe Buka Mak Hetan

Foto: Marcelino Magno FB

Transferensia Poder La'os Entrega Deit Iha Bandeija Maibe Buka Mak Hetan 

Merkado Manleuana, Forum Haksesuk (FB).  Mosu tese dominante husi Maun Bót sira katak:

"Jovens sira ka jerasaun foun seidauk preparadu atu kaer ukun, neduni sira mak prepara atu entrega Ukun ba jerasaun foun sira".

Hantan ba tese ida ne’e, Kandidatu Presidente da República, numeru 8, António da Conceição "Kalohan" haktuir ba vendedores sira iha Merkado Manleuana, Dili, Quarta-Feira (08/03/2017) ne'e katak:

"Husi Jerasaun Tuan ba Foun, ne’e procesu natural ida, nune poder ne’e labele simu hanesan entrega  iha bandeija,  maibe liu husi konquista ida".

“Poder tenki buka mak hetan, laos hein entrega deit husi jerasaun tuan sira“, defende Kalohan.

“Uluk maun sira fiar ba jovens sira  halo manifestasaun hasoru Indonesia luta ba ukun rasik an, hatudu katak jovens sira mos bele, luta ba ukun rasik an no bele asegura ukun rasik an liu husi hola parte iha procesu  desenvolvimento“. “Maibe agora maun sira tamba moris ona iha "Kemesraaan" dehan fali jovens sira seidauk preparadu no hein mak maun sira mak entrega Poder iha bandeija“, dehan António da Conceição Kalohan.

“Hau kandidatu ba Presidente tanba uluk Jovens bele no agora mos bele nudar jerasaun kontinuador ba kaer rasik kuda talin no sae rasik kuda“, argumenta António da Conceição Kalohan.