Timor-Leste Laiha Politika ba Desenvolve Talentos Klosan Sira Nian

Timor-Leste Laiha Politika ba Desenvolve Talentos Klosan Sira Nian

Foto: Jael Chng - WordPress.com

Ohin loron hotu-hotu halo programa akompana Academia Dangdut Asia ba dala 2, ne' ebe realiza husi Channel TV indonesia nian ''INDOSIAR'', husi partisipantes nain 6 ne' ebe hola parte, hela deit 1 mak Maria Vitoria iha Grupo C.

Kronolojia hahu husi Estadu liliu Governo liu husi Ministeriu Turismu no Kultura/SEC no SEJD la fo atensaun, husi apoios financeiros no politika ruma konaba hasa'e talentos klosan nian. ETO TV, entidades privados ida mak aposta apoios to'o lori participantes sira ba Jakarta, Indonesia.

Ikus, quando enventu AD Asia2 hetan respons husi publiku, liliu klosan sira, hahu ona Governantes sira oferece apoios ruma no organiza eventus. Aktus sira ne' e nudar aktu oportunista, hein momentus deit, la iha politika no vontade ba desenvolve klosan sira nia talentos.

Husi parte MTC/SEC, kria kondisaun ba harii eskola musikal, importante no urjente. Tanba fakta: ita nia musikus Timor oan, barak gosta no hobby musika, maibe ho deit feeling ka baseia ba rona musika pois imita, maibe la liu husi aprendizagem ba musika rasik. Teknika kanta, vokal , dada-iis, nudar teknikas sira ne' ebe ba musikus sira precisa iha exercicio. Exemplo: AD Asia2, participantes Timor nian hetan difikuldades tanba la domina ninia teknikas sira ne'e. Inklui mos artista senior no komentador ba AD Asia2 husi Timor-Leste, Anito Matos, kompara ho komentatores sira seluk, nota diferensa boot tebes. Tanba sira mai husi eskola musika, domina teknikas musikas nian.

Dala ruma mos, ita nia artista sira nebe mosu iha palku nasional, mos ladun iha vontade atu aprende, wainhira toó kompetisaun la konsegue hatudu, tanba hananu tanba rona deit, maibe la'os tanba hatene musika. Rona ho hatene buat rua la hanesan 

Parte ida Timor-Leste iha potensia musikas husi kamada klosan sira, parte seluk, kondisaun oinsa mak desenvolve talentos mak seidauk iha. 

Oinsa Governo ninia responsabilidade no saida mak sei halao?
Pratiku deit: 

Harii eskola musika ka conservatorio musika nian. artista sira konesidu iha mundu rai klaran, hotu-hotu liu husi eskola musika, liliu conservatorio. Participantes husi rai Asia sira seluk, hatudu sira nia performence diak tanba sira mos procesu aprendizagen liu husi eskola musika, liliu Malaysia no Indonesia.

Konaba rekursus Humanos ba eskola musika, Timor oan lubung ida mak especialista ba iha musika, balun hetan rekonesimentu internacional, oinsa mak bele aproveita didiak sira. Sira mak:

1. Maestro Simao Barreto (Interpreter ba musica Timor nian no maestro nebe nia naran mos tama iha lista maestro sira iha mundo);
2. Maestro Cornelio Cruz (Lori coro Sol Nascente juara vocal no coro iha nasaun barak ona iha Europa);
3. Maestro Antonio Ribeiro (Gutarista ne' ebe mak hanorin iha Conservatorio no iha Radio Renascenca iha Portugal);
4. Seluk tan....

Depende vontade politika no tradus iha OGE2017, se lae 2018, etc.

SEJD: Politika juventude nian la'os ba desporto deit, maibe ba joventude em jeral, oinsa desenvolve ka hasa'e talentos sira klosan nian.

Avaliasaun ba politia juventude buka tradus iha buat ruma pratika ba juventude no talentos la'os mak desporto deit, nudar komponentes ida laos uniku iha sociedade Timor-Leste.

Mak ne'e deit komentariu balun, husi Ekipa FH!

Dili, 21.11.2016!