 |
Komunikadu Imprensa, 28 Juñu 2016, iha Salaun Yayasan HAK, Farol, Dili. Porta-voz KLEJOTAMO Moisés Vicente iha klaran lee hela ne’e.
Foto: Jornalista Rádio Liberdade, Victoria M. Rodriques
|
Porta-voz KLEJOTAMO, Moisés Vicente haktuir katak, kanal RTTL nian la kobre to’o iha suco no aldeia rural sira iha Munisipiu Bobonaro, no tinan ida ne’e, jogu Copa EURO iha França, komunidade Tapo/Memo asesu fali iha signal ka kanal Nasaun China nian liu husi venus parabola. No realidade ida ne’e akontese ona duran tinan 5 nia laran, hahu husi Copa Mundial 2006, 2010, no Euro Cup 2012 no 2016, iha suco refere la hetan signal RTTL nian.
“Ami Klibur Estudante no Joventude Tapo/Memo-Oan (KLEJOTAMO), Posto Administrativu Maliana, Munisipiu Bobonaro nia observa durante ne’e katak, antena ka pemancar ida uluk monta iha tempu Indonézia nian iha Maliana la kobre hotu iha suco balun ne’ebé mak besik iha Posto Administratvo Maliana, Posto Administrativo Lolotoe, Munisipiu Bobonaro”, esplika Porta-voz Moisés Vicente, wainhira KLEJOTAMO hala’o komunikadu imprensa, Tersa (28/06/2016), iha Salaun Yayasan HAK, Farol, Dili.
Em relasaun ho problema refere, KLEJOTAMO hamutuk ho Suco Saburai no suco sira seluk tan iha Munisipiu Bobonaro, hato’o ona sira nia rekomendasaun ba Prezidente Rádio e Televisão de Timor-Leste (RTTL), Milena Soares Abrantes atu hare lalais failansu sira ne’ebé akontese iha baze no la bele hare’e deit iha kapital Dili nian.
Sira husu ba ekipa tekniku RTTL nian hodi tun ba baze atu bele monitoriza fatin ne’ebé mak la asesu hotu signal RTTL nian, atu nune’e iha futuru la bele akontese tan failansu hanesan ne’e. Sira mós husu ba Secretário Estado Comunicação Social, Nélio Issac atu haree asuntu ne’ebé mak sira kestiona iha Posto Administrativo Maliana, Munisipiu Bobonaro, hodi bele hadia ho kualidade liutan iha futuru oin mai. ias/Mj3.
Jornál Diário Nacional, Loron Kinta-Feira, 30 de Juñu de 2016
Sem comentários:
Enviar um comentário
Nota: só um membro deste blogue pode publicar um comentário.