DEKLARASAUN POLITIKA BANCADA PARLAMENTAR DO PARTIDO DEMOCRÁTICO

DEKLARASAUN POLITIKA

BANCADA PARLAMENTAR DO PARTIDO DEMOCRÁTICO

DILI 5 DE MAIO DE 2016

“Kaer metin ukun rasik an, no harii nasaun hosi baze”

Uluk nanain bancada parlamentar do Partido Democrático hakarak fo agradesimentu ba CNRT nebe hamutuk ho koligasaun hahú iha tinan 2007 mai to’o loron 11 fulan marsu tinan 2016. Ami agradese mos ba FM tamba lao hamutuk ho ami mos hahú husi tinan 2012 mai to agora.

Partido Democrático sente orgulhu tamba kontribui ba estabilidade governativa no estabilidade nasional iha ita nia rai hahú iha tinan 2007 mai to agora.

Ami sente orgulho mos tamba Partido Democrático fo nia kontribuisaun tomak hodi aprova Plano Estratégico ba Desenvolvimento no Plano de Asaun Anual.

Iha oportunidade ida ne’e Bancada Parlamentar do Partido Democrático haklaken katak sei compromete nafatin atu kontinua fo kontribuisaun ba estabilidade politica no ba desenvolvimento nasional hodi lori dame no domin iha Timor ida deit mak Timor ukun rasik a’an!

Partido Democrático compromete mos hodi esforso a’an nafatin atu hamosu cultura politika ida nebe iha prinsipiu, ética no moral hodi hametin no haburas democracia iha República Democrática de Timor-Leste. Timor-Leste nudar nasaun foun ida presiza define identidade politica ida nebe baseia ba prinsipiu, ética no moral.

Partido Democrático apela ba partido politico sira hotu, no ba Instituisaun Estadu nian tomak atu hatu’ur cultura de diálogo iha ita ida-idak nia pensamento, plataforma politica no acção política hodi fo solusaun ba problema legal sira hotu nebe bele mosu, tamba laiha lei ida ka sistema ida mak perfeitu. Tamba ne’e mak diálogo importante.

Partido Democrático apela mos ba politico sira hotu no ba ukun nain sira iha Nasaun ida ne’e atu kuida, tane no valoriza líder históriku sira no funu nain sira hotu nudar Património Nasaun nian.

Partido Democrático compromete atu la tane a’as líder histórico ida no hatun líder histórico seluk. Sira mesak ita nia aman, ita nia lider no ita nia parseiru ba desenvolvimento nasional.

Ikus liu, excelensia sira hotu, Bancada Parlamentar do Partido Democrático hakarak fo agradesimento bot ba Deputado Vicente Guterres, Deputado Adriano do Nascimento no Deputada Angelina Machado de Jesus tamba ita bot nain tolu nia kontribuisaun hodi lidera Parlamento Nasional ida ne’e durante tinan tolu, fulan walu, ho kapasidade, qualidade, rigor, dignidade no IMPARSIALIDADE!

Bancada Parlamentar do Partido Democrático encoraja ita bot nain tolu atu simu desizaun politica ida ne’e ho laran tomak. Partido Democrático consiente katak ita bot sira tun husi pozisaun la’os tamba halo krime ruma, la’os tamba hatún dignidade Parlamento Nacional, no la’os mos tamba hatún no kontra dignidade Nasaun nian.

Partido Democrático husu atu ita bot sira simu no hatu’ur akontesimentu politiko ida ne’e iha ita bot sira nia moris nudar lisaun moris nian ida (uma lição de vida) ba imi ida-idak nian no mos hanesan marku históriku ida ba prática politica iha Nasaun ida ne’e.

Forsa nafatin, servi nafatin ita nia Nasaun no ita nia Povu hodi kaer metin liafuan husi Presidente Partido Democrático, saudoso Lasama nebe dehan katak

“HAU NIA DIGNIDADE LA A’AS LIU DIGNIDADE NASAUN NIAN”

Obrigada barak

 

Lurdes Bessa

Chefe de Bancada