VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quinta-feira, 3 de março de 2016

Sera Que Lere Anan Timor (Lere) Sai Sasukat Ida ba Elisaun 2017 Mak Sai Polimika?

Sera Que Lere Anan Timor (Lere) Sai Sasukat Ida ba Elisaun 2017 Mak Sai Polimika?

Cesar Dias Quintas, “Lere-Cay”
Militante RENETIL ( Eis Gurda Costa Xanana Gusmão iha Cipinang, Jakarta)
Tambasa dinamika promocao iha instituisaun F-FDTL sai polimika bo’ot no halo tensaun politika iha rai laran sai manas to’o Kay Rala Xanana Gusmão (Xanana) intrega fila fali nia medalha Veteranu ba Presidente da Republica. Tuir Autor nia analiza katak ne’e laos ona sobre prosesu dinamika profesionalidade instituisaun F-FDTL maibe halai liu ona ba dinamika no situasaun politika ba elisaun 2017.
  
Wainhira acompanha dezenvolvimento politika iha rai laran, buat barak ita bele hatene no buat barak mak ita sidauk bele hatene. La kleur tan Partidos hotu-hotu sei halo sira nia congreso nasional atu hasoru elisaun nasional Parlamentar 2017 tuir sira nia estatuta partidos nia. Agora, em geral durante tinan 15 povu hare’e ona katak sidauk iha mudansa signifikante iha partidos nia laran husi Partido bo’ot to’o ki’ik liuliu sira nebe agora iha asentu iha Parlamento Nasional. Barak mak sei depende liu ba liderensa veteranos tuan nebe sai mos hanesan fas parte abiente politika nasional iha Timor-Leste. Politika nasional sidauk bele hamarik lolos sem figura veteranos tamba situasaun politika iha partido sei persiza sira henesan figura unidade no estabilidade iha partidos no bele mos ba nivel nasional. Maibe figura sira hanesane hamarik kleur ou kaer poder kleur liu iha palco politika nasional bele mos sai obstaclo ba dezenvolvimento politika iha rai laran nebe persiza iha dinamika estafeta iha prosesu lideransa.
  
Neneik ou lalais partidos nebe iha asentu iha Parlamento Nasional sei halo sira nia congreso nasional. Ida-ida sei  tenta atu muda sira nia statuta no lideransa tuir sira nia nesecidade maibe balun sei kuidadu tebes nebe sai causa atu mantein nafatin sira nia lideransa tuan “ status quo”. Situasaun ne’e sai intersante tebes wainhira ita hare’e didiak FRETILIN no CNRT, sira bele sai belun bo’ot maibe sira sei hadau malu votus atu hetan poder. Ema barak sei acompanha mudansa politika iha partidos nia laran liuliu FRETILIN ho CNRT e sira rasik sei hateke malu, se’e los mak sei halo uluk mudansa iha lideransa maximu iha estrutura partido hanesan Presidente no Secretario Geral? Tuir pisikolozia politika, Partido rua ne’e sei hateke malu, se’e los mak sei halo congreso nasional uluk e se’e los mak sei sai sira nia Presidente no Secretario Geral. Senario ne’e bele sai oinseluk wainhira Presidante ou Secretario Geral atual favorese ou prepara ona ema atu troka sira nia fatin.
  
Mudansa iha estatuta partido sai ona hanesan prosesu normal maibe mudansa lideransa mak sidauk normal iha situasaun atual iha Timor-Leste. Dinamika politika sei izizi Partidos bo’ot ne’e atu halo congreso no halo mudansa maibe se’e los mak halo congreso no mudansa uluk ba sira nia lideransa nasional hanesan Presidente no Secretario Geral? Karik FRETILIN halo uluk depois iha mudansa lideransa ba Presidente no Secretario Geral, sera que CNRT halo mos mudansa, liuliu troka Xanana husi Presidente, Sera que mudansa ne’e la hafaraku partidos rua ne?

 Wainhira ita liga ba pergunta iha leten, tambasa Lere sai husi F-FDTL sai polimika bo’ot, ema balun hakarak no ema balun lakohi? Sera que Lere sai figura foun no diak ba Partido ida atu hasoru elisaun 2017 ou tamba estabilidade nasional? Agora, Wainhira ita liga ba situsaun politika nasional liuliu elisaun 2017 mak iha buat balun importante tebes atu bele analiza. Tambasa CNRT izizi lakohi Lere reforma ona husi nia cargo general, karik CNRT lakohi wainhira Lere sai, nia sei tama no haforca Partido FRETILIN ou CNRT buka hela meius atu convinse Lere atu tama CNRT? Situasaun ne’e sai intersante tebes wainhira FRETILIN sai nonok ituan sobre asuntu ne’e, karik FRETELIN sidauk prontu atu simu Lere maski Lere informa ona iha jornal katak loron ruma nia sei fila ba FRETILIN? Ita hatene katak karik Lere mak tama ba FRETILIN sai vantazen bo’ot ba FRETILIN tamba kuaze partido hotu hotu hanesan iha crize lideransa e Lere sai hanesan figura foun ho nia esperensia durante lidera instituisaun F-FDTL no figura veteran bo’ot ida.

Husi sorin seluk, karik Taur Matan Rua (Taur) mak hari’i Partido duni sai hanesan presidente partidu, politikamente nia sei la haruka Lere sai husi F-FDTL tamba Lere bele sai obstaco ida ba nia partido wainhira Lere tama duni FRETILIN. Karik Taur hakarak duni Lere reforma ona para halo duni revitalizasaun iha instituisaun F-FDTL. Pensamento Taur hanesan Chefe Estado kadabes ita bele compriende nia lalaok maibe hanesan Taur Pesoal karik ita sidauk hatene lolos. Politikamente se’e lolos mak hetan liu vantagen bo’ot liu wainhira Lere sai husi instituisaun F-FDTL, karik Lere sai sei afeta ba stabilidade nasional? Lere rasik informa ona katak sei la iha problema no instabilidade. Karik balun lakohi Lere sai, sira mak sai fator instabilidade tamba Lere bele sai ameasa ba sira nia partido ou grupo balun? Sorin seluk, saida mak sei akontese wainhira Lere la reforma husi F-FDTL e se’e mak hetan vantazen politika bo’ot liu?

Wainhira Lere la-sai husi F-FDTL mak politikamente CNRT sei sente manan tamba sira nia esforsu politika hetan suksesu e Lere la konsege ba FRETILIN. Sorin seluk sei iha posibilidade bo’ot sei la-iha mudansa signifikante ba lideransa Partido rua ne’e: FRETILIN ho CNRT. Karik sira halo mudansa ba sira nia lideransa atual sem Lere maka politikamente sei iha obstaclo ituan ba sira iha elisaun 2017 karik Taur hamarik iha nia Partido foun. Karik iha duni mudansa lideransa foun iha Partido FRETILIN no Partido CNRT, sera que sira bele hasoru Taur hanesan Presidente partido foun? Politikamente FRETILIN ho CNRT iha posibilidade atu halo koligasaun atraves husi sira nia lideransa atual, situsaun ne’e sei haforsa liu husi Taur nia ataka politika ba lideransa nain rua Mari ho Xanana tanto sira nia membrus partido barak mos sei laran todan atu husik sira nain rua tuun. Situasaun ne’e bele causa para sira nain rua bele nafatin iha lider masimu partido nia. So sira rua mak iha forca politica atu hasoru Taur  wainhira Taur hamarik iha Partido foun em termus lideransa veteranus. Maibe buat hotu depende mos ba lider nain rua nia desisaun atu mantain nafatin iha lideransa maximu partidu nia. 

Agora, pergunta ida partido FRETILIN sem Mari no CNRT sem Xanana saida mak sei akontese?  Realidade hatudu katak sira bele sai husi lideransa Partido maibe sira sei iha influenza bo’ot ba partidu rua ne’e maibe lideransa partido ba elisaun 2017 sei determinante tebes atu hasuru husi partido seluk liliu karik iha Partidu foun husi Taur. Tamba sentido de estado Partido FRETILIN no CNRT hamutuk ona atu tau interese nasional hanesan preoridade Partido nia maibe sera que sentido ne’e sei lori nafatin ba hasoru elisaun 2017?  Sera que sira sei halo koligasaun antes elisaun ou depois de elisaun 2017 para manan elisaun ou atu hasoru Partido Taur nia? Presidente Taur nia descursu iha Parlamento Nasional sei halo lider nain rua husi FRETILIN ho CNRT sei hamutuk durante elisaun 2017. Maibe se’e mak sei manan ka lae ita sidauk hatene tamba ida depende ba povu maioria mak vota no deside hanesan juise tribunal elisaun.
  
Ita hotu hatene katak povu agora komesa matenek ona sobre lalaok dezenvolvimento no hatene ona kurize kompartamento instituisaun estados nia. Purtanto, Partido nebe iha asento iha parlamento persiza servisu makas atu hetan konfiansa nafatin husi povu, se’e lae sei iha dejafiu bo’ot ba partido sira atu hetan votus hanesan sira hetan iha elisaun 2012. Povu sempre laran metin ba sira nebe halo promesas iha campanha no promesa halo tuir atu muda povu husi kiak no mukit. Ikus liu, espera katak kazu Lere nia labele sai jogos politika maibe sai interese nasional liu husi dinamika profesionalidade instituisaun F-FDTL. Mai ita hotu hein desicao husi tribunal no depende ba Lere atu hakarak kontinua ga lae tamba parte ida mos sai direitu fundamental ba Lere. Desicao Tribunal sai laos ema ida mak manan maibe atu hametin lei e orden tuir constituisaun nebe povu mak sei senti manan.

Artigu nee hanesan refleksaun ba dinamika politika iha rai laran e artigu nee la inklina ba grupu ou partido ida. Kontiudu artigu ne’e responsabilidade tomak Autor nia e bom findo de semana. 

Sem comentários:

Enviar um comentário

Nota: só um membro deste blogue pode publicar um comentário.