PD Halo Konsolidasaun iha Munisipio Bobonaro no Vikeke

PD Halo Konsolidasaun iha Munisipio 
Bobonaro no Vikeke

Tomada de Posse iha Balibo (17/01/2016)

Partido Democratico (PD), halo konsolidasaun ba estrutura partido nian iha Baze. Iha konsolidasaun hatudu PD metin no buras ba bebeik.

Atu fasilita konsolidasaun, partido husi jerasaun foun sira nian, PD forma ona ekipa 6 hodi halo konsolidasaun iha Posto Administrativo sira.

Konsolidasaun PD nian hahuu uluk husi Munisipiu Bobonaro. Konsolidasaun iha Postu Administrativu Balibo halo iha loron 17 fulan Janeiro tinan 2016. Membro PD sira husi suku 6  mak partisipa iha konsolidasaun.

Iha konsolidasaun, Buras Martins, Vise Presidente PD nian ne’e, apela ba membru PD sira atu hametin liu tan espirito militansia PD nian. Buras mos explica ba membru PD sira kona-ba istoria badak PD nian nebe mai husi membru organizasaun rezistensia oioin. Nia mos realsa papel saudozu Prezidente La Sama nian nudar Presidente PN, no Presidente Republica Interino, konsegue rezolve krize politika iha tinan rua nian laran, maski internasionais sira prevê rezolusaun krise ne’e bele lori too tina 30.

Tuir Buras, PD sei servisu makas liu tan hodi serbi povu no nasaun hanesan La Sama hatudu hela, mate iha misaun serbisu laran, mate ho forma seluk ida husi exemplo Presidente Nicolau Lobato.

Enkuantu Nino Pereira, Sekretariu-Jeral Munisipiu Dili nian, hateten katak, Gastão de Sousa, nebe hanesan Ministro Obras Publikas, konsege halo estrada barak ho kualidade diak. Nia mos hateten PNDS ne’e ideia mai husi membro PD nian nebe ikus mai ezekuta husi Samuel Mendonça, Vise Sekretariu Jeral nebe nudar Sekretariu Estadu ba Administrasaun Estatal.

Iha Postu Administrativu Maliana, Presidente CPN, Antonio da Conceicao, nebe mos halao hela knar hanesan Ministro do Estado Kordenador Asuntus Sosiais, fo tomada de posse ba estrutura foun partidu nian hosi suku 7. Membro PD sira mosu iha konsolidasaun serka de atus hitu.

Iha konsolidasaun, Antonio da Conceicao, husu ba militante PD sira atu servisu makas liu tan hodi reforsa partidu iha baze no reforsa governu hodi servi povu. Presidente CPN PD nee mos esplika katak, bainhira Presidente PD La Sama mate, ema balu hanoin katak PD mos mate. Maibe, saida mak akontese oin seluk fali, tanba PD buras makas liu tan. Iha fatin-fatin, ema nadodon tama PD. “La Sama nia mate halo buras liu tan PD iha baze,” haktuir Antonio.

Iha postu administrativu Bobonaro, estrutura sentral partidu fo tomada de posse ba estrutura hosi suku 5. Iha suku 13 mak iha tempu badak sei simu tomada de posse. Iha momentu tomada de posse ne’e, Presidente Partido Democratico, Adriano do Nascimento louva tebes militante PD hosi postu administrativu Bobonaro, tanba sira nia kontribuisaun ba haboot PD iha baze. Presidente Adriano fo ezemplu hanesan suku Malilait, maske iha eleisaun 2012, estrutura PD nian laiha neba, maibe sira konsegue sai segundu lugar iha eleisaun neba.

Iha biban hanesan, Julio Meta Mali, nebe hanesan Vice Presidente CPN, reafirma fila fali PD nia ezistensia. Tuir, Meta Mali, PD iha nia historia sempre sai alternativu ba determina politika nasaun nian. Iha 2007 no 2012, PD mak determina formasaun governu. Se laiha PD, Xanana labele sai PM. Ho kadeira PD nian mak CNRT konsegue forma Governu.

Maibe tuir Meta Mali, problema mosu, tamba konspirasaun maun boot sira. Iha 2015, tanba konspirasaun maun boot sira, hodi viola akordu partidu tolu nian ba formasaun governu hodi sai runga ranga hanesan agora nee. Tuir Meta Mali mos, tanba konspirasaun maun boot sira nee, maka bele sosa aviaun liu hosi sms ba malu deit, sein liu hosi aprovasaun orsamentu iha Parlamentu Nasional.  Nune mos, tuir Meta Mali, tanba konspirasaun nee mos, maka halo osan montante boot, 217 miloens, ba mout  hotu iha grupu kiik oan ida iha Oecusse hodi halo kiak fali Munisipiu sanulu resin rua sira seluk. Akresenta tan Meta Mali, tuir los, em vez de sosa aviaun, diak liu sosa mak trator hodi destribui ba agrikultor sira, hanesan uluk Sekretario Jeral PD, Assanami, nebe assume kargu hanesan ministru agrikultura, halo iha tempu neba.

Iha Lolotoe, nebe uluk PD manan eleisaun tutuir malu, militante no estrutura PD iha neba, deklara katak, sira sei serbisu maka’as liu tan, hodi halo manan nafatin PD iha eleisaun 2017 mai. “Maibe,  ami husu para PD tenki servisu makas liu tan hodi serbi povu nee, hodi hadia estrada, dada bee mos, ba povu Timor-Leste tomak. La’os, osan ba tau fali deit ba grupu ida iha munisipiu ida,” husu militante PD nian ida nebe foin simu pose.

Nune mos iha Kailako no Atabae, ekipa sira seluk hosi lideransa sentral PD ba halo konsolidasaun ba estrutura PD nian. Lideransa sentral PD agradese ba estrutura iha baze sira nia serbisu makas, no husu atu serbisu makas liu tan hodi konsolida forsa partidu hodi serbi povu, no nasaun ida nee diak liu tan iha futuru.

Husi Bobonaro, PD hakat ba Munispiu Vikeke. Iha loron 30 fulan Janeiro, PD halo konsolidasaun iha Posto Administrativo Lacluta. Iha eleisaun 2012, PD manan iha Posto Administrativo Lacluta. Ho nune’e, aproveita biban konsolidasaun nian ne’e, PD mos fo agradecimento ba membro militante ho simpatizante sira PD nian, nebe serbisu maka’as hodi halo PD manan iha Posto Administrativo ne’e.

Iha Lacluta, Sekretariu Jeral PD, Mariano Asanami Sabino, haktuir katak, ”hanoin kona ba ZEESM ne’e La Sama mak hanoin uluk wainhira sei nudar Prezidente Parlamento Nacional”. Nia afirma katak, ”La Sama nia hakarak ne’e, kria ekilibriu iha dezenvolvimentu iha Timor-Leste atu atrai investimentu externa hodi mai investe iha ita nia rain”, dehan Assanami. Assanami nia afirmasaun ne’e relasiona ho faktu ida katak, Prezidente Parlamento Nacional, Fernando La Sama de Araujo nmak husu atu harii ZEESM iha Timor-Leste, liu husi karta ne’ebe nia hakerek ba Presidente Fundasaun Lusitania ba Desenvolvimentu, iha loron 25 fulan Abril tinan 2011.

Iha fatin hanesan, Presidente Partido Democratico (PD), Adriano do Nascimento, hateten katak, ”PD la aceita ho Orsamento Jeral Estado (OJE) tinan 2016 nebe halu ajudikasaun direta sein fronteira ba projetus ZEESM. Tanba ne’e mak PD ninia pozisaun iha debate OJE2016 kontra artigu 7 alinha 4, Lei OJE2016 nian”.

Iha loron hanesan ho konsolidasaun iha Lacluta nian, Ekipa V, PD nian mos halu konsolidasaun iha Posto Administratico Uatucarbau. Iha Uatucarbau, Lurdes Bessa, nebe hanesan Xefe Bancada Partido Democratico nian no Vise Presidente PD nian, realsa katak, PD hakarak harii sosiedade ida demokratiku, justa no aposta maka’as iha justisa social. Nune’e mos PD defende demokrasia, direitos humanos, liberdade, igualdade, fraternidade, solidariedade, toleransia, justisa social, armonia, paz dezenvolvimentu, progresso no estabilidade, hanesan valor sira nebe PD tenki tane aas. Nia husu atu PD mos kaer metin valor sira respeita malu, hadomin malu no kontra tipu violensia ho diskriminasaun hotuhotu.

Deputada husi PD ne’e mos afirma katak Timor-Leste seidauk libertado tanba seidauk iha akordu ho Australia kona-ba fronteira maritim. Timor-Leste tenki hamutuk no luta maka’as hodi bele determina lais fronteira maritime, pozisaun ida nebe PD defende desde uluk kedas. Nia sublinha katak, presiza serbisu maka’as hodi liberta povo husi kiak, husi analfabetismo, husi diskriminasaun politika, ekonomika no social.

Ba Lurdes Bessa, “Harii Nasaun husi Baze” nebe PD kaer hanesan nia lema, ne’e signifika povo mak tenki sai hanesan sentru dezenvolvimento nian. Povo tenki partisipa iha desizaun sira nebe afekta ba sira nia moris, labele impoin deit husi boot sira.

Iha sorin seluk, Lurdes Bessa mos dehan, “Ita hotu triste tanba Companheiro La Sama mate. La Sama nia mate lakon boot ida ba PD no ba Timor”. Maibe nia fo hanoin ba membro PD sira, La Sama nia isin mak mate, maibe ninia hanoin la mate. Nia husu ba estrutura PD nian hotu, atu kontinia La Sama nia hanoin hodi bele kontribui ba konstrusaun estado. Nia hateten, La Sama nia mehi boot ida mak agora hahuu daudauk ho implementasaun ZEESM. Maibe ZEESM ida La Sama hakarak nee, ZEESM ida atu kombate pobreza, laos atu fo han grupu kiik oan ida.

Iha sesaun dialogo nian, membro PD sira iha Uatucarbau husu atu hadia estrada husi Vikeke ba Uatucarbau nebe aat tebes. Hatan ba ida ne’e, Komisariu Gastão Sousa, nebe hola parte iha Ekipa Konsolidasaun iha Uatu-Karbau, hatan katak, tama ona iha plano atu tinan ida ne’e, hadia estrada Vikeke ba Uatucarbau.

Tomada de Posse iha Watucarbau (30/01/2016)

Konsolidasaun iha Posto Administrativo Ossu hala’o iha loron 30 fulan Janeiro tinan 2016. Iha Ossu, Ekipa III, fo tomada de posse ba membro PD hamutuk na'in 12. Iha konsolidasaun iha Posto Administrativo Ossu ne’e, Vise Sekretariu Jeral PD, Mario de Araujo, hateten katak iha 2006, ema dehan PD mak sai autor ba krizi 2006, maibe iha realidade, PD mak rezolve krizi 2006 bainhira saudozu Prezidente PD La Sama, hetan fiar sai Prezidente Republika interino. La Sama konsege konvense petisionariu sira, hodi intrega sira nia kilat hodi submete ba prosesu justisa. Seluk ho ne’e, Mario de Araujo mos hateten katak hafoin  Prezidente La Sama mate, PD forte nafatin, tanba PD fiar ba lideransa kolektivu. Ohin loron, iha lider barak iha PD, ne'ebe mak mai hosi jerasaun foun, nebe prontu atu lidera partidu ne'e, no kontinua Prezidente La Sama nia mehi ba oin, hodi dezenvolve rai ida ne'e.  Nia mos afirma katak PD la depende ba figura ida ou naran ida. Faktus hatudu duni katak, hahu hosi harii, PD iha ona esperensia hodi sai oposizaun iha Parlamentu Nasional nune’e mos hola parte iha governasaun. Ida ne'e hatudu katak, PD preparadu ona atu ukun bainhira hetan fiar hosi povu. Ne'eduni, Vise Sekjer PD ne’e, husu ba militantes PD nian iha Ossu, atu kontinua serbisu maka'as liu-tan hodi haforsa partidu ne'e ba oin.

Iha loron 31 fulan Janeiro tinan 2016, PD mos atu halo konsolidasaun iha Posto Administrativo Vikeke, nebe lidera direitamente husi Adriano do Nascimento, Presidente PD nian,  nebe hanesan Vise Prezidente Parlamento Nasional.

Iha konsolidasaun iha Posto Administrativo Viekeke ne’e, Prezidente PD, Adriano do Nascimento, enkoraja membru PD sira hodi hateten katak, maski “ema iha PD uituan mos ita la’o nafatin ba oin. Uluk iha ai-laran, ema hela uituan deit mos, sira buka no dada malu hodi hamutuk iha nebe to’o ikus konsege lori Timor-Leste ba ukun rasik an. PD mos hanesan ne’e, “embora uituan, maibe ita sei dada malu hodi hamutuk atu alkansa objetivo nebe PD hakarak mak libertasaun povu husi kiak no mukit”.  Iha sorin seluk, Mariano Sabino Assanami, hateten katak PD tenki sai alternativu ba ukun. Neduni nia husu ba joven sira atu mai hametin PD, tanba PD ne’e, forma husi jovem sira nebe mai husi Rezistensia no matenek oan sira. Assanami mos konta istoria uituan hodi hateten katak PD ne’e nia abut mai husi ASDT, FRETILIN, CNRM no CNRT. PD nudar kontinuador hodi harii estado de direitu no demokratiku nebe defende justisa ba ema hotu.

Iha loron hanesan, tuir ajenda, PD mos atu halo konsolidasaun iha Posto Administrativo Uatu-Lari. Maibe lakonsege realiza, tanba membro PD ida, Lucas “Lucky” Vidigal, Xefe Departamento Lojistika Nasional PD nian, hetan atake kardiaku no mate iha Aliambata, fatin atu halu konsolidasaun. Hodi hatudu solidariedade ba Lucky nian mate, PD kansela konsolidasaun iha Uatulari hodi akompaina lori hikas Lucky nian isin mate mai iha Dili.

Maski kansela ona konsolidasaun iha Uatu-Lari, maibe PD kontinua kumpri nia ajenda ida, nebe atu halu vizita ba Uma Restos Martais sira nian, fatin nebe ohin loron hodi halot ruin martires da Patria sira husi Uatu-Lari nian. PD la’os deit ba presta homenajen ba heroi sira ne’e, maibe mos entrega kontribuisaun ba veteranus sira iha Uatu-Lari, hodi sira sosa buat ruma bainhira bali restos mortais husi martires sira nian. Marcos da Cruz, membro Komisaun Estudu Estratejiku no Planeamentu (KEEP) nian no Vise Ministro Agrikultura, no Carlos Saky, membro CPN no Vise Presidente KEEP, nudar Uatu-Lari oan, akompaina Vise Sekretariu Jeral PD, Samuel Mendonça, nebe hanesan mos Sekretariu Estado Estatal, hamutuk ho Benjamim Martins, membro  CPN no KEEP, ho kuadros PD balun husi Munisipiu Vikeke, entrega kontribuisaun ba veteranus sira. Kontribuisaun nebe nudar jestu solidariedade no apoio ba veteranus sira,  entrega direitamente husi Vise sekretariu Jeral PD, Samuel Mendonça, ba administrador Posto Administrativo Uatu-Lari, Tomas Soares da Silva.

Ho konsolidasaun nee hatudu katak PD eziste nafatin iha baze no hetan apresiasaun boot tebes hosi nia militante sira. Nune mos liu hosi konsolidasaun nee hatudu katak PD buras ba bebeik no sai forte liu tan. Viva PD, Hametin Ukun Rasik An, Harii Nasaun Hosi Baze.